اخذت لي كاس شاي , ومخمخت , وبدأ جوالي يرن .. كانت اختي , ومعها بنتها عمرها 6 شهور
وهي برا وتوهقت في بنتها فاضطريت اروح اخذها منها اوديها البيت,

طبعاً كنت اسوق لوحدي , وركبتها وهي من الصغار اللي تتقلب 14 قلبه في الدقيقه حطيتها بجنبي بالمرتبه الاماميه
مادريت الا هي منقلبه ع وجهها وانا اسوق جلست اعدل فيها الى ان نامت ع ظهرها , ..

شوي الا وهي منقلبه وصاير وجهها في الباب وجلست اعدل فيها وانا اعدل نسيت اني اسوق
واكلت مطبه محترمه حسيت اني براليات جد علينا مطبات مدري وش تبي , جبل مو مطب
لذلك انا والهليل متفقين ان نسمي حينا حي المطبات , يامطبات ياحفريات , احيانا احس انهم بهالحفريات بيطلعون
يا مويه يا نفط .. من كثر مايحفرون , احس اني شطحت ولا لا بس خلوني افضفض شوي ..

المهم .. نرجع لبنت اختي بعد المطبه شلتها ومسكتها وانا اسوق والف واقول عسى ماتطير ان لفيت من خفها المهم اننا وصلنا بالسلامه ..
بعدها جاني اتصال من احد الاحبه من اقاربي من اللي مغربّين بالغربيه بجده لظروف العمل من سنوات , ,

وبشرني انه بالرياض وحاب اشوفه ونلتقي , المهم اكددت عليه ان الوعد باذن الله بالبيت حتى نتسحر سوا بس رفض واصر علي
انه مايبغى رسميات , ووده لو يكون باسترحه او شي ..
فقلت مافيه مشاكل .. تواعدت انا وياه بالاسترحه .. واول ماوصل ورحبت فيه اول شي قاله وش هالجو عليكم

قلت الله واكبر جاي من النمسا وانا مادري المهم الولد باين انه صار جداوي وصار يكره نجد ماعلينا
الاهم اننا جلسنا وبدينا نسال عن الحال والاحوال ..

واجتمعوا الشباب طبعاً بدأ يقنعني بالعمل معه بجده وبدأ يغريني بجمال الجو وطيبة اهلها
وسهولة العمل وراحة البال فيها , واغراني بقربها مكه والحقيقه اني بديت اقتنع ..
شو ودخل معانا بالخط واحد من الموظفين بالشرقيه

بعدها رحت البيت وجلست ع النت الى ان بدأ النوم يتغليل في دمجتي ..

المهم حلق , وبعدها رحت انا وخويي نتقضى , تصدقون اخذ كل مقاضيه بخلال ساعه ونص بالكثير ..
ولكن تخيلوا ياشباب وضع البنات , يبي لها اقل شي اسبوعين عشان تخلص اغراضها لا ولو تعطيها
وجه ماعندها مشكله تجلس اكثر ,
الغريب انه احيانا يكون الشهر كامل ,

وهـا نحن وصلنا الى مسك الختام في سلسله (يوميات رمضانية 1430 هـ)
اسال الله ان تكن حازت على اعجابكم
فـ ماكان من صواب فمن الله وحده وماكان من خطأ من نفسي والشيطان
كل الشكر لـ كل من شاركنا في هذه اليوميات
وكل الشكر لكم انتم على تفاعلكم

و اللهم أجبر كسرَ قلوبنا على فراق شهرنا يارب العالمين..
اللهم اجعل هذا الشهر شاهداً لنا ، وحجة لنا لا حجة علينا..
اللهم إن كان في سابق علمك أن تجمعنا في مثله فأحسن عملنا فيه..
وإن قضيت بقطع آجالنا فأحسن الخلافة على باقينا..
وأوسع الرحمة على ماضينا..

(صوتين مدموجه اسمعوه كله )

أرق التحايا وأطيبها من
مشرفي واستشاري
المجلس العام