(( يوميات رمضانية " 11 " )) : المتألق ( leo messi )" كتبت انا اليوميّـه في حزة العصريّـه وارسلتها فوريّـه بضغطةٍ سحريّـه ...!!
  فكرة - سندريلا الهلال اعداد ومتابعة - الهنوووف تصميم - عسيريه  لنا من كل عام شهر فضيل ..
أعاده الله علينا وعليكم وجميع المسلمين بالخير واليمن والبركات
وكل عام وانتم بخير
**][يوميات رمضانية 1430 هـ ♥][ **
لقد عدنا اليكم .. تحملنا الاشواق للقياكم .. ونسعد ان نعيش معكم .
. في سلسلة تحمل بين طياتها يوميات الأعضاء الرمضانية من كل عام ،
هذه السلسلة أنتم أهل بيتها ونحن ضيوفا في حضرتكم ،،،
+
+.........+
+
أهلا وسهلا بكم أحبتنا ..
ودعونا نرحب سوية بالمضيف "الحادي عشر"
العضو المتألق "leo messi ."
لكي يحكي لنا احداث يومه مع شهر رمضان المبارك ..
السلام عليكم ورحمة الله وبركاته ..... كل عام وانتم بخير ...! طووووط عند الاشارة تكون الساعه الحادية عشرمساءً وتسع وخمسون دقيقه وتسع وخمسون ثانيه في هاللحظات بدأ يومي وانا جاثم على مقود سيارتي ( في راس كبري الخليج  ) وعينك ماتشوف الا السيارات والعالم شربكة بواري وراي وقدامي..! كل واحد يبي يلفت انتباهي عشان اطلّعه باليوميات حقتي  << تعرفون ربعنا يبون يشتهرون بأسرع الطرق  المهم اني ماطقيت لهم خبر واغلبهم مشوا بقى راعي عراوي ماغير يحدحدني على الصبّــات وانا اللي انزّل القزاز واشب فيه واهدّده .. يا**** لو ماتوخّر من طريقي والله لا ابطّـل انزل يومياتي ترا المهم انها قفلت معه واشوفه يناظر فيني بحقد ثم قال كلمة وهو ماشي << كل ذا بسبّة هاليومية وعشان تعرفون اهميتي بس مالكم بالطويله والخريط اللي فوق .. المهم دق علي واحد من العيال وقال تعال البيت فيه واحدنصراوي نبي نكفر به قبل السحور المهم رحت عنده وتكيت لين الساعه 2وثلث تقريباً وماودي اسرد لكم اللي صار هناك من هوشه مع خوينا النصراوي خوفي ادخل من بكره والقى الموقع محجوب المهم رجعت البيت وتسحرت وطقيتها حنك مع اخوي عبدالله  << اجل مع عبدالله لين بعد صلاة الفجر وغطيتها نومه طبعا قمت الساعه 9 ونص حالتي حاله وعيوني حمر ومتنفخه كنها عيون ضفدع عاد أنا متعود بالايام قبل رمضان اول مااقوم الصبح لزوم اشرب كأس والا كاسين مويا بارده اشربهم قبل حتى اغسل وجهي لذلك تحصلني اقوم ( خرمان مويا ) مدري هي عادةً زينه والا شينه . .. المهم طلعت الدوام .. وانا داخل للمكتب الا واشوف ذا الفلبيني الغثه  يعآطس عند باب المكتب يحترينا .. يالله صباح خير فلبيني ويعطس .. وعلى هالصبح صاير وجهه كنه علك ( والله ان اول شيء طرا على بالي انفلونزا الخنازير ) طاااار بعدها النوم اللي براسي المهم ( الفلبيني ذا اقلق والدينا يبي اجازة ) ومدير الشركة ومديرالانتاج بالمصنع يقولون صرفوووه الفترة ذي مافيه بديل لين بعد رمضان المهم ويدخل ابو فلبن ويتكي عند مكتبي .. ويشرح لي وضعه وانه يبي يسافر لأن ظروفه صعبه وان اجازته مستحقه من 5 شهور وللحين ماراح.. انا تورطّت فيه كل شوي يعطس ( عاد عطسته ) مدري وش تبي ودي اضحك عليها وودي انحاش من المكتب لين يجي مدير شئون الموظفين ونشوف له تصريفه .. المهم قلت ياولد مالك حل الا تخليه يروح يتكّي على الكراسي اللي بأخر المكتب وهناك يعطس على راحته قلت : سيريليو ( هذا اسمه ) ودك العطسه والزكام تروح عنك ؟ ناظرني مايدري وش اقول ( قلت رفيق شف .. يبغا .. هذا .. آآآتت سوووو آآآآتت سووو .. روووح . . قال ايه قلت قم قامت عصبك هناك على هذيك الكراسي لأن المكيف هنا يصك بوجهك فأكيد بتزيد العطسه .. حسيت انه عرف اني خائف لا انعدي المهم انه قام وقال كلمتين مافهمت منهم شيء بس الظاهر انها سبََه ...! المهم بعدها جاء مدير شئون الموظفين وحولنا ابو فلبن للمعقب يتفاهم معه ....! تكيّت بعدها لين بعد صلاة الظهر .. الا والله ويطقني ابو ابو ابو ابو الشوق ( لـ رينـاااد ) ابي اسمع صوتها وهي تصيح وادق على امها قلت وين رنووده ؟؟؟ قالت نايمه .. قلت اجل صحيّها ( واقرصي لي اذنها )عشان تصيح طبعاً تعرفون صوت القطار؟؟ زين اجـل وشسمه ايييه وش كنا نقول عن كبري الخليج << رجاءً لحد يقارنّيببو بدر اللي في باب الحارة عشان مااقلب عليه المهم قعدت لين الساعه 3 تقريبا واطلع البيت لين بعد العصر وكنت ناوي ادقها نوووومه ( لأني كنت مرتّـب اموري بروح الاستراحه اجتماع اعضاء المجلس ) وبكمل اليوميه بعد ماارجع من هناك عشان اكتب لكم وش صار لكن تغير الجدول بعد صدور الامر السامي من الوالد بمرافقتي له لمحافظة الخرج لغرض جلب ناقتين ( خلفات ) مع البزر او البزقه حقهم اللي يقاله حاشي لذلك : كتبت انا اليوميّـه في حزة العصريّـه قُبيل المغربيّـه والبيتزا الشهيّـه والسمبوسه المقليّـه ومعهم بعد خليّـه وارسلتها فوريّـه بضغطةٍ سحريّـه من اصابع ايديّـه المتعصقلاتٍ فيّـه كنهن طرف زوليّـه هذي هي اليوميّـه ياللي تبي اليوميّـه << خل عنك انت وياه كيف السجع بس؟ اعتذر عن التكملة لأني يمكن اتأخر بالخرج ولانيب راجع الا بعد السحور وشييينه بعد ماتعبّت الاستشاريين معي وتحديداً الهنوووف اسحب على اليوميه لين بكره عشان كذا راح تتوقف اليوميه هنا << شكلكم تقولون ازيّــــن ونعد السادة النظـارة العرب بجزء ثاني السنه الجايه ان شاء الله قبل لا انسى ... كلمة شكر ولو انها قليلة بحق الاستشاريين والمشرفين على المجهود الكبير اللي يقومون فيه من اجل المجلس ...! والله يجزاهم عنا كل خير يارب .. وجعلهم ووالديهم للجنه .. ومن يقرأ ..! حبيب الشعب كان هنا .. ودز للخــرج كل الشكر للمتميز **][ "leo messi "♥][ ** وربي يحفظ لك البنوتة  وانتظرونا غداَ مع العضوة المتميزة - وجــدان .-  أرق التحايا وأطيبها من
مشرفي واستشاري
المجلس العام . | 