----
بدوية ضيدان

كما ان الشعار اشتهروا بفخرهم بالبدو وبدواتهم

فلضيدان كذلك نفس هذا التوجه

نترككم مع قصيدة((حنا بدو))

يلي على وجهي قريتي كل صفحات الشقى& أقري و أنا بكتب قصيده و أشعل الساحه حريق
باقي كثر ما راح و اللي راح نصف اللي بقى& و أن ما وصلت لغايتي بموت في نصف الطريق
يا بنت يوم أمطر غلاك بقلب ضيدان و سقى& تدرين وش سبة شقاه و سبة الجرح العميق؟!
شقاه من يمناه و أسم الشيخ و النفس امحقى& و الجرح منك يا أعذب العذبات يالموت الرقيق
يا بنت ما دام البدو تخلف هقاوي من هقى& و أنا بدوي متني يشيل من الزمن ما لا يطيق
ابفخر حنا بدو نعشق على وضح النقا& حنا بدو فينا الولد للقمه العليا عشيق
حنا بدو فينا الولد لو شاف موته ما أتقى& حنا بدو فينا الولد يرقا و لو ماله رفيق
حنا بدو فينا الولد لا من رقا رقا رقا& الين يوصل غايته لوكان في قمة طويق
يا بنت جيتك و الثمن عمري أبي ليلة لقا& يما كذا و الا بلاش من الصداقه والصديق
و ساعة تبسمتي و شفت الجمر والثلج أصدقا& قلت أشهد أن الموت حق و صحت لك صيحة غريق
و أعتقت دمعي و الزعل و الحزن لرضاك أعتقا& و أغفت عيوني في عيونك يا عساها ما تفيق
و آمنت باللي سخرك تقرين صفحات الشقا& و أشعلت بردي في دفاك و شبت الساحه حريق


====
المراد لضيدان مع غيره من الشعراء

كما من فنون الشعر المرد فقد طرق هذا الفن ضيدان

ونترككم
مع (ردية بين الشاعرين / ضيدان بن قضعان وسعد الودعاني)
ضيدان

البارحة يا سعد والعين مسهرها=واغلا القصايد تزاحم في شراييني
شبيت نار القصيد وبت اسامرها= ويممت لك يا سعد والله محييني
وخليت بعض القصايد في دفاترها=ايمان بالله ثم بسمي وتكويني
وغنيت لك من طروقٍ كان ذاخرها=غوالي ما تساق إلا لغاليني
وانا اعرف منين وليه وكيف اعبرها=موهوب فطره ورب البيت مغنيني
والشعر لعبة سحر وعيون ساحرها=احيان تسكن جفوني لين تغويني
واحس نفسي على الدنيا واكابرها=سلطانها اللي عليها الله موليني
مغرور مجنون مدري كيف اصوّرها=الغاية انها تركز في شياطيني
واعوذ بالله يقهرها ويدحرها=ربٍ ليا اغواني الشيطان يهديني
اللي رفع سبع فوق وسبع كوّرها=إن شاء يميتني وإن شاء يحيني
مؤمن وشاعر واجم من البحر وارها=وعلى قصير المدا ما الله بحاديني
اغلي القصيدة وارتبها واطوّرها=والعب بها كنها المسباح فيديني
ما اتعب عليها واكسرها واجبرها=إليا تناوشتها ما هيب تلهيني
وعد القصيدة على اللي ما يقدرها=عيبٍ على اللي يعرفون القوانيني
والسالفة يا سعد مانيب ذاكرها=دام انت فاهم وتسمعني وتوحيني
والناس سرد الحكي ما هوب غاترها=لكن خل السوالف بينك وبيني
وان مرتك صد ما كنك بخابرها=الصمت حكمة يا راع الشين والعيني
والمزنه اللي سقا الصمان ماطرها=ان خلّتها يا سعد لا تلتفت فيني
والساحة اللي تعلو في منابرها=غير السعودي اماراتي وبحريني
العين يا بو مبارك شافت اكثرها=ويا شيب عيني من اللي شلفته عيني
شافت من الناس شعارٍ جواهرها=من غبة اليم تشرا بالملاييني
ناسٍ لو تموت من مفاخرها=قصايدٍ تفتخر فيها الدواويني
وشافت من الناس شعارٍ بمظاهرها=ناسٍ عسى اللي تبلاّها يعافيني
شعّار ما همها إلا اتطلع صوّرها=وقلوبها اكبرمن قلوب البعاريني
تقرا على كل ما شافت مشاعرها=حتى على التايلندي والفلبيني
ناسٍ ما يدرون وين الله حاشرها=ما صاح من صايحٍ هجّوا مغيريني
بلا على الدبك سندها وحدرها=وما قالوا الناس عادوه الوراعيني
قلته وانا غلطتي الا اخطيت ابررها=ما اقول فاتت ما عاد يمديني
وقصيدة ٍ ما تطول وجه شاعرها=ما هيب للي على السكة يباريني
هذا وتسلم من اولها الى آخرها=والسالفة خلها ما بينك وبيني



رد الشاعر سعد الودعاني




قب المعاني متى ما اسرجت ضامرها=في قطع فرجة في خيالي ما تعنيني
بنا ريح يـدك الغيم حافرها=اصايل عسفها ما هوب يشقيني
ضيدان بيّن لي الشاره وشطرها=كنه يقول انتبه بالنقض تخطيني
شب القصايد وفاحت لي مكاسرها=والميت ايغبن وإلا الحي يحييني
نوادرٍ صدر ابو منصور ماكرها=هداتها عن بعض الاشياء تكفيني
خاتم سليمان في يمناه صخرها=وعصاة موسى ما بين ايميني
ما هيب تلهيه وانا ما اجررها=واحب طول المدى والرب مرهيني
مستفعل فاعلٍ فعول لاخرها=ما هيب وزني ولا طرقي وتلحيني
بين اصبعيني اورّدها واصدرها=كنها بلا قاف تتبعني وتمليني
من قلتلةٍ في الخيال ولا يخاشرها=غيري ومن صافي الطفوف ترويني
والشعر فطنة ذكا من ذهن ماهرها=وشرارة ابداع اولعها وتطفيني
حالة تلم التناقض في عناصرها=شعور عفوي وتلقائي وتخميني
احس بالعبقرية في تبخترها=واخش في جو واكره من يحاكيني
آراء مهما اختلفنا ما نكفرها=دام اتفقنا المبادي يا مخاويني
والمزنة اللي سما الصمان باشرها=كني برعادها لاحن يدعيـني
اول مقاديمها يتلا مواخرها=واتلا مواخيرها دينك على ديني
اشوفها وابتعد ما كني اناظرها=وفي صدتي عنك ما يحتاج توصيني
ما شافت العين تدفن في محاجرها=وان مرني اعتبر ما هوب يعنيني
والساحة اللي يفبركها محررها=امدح وتاخذ عباتي يا مواليني
ناسٍ تبيها لا والله تدبرها=بالعرض خشوا معارضة الطراشيني
اوادمٍ تبترم داخل دايرها=في طرح دارج وفي تكرار روتيني
شليلة اشباه ملهيها تكاثرها=تشابهت كنها ملامح الصيني
لا سبك لا حبك لا معنى ينورها=لا شاعرية ولا معهم مضاميني
يا مربحك يا معافي لو يوفرها=والقه في قلب من لايفقه اتهيني
على عماها وبالفاضي تدحدرها=تبداه مسحوب شوي ايلا هو هجيني
هلما جرا وتعلن عن تذمرها=ومن فتل قافك نظرت اللي توريني
لو اذنوا شرق ما والله يفسرها=غير الذي يعرف بين قوسيني
وقصيدة ابياتها ما هيب تشهرها=ما تحمل اسمي ولا خطي وتدويني
وشعرٍ عليه العرب ما تنطل غترها=وياقف شعر روسها له ويش يوزيني
والسالفة لو تشابرنا محاورها=الشين والعين عندك يا مناديني


-----
الوداع ومرارته كمرارته الحنظل,, فقد كتب ضيدان في الوداع

وقال:
فمان الله يا أول من سكن بين الضلوع العوج **عسى دربك سفير و يا عسى الله ما يخليني
توكل لا توادع رح عسى درب الجفا المسهوج **يصادف درب فرقى عقبها ما تلمحك عيني
سمحت من الهوى و من القصيد و من زراق الموج **و رميت أغلى المجاديف الغرام و جيت بيديني
أبغرق في عذابك لا رحلت و يصبح المنتوج **قصيد في حياتي سلوتي و أن مت يرثيني
و اذا هبن بنات الريح للذكرى بدون سروج ** أبسرج مهرة النسيان و أرحل من عناويني
وبنسى لين أسج و برسل الونات فوج فوج **وبنسى دمع عيني ينتثر و أنساك من حيني
صبور ؟ أي و الله اني ما ثنيت العزم قبل أدوج **بريضان الجفا و أظما لوصلك لين تسقيني
شجاع ؟ اي و الله اني ما عرفت الذل قبل أسوج **قدم رجلي على درب لبيت أهلك يوديني
كريم ؟ اي والله اني ما عرفت الشح قبل تروج **دموعي في عيوني ثم أشح بحسرتي فيني
أحبك ؟ حسبي الله ليت مالك في سماي بروج **و لا لك بالبسيطه كود شي بينك وبيني
دخيلك لا تلتفت رح بفالك و أترك المرجوج **تغانم ما بقى لك و لا أنا ما عاد يمديني
فمان الله سق ركبك على درب السنين العوج **و لكن طالبك لا أقفيت عني لا تخليني
**تنويه**
للعلم هذه القصيدة مغناه وغناها حسين العلي وكذلك حمد الطيار