السلام عليكم ورحمة الله ويركاته جميعا

بدون مقدمات .... الموضوع كله عبارة عن مقدمه

رنا وساره ... مع بعض ... رنا طفشانه ووقت الطفش
الواحد يتذكر شغلات كذا بعد فجاة من الزمن !!

رنا تذكرت ان فاتورة جوالها مبلغها مو منطقي وشاكه ان
يكون فيه مشكلة بالنظام حق الاتصالات ... او يمكن انهم
ما حسبو المبلغ اللي دفعته مقدما الشهر الماضي !! قالت
خلني ادق عليهم اشوف ايش السالفه ... مسكت الجوال
دقت 902 ... فتحت السبيكر وبدت تقلب بالقنوات
وتسولف مع ساره يعني لزوم تضييع الوقت لين يردون
طال عمرهم المهم الخط تحول لواحد من موظفين
خدمة العملاء ... الو بسيوني بسيوني كيف اقدر اخدمك !!
هلا اخوي ... لو سمحت فاتورتي مبلغها كبير ما له بالعاده
تجي فاتورتي بهالمبلغ !! ممكن تشوفلي ايش المشكله !!

اهلين اختي شرفتينا باتصالك ... نعتذر منك بس حاليا
عندنا تحديثات بالنظام والظاهر صار فيه غلط ... ان
شاء الله خلال اليومين الجايه كل شي بيكون اوكي !
وبتوصلك رسالة بمبلغ الفاتورة الحقيقي

رنا : طيب اوكي شكرا الله يخليك يعطيك العافيه ...
بسيوني بسيوني : الله يعافيكي شكرا لاتصالك .

لو رجال اللي دق كان قاله وش وراك فلوسك تصرفها
على غير سنع ادفع ما بيضيع عليك شي لو فاتورتك غلط
ينزلك رصيد للفاتوره الجايه

رنا رمت الجوال جنبها وكملت سوالف مع ساره
كويس فيه غلط مو معقوله كل هذا فاتورتي !!

شوي ... طوط طوط ... طوط طوط ... صوت رسالة
هذا مسكت رنا الجوال وفتحته !! لقت رساله من رقم
غريب ... هلا اختي انا بسيوني بسيوني موظف الاتصالات
كلمتك قبل شوي وعجبني صوتك مدري انتي صوتك كويس
والا انا منظف اذني اليوم حبيت اقولك اي خدمه
انا حاضر !!

نفس الموقف من جهة اخرى !! واحد ناشب لبنت
الا غصب يتعرف عليها وهي ساحبه عليه !! ببساطه
يعرف واحد خويه بالاتصالات ... هلا فلان اخبارك
بالله خذ هالاسم وشف لي اذا موجود عندك فيه شرايح باسمه !!

خويه يشيك ... سم يا فلان تفضل هذا رقمها ... خوينا
يتصل عليها ... ينشب وانواع الازعاج ... البنت تغير
رقمها عشانه !! هو ما استفاد شي بس هي خسرت كثير !!

مواقف كثيرة نفس هالنوع بعدة مجالات مختلفه .. سواء
مجال الطيران والحجوزات ... مجال التعليم ... وغيرها
الكثير ... كلها بالنهاية توصلنا لنقطه وحده !!

ليش الموظف ما صار يحترم شرف المهنة ... والسلطة
اللي اعطيت له ... وخلته يكون بمكان اكثر شي يحتاجه فيه
هو انه يكون قد الثقة اللي اعطيت له !!

غير كذا فيه مواقف باماكن معينه مثل المناصب اللي
تكون فيها مسؤولية مراقبه ومتابعه عبر الكاميرات مثلا !!
لـ الاسف يكون خلفها اشخاص ما هم اهل للثقه .. الكارثه
تصير مو انه يشوف شغلات خاصه صارت !! هذي
لقافه وتعدي على خصوصيات هو يتحمل ذنبها لحاله!!
لكن الكارثه ان وراها ناس غالبا ينشرون التصوير هذا
يعنا حبا للفضايح والاكشن ونشر الموضوع لـ عامة الشعب !
خصوضا ان احصائيات Google مؤخرا .. نتائجها
تقول ان السعودية هي في الصدارة وبتفوق في استخدام كلمة "فضيحه" خلال البحث كـ كلمة استدلالية

من الشغلات الغبيه بالحياه ان يعطى اشخاص مثل هؤلاء
سلطه او وظيفه معينه وهم ما يستحقونها !! وهالشي بكل
مكان موجود ... اشخاص لـ الاسف معهم سلطه وصلاحيات
بس ما يستخدمونها بطريقة صحيحه ... ويستغلونها في
مواقف ابعد ما تكون عن العدل او الاخلاق او الشرف !!

ما ذكر اعلاه هو قصة حقيقيه من مجموعة قصص حصلت مع
ناس اعرفهم شخصيا ... او نقلت لي من ناس ثقة ... لكن ما حبيت
اذكر كل المواقف يعني حتى يكون فيه تنوع مو كل شي من عندي !!

ما ودي اطول بالحكي لان البعض ما يحب المواضيع
الطويله + احاول اختصر عشان البعض ما يتهمني
اني اخذ منشطات

المايك لكم

ما فيه شي بس هالفيس احسه مظلوم ما نستخدمه
حبيت اسويله دعاية واشوف شكله شلون يطلع
طبعا كلامي هذا يستثنى منه بعض الناس لان اشوفهم
دايما يستخدمونه

سي يو