لبا عيونك ي الغلا ليه تبكين!؟... وش فيك كنك صايرة مستهمة ؟
قالت يا خالد اسمع السالفة زين... اسمع كلامي وهرجتك في متمه
وش حيلة الي ميتة بين نارين...كني أشوف الموت وأروح يمه
لا عادك الله يا مسى يوم الأثنين...هو ناقص المهموم تزيد همه !؟
تدرين وش سوى بي الليل تدرين ؟ .. كني يتيمٍ توها ماتت أمه !
قالوا ترى أهل المحبة مجانين .. وقالوا ترى طب الغلا فيه سمه
وقالوا مصيره يتركك لو بعد حين .. جمع بقايا شتات حبك ولمه
اذكر زمان اقول يا حي ذا العين ... يلي بنظر خالد أغلى من أمه
في جرة أقدامك ورود ورياحين ... حتى الزهر يبي عبيرك يشمه
وفي نظرتك تُكتب لعينك دواوين ... ويكتب على صفحة قصيدك(مُهمة)
أستغفر الله لو بقول انك الزين ... لأن المدح في حق مثلك مذمة !
ودي أعيش بوسط قلبك حياتين ... وودي أنام بجفن عينك واضمه
وأبقى على عهد الوفا لك وتبقين ... أغلى من عيون المعنى ودمه
يا هيه يا وين الوناسة وأنا وين ! ... الحب ما يرحم ولا فيه ذمه
وهذي نهاية سالفة اربع سنين ... لا أقفى الحزن , عود لقلبي وخمه
