نادي الهلال السعودي - شبكة الزعيم - الموقع الرسمي - مشاهدة مشاركة بصفحة مستقلة - ✰¤¶` العضو المتميز مواصل من عام 1413هـ ( ضيف المجلس العام )`¶¤✰

Hictar · #66 24/07/2009, 02:50 PM

رائدة الزعيم
ترا مقلب هالشيعي - أبسط المقالب
وإلا لو بكتب وش يسوي - بنصك بإيقاف نهائي

بنت عبدالعزيز

- كم مره تتروش في الاسبوع ؟
وإنتي هذا اللي هامتس

أعرف ليه تسألين هالسؤال - لأني عشت نفس شعورك الحالي من الوسوسه

والحمد لله إفتكيت من هالعقدة من وقت قريب.
كنت أول ما أصحى آخذ دش وأروح الدوام.
أرجع من الدوام آخذ دش.
بالليل آخذ دش

وخلال كل هالدشوش - لو بروح لأيه مشوار أخذت دش

أعرف شعور الموسوسين - فالله يعينك على نفسك
بس الحمد خفيت عن هالوسوسه إلى مرتين باليوم.

- لك يوزر ثاني معروف في الزعيم غير هذا وخاصه قبل لا تستخدم هذا اليوزر ؟!
لا ، ماليش.
فيه عضو - عطاني يوزره أستخدمه بأيه وقت
وإستخدمته بوقت إيقافي - بس ماش
ما أحس إنه أنا

وهذا اللي مخليني متردد أغير إسم اليوزر!!.

الهلباني

كيف الشخص يكسب قاعده جماهريه بالمنتديات الكبيرة ؟ ( مثلك ماشاء الله )
مع العلم ان المواضيع المطروحه من قبلك قليله جدا , مقارنه بانتسابك للشبكة عام 2006هل نقدر نقول انو العلاقات الخارجيه لها عامل ؟؟
تصدق عاد - إنت وكثير دائما يردد علي كلمه ( صاحب شعبيه ).
بالنسبة لي ما أشوف هالأمر - وإنتوا تشوفون شئ وأنا ما أشوفه لسبب :
المسأله قائمه على الإحترام.
فإنت إذا تبي الناس تحترمك فعليك إنك تحترمهم - وإذا بتسئ لأحد منهم أكيد ما راح يحترمك.
والإحترام أساس تعامل الإنسان بالحياة ، حتى بالزواج.
صحيح أنا ( بعض الأوقات أزودها ثلاث حبات ) - لكن ما يعني هذا إني ما أحترم الشخص ، فيكون الإختلاف بوجهات النظر فقط.
أما بخصوص العلاقات الخارجية فلها دور - لكني أعتبره دور بسيط جداً ، وما يتعدى ( قهوة وشاهي وسواليف وعشاء )
إلا لشخص مثل ما ذكرت سابقاً من نوعيه ( جعل المنتدى بيته الثاني ) هذا يهمه أكثر من قهوة وشاهي وعشاء وسواليف!!.
أما بخصوص كيف تنشئ قاعدة جماهيريه ( على قولتك )

فما أدري!!.
فأنت تلاحظ لما تدخل أيه مجلس رجال - بتلاحظ الإختلاف بينهم.
واحد ساكت - وإثنين يتهامسون لحد ما تشوف واحد من هالمجموعة ( يلعلع بصوته )

يناقش بالرياضه - سياسة - تاريخ - دين . ( سواء كان يبربس بكلامه أو لا )
لكن هالرجال اللي ساكت ما تظن بفكره وده يكون مثل هالرجال اللي ( يلعلع ).
هي ميزه الله يحطها بالإنسان ما يقدر هالرجال الساكت يوصل لشخصية هالرجال ( الملعلع ) إلا بعد مراحل ، ويمكن ما يقدر يوصل إلى هالمرحلة لأنها تتطلب قراءه وإستيعاب - تحليل وإستنتاج ما يقرأ - رسوخ المعلومة بالعقل - قوة الذاكرة.
وبنفس الوقت ( هالرجال الساكت ) عنده ميزه تخصه ( الله سبحانه وتعالى ) أعطاها إياه - هالرجال الملعلع ما يقدر عليها!!.
أتمنى إن الفكرة وصلت

دبل كيك

سـؤاالـي .. مـن عـاام 1413 هـ وانـت مـوااصـل .. مـاا فـكـرت تـحـتـفـل عـاام 1433 بـمـضـي 20 عـاامـاا وانـت سـهـراان ؟؟!!

وكـيـف قـدرت تـوفـق بـيـن الـتـبـطـح والـتـسـدح والـتـي تـعـتـبـر فـي مـقـدمـة اهـتـمـاامـااتـك مـع الـسـهـر ؟؟ وعـقـبـاال الـيـوبـيـل الـفـضـي والـذهـبـي والـمـااسـي ...!!
الله يعينا على طاعته
فليه أحتفل بعد ثلاث سنوات - إذا اليوبيل الفضي بعدها بخمس

فأخليها مره وحده ( لتقليل التكاليف )

خبرك ألحين لو بتعزم ( يبي لك راتب شهر )

أما بخصوص السهر :
لو بتشوف الأعضاء كيف يستغربون إذا جت الساعه 1 ما نمت

صحيح أنا بعز شبابي - لكن بمواصفات شايب.
أرقد من 11:15 وإذا مره تأخرت وصلت إلى 12 ومن صباح الله خير وأنا مرتز ( إربعاء - خميس - جمعه - في إجازة - مداوم ) نفس النظام

ما أحب السهر أبداً - وأقدس جلسات الصباح
هدوء - نسكافيه على يمينك
وعلى شويه زقزقه عصافير
هنا أحس إني ملكت الدنيا وما فيها

فلا يغرك ( اليوزر )
أنا إنسان ( نوام ) وخصوصاً الفترة الأخيرة - ما أدري وش اللي قلب حالي ( عين وما صلت على النبي )

مـن هـو الـكـااتـب الـذي يـشـدك حـرفـه .. ؟؟
إنت تراك ما حددت

1- إن كان كتّاب منتديات - فصار لي سنتين وأنا مسنتر هنا ( وطارق - بالطليعة بلا منافس ).
2- أما كتّاب صحفيين : فالدكتور مطلق سعود المطيري ( الكاتب بجريدة الرياض )
جد أتعجب من هالرجل ( ما شاء الله تبارك الله )
أسلوبه عجيب :
دائما يربط الماضي بالحاضر - حتى لو عاد بالماضي للحكم الروماني.
أسلوب سلس - مبسط - يحاول يوصل المعلومة أو الفكرة بأبسط طريقة ( هذا إن كان القارئ ذهين )
لأنه يتميز بميزه ( جعل القارئ هو من يستنتج الفكرة أو المعلومة )!!.
3- أما إن كنت تقصد أني أتبع كاتب معين وأبحث عن كتبه ( فلا يوجد ).

كـيـف كـاانـت بـداايـااتـك فـي عـاالـم الانـتـرنـت ؟؟
كغالبية الشعب السعودي ( بالشات )

ما أدري وش هي أسباب إفتتاحية الشباب للشات ببداية دخوله للإنترنت!!.
أتوقع لسببين:
1- المتعارف عليه عند الجميع ( ترا فيه بنات )

2- إن المستخدم ينتظر ( أحد يرد الصوت ) - بمعنى إن المستخدم دخل الإنترنت وما يدري وش يسوي ( فيدخل يسأل ) وينتظر أحد يجاوبه.
صحيح إن بدايتي كانت خطأ ، لكني أعترف إن الشات أفادني كثير.
1- بتعلم برامج
2- عدم إعطاء الثقة للشخص المقابل!!.
3- أنه عالم إفتراضي فقط.
أما عن التفاصيل : فسأذكرها لاحقاً ، لأني على ما أعتقد شفت سؤال عن ذكر التفاصيل

وإذا كنت غلطان - فأبشر برجع أكتب لك الأحداث اللي صارت بالتفصيل الممل

الـقـمـر يـبـدو مـكـتـمـلاً .. ثـم يـتـضـااءل حـتـى يـصـبـح هـلااالااً .. مـااذاا يـمـثـل لـك هـذاا الـمـنـظـر ؟؟
على إنها آيه من آيات عظم خلقه سبحانه وتعالى
إلا أنك تفكر بمراحل النمو في حياة الإنسان :
يقول تعالى ( ( هو الذي خلقكم من تراب ثم من نطفة ثم من علقة ثم يخرجكم طفلا ثم لتبلغوا أشدكم ثم لتكونوا شيوخا ومنكم من يتوفى من قبل ولتبلغوا أجلا مسمى ولعلكم تعقلون ).
كأن بدايه القمر كولادة الطفل.
وإكتماله كبلوغ الإنسان أشده.
وتضائله كالشيخ قد ضعف من بعد قوة.

سبحانك ربي لا إله إلا أنت.