الدوائر الحكوميه : (
لاتتعب حالك وياكثر ماصار ياماكان كان
بعجاله
لي عوده وثلاث سوالف صارت لي مع احدى الدوائر الامنيه ..
وخاصه بالتجوال الميداني
سالفتين مع المرور وامس (الاربعاء) بالثمامه مع الهيئه
وياقلب لاتحزن
----------
مرحبا اخي الكريم
موضوعك متشعب لو اتكلم عن الدوائر الحكوميه ما اخلص
ولا بعد عن الشباب والبنات عز الله قضينا ..
امممممممم
لو بحلف ان كل شخص فينا (كد) مر بتجربه مع الدوائر الحكوميه
ممكن نقول انها نقطه سودا بحياته ((ياكثر النقط عد واغلط))
... ابدردش معاكم وابفتح لكم 
السالفه الاولى/ واحد من الاخويا (باختصار) اخذ مخالفتين سرعه بشهر 1 وشهر 3 العام الماضي حلو ... النظام المروري الجديد اللي تدبل المخالفه بعد 30 يوم صدر بشهر 10 العام الماضي .. يعني المخالفه اللي حصل عليها قبل النظام الربوي الجديد .. المخالفتين سجلن عليه ودخلت بسجله (خويي) بعد النظام الجديد وتحديداً بشهر 12 العام الماضي ودايركت المخالفه تدبلت على طووول اول مادخت بالكمبيوتر ... OK الان بدت المعاناه راح لم هيئه الفصل بالمخالفات بالناصريه ((مافيه غير الناصريه ممكن تتخيل الضغط النفسي بطريق خريص وانت ساكن بشرق الرياض بعز الزحمه )) بعد جلستين صدر القاضي ((اللي بهيئه الفصل)) لصالح خويي والمخالفه تسجل على النظام الاول ... بعدها راح 3مرات ((3جلسات)) عشان يسجل المخالفه على النظام القديم ومعاه صوره من حكم القاضي ... والى هذه اللحظه الجلسات مستمره في هيئه الفصل ... السالفه الثانيه /
لأخوي (باختصار) كان يسولف مع ولد عمتي بالشارع وكانو
واقفين عند ((ميد)) <<< دعايه : )
المهم جاهم سوناتا سري وامرهم بنفسيه مش ولابد ((مثل وجهه )) الرخصه والاستماره
لسياره اخوي وسياره ولد عمتي
وامر ولد عمتي بشيل التظليل + مخالفه ((مظلل كامل ولد عمتي ))
اخوي مظلل زيرو زيرو في كول الابواب والخلفيه فقط امر
اخوي بشييل التظليل ... اخوي قاله التظليله خفيفه والشي
الثاني في كول شركه مو حي الله تظليل
والزم اخوي بشيل التظليل + مخالفه ... رغم مرور السري
السوناتا تظليلته اقوى
من تظليله اخوي ...
المهم
انا استفسرت من رقم 993 بالنسبه للتظليل وقالي مخالفه
التظليل اذا كانت تمنع الرؤيه اكثر من خمسين بالميه غير
مسموح فيها ... قلت حلو انا مظلل ولاتمنع الرؤيه اكثر من 20
بالميه لكن المرور مظلل اقوى من تظليتي ((سياره اخوي)) قالي اذا رجل المرور
اللي ماسك و معاه كراون فكتوريا مسموح
يظلل (( قلت حكم قرقوش .. قلت طيب واذا سوناتا سري ؟؟
قالي سكت شوي قال مادري بس ممكن تروح لهيئه الفصل ..
قلت قضينا حسبي الله عليكم كافي خويي ((تمرمط باسيابكم
و...و... هو بسرعه قاطعني بتهديد بأن المكالمه مسجله
قلت له الشق اكبر من الرقعه .. وسكرت بوجهه
السالفه الثالثه والاخيره/
امس الاربعاء طلعنا حنا والشباب بالثمامه ... نبعد عن ازعاج
وضغط المدينه وعن الاستراحه
المهم وحنا بعز السوالف بعد الشوي والكبسه اللي ترد الروح
(من ايديني ) خويي قالي شف اللي وراك واشوف جيوب
توقعتهم فيه تحدي بينهم وشوف اسرعوا وكأنهم ناصيننا
(متجهين عندنا بسرعه)
وفجأه واحد راح يمين والثاني جاي لمنا بيدعسنا يوم شفته انه
اقبل خلاص ونقوم بسرعه
نروح لسيارتنا ((نور السياره مولع )) ويجيبنا في الله يوقف
لمنا وبكل بساطه يقول وش عندكم
ونشوف واثاريه سياره باترول تبع الهيئه ...احدنا قال ياخي
خوفتنا مو اسلوب قال اشوف انتم سكارى ولا لا ... تكلمت قلت
لو حنا سكارى كان صحينا عقب حركتك
واللي راح يمين جانا من الجهه الثانيه يمين شوف كيف يعني
واحد واقف بوجيهنا وواحد خلفنا عشان مايمدينا نسوي شي
...
الثمامه في بلاوى ما اختلفنا بس بالله هذا اسلوب
حقيقه من الاول كنت اقول الجرايد ظالمه الهيئه بس عقب اللي
شفته ما استبعد منهم اي شي انا عاده احفظ لوحه شي بس
هالمره. للاسف
حسبي الله عليه والله لايسامحه ولايحلله
مادري لو يستخدمون دربيل ليلي اصرف
----------
عقب اللي صار والطاسه عندنا ضايعه ..
بإذن الله بعد البكالوريس
افكر بالقانون عن جد على الاقل الواحد يعرف
اللي له وعليه
\\
//
اسف عل الاطاله وتقريبا طلعت برا موضوعك حييل 
حقيقه كنت ابفتح موضوع جديد ابقول اللي ي خاطري لكن الحمدلله موضوعك مناسب الواحد يقول اللي بحاطره 
