هلا بالغالين ,,,

@ .. هلا بــ سهل 888 ,,,

مساك الله بالنور والسرور ,,,

إقتباس منور المطبخ العام ,, بصراحه أول ما قالوا الشباب نبي نستضيف العوام قلت كنسلوا البوفيه وهاتوا لنا كم ذبيحه هرافى ,, وامحطوا التبسي و2 سفن أب قدام الرجال أصرف

ليتك مخليهم على بوفيتهم , شوفة عينك لاشفنا ذي ولا ذيك , افلسنا منهن كلهن , عموما الرجا في نهاية المقابلة عسى الربع يفطنون ويجيبون لو كيكة

إقتباس وبما أنك سيـّـرت علينا ,, خل نشوف وش عندك

انا انا ما عندي شيء :sad: هم قالو تعال وجيت

إقتباس عندما تكون هناك مباراة مهمه للهلال ماذا تفعل واين تشاهدها ( اوصف المشهد ) هل أنت عصبي أو متعصب للهلال ؟ هل تلعب الكره .. آي مركز لو بتكتب موضوع بالمجلس العام !! أقول لو وش راح تكتب

قبل عشرين سنة او زود شوية ( الله لا يوريك ) انواع الخبصة والتعصب , صدقني في فترة من الفترات واذا كانت المباراة مصيرية ( يعني تؤهل لنهائي ) ما كنت اقعد في البيت , اطلع برا وكل شوي اسأل هاه وش صار , كان الوضع غير عادي وما كانت تفوت مباراة نهائية إلا مسجلها واذا فاز الهلال انواع الاعادات لدرجة ان اهلي قالو هاه نسمع لك المباراة يعني حافظها صممممم ,,,

هالايام وبعد ما تزعم الهلال الاندية صارت ( الحالة ) اخف شوي ,,,

بالنسبة للعب الكرة , نعم كنت امارس لعبة كرة القدم في مركز الوسط ما بين وسط ايمن ومحور وكنت في ذاك الزمن نجم لا يشق له غبرة

بالنسبة لكتابة موضوع في المجلس العام ما اعتقد اني بنجح , ياخي صدقني انا خلقني الله راعي كورة وبس

إقتباس متى بدأت بتشجيع الهلال هل ترى بأن الهلال يدلل الاجانب سيسيه يطلع من الملعب يتدلع ( ماني ماني لاعب هه ) وسيفو بغى يتوطى ببطن المطلق وتراوري يجي من سفر ويلعب بكرا أم ان الامر يتعلق بالمدرب !!

بدأت تشجيع الهلال بعد ميلادي بخمس سنين صدقني هذا اللي حصل

الهلال يدلل كل لاعبية للاسف :sad: سواء اعضاء الشرف او الجمهور ,,,

إقتباس ماهي اوقات دخولك للنت واذا كنت بالعمل كم سرعة اتصالك بالشبكه << الله يخلي لكم ارامكوكم

اللهم لا حسد الاتصال عندنا اسرع من الصوت , والنت عندي شغال عندي مادام اني صاحي ما نمت ,,,

إقتباس عمومآ تقهو وعيـّـن خير ولا ترد الا وانت متعشي

الله يعافيك وليتك معزبنا هنا , كلامك ياخيييي طيب كله عن المهيلة والحايل , ياخي انت نشمي وبس

@@@@@@@@@

@ .. هلا بـــ بالبارق 2000 ,,,

الله يمسيك بالنور ويعافيك ياخي انت ما وحشتكش الشرقية , يعني ماودك ترجع , ترى اذا ودك الواسطة موجودة ندبر امرك

إقتباس مرحبا بك يا ابو سلطان في كَــنــفــات المجلس العام .. <--- عشان يدري إن فيه فرق ..

هع هع هع راحت عليك اخذها ذيبان ومالك الا تدور على غيرها هالكلمة سجلها التاريخ بإسم ابن العم

إقتباس كم نحن سعداء ويغمرنا السرور لمشاهدة أبي سلطان بيننا في المجلس العام ..

وانا كماك , سعيد ومبسوط بوجودي فيذا وبين ظهرانيكم

إقتباس - في البداية عند ذكر اسم ( العوام ) يتبادر إلى ذهن أي شخص (( الاقتباس )) .. والبعض يراه مرتبطاً باسمك ..والكثير وأنا منهم نرى أنك من أصحاب اختراع الإقتباس في عالم المنتديات ..!! من خلال ما سبق أجب عن التالي <---- الاختبارات الأسبوع الجاي 1- هل صحيح أنك تفكر في تشفير الاقتباس بحيث يكون الدفع من اجل الاقتباس ؟!! 2- نريد أن تشرح لنا تطور الاقتباس في العالم العربي بدءاً من بداية المنتديات حتى الآن .!! 3- ماهي الخطط المستقبلية لك في الاقتباسات ..

صحيح يالبارق , ترى انا اول من استخدم الاقتباس في المنتديات الرياضية وكان هالامر في منتدى اسمه ( ملتقى الشبكات ) تراه هالحين انمسح من الوجود , حكاية تشفير الاقتباس ماعاد نقدر عليها , والسبب اني ما سجلت براءة الاختراع في ذاك الوقت , مثل روحت ( كنفاتك )

تطور الاقتباس كان على مراحل , بدايته كانت وضع اقواس وبعدين صرنا نشكل في الالوان يعني نحط المُقتبس لون والرد لون ثاني , وفي الاخير وصلنا الى كود الاقتباس وهذا هو الى يومنا هذا هو السائد ولن يبيد لحاجة الجميع له

إقتباس - أبو سلطان .. بما أنك من أهل الشرقية سكناً وعملاً .. ومن اهل نجد أصلاً ..فأيما تفضل رحلة للبر أم رحلة للبحر .. ولماذا ؟

والله ياخوك حنا مثلك عارف ( ابا عن جد ) ما عنا وعن البر , لكن عقب البيتش حق ارامكو اشوف اننا خربنا وبالصيف صار البحر عندنا هو الحبيب

إقتباس ( طبعا رحلى للبحر صدق ماهيب مثل ذوليك )..

يابن الحلال صادوة واكتشفو وضعه النسيب كفشني في الرياض وبعد ما مشيت منه اتصل على اخته في البيت يبي يسلم عليها وسالفة جرّت السالفة الين قالها توني شايفن ابو سلطان هنا في الرياض , قالت له الرجال رايح للبحر هو ضحك وانا رحت بها , يعني هالحين يبي لنا شغله ثانية غير سالفة البحر

إقتباس - على طاري رحلات البحر .. ما تلاحظ إنك طولت على رحلات البحر ( هالمرة أقصد ذوليك )..

ياخوي انتم اللي ماعاد عزمتونا , يالله شمر عن سواعدك وابشر باللي يعنى لك

إقتباس - من جلس مع أبي سلطان في مجلس واحد يعلم أنه يملك الكثير ، ويعلم كم من الأمور الكثيرة ملم بها .. أقصد غير الرياضية .. فلماذا لا نرى موضوعاً عابراً لأبي سلطان ويكون بعيداً عن الكرة وهمومها ومشاكلها ..؟!!

يابكااااااش , يارجال من عرفت الكورة وانا استدير معها هي محور الحديث دائما , البواقي تراها تجي شطف

إقتباس وفي النهاية لا يسعني إلا أن أشكرك شخصياً على تلبيتك الدعوة فهذا بحد ذاته شرف كبير لنا ، كما أشكر الأخوة في تطوير المجلس العام على جهودهم في هذا الموضوع وفي المواضيع الأخرى ..

يابن الحلال لو تدري وش السالفة كان ما قلت اشكرك بيني وبينك الاتصال من الاخوان كان في وقت متأخر تقريبا الساعة وحدة بالليل , واخوك وراه شغل ويبي يرقد , قالو له هاه قال تم والله المستعان

تحياتي ولي عودة ,,,