نادي الهلال السعودي - شبكة الزعيم - الموقع الرسمي - مشاهدة مشاركة بصفحة مستقلة

الـسـلـطـان · #1 04/07/2009, 06:37 PM

بسم الله الرحمن الرحيم

السلام عليكم ورحمة الله وبركاته

مبروك علينا نحن معشر الطلاب الإجازة الطويلة

وإن شاء الله نستفيد منها , مو مثل الإجازات السابقة

اللي ما أذكر في يوم من الأيام إني جنيت أي فائدة منها

.: بعد ما خلصت من الإختبارات , وتاحت لي الفرصة لدخول النت , ودخلت البريد , طبعا خشيت ولقيت البريد مليان

لأني لي فترة ما فتحته ...

الوضع جدا متأزم

عاد ياريت فيها رسالة تستفيد منها , يا صور ومقاطع ولا من ذي الرسائل اللي مدري وش تبي , وأنا ما تقهرني إلا اللي يرسلك رساله ويقول { أرسل هذه الرساله إلى جميع الأشخاص الذين تعتبرهم أصدقاءك , إذا رسالتك هذه عادت إليك ستعرف بأن حولك الكثير من الأصدقاء الذين يحبونك }

ودي تصير الرسائل بفلوس عشان الناس تفكنا شوي من ذي الرسائل البايخه

ولما بديت أقرأ في الرسائل وخصوصا رسائل القروبات , في بعض الرسائل تجيب الهم , هذا يسب في وزراة الكهرباء , وذا في وزارة المياه , وذا مدرعم ويتكلم عن السياسة , وكل واحد منهم جالس في البيت ولا هو داري وش يصير في البلد ,,,

الحين فيه ناس ما غير جالسة على النت وتسب في فلان وعلان , ولا في يوم كلفت على نفسها تقدم شيء للوطن , أو حتى تتكلم عنه بصورة إيجابيه , يجيك الواحد ويتكلم في ذا القروب ويسب وهو ييحسب إن المتلقين كلهم سعودين , وهو ما يدري إن قاعد يشوه صورة المملكة ,,,

مثال بسيط لبعض الناس اللي تحاول تنقل صورة حسنة لدولتها / في أحد المجموعات البريدية في قروب إسمه " ضوء عمان " , أتوقع كثير منكم شاف موضوعاتهم , المهم إن ذا القروب تقريبا كل إسبوع يرسل رسالة للمجموعه يتكلم فيها عن معلم من معالم عمان , مره يتكلم عن القصر الفلاني , ومره عن أنواع الزهور و الورود , وغيرها الكثير , لكن نحن ما يهمنا رسائله بكثر ما يهمنا تفكيرهم , انا أتوقع إنهم يكتبون ذي المواضيع عشان يجلبون السياح لعمان , فتستفيد الدولة .....

مو حنا الله يخلف علينا , ننتظر أي شيء عشان نتكلم فيه , إنقطعت المويه غثونا بالمواضيع , إنقطعت الكهرباء سووا زحمه , نزلت شركة الكهرباء إعلان تطالب بالترشيد في الكهرباء , ما سلموا من غثاهم . أنا قبل يومين تقريبا قريت موضوع , فيه واحد قاعد ينتقد وزارة الكهرباء , وإنهم كيف يطالبونا بالترشيد !! وحنا دافعين من جيوبنا . وزارة الكهرباء كل اللي قالته رشدوا , يعني بدل ما انت تنام بغرفه وأخوك ينام بغرفة ثانيه وكل واحد مشغل المكيف , ناموا بغرفه وحده على مكيف واحد , منها تستفيد انت بتقليل الفاتورة ومنها تستفيد الشركة بتقليل الضغط عليها , يعني ما يحتاج تغثنا وتغث وزارة الكهرباء .

إذا الواحد ما كان وده يسوي خدمه للوطن ولو قليلة , على الأقل لا يقعد ينشب لهم بالصغيرة والكبيره , يا تسوي خير , او السكوت أحسن بكثير .

وأخيرا أتمنى إني ما أكون ثقلت عليكم

وتحملتوا بربرتي شوي

في أمان الله