بسم الله الرحمن الرحيم

السلام عليكم و رحمة الله و بركاته

مساء الخير يا جماعة المجلس و الزوار الكرام

الحقيقة أنني كنت سأكتب هذا الموضوع منذ أكثر من أسبوع .. لكن في كل مرة أريد كتابة هذا الموضوع أتراجع بحجة أنه لن يفيدني بشيء .. و لكن وجدت نفسي مضطراً لذلك للفضفضة و أسأل الله أن يكون مفيداً بدعواتكم

و بما أنه موضوع للفضفضة فقد يكون مبعثر و لكن الأهم أن يكون واضحاً لأني هنا سأشكي معاناتي و معاناة أكثر من 7000 آلاف شخص قد يزيدون في المستقبل




الله يا حلاة أيام الابتدائي صحيح انها كانت فيها حوادث لكن حلاتها بشقاوتها و برائتها .. كانوا يسموني مهجد ابوعلبة هذي قصة ما يحتاج احكيها لأنها مشوار و فيها مدح للذات مهيب طيبة << القلب للذات

دخلت الإبتدائي و كنت متحمس بدرجة غير طبيعية للدراسة زي أي ورع .. الحمدلله كنت متفوق في السنة الاولى و جميع السنوات .. مهوب من ذكائي الا من هالتعزيز اللي يجي خاصةً الشكليطة



طلعت على المتوسط .. انحدر المستوى شوي لكن الحمدلله عديتها بفضل الله ثم بفضل قرار طلعوه ذيك الفترة اللي هو ان لك مادتين الظاهر تنجح فيها من 30 او 28 .. مش متزكر بالضبط لكن كان قرار حلو



بعدها دخلت الثانوية .. و طبعاً ما كان فيه زي هالحركات اللي في الصورة الا على طاري الصورة أتحداكم كم واحد داق اللطمة فيها

الحمدلله في اولى ثانوي سقطت في 13 مادة و في الفصل الثاني قلصتها لخمس << دافور .. و في الدور الثاني عديتها كلها .. ياااااه بس على الكفاح

خلصت الثانوي و لله الحمد و دخلت مباشرةً في مجال التربية الخاصة .. الحمدلله تخرجت من الجامعة و كان أملي الوحيد هو أن أجد وظيفة تلمني من هالفضاوة اللي اعيشها هالايام [ متخرج من شهر 2 هجري ]

الحمدلله أجريت المقابلة الشخصية و إجتزتها بنجاح .. ثم طلبوا من الخريجين اللي يبون وظائف تعليمية إجراء إختبار [ قياس ]

طبعاً ما فيه مشكلة اللي قبلنا كانوا يسوونها لكن عن طريق وزارة التربية و التعليم و لا كان فيه مشكلة أبداً و كان يدخل فقط للمفاضلة



وزارة التربية و التعليم كانت تجري الاختبار بمسمى [ الكفايات ] و كان فقط للمفاضلة في التعيين و لم يكن فيه رسوب حتى أن بعض اصدقائي اللي اللحين يدرسون في مدن مختلفة كانوا متحصلين على 25 من مية في الاختبار و تم تعيينهم و لله الحمد

و هذا كان المفهوم اللي دخلنا فيه للإختبار .. و على فكرة هالمفهوم ما كان من تأليفنا بل كان موجود في موقع الوزارة

اللي حصل اننا اختبرنا في 21 - 5 .. و تم الإنتهاء من النتائج و إرسالها للوزارة بعد الاختبار بثلاث أيام فقط .. و لكن لم تعلن إلا بعد ثلاثة أسابيع .. و الكلام هذا موثوق من شخص في الوزارة

فجاءة طالبوا أن يجتاز المعلم 50 % من الإختبار .. هنا جت المصيبة .. يعني تجيب أقل من 50 % ما تتعين في حركة غريبة جداً من الوزارة

فـ لو كانوا جالسين على حجتهم الاولى بعدم وجود احتياج كان اهون من القهر اللي نعيشه الآن بحيث اننا ما نتعين الا بعد الاجتياز و على حسب الاحتياج بعد [ على فكرة الاحتياج في تخصصي موجود و لو اجتزتها لتم توظيفي و توظيف الدفعات التي تأتي بعد دفعتي ]

القهر زيادة يا جماعة الخير اني جبت 49 % في الدرجة الكلية .. و يا حليلي كنت مقهور الى ان دريت ان واحد من اخوياي خذا 49.5 % نص درجة بس يا عيال اللذين

ما علينا .. الخطأ منا كمعلمين كيف ما نجيب درجة 50% .. يا شيخ هذولي معلمين المستقبل ما قدروا يجتازون الاختبار [ هذا كلام أقسم بالله انه جاي من مسؤول كبير في الوزارة بعد مقابلته ]

لكن إذا بغونا نجيب درجة حتى تتعدنا الستين و السبعين و الثمانين يبشرون .. لكن بحيث انهم يجيبون أسئلة في التخصص .. تخيلوا يا جماعة الخير ان الأسئلة اللي جتنا و لا سؤال في التخصص .. أقسم بالله العظيم و لا سؤال في التخصص

رحت لمسؤول كبير في الوزارة و قلت له هالكلام .. تخيلوا وش كان الرد و بكل برود [ ما تتوفر أسئلة في تخصصكم في حال توفرها سنختبركم فيها السنة القادمة إن شاءالله ] طيب يا اللي منيب قايل ما فيه لا تختبرونا وتضيعون سنة كاملة من مستقبلنا ممكن تزيد بعد

لا و السنة الجاية فيه كلام انه لازم يجيب طالب التعيين 65 %

شيء خارج و داخل الموضوع .. في الجامعة كان بعض الطلاب يحتجون على أسئلة واحد من الدكاترة .. قال الدكتور ان درجة صدق الإختبار تتحدد بنسبة الدرجات و تفاوتها .. في القياس ما فيه تفاوت .. يا ناجح يا راسب .. و نسبة الرسوب 53 % .. تخيلوا معي 53 % هذي كيف تجي الا و الاختبار فيه مشكلة

و للتوضيح اختبار القياس اللي اختبرناه ما كان بعيد عن اختبار ما بعد الثانوية ان ما كان هو بعد .. في هذاك الاختبار جبت 83 .. و في هذا الاختبار جبت 49 .. هنا وين يكون الخلل ؟!

عموماً هذي فضفضة بسيطة .. إن كانت طويلة اعذرونا والله من القهر اللي نعيشه .. نحاول نضحك و نستانس و ننسى شوي .. لكن لا بد من الفضفضة اللي تريح الصدر شوي

و على فكرة بعد اللحين أي مجال تبي تدخله لازم تختبر القياس و تعديه .. الخوف بكرة لا بغيت تتزوج يطلبون منك اهل الزوجة انك تعدي القياس

و نقطة أخيرة نسيت أكتبها [ الأول على الدفعة بمعدل 4.65 من 5 رسب في الاختبار بدرجة 41 يعني أقل من درجتي و أنا اقل من معدله بأكثر من النص و أحد الأوائل على الدفعة بمعدل 4.15 رسب في الاختبار بدرجة 49 .. يعني زي درجتي بالضبط ] بالله يا شباب وين الخلل علموني

دعواتكم يا شباب بالتوفيق للجميع

في النهاية [ حسبي الله و نعم الوكيل ]