وعليكم السلام ورحمة الله وبركاته
الله يعطيك العافيه جرح 
فكره رائعه تعرفنا فيها على شعراء لم يخدمهم الاعلام 
كنت بتكلم عن سعد بن علوش لكن سبقتني رند 
بس بضيف له قصيده اشوفها افضل قصايده واقربها لي
العبره
الجهل بيني و بينك طايـح سـوره
من مر الأيام صارت عندنا خبـره
ما دام عينك من اللي صار مكسوره
أجمع شموخك و خفف حدة النبـره
لا شفت وجهك ليا غيرته الفـوره
أشوف قلبي ليا من مل من صبـره
يآخر مبالاة قلبـي و اول شعـوره
شفلي سنع في غلاك و شوفلي دبره
خليت نفسي مـن الايـام مقهـوره
و خليت حالي لمن لا يعتبر عبـره
غديت في دنيتك يمهـدي الفـوره
في روضة خريم مثل مضيع الأبـره
خلصت ما عاد أقاوم صدك وجـوره
القلب قرب يموت و غيبتـك قبـره
فراقك العـام تكفـا لا يجـي دوره
صرت احسبله و افكر فيه و أعتبره
ماني بناسي هذاك الطيش و غروره
يوم أنك أخلفت ظن فيك وش كبـره
و أذاك ناسي تراها عندي الصوره
أقفيت تضحك و أنا غصتني العبره
فهد المساعد
شاعر غني عن التعريف فرض نفسه بقوه في الساحه الشعرية , طرح البوم (الاسرار) قبل اشهر قليله ولاقى اصداء ايجابيه وسط المتابعين
من اخر ابياته
الدكاتر
حاولت اذاكر بس مااقـدر اذاكـر
أقرأ ووجهك في الكتب ينرسم لي
عذراً عميـد الجامعـه والدكاتـر
هذا نصيبي والله اللي قسـم لـي
يعني وش تسون لو غبت باكر؟!
ورجعت لديار تـرد النسـم لـي
يحسم علىّ؟ كانه على الحسم شاكر
معدلي فدوه لهـا لا انحسـم لـي
ياقلبـي التعبـان قـص التذاكـر
مشتاق اشوف عيونها تبتسـم لـي
في رثاء والده رحمه الله
صلاة وعناقيد
عدّى عمر .. ياليت الأعمار تنعـاد
وأرجع بلا شيـب وبليـا تجاعيـد
أرجع وأضم أبوي وأقـول: لا عـاد
تموت وتتركني مثـل ليلـة العيـد
يوم اسألوا عنـك الصبايـا والأولاد
وقلت:أمي تقول انه مسافـر بعيـد
بكيـت ليلتهـا وناديت..مـا فــاد
وظليت أصوت لك .. وأناديك وأعيد
عوّد يا بوي وجب لي ثيـاب جـداد
يا كثر ما تنسى يا بـوي المواعيـد
بكيتك لحالـي وأنـا كنـت معتـاد
تكف دمعـي بإيـد وتضمنـي بإيـد
كم كنت محتاجك تجـي كنّـك رقـاد
تمطر من كفوفـك صـلاة وعناقيـد
احتجت لك طفلٍ كسر قلب الأعيـاد
واحتجت لك طيش وشباب وتناهيـد
واحتجت لك شاعر له أحباب وأضداد
واحتجت لك رجال يخشـى المناقيـد
احتجت لك .. واحتاج لك ظل وسناد
العمر ينقص واحتياجي لـك يزيـد
سكة الذكرى
مرّني طيفـك .. وطيفـك صاحبـي مـدري عـدوّي
جايبٍ صوتك .. وصوتـك سكـة الذكـرى الحزينـة
قال أنا جوّي تكـدّر .. قلـت : ماهـو كثـر جـوّي
قال فرقانا غبينـة .. قلـت : وأكثـر مـن غبينـة
قال : أنا بـ أموت من غيبتك قل لـي ويـش أسـوّي؟
قلت : أنا أبغى الموت في غيبتك .. قل لي بس وينه؟!
قبل ترحل .. كنـت أقـول بيسـرح أيـام و يضـوّي
مثـل ماعودنـي اليـا اشتقـت لـه جابـه حنينـه
بـس هـ المـرة ثمـان شهـور وضلوعـي تــدوّي
كل يوم أشتاق لك .. يلعـن أبـو الشـوق وسنينـه
كـل ماعشمـت قلبـي .. قـال ياآآ ضلوعـي تقـوّي
ورحـت أنـا ويـاه نرقـب رجعـة اللـي فاقدينـه
نوب أقـول اليـا رجـع بكـون فـي قمـة هـدوّي
ونـوب أقـول الا أبزعـل وأتلـى مابينـي وبينـه
كل يوم أجلس علـى جـال البحـر وأقـول تـوّي ..
.. لاسألني : مافقـدت الحلـم فـي لمسـة يدينـه ؟!
مادريـت أن البحـر ماقـال لأمـواجـه تــروّي !
و مادريت أن الغـرق هـو حجّـة غيـاب السفينـة
مادريت .. أو مابغيت أدري .. ولاأدري وش بسوّي
لو رجعت .. وشفت طيفك فـي الممـرات الحزينـة
وين ابنسى وانت طيفـك صاحبـي مـدري عـدوي
مارضى يتـرك لـ غيـره شبـر واحـد فـي المدينـة!
باب النسيان
كل مافي الأرض ينذر بالمفارق والغياب
اللقى .. والشمس .. وحروف الرسايل .. والقبور
وش بقى يوم أكتشفت أن آخر الدرب السراب ؟!
والبحر دمع السواحـل هاجرت عنها الطيور !
مالحزني صوت ؟ .. مدري هو خطأ والا صواب !
بـس أعرف أني حزين وصوتي الليله جهور
من يدّثر صوتي الليله ويكسب له ثواب ؟!
مالها يالشعر غيرك أنت .. ياجبر الكسور
يكفي أني .. لابكيت بدونك أشعر بإرتياب
وكل ما أبكي فيك .. أشوفك لي .. عن اللي فيّ .. سور
أدري بيوتك عرايا .. لكن أوزانك ثياب
لبّس جروحي من أحزانك وألبّسك الصدور
كان ياما كان والنسيان للعشّاق باب
عاشق ٍ لاشدّ درفة باب .. صاح بلا شعور
يقدر النسيان ينزع غصن من فوق التراب
بس مايقدر يقرّب للتراب وللجذور
كيف أبنسى ذكريات الطيش الأول .. والشباب
ورفقة الليل العتيقه .. وأول الفجر الطهـور
والمواعيد وشغبها .. والوله قبل العتاب
وساعة ٍ كم كنت أحاول في عقاربها تدور
والمكان اللي وهن سقفه من الفرقا وشاب
من بعد ماكان يحضّنا مثل طفل ٍ غيور
والمطر لا لوّن الشارع .. وقلنا لـ السحاب :
بللّ أيدينا .. ترى العشّاق أياديهم زهور
كيف أبنسى والريـاض لسيرتي مثل الكتاب !
حافظتني بيت بيت .. و حي حي .. و دوُر دوُر
من كثر ماكنت أدوّر فـي شوارعها جواب :
هو صحيح الحب أعمى ! أو عيون الناس عور ؟!
كنت أشوف الحب عذب .. وهم يشوفونه عذاب !
كان هذا الحب سر ! .. وقلته وكلي سرور
علمّوني في المدينه كيف لاحبيت أهاب
لكن القريه قمرها قال : كُن لـ الحب نور
في بلادي كنت عاشق .. بس شاعـر بــ /إغتراب!
لين صرت الشاعـر اللي تعشقه كل البحور
علمّيني يالقصايد هو خطأ والاصواب ؟!
لارفضت أنسى عيون ٍ عشتها شعر وشعور
هذا أنا لحالي .. هزيل الحال .. وأشعر بـ /إكتئاب
كن " قلبي " جال بحر ٍ هاجرت عنه " الطيور"
أجرع الفرقا وأقول الحب عذب .. وللعذاب ..
كل قلب ٍ لاحرمه الوقت من خلّه .. يبور
ولين هذا اليوم أدوّر في المدينه عن جواب :
ليه في شرعك .. يكون الحب معنى لـ الفجور ؟!!
صالات المطار
قبل اسافر كنت جالس في زمان الانتظار
ارتشف هم المكان ... وكل همي حاجتين
كنت خايف من يباس ..وكنت خايف من خضار
كنت اخاف انك تجين ...وكنت خايف مــا تجين
ليـــن شفتك من ورا بيبان صــالات المطار
مقبله من كثر شوقك...كنت اشوفك تركضين
مرةٍ ركضك يمين ونظرة عيونك يسار
ومرةٍ ركضك يسار ونظرة عيونك يمين
تــايهه..ماكنك الا ضحكةٍ وسط انكسـار
ســــاكته..ماكنك الا دمعةٍ فيها حنيـــن
خايفه .. وجله ..حزينه.. يعني كنتي باختصار
تشرحين لكل جاهل معني كلمة(عــــاشقين)
بعــدها جيتــك ولدٌت عينك.. ودار الحـــوار
من كفوفي دمعتيــن ومن كفوفك دمعتيـــن
كنت اصد وكنتي انتي ثــايره مثل الشـرار
ماعلى لتغه لسانك غيـر (ويــــن؟ ويــــن؟)
واذكر اني رحت قبل ابدي لك اية اعتــذار
رحت حتى قبل اطيب خاطرك في كلمتين
لكن انتي عارفتني زيــن .. والى صار صـــار
سامحيني .. واذكريني قد منتي تقدريـــــن
اذكريني لانتهت للشمس رحله مع نهار
واذكريني لاصحى للصبح ورد الياسمين
واذكريني لا لمحتي في ليالي البرد نار
واذكريني لا سمعتي للمطر صوتٍ حزين
اذكريني واذكريني واذكريني.. باختصار
اذكري فــهد المسـاعد قد مانتي تقدريـــن !
للمره الرابعه على التوالي اكتب رد على هالموضوع بس ان شاء الله هالرد يوصل بالسلامه 
اخر تعديل كان بواسطة » إيقاع المطر في يوم » 26/05/2009 عند الساعة » 05:50 PM | 