أعتذر عن العودة مرة أخرى..

هذه ردّية بين:

شاعر الوطن/ خلف بن هذال
الشاعر الأسطوري/ ياسر التويجري


الردّية جرت في [ باريس ] حيث التقيا هناك..

خلف بن هذال.. لـ (ياسر):

ياراع الطير خل الطيـر فـي وكـره
لاتقشـع البرقـع اللـي للهدد باقـي

فـي هـدة الطيرلاتفـرح ولاتـكـره
وانا لحب أشقـر الجنحـان مشتاقـي

اعلم عن اليوم ماأعلم مايجـي بكـره
والله يفرج ويبهج صدر مـن ضاقـي

الوقت ماكـر وكـل ذاق مـن مكـره
ياكثر ماذقت مـن لوعـات عشاقـي

الرجل يشكر ليا طال وضفـى شكـره
يربح به السوق عند إفلاس الأسواقي

للعشق نشوه غـرام وللهوى سكـره
والله ماادري متى جمعـاي وفراقـي

يطوي بي البعد طوي الخيط بالمكـره
اليا متى تطوي البيـدا علـى ساقـي

ياسر ... ترى للكرم واهل الكرم حكره
يفوح فيها الدسم وتفـوح الأرزاقـي




و ردّ الكاسر:

الشعر فكره ياراعي الشعر والفكره
يالشاعر اللي مع الشعار عملاقـي

سوق المعانـي تملكتـه ومحتكـره
بالفعل ماهي شهايد بيض الأوراقي

أوّله ماجيب قبلك وانـت مبتكـره
واشوف كنك علـى تاليـه توّاقـي

ياعاشق الطير حب الطير من ذكره
لاصار كفه شطير وريشـه دقاقـي

ماكره في نجد ما مارابـه الهكـره
ولاشراه الـردّي وباعـه عراقـي

على غزال الشداد اللي على البكره
اورّد نياقهـم واصــدّر نيـاقـي

احب راس الظفر وآطى على العكره
والأمة أخلاق وأنا هـذي أخلاقـي

للوقت وقفه حساب وللزمن نكـره
والله يصبر من أفارق على فراقـي