هلا وغلا الهنوف ...
أخيراً قرأت لك موضوع قبل ما يكرشوني من الشبكة >>> متوقع إنه بيكرش بعد البطولة
خلينا ناخذالموضوع حبّه حبّه ..
بالنسبة للأسواق واللي يشيل طفل ..
بالنسبة لميار بنتي فأنا في بعض الأوقات أشيلها لأنه أيضاً حرام الحرمة تشيل الطفل والروحة للسوق علشانها لازم الواحد يضحي شوي ..
لكن من أول ما أحس بوجع بظهري دايركت يا إني أجدع ميار أو أعطيها أمها
...
بالنسبة للي صوته عالي والله يا هو يقهر ويرفع الضغط إن جلست عند واحد يتكلم معك وكأنهم قايلينهم ترى الناس ما تسمع وأرفع صوتك .. أنا إذا رفعت صوتي بمجلس والا شيء والله يا أنا أستحي ووجهي يصب عرق لأني أحس إن الحركة هذي مالها أي داعي أبداً ..
....
بالنسبة للي يمسك الجوال وأنت جالس بمجلس ما أعلق على اللي يسوي الحركة هذي إلا ياليتهم رقدوا ذيك الليلة ولا جاء هالأبله لأني اللي ما يحترم المجالس مو كفو إنه يجلس معك .
....
هع هع هع هع هع بالنسبة للمطاعم والله يا صار لي موقف مع بزر من هالبزران ..
كنت رايح أنا وعيالي لمطعم ومسكرين الستارة إلا يجي ذاك البزر اللي يفتح الستارة وأنا اللي أسكرها ويتكرر الكلام هذا أكثر من خمس مرات .. عاد حقدت أنا من جد بس ما أقدر أصلّح له شيء .. وأنتظره لين يجي علشان أكلّمه وإلا أعطيه شيء يلهيه ..
ويوم جاء قلت له ليش يا شاطر كذا إلا والبزر ينفجر بالصياح ويجي أبوه وش السالفة .. قعدت أضحك وقلت أزعجنا وجيت أكلّمه قال ما تستحي هالبزر كبر عيالك وأنت تضربه قلت والله ما ضربته .. أكلمه بس قال بس عيب عليك .. عاد أنا قفلت معي .
قلت شل بزرك لا يجيك كف أنت وياه أنا جاي لمطعم مو لحضانة لا أبوك لا أبو هالمطعم .
....
آخر شيء الفضول .. يا كثرهم وأعتقد أنها أصبحت عادة حتى أنك تستغرب إذا كنت تعمل شيء ولا أحد يكون له فضول عليك ..
...
أختي الهنوف أنا أكثر شيء أكرهه بالدنيا هذي إنه يجيك واحد ويتكلم عليكم على أنه فاهم كل شيء ..
وأي موضوع تكلّمه يعطيك رأيه وهو ما يعرف ويقنعك إن رأيه صح .. وأنا أعرف كثير من هالنوعية ودايم أتصيّد لهم ..
مرة واحد بالدوام عندنا مزعجنا إنه يتابع بطولات أوربية وهو أقسم بالله ما يعرف بالسعودية الا الهلال والنصر والاتحاد ويمكن الأهلي والشباب .. ومزعجنا ..
وكل يوم بآخر الليل يدخل موقع كورة ويشوف النتايج ويجي يتفلسف علينا .. ذاك اليوم قلت لواحد سوري شف أبصيده بس إذا صدته أبيك تفقع ضحك قال أوكي ..
جاء يتكلّم عن مباراة أرسنال وفياريال اللي صارت بدور الثمانية لدوري الأبطال .. وهو يتكلم قلت إلا أبو نجد >> هذا أسمه ..
المباراة أمس بدور الــ 6 أو دور الــ 18
طبعاً هو يا 8 يا 6
قال أكيد بدور الــ 18 وخذ يالسوري ضحك وخذ يا أنا ضحك لين صار وجهه أحمر .. وقلت له رجاءً لا تتكلم بأمور ما تفقه فيها
شكراً الهنوف وآسف جداً جداً على طول الرد .. وثقالة الدم وبثارة الصخرة
