نادي الهلال السعودي - شبكة الزعيم - الموقع الرسمي - مشاهدة مشاركة بصفحة مستقلة - «®•°•ღ•°امسكوا عيالكم وقصروا اصواتكم ..- خربشات هنوفية -«®•°•ღ•° !! ‏ ‏

الهنوووف · #1 14/05/2009, 12:38 PM

السلام عليكم ورحمة الله وبركاتة
هلا والله فيكم يالغالين

اشتقت لمعانقة متصفحكم

..__>> مدري يقولون كذا هم
هذي خربشات بسيطة كتبتها لاني صاحية بدري

اول مره اكتب شي وانزله دايركت

حتى بدون تنسيق سويت لي فاصل من تصميمي وابداعي

امدحوها

_> بالعادة تفكر بالموضوع اسبوعين وتجمع اسبوعين وتنسق اسبوع

استروا ماواجهتوا

ترا بدون تدقيق وتمحيص

اثناء تجوالي في مدينتي الحبيبة ومابين زيارات الاقارب استوقفتني وفي رواية تطلعك من طورك

هالامور تندرج تحت مايسمة بالاتيكيت ( الظاهر اسمه كذا

)

بالاسواق
فيه بعض المواقف تتكون غريبة وعجيبة وتدعوا للضحك
في مشهد شفتة من فترة نرفزني شوي وخلاني اضحك غصب واتحمد والله
رجال اتوقع خمسيني ( مدري بالضبط بس انه اكبر من 45 سنه

)
تخيلوا شايل شنطة الطفل وشايل الطفل معاه بشكل غبي والمدام مامعها الا شنطتها الصغيره
الرجل لابس ثوب وشماغ هيئتة سعودي ولكن مدري بالضبط وش جنسيتة هل سعودي اولا

المدام هيئتها ممكن تكون اجنبية وشكلها مو كبيرهـ مره
يمكن بعضكم بيقول وشدخلكم بالناس بس والله شكل الرجال كان غبي ويدعو للشفقة
المساعدة حلوه بس مو لهالدرجة الرجال كل شي والحرمه تتمخطر جنبة الا اذابزوجتة شي يخليها مو قادرهـ تشيل
@ فيه موقف تقوه خالتي واحد سعودي وزوجته اجنبية داخلين محل ذهب

اول مادخل قال للبائع طلع لها كل شي تبيه

كل شي

ردت سعوديه

(قالت لو انها سعودية ماقلت كذا

)

@ وايضا بعض الرجال الله يهديهم وقت الصلاه بالسوق مايصلي ويجلس جنب حرمة المصون سوالف وضحك يخاف تضيع الظاهر
ياهالموقف يرفع ضغطي خصوصا لو كان المجمع كبير وفيه ناس ومغلق ماراح يجيها شي ان شاء الله
مدري هو وسوسه او تهاون بالصلاة

يافيه ناس ماودك تجلس جنبها وهي تسولف شوي وتتفجر الطبلة من ارتفاع اصواتهم
مما يجبرك تقول بنفسك متى يسكت ازعجنا علما ان كلامة شيق ولكن ارتفاع الصوت الغير مبرر ينرفزك
ومشكلة ثانية غير ارتفاع الصوت هي السرعة بالكلام يخليك تهز راسك وانت ماتدري وش الطبخة ولاسمعت شي
انا عندي عقدهـ من الصوت العالي ماحبه ابدا فـ قصروا اصواتكم الله يعافيكم

وفيه شي ينرفز بعد الي يسولف وهو مقابل وجهك مافي مسافه كافية للاكسجين

بعض الاشخاص الي يهديهم جوالهم ماينزل من يدينهم وتقليب بهالصور وبهالرسائل كانها اول مره تمسك جوالها ...دامك هذا حالك وش جابك لهالجمعة
وكل دقيقة اتصال مايحلون اهلهم وصديقاتهم الا هالاوقات
هالظاهره تضايق الموجودين وخصوصا لاحظت كبار السن يعصبون من هالنوعيات
والحين العالم تطورت واصبح الاب توب والايبود بديل للجوال

اتوقع الكثير منكم جرب يتعشى او يتغدى بمطعم وبعض المطاعم يافيها ازعاج تقول حضانة اطفال
ومن زود الوقاحه ببعض الناس تلاقي عيالهم يطلون من فوق والا يقلطون معاكم بالطاولة
وغير الالفاظ الي تطلع من الاب وصراخه على الاطفال ياحمـ ؟؟ اجلس هنا
ويـا كلـ..؟؟ وين اخوك
والا تلاقي نقاش حامي بين زوجين وأصواتهم مرتفعة انت الي تنحرج وانت تسمع هوشتهم
انا فكرت وشفت افضل حل يحطون قسم للعوائل باطفال وعوائل بدون اطفال
وللمتزوجين في بيت مستقل والمتزوجين الي عند حمولة

(لان دايما الي عند حمولة مايلاقون يتهاوشون ويتناقشون الا بالمطعم

)

المهم امسكوا بزرانكم بالمطاعم وسكتوهم تراهم ازعجونا

@ نخلص من الازعاج يجيك طريقة الاكل فيه ناس نفس الشي ماودك تاكل معاهم طريقة اكلهم تنرفز

>> ياكثر الي ينرفزك

جد حلو الواحد يراعي ان فيه ناس قدامه وياكل بطريقة ماتدعوا للاشمئزاز
والا يجي يخلص من الاكل ويرمى الملعقة بالصحن او قشر الفاكهه بالصحن نفسه

ايضا الفضول المبالغ فية
يعني تتفاجا بالي تسحب جوالك وتتفرج على الرسائل بدون ماتشاورك
( مرهـ بالجـ ( مابقول وين علشان ابوطلال هههه لايمسكه

ا )
بنت يمكن لاول مره تجلس معاي واتفاجا انها تمسك جوالي وتتفرج بدون احم ولادستور خلقه هالبنت ماهضمها انحرجت اطلب جوالي منها

@ طبعا موقف اخر للفضول الي شوي ويقلط معاكم بالسياره

ويدخل من الشباك

في النهاية ياليت كل واحد يتطرق للمواقف او الامور الي تضايقه بالي حولة منها نتعلم لان الكثير يقع بالشي ومايدري انه يضايق الي حولة
بالنسبة لي هالامور تضايقني بدرجة ماتتصورنها بالاضافة الى بعض الامور لو اتكلم بتقولون الله يعينك ض1
احيانا احس هالامور يعاني منها مواصل من عام 1413

مثلا ماحب عزيمة او جمعه بسيطة ماتتجاوز 30 نفر تقدمين العشاء بصحون وملاعق بلاستيك

@ نكون جمعه بنات تجي بنت تسلم على صديقتها وتترك البقية

@ فيني طبع غريب

احب اشتري اكواب

كل ماروح سوق اطلع بكوب

وايضا هواية تجميع ااكياس المحلات

طبعا مو اكياس ماركات فقط حتى لاتقولون فشخره

لو كيس ابوريايلن

هل احد يشاركني هالهواية

هذي خربشات من تجوالي بالاماكن العامة والبيوت اتمنى ان اي احد يقع فيها يتخلص منها

مواقفكم ........؟؟

@@@ ليس من الضروري أن تكوني من طبقة أرستقراطية حتى تكوني سيد\ هـ مجتمع لبقـ \ هـ

مما راق لي :
أكَثرَ مَا يُقْلقُنِيَ
أنَنِيَ { بَتْ عَاجِزَة
عَنْ تَغيَيرَ مَسَارَاتَ فِيَ الأنَا إتَجَاهَهُمْ
كَثيَراً مَا أقُولَ سَ أرَكُنْ جَانِبَاً
عَطَاء لا يَسَتحَقُوه مَنِي وَ .. إذَ بِيَ أُضَاعِفٌه لهُمَ
وَيْحُهَ قَلبَيَ
لمْ / لنْ يُنصَتَ لِـ نَداء العَقَل يَومَا .. }