قصيده مؤثره وهي بعنوان
( قصيدة شاب رثى نفسه وتوفى بعدها بيومين )
جاني وانا في وسط ربعي وناسي
جاني نشلني مثل ما ينشل الناس



مني نشل روح تشيل المآسي
تشكي من ايام الشقى تشكي اليأس

اثر الالم في سكرة الموت قاسي
ما هالني مثله وانا انسان حساس

جابو كفن ابيض مقاسه مقاسي
ولفوا به الجسم المحنط مع الراس

وشالوني اربع بالنعش ومتواسي
عليه ومغطى على جسمي الباس

وصلوا علي وكلهم في مآسي
ربعي ومعهم ناس من كل الاجناس

يا كيف سوا عقبنا تاج راسي
وامي الحبيبه وش سوى بها الياس

اسمع صدى صوت يهز الرواسي
قولوا لها لاتلطم الخد يا ناس

قولولها حق وتجرعت كاسي
لا تحترق كل يبي يجرع الكاس

اصبحت في قبري ولابه مواسي
واسمع قريع نعولهم يوم تنداس

من يوم قفوا حل موثق لباسي
وعلى رد الروح صوت بالاجراس

هيكل غريب وقال ليه التناسي
صوته رهيب وخلفه اثنين حراس

وقف وقال ان كنت يا نمر ناسي
هاذي هي اعمالك تقدم بكراس

ومن هول ما شفته وقف شعر راسي
وانهارت اعصابي ولا ارد الانفاس

يا ليتني فكرت قبل انغماسي
بالغفله اللي منتهاها للافلاس

وفزيت من نومي على صوت ناسي
واصرخ واقول الموت واحذر الناس

"توفي قائل القصيده بعدها بيومين في حادث مروري "
قيل ان كاتب هذه القصيده " نمر السحيمي "
رأى في المنام انه حصل له حادث ورأى انه يغسل ويكفن ثم يصلى عليه
فقام من النوم مذعورا فكتب هذه القصيده واودعها في درج مكتبه
ثم سبحان الله بعدها بيومين توفي بحادث ، وعند تفتيش مكتبه وجدوها فيه
رحمه الله رحمه واسعه

منقول