احبائي زعماء نصف الارض ,,, بعد التحية :

محمد نامي :

انا بصراحه عندي عندي تحفظ على مستوى اللاعب محمد نامي في مباراة الاهلي الامارتي , والسبب في ذلك الارهاق والاصابه ؛ لأن محمد نامي في الفترة الاخيرة لعب مباريات جامدة وخصوصا مباراتي المنتخب مع ايران والامارات , وهذا هو السبب الوحيد في ظهور محمد نامي بهالمستوى في المباراة الاخيرة .

عبدالله الزوري :

أما من ناحية الزوري حتى هو بعد مستواه في مباراة الاهلي الاماراتي ماكان جيد , ووضح عليه الارهاق , والدليل انه اذا استلم الكوره وانطلق من الجهة اليسرى ماعاد يقدر يرفع من التعب .

ماجد المرشدي :

من ناحية ماجد المرشدي , هو لاعب جيد وتوه راجع من اصابه , بس بصراحه مستواه انخفض عما كان عليه في دورة الخليج مع المنتخب , لأنه بصراحه في مباراة الاهلي الاماراتي كان واضح عليه الاستعجال والارتباك .


اسامه هوساوي :

مهما اقول فيه ما راح اوفيه حقه , لأنه بصراحة قمة في الاخلاق والمستوى , ماشاء الله عليه , شايل الدفاع بمعنى الكلمة , انا ما اقول انك نسيتنا تفاريس لأن تفاريس في قلوبنا وصعب ننساه , لكن بقول انك بتكون افضل مدافع مر على فريق الهلال باذن الله , بالتوفيق يا بطل .

خالد عزيز :

في مبارة الاهلي الاماراتي انا لاحظت في خالد عزيز شي ماشاء الله عليه , من مباراة إلى مباراة تلقى مستواه يتطور من ناحية المهارة والباص والتغطية والتحرك وقطع الكور , يالبى قلبك يا ابو العز , في مباراة الاتحاد بتشوفون وبتعرفون من هو خالد عزيز . (ياويلك يا نور) .

ميريل رادوي :

بصراحه مستواه جيد لكن مو مثل اول ما جاء للفريق ايام كوزمين , تمريراته كثير ما تكون خطأ , اتمنى انه يكون ظهير ايمن مكان نامي في مباراة الاتحاد , ويكون الخثران محور مع خالد عزيز .

كريستيان ويلهامسون (ويلي) :

اتمنى انه يركز شوي في تنفيذ الكور الثابته لأن غالبية رفعاته تكون بعيده عن المهاجمين , اتمنى انه يغير طريقته في تنفيذ الكور الثابته , لأن رفعاته غالبان ما تكون بطيئة مو مزروره وقوية مثل رفعات بيكهام .

سيول :

ماشاء الله , مستواه في تحسن ملحوظ وعجيب وخصوصا المباراتين الاخيره , اتمنى يختمها صح مع الاتحاد ويجيب الدوري وهذا اللي اتوقعه بإذن الله .

طارق التائب :

بصراحه هو نجمي المفضل في نادي الهلال , لكن بصراحه مستواه في مباراتي الاتفاق والاهلي الامارتي يخوف , صار يعطل اللعب , يستعرض , كل تمريراته باص عيون , يقتل الهجمات السريعه , يعني لما تكون فيه هجمه مرتده للهلال وتوصل لطارق ما يفك الكوره الا لما يرجعون لاعبي الفريق الخصم كلهم بعدها يناول , اتمنى ان طارق يظهر في مباراة الاتحاد مثل ماعرفناه , وهذا العشم فيك يابو نادين .

ياسر القحطاني :

عيني عليه بارده , وماقصر البطل , انا ملاحظ شي في ياسر ماشاء الله عليه اللي هو انه حتى لو انخفض مستواه يجيب اهداف ماشاء الله , مباراة الاتحاد بيثبت لنا ان الكبير كبير .


محمد الدعيع :

نبغاك مثل نهائي العام الماضي ضد الاتحاد في جده , يعني نبغاك مصحصح ورايق , وصدقني انت مصدر الاطمئنان للفريق , اتمنى لك التوفيق يا ابو عبدالعزيز .


عبد الرحمن بن مساعد (شبيه الريح) :

الله يعطيك على نيتك ان شاء الله , ويوفقك وين ماكنت , اعطيت كل شي للفريق وماقصرتي بأي شي , حاربوك وحاولو يسقطونك لكن بدري عليهم , انت اكبر منهم يابو فيصل بعقلك وتفكيرك وطموحك , لله درك يا بو فيصل .