حيـــــــــاكم
الواحد هاليومين عند أدنى شي ينفخ عليك ويفقد اعصابه 
وش دعوى ياجماعة 
وين الاخلاق السعودية 
الحين لو ( تشطف ) واحد بسيارتك بدون قصد 
ماتدري الا وهو لاحقك فاتح دريشته يسب ويلعن ويتفل << 
واذا خلّص هواش وراح وتعدّاك.. وتحسب انك افتكّيت من شره
ماتدري الا وهو قدامك مطلّع لك ايده من الدريشة بحركة ( طووووط ) 
الله يرحم زمان اول
اذكر ابوي قد تصادم مع راعي سيارة قبل حوالي 15 سنة
( لاحظوا اقول صدمه مو شطفه )
من لحظة الحادث الييين جاء المرور وهم يتعازمون ابوي وراعي السيارة 
كل واحد يقول للثاني ( العفو والسموحة... وعشاك عندي ) 
لكن الحين
خل الاشارة تولّع خضراء واصبر ثواني لاتمشي
شف اللي وراك وش يصير فيه 
بيزعج الدنيا ويعلّق على البوري
واذا أشّرت له بيدك نزل عليك بالعقال 
<< قلنا عقال مو شاكوش
ادخل مطعم.. ورح للكاشير واخطم على دور اللي قدامك بدون قصد
شف كيف ردّة فعله ذيك اللحظه
يبدأ يصارخ ويهايط وسط المطعم.. ويشرشحك ويمسح فيك الارض
وزين اذا ما راح واخذ السيخ حق الشاورما علشان يشق بطنك 
يؤ يؤ .. وش دعوى ياحافظ ؟؟ 
الى هالدرجة ماعاد فينا طولة بال ؟؟
في الدوام..
رح للمصلّى علشان تصلي الظهر.. وشف بعض الزملاء يسولفون ومالهم نيّة صلاة 
وبكل براءة وادب ولطف قل لهم : ( الصلاة ياشباب )
وخذ يانظرات حاقدة وتجديع كلام >> وانت شايفنا يهود / منتب عاقل يا بن باز
رح أي دائرة حكومية الصبح بدري وادخل على أي موظف
وبكل ادب واحترام اسأله عن معاملتك.. على طووول يصرف لك زبدة << يزبد لك
حتى الشرطة
والله العظيم اني اذكر واحد لحق دورية بالعليا وخلاهم يوقفون
ونزل وسلّم عليهم وسألهم بكل عفويه عن مستشفى الحمادي وين مكانه 
ركّبوه واخذوه للقسم وصكّوه توقيف 24 ساعة.. ياساااااتر وش هالنفسيّات
حتى في منتدانا
رح قسم الجمهور واكتب لك موضوع عكس اتجاه الاغلبيه لكنه يعبّر عن وجهة نظرك 
وشف التسفيل بالردود.. قسم بالله يغسلون شراعك ويخلّونك ماتسوى ريال
ليييه بس كده ليييييه ... مايصحّش الكلام ده 
نصيحة مني
اشربوا عصير مانجا كل يوم.. ترويقة دم غير طبيعية
.
.
.
رومانسيات صخراويات
بعد ان تقف حائرا امام المرآة لمدة تزيد عن عشر دقائق
سوف تقع عيناك على ذلك العطر
وبإيحاء مباشر من دقات قلبك المأسور بكل مايربطه بتلك الذكريات
سوف تكتشف ان علاقة طردية قد نشأت بين نبضاتك وعطرك
وأنّهما بكل تفاصيلهما مرتبطان بنفحة من احساس عطرها
حينها
سوف تعلم جيدا أنه لا قيمة لزجاجة عطرك مقابل نفحة من عبيرها
ولذلك
عد إليها وسلّمها كل عطورك... وقلبك... وابلع العافيه وخلّك رجل 