احـتـقـان.. في الدوام والمسجد والحارة وكل مكان.. الى متى ياسلطان ؟؟
حيــــــاكم
وليد الفراج يسأل الامير نواف بن سعد عن سبب الاحتقان
ونواف عطاهـ الخيط والمخيط
وكلمته كانت تكفي لكل من يمتلك مثقال ذرة من كرامة علشان ( يريح ويستريح )
الامير قال : سبب الاحتقان معروف.. وما يبيله شرح
بيّض الله وجهك يانواف
وصلّت الرسالة بكل ادب وفصاحة...
لكن الى متى ياجماعة ؟؟
الاحتقان صار في كل مكان...
في البيت والحارة والمسجد والبقالة والدوام وكل مكان
والله العظيم اني قبل امس الصباح في الدوام
قاعد على مكتبي ومجتمع حولي اربعة.. وانواع الهواش
والله ان اصواتنا يسمعها اللي في المكاتب المجاورة والبعيدة
نصراوي واتحادي يدافعون عن سلطان بن فهد.. وانا عن الهلال
طلعت بعد الساعة 1 اتغدى في مطعم قريب
لقيت فيه بالصدفة خمسة من الزملاء غير اللي قبل
وجلست معهم وقلبناها ساحة معركة في المطعم
لدرجة ان اللي جالسين جنبنا تركوا غداهم وطبّوا معنا فازعين
الهلالي والنصراوي واللي مايشجع شي بس مايحب الهلال
رجعت للبيت بعد الدوام...
وبعد صلاة المغرب استكمال حفلة الاحتقان مع الجيران
وهواش مع بعض الجيران ( المهايطية )
اسألكم الله متى وصلنا لمثل الحال في تاريخ الرياضة السعودية ؟؟
متى كانت اوقات الدوام الرسمي والمراكز العامة والمطاعم ساحات معارك ؟؟
ليش صرنا نطلع من المسجد بدل مانسبح ونهلل صرنا نتهاوش ؟؟
منهو اللي خلانا نوصل للحضيض ؟؟
والى متى ناوي يرتز على الكرسي يعفس الدعوى من جهة
ومن جهة اخرى يأمرنا بانتهاج الاخلاق السعودية ؟؟
ياخي ترى الاخلاق بمختلف انواعها
اسلامية ورياضية وحتى السعودية على قولتك
كلها تقول لك كفيت ووفيت وماقصرت... والكرسي يتعذّرك
خلاص يامسلم.. يكفينا ( دحدرة ).. عط المجال لغيرك
ياسر والفريدي !!!!!
عندي اكثر من علامة استفهام لهالثنائي
لكن أهمّها على الاطلاق... عندكم خبر أننا في مرحلة الحسم ؟؟
ياسر القحطاني
مستواك خلال المباريات الاخيرة ( يجيب المرض )
من متى وانت تلعب بخطّة ( طيحني ) ؟؟
ترى هالطريقة مايستخدمها الا مهاجمين ( تكملة العدد ) مثل السعران والشهراني
ومن متى وانت أي كورة تجيك ( تمزعها ) بدون تفكير ؟؟
وتاليتها معك وانت ( تتمشى ) كأنّك في الكورنيش ؟؟
اتمنى انك تدرك الآمال اللي نعلّقها عليك كجماهير
انا هنا اتكلم من منطلق حبي لك ياياسر
وين ياسر اللي بغى يحترف في مانشستر سيتي ؟؟
احمد الفريدي
ترى فيه فرق بين ( الفلسفة ) و ( التناحة )
اللي يشوف لعبك يحلف بالله انك متعشي فول قبل المباراة
ياخي وش هاللعب اللي ما ادري وش يبي ؟؟
الى متى وانت في هالبرود وضايع وماتدري وش السالفة ؟؟
وين احمد اللي كنّا نتغنّى فيه قبل كم شهر ؟؟
وين احمد اللي شال المنتخب على اكتافه في فترة سابقة ؟؟
ياجماعة والله مايصير.. راجعوا حساباتكم
