أولا الموضوع في غاية الروعه وتحليل جيد ومنطقي نوعا ما

ولكن فيه نقطتين ودي أعلق عليهم
اول شي بالنسبه للملك راؤول تفضلت في موضوعك ان اللاعب مستواه هابط ولم يكن مثل المواسم السابقه هذا شي لايختلف عليه اثنين .. ولكن قلت ان ماله عذر بالعكس انا اشوف ان له عذر وانا ما ابرر له بكوني احب اللاعب هذا لا والله بالعكس ولكن هذا الشي من وجهة نظري انه واقعي .. وهو ان اللاعب يلعب في مركز جديد عليه وهو صناعة اللعب لأن هذه هي تشكيله كيروش فيجو على اليمين و زيدان على اليسار و راؤول خلف رونالدو اكيد ماراح يسجل اهداف ولا راح يبدع في هذا المكان لأن فيه غيره من هم افضل منه في هذا المكان وعلى رأسهم زيدان .. فمن وجهة نظري ان هذا السبب وراء انخفاض مستوى راؤول وعدم تسجيله للأهداف .. ولكن شوفه مع المنتخب اذا لعب رأس حربه كيف يسجل اهداف مع العلم ان في المنتخب الاسباني لايوجد صنّاع لعب كزيدان وفيجو اذا لا أعتقد ان الخطأ من اللاعب بل من المدرب

اما بالنسبه للنقطه الثانيه وهي عن رونالدو انا بصراحه ملاحظ عليه الانانيه يعني دايما تشوفه يبي يحاور و يسجل اهداف من مناطق ميته مع العلم ان زملائه فاتحين له بس مايناول وتفشل محاولاته و نفس الشي مع فيجو لكن الفرق ان فيجو اول ماتضيع منه الكورة يسبون و يلعنون فيه اما رونالدو عادي مدري وش السبب ؟؟

وعندي تعليق بسيط جدا على كلام الأخ محتاجلك
انت تقول ان كيروش ماعليه كلام لأنه جاب الصدارة ... بالله عليك هل هذا هو الريال ؟؟ هل هذا ريال المتعه ؟؟ هل هذا ريال الفن ؟؟ ... بالعكس صرنا في المباريات الى اخر دقيقه وكل واحد حاط ايده على قلبه خايف لا يجي علينا هدف هل هذا هو الريال ؟؟؟ ... راجع نفسك قليلا وسترى
وبالنسبه للاعب سولاري فعلا انا اوافقك الرأي في ان هذا اللاعب مظلوم ولكن شي طبيعي بيبقى في الاحتياط ماله مكان صراحه بوجود فيجو و زيدان ... ولكن نرجع ونقول انه مظلوم مظلوم مظلوم

واخر تعليق عندي على كلام الأخ صدى الأمس
اتفق معك في كل الكلام اللي قلته باستشناء نقطه واحده وهي رحيل فيجو او جلوسه على دكة الاحتياط .. اخالفك في هذا الرأي لسبب واحد انا اشوف انه مقنع بالنسبه لي وهو ان الفريق لازم يعتمد على لاعب من خلال مهاراته الفرديه يعني لازم يكون فيه تنوع في الهجمات صحيح ان فيجو يقتل بعض الهجمات لكن هذا شي طبيعي في عالم كرة القدم صحيح ان فيجو يعاب بكثرة سقوطه بسبب و بدون سبب و كثرة احتجاجاته وهذا شي طبيعي بني آدم لا يخلو من العيوب

ولكن في النهايه تبقى وجهات نظر
واسف على الاطاله لكن كما تفضل اخوي صدى الأمس بأن ابداعك جبرنا على الاطاله اخوي ريفالدو الفن ... والف شكر مره اخرى

تحياتي للجميع