اخوي العزيز كايدهم عندي كم ملاحظة الله يحفظك

إقتباس "لو مدرب ريال مدريد أبـعد من تشكيلته رونالدو وزيدان وبيكهـام .. ماذا ستكون ردة فعل جمهور ريال مدريد "

أولا : جمهور ريال مدريد اتوقع انه فاهم و يعرف ان المدرب ما اخرجهم الا لسبب .

ثانيا : 1 - الجابر لازم نعترف انه الان ماهب مثل الجابر الي قبل سنتين , الجابر الي يلعب 90 دقيقه متواصله بفن ولياقه فل , يصلح كوره لهذا ويذب كوره لذاك ويوجه هذا وينبه ذاك ( مشكله لازم نمدحه شوي لا يجينا واحد من البزارين ويقول مندس !! ) الجابر الوسم هذا يلعب اخر 20 دقيقه , مره يبدع ومره لا , وغالبا ما يبدع لكن لو لعب المباراة كامله ضنك يبقدم فيها نفس الي بيقدمه في الـ 20 دقيقه ؟ والي يقول سامي طلب من المدرب انه يلعب اساسي هذا كذاب , سامي مستحيل يسويها وهو ابخص من المدرب في مصلحته و ابخص من المدرب في سمعته .

2 - الشيحان والدوسري : بسألك سؤال ... لو المدرب لعبهم اساسيين من اول ما تم التعاقد معهم, شي طبيعي انهم ما راح يقدمون المستوى المطلوب منهم صح وبعدها شف الكلام في الجرايد والمنتديات الي يقول صفقات فاشله والي يقول ليه تلعبهم وهم توهم جدد والي يقول مدرب فاشل والي يقول اداره فاشله ....الخ . لذلك حب يتركهم حتى تصل لياقتهم وجاهزيتهم لـ 100% . الشيحان مع انه ما يلعب الا في اخر المباراة الا ان مستواه تحسن ونفس الشي مع الدوسري تذكر مباراته الاولى قدام الاتحاد ؟ تذكر كيف كان لعبه ؟ الان الحمد لله تحسن . وبعدين لنفرض انهم وصلوا لقمة مستوياتهم كيف تبيه يلعب الدوسري ويترك الشلهوب على دكة الاحتياط ؟ وكيف تبيه يلعب الشيحان ويترك الجمعان و تراوري برا ؟ لا تقولي يلعبهم كلهم لان كذا بيحوس ابو الفريق ويبي لهم شهور حتى يتأقلمون مع الطريقه الجديده .

3- التمياط : نفس الشي راجع من اصابة وخايف ترجع له من جديد , حتى في كل مره يعاق فيها التمياط تشوف المدرب يفز وحاوش والجماهير تحط يديها على قلوبها . وبعدين اذا ان شاء الله تعافى التمياط واصبح قادر على انه يلعب اساسي كيف تبي سامي والتمياط يلعبون اساسيين من بداية المباراة وثنيناتهم يلعب في نفس المركز ولهم نفس الدور ؟؟ لا تقولي يلعب سامي مهاجم لان عندك في الهجوم تراوري والشيحان والجمعان ومدري من بعد نسيتهم من كثرهم .

إقتباس الهـلال الآن لعـب أكثر من 14 مباراة .. أريد أن اسأل : كم مباراة لعبها الهـلال وقلنا للهــلال ... براافووو هذا الهــلال ؟

غريبه تطلع هالكلمه من "مشرف سابق في شبكة الزعيم " الحين وشهي 14 مباراة ؟ هذي ما تجي ولا ربع الدور الاول في اي دوري اوروبي !!! من جدك تحكم على مدرب من 14 مباراة فقط ؟ لا والي يسمعك يقول ما فزنا الا في ثنتين بس ! قل خمس مواسم اربع مواسم هذه معقوله .

إقتباس .. العـنزي ، والمطيري

العنزي لاعب رائع جدا جدا , والي يحضر تمارين الفريق ومبارياته الوديه يعرف صحة كلامي , اما المطيري فتكفيك تغطيته الدفاعيه وفاولاته .

إقتباس آدميوس لا يـفرق عندما يلعب مع نادي قوي او صغير .. طريقة لعب الفريق لا تـتـغير .. نفس الخطه و التشكيله

هالجمله اشوف الأعضاء ما غير يرددونها ولا عرفت وش المقصود منها !!!! غريبه جدا

الحين اذا لعب مع فريق قوي , وش رايك انت تبيه يلعب مهاجم ولا مدافع ؟ ان لعب مهاجم وخسرنا قلتوا متهور ولا يفرق بين الصغير والكبير الخ . وان لعب مدافع قلتوا جبان وشوه سمعة الزعيم ...الخ.
واذا لعب مع فريق ضعيف و هاجم وجا فينا قول من مرتده وخسرنا , شرشحتوه شر شرشحه واستلمتوه وقطعتو فيه الين يقول امين مثل مباراة الطائي . وان لعب مدافع سواء فزنا ولا خسرنا ماهب سالم منكم ومن تقطيعكم فيه .

يعني ياليت اخوي العزيز تشرحلي كيف تبيه يلعب امام الفريق القوي وكيف تبيه يلعب امام الضعيف .

إقتباس ولعل فضيحة مباراة الخليج وضربة الركنيه في الدقيقه 43 وتواجد لاعبـين أو ثلاثه .. و الفريق متقدم بهدفين .. تكشف لنا عقلية آدميوس الدفاعي

يا ساتر صارت فضيحه . من متى والركنيات مقياس على عقليات المدربين !! جديده هذه .

إقتباس ولعل فرحة آدميوس بعد مباراة الاهلي " بالتعادل " تـكشف لنا انـنـا في وضع مـزري

كيف ؟ انا ماشفت هاللقطه لكن شريط المبارة عندي ... ممكن توضحلي كيف اكتشفت انه فرحان ؟ اذا بتقولي انه كان يسلم على اللعيبه والاداريين ويقولهم " قود قيم , قود قيم " ترا هذه بعد كل مباراة تصير !

إقتباس لازم اللاعبـين يتأمرون ويجعلون الفريـق ينـهزم .. حتى يــقال الـــمدرب ؟!!

الحين بدال ما تقول ليش اللاعبين ما يصححون اخطاء المدرب تبيهم يتأمرون عليه ؟ بديت اشك ان المسأله بينك وبين اد دي موس مسأله شخصيه !!

في انتظار ردك ... اذا حاب ...

تحياتي