بسم الله الرحمن الرحيم

مرتن من المراريت وانا (منسدح) قدام هل أطخم اللي اسمه لابتوب ونطقطق هنا وهناك ونحوس في الشبكة العنكبوتية ( أعاذنا الله واياكم من شرورها) وبدون مقدمات (رعصت ) على ( أيقونة) الأكسبلورر وفتحلي الموقع (العالمي ) قوقل ... لقينا موقع ينافس النصر في العالمية .... المهم انتظرت برهه من الزمن افكر ( ترى برهه متعوب عليها ) قوقل في قلوبنا ورى ما اسوي بحث عن اي شي يخطر في بالي بجرب بيطلعه لي قوقل ولا لا...

وبدينا رحلت الالف ميل بالبحث عما سيعجز عنه القوقل ...وانا اللي امحطلك هاك الاسئلة وكل مرة القى الرد من قوقل تصدقون حتى يوم سالته ليش النصر عالمي لقيت اجابة ... موقع فيه مسابقة اسال سؤال سخيف واللي بعده يجاوبك وبأمكانكم تجربون بنفسكم ...

ومع الحوسة طلعت اللمبة فوق راسي وجاني هاك السؤال اللي اسهل منه مافيه بس متأكد إن إجابته جدا صعبه على قوقل بس مو علينا كهلاليين اجابته بتكون سهله جدا جدا ..

"ليش إدارة المنتخب يناظرون فقط مدربين الهلال ولا يشوفون لهم مدربين غيرهم ودائما خياراتهم الهلال اولا"

سؤال سهل يا قوقل عيب عليك ما تعرف تجاوبة افااااا كل الملايين اللي يدعمونك فيها عشان تكون افضل محرك بحث في العالم ولا تقدر تجيب لي موقع واحد كاتب هل الجمله ....

بكل بساطه يا قوقل انا عندي الجواب لك ليش ما لقيت هل السؤال وبجاوب لك كمان على السؤال ...اسهل من كذا مافيه يا قوقل (بيه ) بكل بساطة كل الشعب اللي يهمه المنتخب السعودي يعرف هل الجواب عشان كذا ما لقيته عندك ولا في امل احد يسأله حتى اذا كان صغير بالسن لأنهم بكل بساطه يعرفون الاجابة ...

لا تكفى لا تحلفني أقول الاجابة يا قوقل بلاش إحراج يا قوقل ... يالله ليش الاحراج هذا مشكلتي أحبك يا قوقل ولا أقدر أرفض لك طلب ...

الجواب يا قوقل لأن الهلال دائما مبدع في أختياراته للمدربين الا ما ندر وكل مدرب يجي للهلال يلقى الجوالصحي للتدريب ويلقى (كوكبة ) من النجوم الجاهزة للدفاع عن شعار النادي فقط يا قائد الكتيبة وجه الجنود لخوض المعركة ....

وفجئة اشوف صفحة قوقل تسوي تحديث للصفحه ويطلعلي سؤال يقول .. "ليش طيب إدارة المنتخب ما يجيبون مدرب ذو صيت ولا يخلون مدرب الهلال اول مدرب لهم في خياراتهم للمدربين"...

بسم الله الرحمن الرحيم أعوذ بالله من الشيطان الرجيم أقرى المعوذات وش اللي صار قوقل يطرح أسئلة ... افاااا يا قوقل كنا حنا اللي نسألك واللحين أنت صرت تسأل,,,,
رد قوقل أعذرني يالاخو بس الهلال كيان أكبر من السيرفرات اللي حطوها لي لو بسجل كل معلومه عن الهلال لازم اسويلة سيرفر لحالة بس خلنا من طولة الكلام جاوب ولا ماعندك جواب عن السؤال ..

مسكين يا قوقل حنا الجمهور الهلالي تجد كل شي عندنا لو تبي حتى تاريخ الانديه الاخرى عندنا ناهيك عن فضائحهم ,,, نجاوب عن سؤالك يا قوقل .. بص يا باشا ... بكل بساطة لسببين لا ثالث لهما اول يفكرون انهم يوم ياخذون مدربنا الفريق خلاص بيندمر ولا راح نقدر نجيب مدرب غيره ولا حتى نقدر نجيب بطولات لكن هيهات والسبب الثاني هم واثقين ثقه تامة وعمياء بأن أفضل الكوادر الوطنية والأجنبية سواء تدريبية أو إدارية أو لعيبه هي في نادي الهلال فقط ....

وترجع الصفحه تسوي تحديث ... ويكتب لي أخونا قوقل ... ليس طيب حاقدين عليكم إدارة المنتخب ....

وهنا اللي اعصب على قوقل بغيت اضغط ( أيقونة ) أغلاق وأعذبه بس هديت اعصابي وقلت لازم أكون حليم معه جيزة جيز بقية الانديه اللي رحمناهم.... اسمعني يا قوقل يا حبيب قلبي المنتخب مش إدارة منفصلة لحالها المنتخب تابع للأتحاد السعودي لكرة القدم وهل ( إتحاد ) تنطوي تحته الاندية السعودية كافة لكن للاسف ضمن هذا الاتحاد ناس ما يهمه سوى شعار ناديهم لو على مصلحة المنتخب فلذلك ليس إدارة المنتخب هي السبب في الموضوع بل من وضعهم في الأتحاد السعودي لأجل خدمة مصالح أنديتهم المفضلة...

بس تصدق يا قوقل ياخذون ثلاثة ارباع لعيبة الهلال للمنتخب وفي النهاية يفوز المنتخب وإذا غلطوا وما أخذو لعيبة من الهلال المنتخب يكون للاسف مستواه ( مدحدر) في الارض ... يعني حال لسان المنتخب يقول كيف نعيش بلى ( هلال ) ...

وترجع صفحة قوقل تسوي تحديث ويطلعلي هاك السؤال الغريب .. طيب أرفضو تعطوهم مدربكم أو لعيبتكم وخلاص بيتأدب المنتخب ...

مسكين يا قوقل المشكلة انك ممكن تعرف وش معننا كلمة الأنتماء لكن صعبه تحس فيها مهما كان هذا الوطن يا قوقل نفديه بكل ما نملك فما بالك لو طلبو مدرب او لاعب أن بغوا ياخذون فريق كامل فدى لك يا وطن بس مع ذلك سيظل الزعيم زعيم يا قوقل ياصديقي العزيز ... مهما كان الهلال جزء من هذا الوطن ولن يرفض خدمة وطنه لو على حساب نفسه لكن هل تعلم بأن في فرق ثانيه لا تساعد الوطن وتمسى بأندية الوطن ... هل تصدق يا قوقل في أندية تقول الوطن ضدنا مع أن كل خدمات تقدم لهم ويتهمون الوطن بأنه ظالمهم ؟.....

لكن الغريب يا قوقل ان الوطنيه لا تكون الا على حساب الهلال ولا تعليق على ذلك فقد كفى ووفى الامير عبدالله بن مساعد عضو شرفنا

ويرجع الذيب قوقل يسوي تحديث قلت الله يعين على أسئلتك وألاقي قوقل كاتب لي بالخط العريض تصدق إذا انا كنت عملاق البحث فصدقني بعد كلامك عن الهلال أنا ولا شي قدام الكيان الهلالي هنيئا لك بالهلال..


صافرة

* نحن نعيش في مسرحية كوميدية رياضيه ابطالها معروفون لذلك كتبت المقالة باسلوب كوميدي (لنواكب) التطور..!!!

*نحن من ندعم الوطن وغيرنا نادي الوطن..

*كلام بالصميم من الزميل فهد الروقي هل يكون المرتشي مديرا فنيا للمنتخب.. مو كل مرة أيها الأعلام الأصفر...

*تصريح البلوي الاخير هو محاولة تخدير لجمهور ناديه وابعاد مشجعي نادي الهلال عن تشجيع ناديهم فاحذرو فياسر ليس بهذه السذاجه ليذهب من نادي الهلال وتصريحه في جريدة الرياض خير دليل عندما قال وهل سيتركني الهلاليون ؟


سبحانك الله اللهم وبحمدك واشهد أن لا اله إلا أنت أستغفرك وأتوب إليك

حرر في 20 صفر 1430هـ

أخوكم
صلاح بن أحمد السليماني