احلى خميس وجمعة عاشها الناس في منطقة الرياض وضواحيها اللهم لك الحمد ، من قمة الوناسة عندهم انك لوتطلب من واحد منهم خمسة ريال عطاك عشرة ومعها ابتسامة تشق الوجه !!

الدنيا صب وعطايا رب ،الله يجعله نازل برحمة ويحفظ احبابنا في المناطق اللي كان فيها السيل شديد عليهم واخص اهلنا في نعجان والضبيعة والدلم ،،،( طبعا انا هنا اتكلم عن منطقة الرياض فقط )

اما الدلم هذي فكلام ثاني !! السيول مسوية فيها العجايب ، المزارع رويت ، والشعبان تدك وتمشي والشوارع بعضها لعب فيه السيل حتى ان المخرج اللي يربط الرياض بالدلم والحوطة والحريق ووادي الدواسر مغلق يوم الربوع لشدة جريان السيول ، واللي يبي يروح لذيك الدير لازم يدخل الخرج ويسلك طريق العيون ( نقلا عن اقاربي اللي سلكوا هالطريق )

انطلقت من الرياض يوم الخميس الصبح ومن يوم مشيت وانا في سيول ومياه ، مرينا الدلم والصحنة ولاازالت آثار السيول قائمة ( وديان تمشي ومن اهمها وادي القصايم المشهور ، مناقع ماء، اسفلت رايح في خرايطها والمويه مغطية اجزاء منه ، بيوت ومزارع معزولة بالمياه تماما )

انتهينا من الدلم ووصلناالحوطة وصادف وصولنا بداية جريان احد الأودية المشهورة هناك وكان منظرا يستحق المتابعة والاعجاب حيث المتعة والجمال في قوة جريان المياه وخريرها الذي يشنف الآذان ، ورأيت واحدا من كبار السن وهو في قمة وناسته ويلهج لسانه بشكر الله فبعض اصحاب المزارع هناك نضبت آبارهم واوشكت نخيلهم على الهلاك لكن رحمة الله والواسعة انعمت علينا وعليهم بهذا الغيث العميم .

النخيل في الحوطة رويانة ماشاء الله ، الأرض استردت عافيتها ، السد فيه ماشاء الله من المياه بعد هذه المطرة المباركة .

رحلتنا حطت رحالها في الحريق بعد المرور على نعام والمفيجر ، وكل هالخدان جاها من الخير ماسيل الشعبان واسعد القلوب حتى ان بعض الشباب من الفرحة قاموا باطلاق الألعاب النارية ليلة الخميس على ضفاف الأودية التي كتب لها الجريان ، هالماطر المبارك رفع منسوب المياه في سد الحريق الى مايقارب تسعة امتار وهو رقم قياسي لم يسجل من قبل في امطار الوسمي

سد الحريق صار مثل الكورنيش عصرية الخميس الكل كاشت وفالها !!الابتسامة لاتفارق محيا الجميع ،الجميع مستيشر ويبارك بعضهم البعض وكأنهم في عيد !!

هذه بعض مشاهدات اخيكم الفقير الى ربه ، أرجو ان تحوز على رضاكم والمعذرة على القصور واللي عنده زود لايحرمنا ،،،

اللهم لكم الحمد والشكر على آلآئك ونعمك التي لاتعد ولاتحصى ، اللهم اجعل ماأنزلته لنا خيرا وبركة وبلاغا الى حين ، اللهم سقيا رحمة لاسقيا هدم ولاغرق ، اللهم احفظ احبابنا في كل مكان وآمن روعتهم ،،،،،