اخوي الموهوب
مساك الله بالخير .

إقتباس ولكن ادهشتني الاسباب " الدرزن " التي سردها الاخ العزيز : العطيب الهلالي واللي ادهشتني صراحة هذا بالذات 11- عدم تمرين اللاعبين على عملية الاستفادة من الكور الثابتة واللي من ضمنها قدام الجيش حول 14 ركنية لم يستفد ولا من وحدة منهن . يبدو يا غالي انك لم تحضر تمرينا لفريق الهلال منذ اشراف ادديموس على الفريق .. وربما انك لم تشاهد ادديموس على الطبيعة ..

وش دعوى عسى بعد ماهيب التمارين محتكرة لناس معينيين ؟
وبعدين اديموس هذا مشفر والا مخفّر ماحد يناظره على الطبيعة .
ياخوي ترى الهلال وتمارينه ملك لجماهير الهلال كلهم ماهيب لناس عن ناس الله يصلحك .
والا لازم نعلمكم اننا حضرنا التمرين علشان تصدقون كلامنا .
وبعدين اللي يخليك تحضر التمارين وانت بالخبر ورا ما يخليني احضرها وانا بجنب النادي .
وبعدين تبغاني اكتب عن شي انا ماشفته . أنا ماتكلمت الا عن شي شايفه بعيني .
وانا قلت شوفو الفرق بين باتيستا البرازيلي المغمور وبين هالداهية العالمي وش كانو يسوون بالتمارين .
يعني اتكلم عن اثنين شفت تمارينهم والكل يذكر كيف كانت تنفذ الضربات الحرة والركنيات ذيك الايام .
أيام أشرف قاسم وابو اثنين والثنيان والرشودي والرشيد وموسى نضاو.

إقتباس فلا اذكر ان هناك تمرين لنادي الهلال " خصوصا" قبل المباريات الا ويكون هناك اقل شيء 10 دقائق تمرين على ضربات الزاوية ..!! حتى هنا في المنطقة الشرقية مع ان الوقت كان ضيق جدا .. كان هناك وقت مخصص لتنفيذ ضربات الزاوية ..!!

الله عشر دقايق قايلها كنها ياشيخ راس الأسد .
وعشر دقايق كافية لتعويد اللاعبين على كيفية الاستفادة منها .
وبعدين ويبن فايدة هالعشر دقايق .
ياخوي ريفالينو كان يشوت بعد التمارين حول 80 ركلة علشان يتعلم يعني غير التمارين وانت تقول عشر دقايق .
هالعشر دقايق لايمكن تتعدى أكثر من ثلاثين ركنية هذا اذا حسبنا معدل ثلاث ضربات لكل دقيقة .
طيب ما يتخلل هالتمارين ايقاف لتوجيه الاعب المنفذ وايقاف لتوجيه المدافع المخلص وايقاف لتوجيه المهاجم او من يريد التسجيل وتوجيه للحارس ..
واحسب كل ايقاف 15 ثانية يعني والله لوهو عنده عالميين ما قدر بعشر دقايق يعلم اللاعبين كيف الاستفادة من الركنيات .
ياخي انا ابسألك الشلهوب من متى ما نفذ ركنية صح .
الهلال متى هالسنة عمره استفاد من الضرباتالحرة .
تمرين ماله فوايد محسوسة وش نبغا فيه .
الجمعان كم مرة سجل فاول من هالضربات والا الشلهوب والا سامي والا المطيري والا عمرهم نفذوها صح ؟
ياخوي تذكر عام 1417هـ بالمربع اللي أشرف على الفريق كان جوبير البرازيلي .
وتذكر في ثلاث مباريات ثنتين ضد الاتحاد ووحدة ضد الأهلي بالنهائي تذكّر كيف كانت الركنية للهلال بنسبة 70% هذف وقدام الاتحاد بالمباراتين سجل اهداف الهلال منصور الموينع من ركنية بالرياض وحسن نمشان من ركنية بجدة .
ليش وهم نفس اللاعبين اللي كان يدربهم هانجيم . ولكن لأن جوبير ركز في هذه الأشياء استطاع الاستفادة منها .
وعموما في الكرة العالمية كثير من المباريات تحسم من خلال الكور الثابتة .
حنا مع هالمدرب الركنية اللي لنا بنسبة 80% هجمة مرتدة علينا .
واذا صارت علينا حطينا ايدينا على قلوبنا وكل يقول ليتها تصير قريبة من الدعيع .
وانت تقول كل تمرين عشر دقايق أقل شي يمرنهم .

إقتباس عموما اتمنى يا غالي ان لا يكون هدفك من خلال ردودك اثبات صحة كلامك .. انا شخصيا احترم وجهة نظرك .. ولكن لابد ان يكون لديك ايضا مرونة واستعداد لتقبل آراء الغير ولا اقول ان تكون مجبرا على الاقتناع بها .. المهم ان تستمع لاراء الغير دون ان تجهز ردا لها قبل ان تقرأها ..

الله اجهز رد لها قبل اقراها حشا لاصير اعرف الغيب وانا ما أدري .
ياخوي انا رديت بناء على ما قريت مهوب بناء على شي ما اعرفه والا ما قريته .
دور غيرها .

إقتباس 1- لياقة عند اللاعبين صفر والدليل النتايج تنقلب على الهلال في الشوط الثاني في أكثر من مباراة .

نعم يمكن قولة صفر مبالغ فيها لكن من باب المجاز .
وعموما هل انت مقتنع بلياقة لاعبيننا وانهم لياقتهم مية على مية .

إقتباس لنتابع نتائج كل مباريات الدوري لاعطيك الرد على هذه النقطة بالارقام .. ونشوف مدى فائدة اللياقة اللي ماهي عاجبتك .. الدور الاول 1- الهلال × الاتفاق -------- 0/0 مافيه احد قلب النتيجة على احد ..

لكن عد للمباراة وناظر من اللي كان مسيطر على الملعب وناظر من اللي يستطيع افتكاك الكورة من الخصم لاعبيننا والا لاعبي الاتفاق .

إقتباس 2- الهلال × الشباب ------- 2/2 في هذه المباراة احرز الشباب الهدف الاول في الدقيقة 23 والهدف الثاني للشباب في الدقيقة 26 وفي الشوط الثاني قلب الهلال النتيجة الى التعادل بعد هدف الحربي في الدقيقة 38 وهدف الشلهوب في الدقيقة 44 ( يعني في نهاية الشوط بمعنى اخر عصارة اللياقة كلها طلعت ) مع العلم ان تراوري اضاع هجمة لا تضيع في اخر الدقائق ..

نعم في هذه المباراة ظهر الهلال في نهاية الشوط الثاني .
لكن السؤال ماذا عمل في الشوط الأول لكي تستنفذ لياقته وبالذات المهاجمين .كان محصور في ملعبه يعني لم يركض المهاجمون ذلك الركض اللي يخليهم يستنفذون اللياقة .
الله مباراة وقفت على هجمة تراوري .
الله يخلف بس على الهلال اللي تحسم له المباراة ضياع هجمة .
اجل احسب كم هجمة ضاع للشباب الشوط الأول .
هذا مشكلتنا اننا حصل التعادل مع الشباب بالوقت الضايع واعتبرناه فوز ونسانا كل شي بالمباراة وطلع عمل المدرب تمام التمام .

إقتباس 3- الهلال × النصر ---------- 1/ 1 المباراة كلها كانت هلالية بحتة وهدف النصر صحيح انه جاء بعد هدف الهلال الا انهما كانا في الشوط الاول ومافيه احد قلب النتيجة في الشوط الثاني .. اضف الى ذلك ماصاحب المباراة من اخطاء تحكيمية وفاولات .. بالاضافة الى ان هدف النصر جاء من كرة ثابتة ..

المباراة الوحيدة فعلا اللي تقول ان الهلال كان يستحق الفوز ولكن لم يتحقق . وعموما مباريات الهلال والفقر لها وضعية خاصة منذ زمن يعني غالبا يحكمها جهد اللاعبين وجديتهم وظروف المباراة نفسها سوا النفسية او التحكيمية .
وتذكر ان الهلال فاز على النصر بدون مدرب عام 1410هـ بعد هروب كاندينو من المغرب بعد بطولة العرب .
وتذكر بعد ان الهلال فاز على النصر وحنا يدربنا كامبوس ابو قصيصة ذاك الهدر وكان يدرب النصر جورج آرثر البرتغالي .وانت تعرف الفرق بين الاثنين وفي نفس الدوري تعادلنا مع النصر 2×2 وكان النصر مطرود منهم الحلوي الشوط الأول وحنا اللي جبنا التعادل وبالغرابيل سجله الثنيان بالوقت الضايع .يعني مباريات الهلال والنصر طلعها من المقياس .

إقتباس 4- الهلال × الأهلي ------- 2/ 1 احرز الاهلي الهدف الاول في الدقيقة 20 من الشوط الاول واحرز العنزي هدف التعادل في الدقيقة 25 .. وقلب الصويلح النتيجة في الدقيقة 47 من زمن الشوط الثاني .. ايضا في اخر انفاس المباراة ..

الصويلح دخل آخر تقريبا ثمان دقايق والهدف جا من كورة طويلة من منطقة الدفاع الهلالي انطلق خلفها الصويلح والعنزي واستغل الصويلح ربكة دفاع الأهلي وحارسهم وسجل الهدف .

إقتباس 5- الهلال × الوحده ------- 2/ 3 قد تكون هذه هي المباراة الوحيدة التي قد تكون لصالح كلامك .. اذا غضينا النظر عن ان الهدف الوحداوي جاء عن طريق ضربة جزاء غير صحيحة اطلاقا بشهادة الخبراء والمحللين جميعا .. احرز الهلال الهدف الاول في الدقيقة 23 من الشوط الاول . ثم احرز باولو ديسلفا هدف التعادل في الدقيقة 39 من نفس الشوط .. واحرز تراوري الهدف الثاني في اول الشوط الثاني .. ثم تعادل ديسلفا في الدقيقة 43 من الشوط الثاني من ركلة جزاء غير صحيحة .. ثم احرز سلطان اللحياني د (90+3 ) في الشوط الثاني بعد انفلات المباراة من لاعبي الهلال .. والكل اجمع ان الهلال في تلك المباراة كان سيئا .. وايضا كان هناك بعض الاخطاء للمدرب يتحمل جزء منها ..

يعني هالمباراة فقط الهلال كانت لياقة ضعيفة أما باقي المباريات كانت عال العال طيب ورا وين لياقة باقي المباريات اللي قبلها واللي بعدها .
ترى ماهيب يم سالفة اننا نقول ان اللياقة في مباراة تعتبر في بدايات الدوري نقول انها ضعيفة وهي قبلها بمباراتين نغني بلياقتنا !!!!

إقتباس 6- الهلال × الشعلة ----- 3/ 0 محمد الشلهوب في د ( 24) في الشوط الأول عبدالله الجمعان في د ( 27) في الشوط الأول محمد العنزي في د ( 66) في الشوط الثاني اعتقد لا تعليق على هالمباراة والاهداف على مدار الشوطين ..

أنت تقارن مباراة مع الشعلة بمباراة مع الاتحاد والاهلي والنصر .
تقارن ضغط لاعبي هالفرق بضغط لاعبي الشعلة .
تراك صرت نفس سالفة مدربنا خطة الخليج والاتحاد وحدة 4/5/1
وبعدين لو فريقك عنده لياقة في ذيك المباراة كان انتهت على الأقل 5/0

إقتباس 7- الهلال × الطائي ----- 1/ 2 حسين العلي في د ( 41) في الشوط الأول حمادجي د ( 61 ) في الشوط الثاني مودي نجاي د ( 88 ) في الشوط الثاني هذه المباراة لم اشاهدها في الحقيقة ولكن هي تؤيد كلامك ان الاهداف ولجت في مرمى الهلال في الشوط الثاني وربما يكون للياقة دور في ذلك .. ولكن لا تنسى ان الطائي بعد هذه المباراة قلب الطاولة على كل الفرق التي واجهته بوجود المدرب الرائع العجلاني وما قدمه للطائي من دعم معنوي .. عموما ارفض التعليق على هذه المباراة لانني لم اشاهدها ..

لا يا طويل العمر الدليل ناظر وشلون انطلق مودي نجاي وناظر دفاعك ووسطك عجزو يلحقونه .
وبعدين من الدقيقة 61 إلى 88 = 27 دقيقة وش سوى فريقك فيها ؟؟

إقتباس 8- الهلال × الإتحاد ------- 0/ 0 اعتقد انك متفق معي ان الهلال يستحق الفوز في هذه المباراة ومتفق ان الهلال قدم مستوى رائع وخذلته النتيجة وخذله الحكم الذي لم يحتسب ضربة جزاء للهلال صريحة جدا لاحمد الدوخي في نهاية الشوط الثاني ( والمباراة تلفظ انفاسها ) وهنا اللياقة كانت لصالحنا وليس ضدنا ..

صارت ضربة جزاء غير محتسبة هي الدليل على اللياقة . وبعدين احمد الدوخي يعتبر حالة نادرة في لاعبي الهلال كما كان التيماوي في فترة من الفترات حالة نادرة في لاعبي المملكة باللياقة .
والحمدلله ان الله يسر لنا في ذيك المباراة محمد الدعيع والا كان امور !!!!
واذا صرت بعد مقتنع بمستواناقدام الاتحاد فعز الله دجينا .

إقتباس 9- الهلال × الخليج ------- 2/ 0 تراوري د (5) في الشوط الأول تراوري د (67) في الشوط الثاني اهداف على مدار الشوطين ..

نفس الكلام اللي قلته عن الشعلة أقوله هالحين وازيد عليه ان الخليج بداية الشوط الثاني حجر فريقنا حجر بمنطقتنا .
وكلنا كنا حاطين ايدينا على قلوبنا لين سجل تراوري الهدف الثاني .

إقتباس 10- الهلال × الرياض ------ 2/ 1 نتيجة الشوط الأول 1/ 1 الهدافون حسين العلي د (39) في الشوط الأول سامي الجابر د (95+) في الشوط الثاني الهدف في اخر الدقائق .. في الشوط الثاني .. حرام عليك .. كل هذا وماعندهم لياقة ؟؟!!!

قلتها ضربة جزاء واللي تسبب فيها سامي وسامي ما نزل الا الدقيقة 13 الشوط الثاني يعني ما استنفذ لياقته .
وبعد ارجع للمباراة وناظر من اللي كان ضاغط على الثاني ومن اللي مشكل خطورة .

إقتباس 11- الهلال × القادسية -------- 2/ 0 الهدافون حسين العلي د (21) في الشوط الأول حسين العلي د (54) في الشوط الثاني هدف في الشوط الاول والاخر في الشوط الثاني

المباراة الوحيدة التي فعلا أقنعتنا هذه السنة . ولكن أتت مباراة الاتفاق بعدها وقضت على أملنا بتعديل الوضع .
وبعدين لاحظ ان رقمها 11 يعني بدري تو الناس وش معجلنا على المستوى باقي نصف الدوري .
الدور الثاني

إقتباس 12- الهلال × الإتفاق -------- 1/ 0 سيسية في منتصف الشوط الثاني ...

هالمباراة بعد الله ستر وساق لنا الدعيع في أربع كور والمفرج في كورة والا كان اعلوم . ارجع للمباراة وشف وشلون الباشا يمر من عند ابو سليمان والمفرج والغامدي . وشلون صالح بشير يمر من عند ابو عزيز وهم عاجزين عن ايقافهم الا بالفاولات . وعموما قلت لبولما اتحدى أي هلالي يعرف الهلال زين يقدر يقتنع وهو صادق بالفريق اللي لعب قدام الاتفاق .ياشيخ بداية الشوط الثاني ضيع الاتفاق ثلاث أهداف محققة .

إقتباس واذا كنت تريد ايضا مباراة الجيش الاول .. صحيح ان الجيش قلب المباراة على الهلال .. ولكن هناك اسباب غير اللياقة .. 1- الارهاق من كثرة المباريات ..

هههههههههه
ضحكتني بكثرة المباريات ياخوي وش هالمباريات الكثيرة اللي لعبها الفريق ؟؟؟؟
ما راح من الدوري الا ثمان مباريات وتقول لي كثرة المباريات لا ومباراة اللي قبل مباراة الجيش اجلت اللي هي مع القادسية يعني اللاعبين اخذوا راحة تكفي لمباراتهم مع الجيش .

إقتباس 2- الارهاق من السفر والمشقة وماواجه الهلال في سوريا

المشكلة لاعبينك ومدربك والمطبلين كلهم اعتذرو بالتحكيم ما قالوا الارهاق .

إقتباس 3- وهو الاهم .. تصرفات الجمعان اللي خلت الفريق كأنه يلعب على سلك كهرب مو على ارضية ملعب .. مما ادى بالفريق للنرفزة ...

الأهلي اللي اعتذرو ا فيه ابو لما وغيره يوم هزم الاتحاد كان مطرود منه لاعبين ورا بعض وتعادلو مع الاتحاد اللي متقدم وكامل وعجز الاتحاد يسجل فيهم ولا هدف .
وبعدين نفس مباراة الجيش ناظر أحداث المباراة عموما وشف الاهداف اللي للهلال وشلون جابوها ؟؟
لا تقول الجمعان وغيره الجمعان يوم يطرد كان الفريق متقدم .يعني لو مدربك سنع ولياقة لاعبينك زينة كان قدرو يتحملون الضغط اللي جاهم .

إقتباس اما مباراة الجيش الثانية .. طبعا انت تذكر هدف المنقذ الصويلح في اخر الدقائق .. في نهاية الشوط الثاني ..

قلتها المنقذ وهالمنقذ متى دخل دخل قبل الهدف بدقيقتين يعني لياقته فرش طازجة . والا لو كان من لاعبين المباراة من بدايتها كان ماقدر على الضغط اللي قام به على الدفاع السوري وحارسهم وقدر بعد يلحق الكورة ويسجلها براسه .
وبعدين هالمباراة أثبتت ان ماعندنا مدرب بس البركة بالدجة اللي بخزنة النادي والا كان ابو عبدالرحمن طيره من ليلته ذيك .

إقتباس المهم انا طولت على الشباب ولكن حبيت بس اثبت عدم صحة السبب الاول للجميع بالارقام .. وما اعتقد ان عندي وقت عشان اتحدث عن كل الاسباب ..

وش دعوى مانيب قد المقام ما استاهل انك اتطول علشاني . يعني تركتني بس علشان الشباب .مشكور وما قصرت على هالحشمة والتقدير .
وبعدين ياليت تعطينا وقت وتنورنا في باقي الاسباب .

اقول اخوي الموهوب لا تناظرون الناس بعين طبعكم ياخوي حنا قلنا أسباب فندوها تفنيد صحيح ومقنع والا على الأقل لاتتهمون الناس انهم يبون يفرضون قناعاتهم وانهم يجهزون الرد قبل يقرون اللي يبي يرد عليه والا انهم ما عمرهم شافو تمارين والا حضروا مباريات .وبعدين ترى والله نهدم الهلال اذا رضينا بهالمهزلة وطولنا عليها البال .

عموما تشرفنا واعذرنا عن القصور والا الخطا .