السلام عليكم !!

كيف الحال جميعا .. اولا انا ماني زعلان على الخساره لأننا كنا نستحقها ..

وثانيا وقبل اعلق تكتيكيا عن المباراة ابي اوضح شي ان رانييري تطور والحمد لله على الاقل صار يستفيد من تغييراته !! وان شاء الله يستفيد من اغلاطه ..

-----

احب اذكركم بكلامي الي بستمر اقوله لين يتغير الوضع (( لا نيدفد ولا ماركيوني يسموون صناع لعب )) نيدفد شيب وماركيوني طقه والحقه والحمد لله الفريق واصل لهالمركز وهذا اعتبره انجاز حاليا في ظل الضعف باهم المناطق ..

تحليلي للمباراة ..

باعتقادي رانييري دخل بالتشكيله المناسبه للمباراة .. بداية الشوط الاول شفنا الضغط على حامل الكره على لاعبين اليوفي وقلة المهاره في لاعبين الوسط ادت الى فقدان الكور

وانا بالمباراة تذكرت تشيلسي واللعب الانجليزي .. يعني على كذا بنقدر نفووز على تشيلسي ؟؟ الجواب لكم ...

سيسوكو مو بمستواه نيدفد شيب وماعنده المهاره من قبل والحين فقد القوه الجسمانيه واصبح كمالة عدد,, فقط ممتاز بتحركاته .. ماركيوني زي ما قلت قبل انه لاعب فيه السرعه فقط .. يعني ما اقدر اسميه صانع لعب ولا فيه مهاره.. فقط انضباط تكتيكي يمكن يفيد الفريق بعودته للدفاع لكنه لا ينفع هجوميا يعني ماهو صانع لعب صانع دفاع ..

الوحيد الي اقدر اقول انه ممتاز بالوسط هو ماركيزيو لكن يد وحده ماتصفق ..

انتهى الشوط الاول بهدف للأودني .. الشوط الثاني كماهو معروف شوط مدربين ..

دخول ياكونتا بدال ماركيوني اعتقد انه اختيار صائب ..

واصبح الفريق يلعب

سيسوكو
نيدفد ........... ماركيزيو
جيوفنكو

اودنيزي كلهم في المناطق الدفاعيه ما عدا لاعب واحد وللأسف الفريق يلعب كور طويله وتمريرات خاطئه .. وما فيه لعب على الاطراف او مسك الكره مع الفريق فتره طويله ..

الدقيقه ٧٠ النتيجه ١-٠ للأودني .. لو كنت مدرب اليوفي وقتها كان عندي خيارين .. واعتقد ان المدرب لو فكر وش الطريقه لوصول المرمى راح يلقاها باحد هالطريقتين :

١- الفريق يلعب قدام فريق مدافع بكامل لاعبينه ماعدا واحد .. اما انك تلعب على طريقة كابيللو ولليبي وهي اشراك لاعب ظهير بدل احد القلوب .. وكنت افضل دخوول دي تشيللي مكان ليقروتالي لأنه مافيه طريقة للوصول لمرمى اودنيزي الا عن طريق الاطراف .. وتكون مراكز اللاعبين كذا :

مولينارو ..... ميلبيرق ..... جريقيرا

سيسوكو ... ماركيزيو
ديتشيللي ......................جيوفنكو
نيدفد
ياكونتا واماوري

بالضغط هذا تجبر الاودني انه يرجع ومهاجم واحد قدامه ٣ مدافعيين يمديك تقفل عليه ..

٢- بما ان الفريق خاسر وماعنده شي يخسره اكثر من هالخساره .. وبما ان الفريق مو قادر يمسك الوسط .. يزود مهاجم على هذولا ويدخل تريزي بدل نيدفد الضعيف جدا بهالمباراة ويدخل اكدال بدال ليقروتالي

بحيث انه يكون فيه كثافه بالوسط

ويكون توزيع اللاعبين :

مولينارو .... ميلبيرق .... جريجيرا

ايكدال .... سيسوكو .... ماركيزيو

جيوفنكو ................................. ياكونتا

تريزي ... اماوري

بكذا تقدر تمسك الوسط بوجود ثلاث محاور وماركيزيو وايكدال ادوارهم الهجوميه ممتازه .. ولو كان فيه تقدم من احد الاظهره يكون احد المحاور يسكر مكانه .. ووجود جيوفنكو وياكونتا على الاطراف راح يفتح دفاع الاودنيزي اكثر ويكون فيه مساحه لتريزي واماوري

والكثافه الهجوميه ووجود رأسي حربه يخلي الفريق اقوى هجومي ويمكن من ربع هجمه يجي هدف ..

ولو دخل ياكونتا مع الثلاث مهاجمين او صار فيه تبادل بالاماكن راح يحدث فراغات بدفاع الأودنيزي .. او حتى احد المحاور دخل مع المهاجمين زي ماشفنا من بولسن كان لحاله .. لأن كل مدافع ماسك مهاجم ..

لكن كل هالتفكير الي براسي ما صار وجانا الهدف الثاني بالدقيقه ٧٥ تقريبا ..

استغربت شي واحد يعني ومادخل راسي ... هو دخول بولسن .. مادري هو قوه دفاعيه ولا قوه هجوميه ولا باصات ..

اللاعب هذا لو كنت مدرب بفريق بالدرجه الرابعه بالدوري السوداني وجاني هاللاعب وقال اعطيكم راتب شهريا بس لعبوني اقوله اقلب وجهك وحنا نعطيك راتب بس لا عاد اشوف وجهك ..

واتمنى اذا خالد مسجل المباراة ابي يجيب لنا مرتدة اودينيزي لزاباتر اعتقد.. الي طلع بوفون وقطعها برجله .. وهي بين الدقيقه ٨١ و٩٠

ابي تشوفون هالعاهه الي ما دخل له دقيقتين شلون يتمشى ويتفرج على المرتده !! ايكدال افضل الف مره منه بس استغرب انه ما يلعبه ...


وكالعاده اهدافنا (( غالبا )) من كره ثابته .. وهذا يدل على انه فيه ضعف بالوسط ..

خسارتنا مستحقه .. وكان السبب بالخساره اللاعبين والمدرب !!