السلام عليكم ورحمة الله وبركاته
تقبل الله صيامنا وصيامكم ان شاء الله
والله ياشباب انا فيه كلام بقلبي لازم اطلعه ولو ماطلعته يمكن يصير لي شي لاسمح الله
ياشباب بذمتكم ماتتفشلون اذا كنتم تتابعون مباراة ومعكم واحد مصري او اماراتي او حتى هندي وفجأة وبدون مقدمات تتفاجأ ان المباراة اختفت نهائيا وبدون كلمتهم الشهيرة نتمنى منكم متابعة ماتبقى من المباراة على القناة الثانية !!! قسماً بالله فشيلة مابعدها فشيلة وحنا قلنا يمكن تنحل المشكلة بعد ماتجي قناة الرياضة والشباب لكن للاسف زادت فشيلتنا ... فدولة بحجم المملكة العربية السعودية انشأت قناة رياضية يقال انها (ثالثة) وماادري كيف ثالثة وهي قاطة مع القناة الثانية .. يعني معقولة مصر والامارات والبحرين وقطر والامارات وعمان واغلب دول العالم الثالث حتى تتمتع بقنوات لها استقلاليتها التامة ويوفون بوعودهم وهذا اهم شي .. ياخي قناتنتا الغبية ومذيعها الشهير الهويمل قال انهم بينقلون مباراة الهلال وفجأة وحنا بانتظار المباراة نتفاجأ ان موعد بث القناة الرياضية لم يبدأ بعد . ياخي طيب ماتقدرون توفون بوعودكم لاتوعدون من الاساس . ياخي الناس تبغا كلام صحيح ولا تبغا سكوت ارحم من الف وعد وكلها خراط فاضي . يعني بذمتكم وش ذنبنا نكون جالسين ننتظر المباراة وبعدين ماينقلونها مما اجبرنا للذهاب الى المقاهي لاستكمال مافاتنا بسبب وعود هذه القناة اللي والله استحي ان اقول ان عندنا قناة ثالثة لانها فشيلة
قناة ماقدروا يحطون لها تردد فضائي قلنا معليش توها في البداية
اما انهم يخلون القناة قطة مع القناة الثانية فهذي والله عيب عليهم .
انا اضمن ان اصغر دولة في العالم ومااعرف اسمها ماتسوي مثل اللي سووه ربعنا
فما بالك بدولة انتاجها النفطي في اوبك يزيد على انتاج جميع الدول العربية في اوبك وماقدروا يسوون قناة منفردة وغير كذا الوعود اللي اتعبتنا والكلام الفاضي
فما اقول الا حسبنا الله ونعم الوكيل
وياليت تعطونا ارائكم في هذه القناة البايخة .. ولا بعد ناويين يفتحون قناة اخبار وقناة اطفال
والله مشكلة صدق .. يعني تتوقعون تكون قناة الاخبار مشتركة مع قناة الرياضة والقناة الثانية ومستقبلا مع قناة الاطفال ليدخلوا موسوعة جينيس لغرائب القنوات ويشكلون اول حالة في عالم القنوات وهي : مشاركة 3 قنوات في قناة واحدة .. يعني قطة محترمة
حسبنا الله ونعم الوكيل وياشباب نصيحة لكم اذا سألكم احد وقال عندكم قناة رياضية قولوا لا ماعندنا الا قناتين غصب 1 وغصب 2
حسبنا الله ونعم الوكيل
اسف على الاطالة
لاتنسون ياشباب تبدون ارائكم في وضع هذه القناة وتوقعاتكم حولها
تحياتي للجميع