الكلاسيكو الأوروبي أو كلاسيكو اسبانيا، هي مباراة تجمع الغريمين التقليدين والعملاقين ريال مدريد وبرشلونه. صراع أبدي قديم جدا من أيام الأبيض والأسود 
. امتاز بالاثاره والجدل وحضور عاطفه كبيره في جميع اللقاءات التي يخوضها الطرفين. جميع من في اسبانيا ينشغل بمتابعة اللقاء لأنه ببساطه بمثابة واجهة كرة القدم الاسبانيه. وهنا نضع لكم لقطات مثيره للاعبي الفريقين مع ملخص لمباراه من الذاكره في ملعب الكامب نو من موسم 86/85
ولكن لكي نعيش الحدث بشكل أعمق، سنطير بكم الى اسبانيا لنستكشف استعدادات الجماهير لحظه بلحظه << ياكبرها بس 
اسبآنيا تلك البلد الجميل بكل شئ ! وفي كرة قدم تزدآن بجمآلها ! وفي الكلآسيكو يكمل جمآلها ! بل يصبح لها رونقاً خآصاً عندمآ يحضر ! من محبتي لهآ قمت بزيارة لها < والله من الهلس 
.. قبل الكلآسيكو المرتقب قلت اشوف الآجواء قبله كيف تصير رحت اسبانيا وهذاني قصيت البوردنج وبعد قصيت جوآز السفر < لاواضح انكك رآيح يالاخو ! المهم قصيتهم كلهم وركبت الطآئرة الا جنبي اسباني رآيح اسبانيا وهو ها ها صاك الستين ومستانس يطق اصبع الرجآل المهم بديت اتكلم الآرجنتينية معه .. قلتله: قراسياس << صح صح يالاسباني انت رد علي وقال: وش تحس فيه ؟
<< طلع يهلس سعودي، انا انصدمت صراحه
فقلت له: الآخو اسباني والا مشبه ؟
قال: لا كتالوني، براسك شئ؟
قلت له: لالالا، بس أسأل. لاتصير كهرب علينا الحين هدي يابو ترى انت بالستين وعندك رجل بالقبر ورجل بالارض خف على روحك شوي.
المهم نطقها سوالف معه, أسهم وعن العيال والمدارس والسياسه. واذا بالرجال يسأل
قال لي: انت وش تشجع ؟
قلت: هلالي
قال لي: بلا استئباط يلا، انت وش تشجع في اسبانيا ؟
<< خفت اقول مدريد يجيني كف مآشي مليون، بس قلت انا اخو مزنه فارس البراري والبحار ماهمني شئ
فقلت له: انا مدريدي بس احب برشلونة صراحه واعتبرهم مثل اخوي.
<< اعرف اصرف ولا ؟ ماعلينا خلوني اكمل السالفة
فقال لي: سرا الليل ياابو ثلاثة ودق صبع وقام من على السيت وعطاها شوية رقص خليجي.
<< انا انجنيت هنا
قلت له: بالله عليك انت متآكد انك اسباني ؟
قال: ترا بفقع وجهك، اوؤد بس واترك عنك حركات المبزره < اوؤد يعني اهجد باللغة الاسبانية !
قلت: انت الحين وش موديك لآآسبانيا ؟
قال: بلا لقافة . << اناانكتمت وشفت ان هالولد ذا ماينمزح فضليت معه طول الطريق ساكت ..
ابشركم أخيييييرا وصلت وشوي وبننزل من الطياره
قلت له: عجل علينا يالحبيب.
قال: اوؤد لا يجيك مخمس يعدل سنونك.
قلت له: لآيكثر اها بس اها. عجل بس اشوف عطيتك وجه انا.
<< شفتوا كيف انا قوي ، المهم الرجال مشا ولما نزلنا خلاص
قال: حياك الله هذه الساعة المباركة 
قلت: ياابو انت اسباني ولا تستهبل ؟ قال: بجد الحين بيجيك مخمس تراك مصختها، امش وانت ساكت.
<< للمرة الثانية اتفشل هذه عواقب الا تواجه الواحد لا راح اسبانيا . يوم نزلنا وقدمنا جوآزتنا وخلصنا
قال: عازمك على قهوة ماي فريند.
قلت له : لا يالحبيب مشكوووور، وراي شغل وادور محل اسكن فيه.
قال: بدبر لك عندي معارف لاتشيل هم بس قلت: يالله قدآم.
المهم قعدنا وطلب كابتشينو وانا طلبت معه كابتشينو < مع الخيل ياشقرا ! قعدنا ولا الولد يطلع شال برشلونة ويلفه حول رقبته قلت له: ياولد ترانا في مدريد اهجد بس.
قال: ابن امه الا يجي يتكلم !
قلت له : طيب طيب ياقوي الرجال هنا بدآ يخربها وبديت اشك في قدرآته العقلية حتى قمت اشك انه اللي طلبناه مو كابتشينو وقام ويقول برسا برسا ويجتمعون عيال المقهى كله وهات يالطقاق والهواش << بالكلام يعني ايه لايروح بالكم بعيد.
في نص الكلام، جا له واحد مدريدي
و قال له: اعلم انه قد تغلبنا عليكم 85 مرة وانتم فقط 77 مرة.
<< انا هنا حسيت بالنشوه والفرح وحسيت بعظمة مدريد، بس خويي فاقد ولا همه شئ.
رد خويي وقال: كم مرة فزنا عليكم خمسة صفر ؟ ثلاث مرات يالزلايب سنة 1934-1935 والمرة الثانية في 1953-1954 والمرة الثالثة 1993 - 1994
وقال خويي : حبيبييييي ان كنت ناسي افكرك << هنا صار مقطع راقص شوي لأنه خويي تذكر اغنيه وقام يغني شوي مع الجماعه، ترى هزنائكم احنا بعد في ملعب الكامب نو: 7 - 2 في موسم 1950-1951 وفي ملعب سانتياغو بيرنابيو: 5 - 0 في موسم 1973-1974 << انا هنا حسيت اني ضايع معاهم، ودي اخوش بينهم بس خايف يجيني شوي، قلت يارجال غمض واشرب الدواء اقصد غمض وخش عرض.
قلت له: طيب كم مره تعادلتوا ؟
قال لي خويي: وش تحس فيه ؟ هذا سؤال تسأله انت ووجهك شبه مقلة الفلافل قال وآحد: اممممم تعادلنا 42 مرة
قلت : آها كملوا هواش يالزلايب قال خويي: تدري يامسيو فيسل << لسانه ثقيل شوي والا هي فيصل، كم سجلنا هدف على مدريد.
قلت له : كم ؟
قال: 320 هدف << وقام يضحك شوي ضحكه فيها خبث، حتى كان فيه عنده ضرس ذهبي قام يلمع شوي. شوي بس موواجد شكله قديم يعني.
قال له واحد من المدريديه: طيب واحنا كم جبنا على برشلونة 
؟ جبنا 352 هدف. << هنا حمق خوييي ومشا الزلابة قلت له تعال تعااااال تعال حاسب قال: خل اخوياك يحاسبون وخلي اهدافكم تنفعك هنا انا عاد قعدت مع المدريدين حبايب قلبي 
قلت لهم: الحين كم مرة تقابلنا مع برشلونة ؟
قال وآحد: تقابلنا معهم 204 مره
قلت : آهآ ..
قلت : وش الآخبار بعد قلت كيف مآملين شئ من هالموسم ولا خلاص ؟ قالوا: والله امممم يعني نتايج الفريق ماتطمئن بس الكلاسيكو له طعم ثاني وشكل ثاني ماتحكمة لا ظروف ولا اي شئ 
قلت : انا سمعت انه شوستر شاتوه ؟ قالوا: ايه جابو خوآندي راموس هالادآرة النايمة
قلت: كيف تتوقعون يمشي معكم كويس في الكلآسيكو ؟
قالوا: والله نشوف على حسب مباراة زينت.
قلت: آها، هنا اخذت لي بريك وشغلت الزيقاره وطالع فيه بعين من على جنب وكملت كلامي، طيب وبعد كيف البرسا هالموسم غير اجل
قالوا: ايه الله يآخذه مستلج مدربهم آوكي وآوضاعهم اكثر استقرار مننا بس زي مانقول الكلآسيكو غير قلت: تتوقعون يكملون مسيرة الآربعة والثلاثة عليكم قالو: لا يبااااااا لااااااا، زي ماقلنا لك الكلآسيكو غييييير زي ماجده غير
قلت: ترى ازعجتونا على الكلاسيكو غيير ترا عرفنا قالوا: لايكثر بس قلت: عاد المباراة في الكامب نو يعني مو لعب عيال ( وجه يرجف والأسنان تتصافق )
قالوا: اييييه ندري صعبة المباراة علينا كمدريدين بس مافيه شئ مستحيل اذا حضرت روح الاعبين
قلت: آيه نشوف قلت بالله كم لاعب عندكم مصاب ؟ قالوا: ابد خفايف ما فيه احد مهم قلت : منهم طيب ؟
قالوا : اممم الرود وديارا وديلاريد وبيبي.
قلت : بس ؟!!!
قالوا: لاااا اشفيك مستعجل، لحظه لحظه نجيب قهوه زياده لأن مطولين يالحبيب.
<< جابوا القهوه
ايه نكمل وروبين ومارسيلو بعد مو لاعبين
قلت: خابرهم رجعوا من الآصابة
قالوا: تراك نايم على خشتك يالسعودي. شوف يالحبيب، روبين مآخذ كرت احمر ومارسيلو اخذ الكرت الآصفر الخامس وماراح يشآرك
قلت: والله حالتكم صعيبة وسئلت عن برشلونة قالوا: ياحظهم مافي الا اثنين غايبين قلت: مييييييين موسيليني ؟ << هنا هم مافهموا الذبه وقعدت افهمهم ساعه انها من مسرحيه مصريه ومادري ايش وهم مستغربين ومعصبين حتى واحد منهم كسر غرشه وتجهز للهواش. قلت لهم: هدو هدو، طيب من الا غايب يعني بالضبط ؟
قالوا: انييستا وقابي ميلتو الا كنا بناخذه ذيك السنه وطلع زجاجه وكله ينصاب
<< هنا قعدوا كلهم يضحكو ضحك مو حق اوادم.
قلت: آهآ، طيب امممممم الحين المباراة متى ؟
قالوا: يوم السبت، الساعة 11:00 بتوقيت اسبانيا
قلت لهم : طيب بتوقيت السعوديه كم ؟ لأني جاي توي من الرياض وماعدلت ساعتي بعدي.
قالوا: الساعه 12:00 يعني.
قلت : ابي اشوفها على ابو سيف [ يوسف السيف ] يعني على الجزيرة
قالوا: والله شوووف جرب تدخل على روابط منتدى الزعيم قول لهم ابي رابط فيه الجزيره وراح يعطونك اكيد قلت: آوكي شباب .. انا بس باروح الرست روم باغسل وجهي ثواني بس
<< وسحبت عليهم مثل ماسوى خويي الكاتالوني ، وكلمت خويي خليته يدبر لي غرفه انام فيها ونمت. وتوته توته خلصت الحدوته
اليوم : السبت التاريخ : 13 - 12 - 2008 مـــ التوقيت : 12:00 بتوقيت مكة المكرمة القناة الناقله : الجزيره الرياضيه +2 ملعب المباراة : 
لقاء هذا الموسم مميز عما سبقه في السنوات الأخيره. فهذه المره يدخل الفريقان بقياده فنيه اسبانيه. اوضاع الفريقان هذا الموسم غير متوازنه البته فالنادي المدريدي يعاني من النقص وعدم الاستقرار الفني بعد تغيير مدربه قبل مباراة زينيت. بينما البارسا يدخل هذا الموسم بجلد جديد وبروح جديد وبقياده فنيه جديده.
من الجانب البرشلوني هناك احتماليه لدخول [ قوديونسين ] بديلا لـ [ بوسكيتس ] بينما من الجانب المدريدي من الممكن دخول [ قارسيا ] كلاعب محوري وايضا دخول [ كريستوف ميتزيلدر ] في خط الدفاع. برشلونة
ريال مدريد
.. بسم الله الرحمن الرحيم .. شاكر لكـ اخوي حسين ع الاستضافـهـ و الشرف لي تواجـدي في موضوع كبير مثـل هذا .. الكلاسيكو ما راح اتكلم عنهـ لأنهـ معروف لدى الاغلبيهـ انهـ افضل كلاسيكو في العالم .. 
يعني نتجاوز الشغل المستهلكـ و نخش بالشغل الجديد .. و اللهـ الكـلاسيكـو باين انهـ راح يصير مصخرهـ .. البرشا ناوي يرد [الاربعة و التصفيق و الرايح جاي] .. يعني اتوقعهـا تاريخية بس مدري لمـن .. << باللهي دفاع و حال الريال مخيس .. 
لا و طاردين ( شوستر ) قبل الكلاسيكو .. و البلى كلهـ من كالديرون .. و حطهـا براس المسيكين .. على اساس الخراب من عندهـ .. روح مافيهـ .. وصل الحال بالريال للأمور المادية لحث اللاعبين على الفوز .. الريال الفريق اللي الواحد يفتخر انهـ يدافع عن الوانهـ .. صار يقول " المكافأهـ مضاعفـهـ " .. على العكس تمـامـاً .. العملاق الكتلوني محطم الارقام القياسية .. انصكـ من نومنثيا و من عقبهـا مدهـر التسلب .. ركـ اشبيلهـ في عقـر دارهـ بالوصخ ميتسي << احب ادلعهـ كذا .. و رقع الزلايب فالنسيـا بـ ( الرجل الحامل مع رأسهـ ) هنري .. << و يقلب على فريقهـ الاسبـاني + اقوى هجوم و اقوى دفاع .. [بأختصار] افـضل فريق اسبـاني حاليـاً .. في مقـابلـهـ .. الريال الفريق المعتمد على تاريخهـ فقـط .. آآآآهـ بس .. و ينكـ يا بيريز .. بالتوفيق لكـلا الفريقين .. مع اني ما اظن الريال راح يتوفق .. للـفائز .. مبروووكـ .. / للخاسر .. هاردلكـ .. / عـذراً ع الاطـاااالهـ .. / ورده 
أولاً شكراً على الاستضافة لـ مباراة بكل صراحة ليست كـ كل المباريات و لا الديربيات و لا الكلاسيكيات في العالم أجمع برشلونة و ريال مدريد أو العكس و ما يفرق تقدم اسم اي فريق على الثاني .. الأهم انك تشوف متعة ينفرد بها الدوري الاسباني بهذا الكلاسيكو الجميل .. دائماً تدور نقاشات حول أفضل مباراة او ديربي أو كلاسيكو .. لكن بكل صراحة هـ المباراة لحااااااالــها
الأيام هذي قناة الجزيرة تعرض عدة مباريات لـ هالكلاسيكو .. بكل صدق أشوفها و لا أحس بملل .. بالعكس استمتع فيها
أكثر ما يميز الديربي انك ما تلقى فريق مقفل .. مباراة مفتوحة من الطرفين .. الكل يهاجم و لا يهمه غير الهجوم
و على طاري الهجوم أحس برشلونة هالسنة غييير عن السنين اللي راحت .. و خلونا نحددها على الاقل الخمس سنوات الماضية من حيث اكتمال اللاعبين في جميع الخطوط
غالباً تلقى الفريق اللي يسجل كثير اذا ما استقبل كثير على الاقل ما يكون اقوى دفاع لأنها معادلة صعبة و الفرق اللي تملك هالخاصية نادرة .. و اقصد بيسجل كثير انه يكون اقوى هجوم
و برشلونة قدر يجمعها بفضل الله ثم تفكير جوارديولا السليم في بناء فريق ينافس هذا الموسم على ثلاث بطولات ان اراد .. و هذي ميزة أهنيه عليها 
ريال مدريد يمر بحالة من الممكن اننا نقول انها قريبة من حالة برشلونة الموسم الماضي من ناحية سوء أوضاع الفريق و الاصابات نوعاً ما 
إقالة شوستر في هذا الوقت ممكن يكون سلاح ذو حدين .. اما ان يفوز الريال او حتى يتعادل و حينها بنسبة كبيرة سنشاهد ريال آخر حتى بالاصابات اللي تمر بالفريق حالياً و هذي وجهة نظر خاصة بي ممكن تكون غريبة نظراً لكثرة الغيابات و لكني أراها قريبة من الواقع أو أنه سيخسر و يبقى الحال على ما هو عليه و يتم انزال سيل من الانتقادات الحادة لـ خواندي راموس اللي لا أنتظر منه شيء أبداً في هذه المباراة على العموم .. ننتظر مباراة ممتعة .. كنت أتمنى أن يكون الفريقان في مستوى واحد و بدون غيابات لكي نستمتع أكثر بالكلاسيكو .. و يا حلاة شوفة هالمباراة و على يمينك مدريديين و على يسارك برشلونيين و الله ان اروح غلطة 
بسم الله الرحمن الرحيم
السّلام عليكم ورحمة الله وبركاته ..
الميرنغي والبرسا ..
أعتـقد بأن المباراة سهـله للبرسـا نسبيًا ,
لكـن المباراة التي مثل الديربي ليس يوجد شيء اسمه (سهل) ,
لكـن الأمور الفنيّة والغيابات تقريبًا المباراة سهله لـ برشلونه , الميرنغي لديه غيابات عديدهـ وصعبه عليه المباراة لديه غيابات مؤثرهـ , مثل فان نيستلروي وروبن وديارا وبيبي , غيابات مؤثرهـ وكثير على الميرنغي , وصراحة إذا فاز مدريد بهذه المباراة تعتبر معجزهـ , وأيضًا لديه غياب لكن مشكوك به , مثل شنايدر , ..
برشلُونه أعتقد بأنه لن يتأثر تمامًا , لديه غياب فقط أنيستا وميليتو ..
ولن يتأثر ..
نتكلم عن هجوم الفريقين هجوم برشلُونه ناريّ , " ايتو - ميسي - هنري " ..
هجوم قويّ وسيتغلب على هجوم ريال مدريد الذي يفتقد لـ مهاجم كبير مثل نيستلروي , وراؤول لن يستطيع أن يهاجم لوحدهـ في ظل غيابات وضعف في وسط الملعب , ومستوى الريال في المباريات السّابقه بأنه يفتقد لـ المُصابين وتأثر بشكل كبير , ووسط برشلونه لديه غياب انيستا , وصراحة ممكن يؤثر قليلاً على ناحيته , ولكن لن يأثر على الفريق بكامله ..
ودفاع البرسا كاملاً وليس يوجد غيابات وصراحة هجوم الريال صعب عليه أن يمر من الدفاع في ظل ضعف الهجُـوم , ودفاع ريال مدريد يفتقد لـ هاينز , وصراحة دفاع ريال مدريد قويّ , ولكن في ظل الغيابات لديه ضعف قليل , ولكن قلب الدفاع المتفاهم من الممكن أن يتصدوا لـ هجوم البرسا ..
بالأخير أتمنى من الفريق مباراة جميله تليق بالديربي , وبالتوفيق لـ الجميع ..
ورده
السلام عليكم .. من القلـيل أن نرى العالم أجمع ينقسـم لـ قسمين إلا ما ندر كما حدث في انتخابات أمريكا الأخيره أو في أمور سياسيه بحته .. و لكن هنا يختلف الوضع و الأمر ، فـ العالم كله ينقسم لـ إما مدريدي أو برشلوني ، و إن كنت أعتبر أن الديربي بدأ كـ سياسه .. مدريد يمر بحاله حرجة للـ غايه .. عدم استقرار ، اصابات وغياب البدر نيستلروي - الذي في فترة وجيزة أصبح جداً أصبح صديقاً حميماً لـ فيكتور فالديز- ، و كذلك عدم وجود البديل الجاهز .. كل تلك الأمور قد تٌستخدم كـ عذراً مُقنعاً في حاله سقوط شوستر في الملحمة .. مشاكل الريال بدأت من الصيف أي من المرحلة الاعداديه لـ الفــريق من التــعاقدات و غيرها ، حيث إنه تم إهمـال وجود المدرب و إختياراته و بدأ الرئيس بـ تولي جميع المناصب ، كم حدث في السابق مع كيروش أيضاً و لكن مع كل ذلك فـ الريال بـ أي تشكيله جاهزة قادر على الفوز في الكامب نو ، أولاً الجانب التاريخي له دور في ذلك ، و كذلك الظروق الصعبه التي يمر بها الفريق قد تتحول لـ عامل إيجابي يستفيد منها لـ تقليص الفرق الكامن في جدول الترتيب ، هيجواين يمر في مرحلة إثبات الذات حالياً ، خصوصاً في غياب الرود و جلب هونتيلار، حيث إنه يدرك صعوبه موقفه في التشكيله في حال تكامل الدكة الملكيه ، جاجو المٌبدع و الموهبه الكبيره و أيضاً قوتي سيكون الحمل عليهم مضاعف في وسط الميدان نظراً لقوة وسط الوجه الأخر و كذلك إنطلاقة الأظهره .. وجود قوتي في المباراة شي أساسي ، من الاعبين النوادر حالياً الذين من تمريره واحده قد يٌنهي الأمر و يحسم القمة
و الشــي الأخر ، خبرته في مثــل هذه المواجهات .. كذلك
الزجاجي روبين يٌعتبر مفتاح أيضاً لـ الفوز بـإستغلاله تقدم
الأظهره الكاتلونيه و خصوصاً دانيل ألفيس الذي أعتقد أنه
ضيعف في الناحيه الدفاعيه مقارنتاً بـقوه النزعة الهجوميه
التي يمتلكها ..
برشلونه يمر بـ فترة رائعاً جداً و قد تكون مواجهة فالنسيا خير دليل على ذلك ، رباعيه ممتعه و متكامله في النواحي الفنيه ، لا إصابات مؤثره ، إستقرار إداري و إرتياح من المسؤولين لـ جوارديولا الذي خالف توقعاتي قبل بدايه السيزون بـ نجاحة مع الفريق و تكوين توليفه كانت هي من إقتناعاته الشخصيه ..
محاور الفوز لـ برشلونه هي الهجوم و ايـضا الاطـراف نظراً لقوة الأســـماء التي يتملكها في تلك المراكز و كذلك سيــاسه القادمــون من الخلف عن طـريق هنري و ميـسي بـ فتحهم فراغات و إشغالهم دفاع الملكي و إيتاح الفرصه لـ لاعبين الوسط بالتسديد و التوغل في عمق الدفاع ..
ورقياً و منطقياً البرشا مهيئا و أفضل ، و لكن قد ينقلب السحر على الســـاحر بـ أفضليه الريال تاريخاً و حاجــه الماسه لـ الفوز على البرشا ..
أتمنى أن لا أرى راؤول اساسياً في القــــمة لكي لا يسوء منظر الكلاسيكو بـ المجاملة أو التحامل على حساب أرنب البرشا سافيولا ، الذي لم يُعطي كامل حقه في ريال مدريد و من يدري قد تكون مواجهة السبت تكون منعطفاً لمشواره مع الملكي ..
أتوقعها و أتمناها مدريديه ليس لـ بسبب ميول أو تعاطف و لكن لـ دوري أفضل و أمتع ..
قفلة :
طال السفر و المنتظر مل صبره
**
و الشوق يا محبوب في ناظري شاب
رد النظر!!خليت في الكف جمره
**
لهـــــيبها في داخـــل القـلــب شـبــاب
نيستلروي .. 4/4 في كل مواجهة تسبب بهدف ، أي نجم أنت يا هذا ..
شاكر لكم على الإستضافه المشرفه .. كلي أمل بـ كلاسيكو مٌثير و حافل بـ الأهاف كما جرت العادة 
أول شيء أحب اشكركم على الإستضافه في أهم مباراة في الليجا ,, شرف لي اني اكون بينكم " الكلاسيكو " أفضل مباراة في العالم .! , متعه فرجه اهداف حماس جنون .! , بإختصار كل شيء في كرة القدم تشهدها في الـ 90 دقيقة
تمنيت ظروف المباراة تكون احسن من كذا بالنسبة للريال الملكي .! ,, كان ودي اشوف برشلونة قوي يتنافس مع ريال مدريد قوي ليعطينا اثارة ومتعه اكثر اتمنى نرى مباراة كما اعتدنا مثيره وحماسيه الى الدقائق الأخيره .! , تمنياتي للبرشا واذا فاز الريال ألف مبروك لهم ننتظر اللوحة الفنية التي سيقدمها جمهور البرشا الرهيب كاسياس: " انا ونادال نتوقع ان نفوز على البارسا بنتيجة هدف مقابل لاشئ "
داني ألفيس : " عليهم أن يثبتو ذلك على أرض الملعب "
سافيولا : " اذا ماسجلت هدفا في الكامب نو لن أحتفل به " بيرند شوستر قبل الاقاله : " الفوز بالكامب نو أشبه بالاستحاله "
يوهان كرويف: " لايوجد شئ مضمون وحالة الفريقان قبل المباراه لاتعني شئ "
خوان لابورتا : " مدريد سيكون اكثر خطوره باصاباتهم عندما يزور الكامب نو "
فيرناندو قاقو : " أنا لا أخاف برشلونه "
تييري أونري : " أريد الفوز على الريال الآن بقميص البارسا "
اريك ابيدال : " لم انسى احداث الموسم الماضي والآن الوقت المناسب لمحو ذلك بالفوز "
ايدور قوديونسين : " أتمنى بنهاية الموسم أن أرى لاعبو الريال يحيونا بعمل الباسيو كما حييناهم العام الماضي "
بيب قوارديولا : " شوستر يعتبر خسارتنا منهم أشبه بالاستحاله !! أنا لا أصدقه !! "
كانافارو : " لايوجد شئ مستحيل "
راؤول : " شوستر قال لنا في غرف الملابس أننا قادرون على الفوز في الكامب نو "
بيب قوارديولا : " اقالة شوستر مفاجأه "
ديكو : " لن أفوت مشاهدة الكلاسيكو، ولنحقق الفوز على الريال بأي طريقه ممكنه "
خواندي راموس : " البارسا يقدم كرة قدم رائعه، ولكن بامكاننا الفوز "
ماركيز : " نريد الانتقام وقدوم خواندي يعطي الريال شكلا اخر "
هيجوايين : " بالامكان الفوز في الكامب نو "
كانافارو وراموس : " متفائلون باللقاء "
روبين : " فوزنا له اهميته المعنوية "
شكر خاص لرابطتي برشلونه وريال مدريد على تعاونهم في جمع مايمكن جمعه حتى خرجنا بهذا التقديم المتواضع لقمة الليقا الاسبانيه.
في النهاية نرجوا أن يحوز التقديم على رضاكم واستحسانكم ونسأل المولى أن يوفقنا في نقل جميع المناسبات الكرويه مستقبلا، ويجدر بنا أن نشير هنا بالابتعاد عن الردود الباهته والترحيب بالمساهمه المفيده في اثراء هذا الأستوديو بالشكل الأمثل ورده
