شكلي قلت كل اللي عندي بالعنوان

فكرة هالمشروع يا شباب وياصبايا اننا لازم نستفيد من وعي جمهور الزعيم ، خاصة وانه من المعروف عنهم الوعي الرياضي وفهم الكورة لدرجة تحسّ وانت تتابع اغلب مواضيعهم ونقاشاتهم انهم افهم من كثير من هالمحللين اللي ازعجونا بالفضائيات .

ومثل ما انتم عارفين يا اخوان ، الزعيم مقبل على مشاركة عالمية بالغة الأهمية على جميع الأصعدة ، ولها أهميتها وتأثيرها اللي بينعكس ان شاء الله على سمعة الكرة السعودية عامة والهلالية خاصة .

ومن هالمنطلق نشأت هالفكرة من اننا نساهم في تفعيل هالمشاركة بآرائنا واقتراحاتنا وأفكارنا ، واللي مانقطعت ابدا ولله الحمد ، ولكن كانت بشكل فردي أغلب الأحيان ، واكاد أجزم انه بالرغم من أهمية أغلبها ، الا انها لا تصل لإدارة نادينا ، او قد تصل بشكل غير واضح . وهذا شي انعكس على أهمية هالمقترحات والأفكار ، وقد يكون ساهم بشكل او بآخر في عدم اهتمام الكثيرين من ذوي الإقتراحات والأفكار النيّرة ، بطرحها في المنتديات بسبب لتوقعهم انها لن تجد الصدى المناسب لهذه الإقتراحات .

الفكرة تتلخص في التالي :

· جمع اكبر قدر ممكن من الإقتراحات والأفكار خلال فترة لا تتعدى اسبوعين (لضيق فترة الإستعداد) .

· تنقيحها مع من اقترحها ونقاشها مع باقي الإخوان والأخوات ، بشكل يضمن عدم خروجها الا بشكل مرضي للمقترح .

· رفع جميع هذه الإقتراحات لإدارة النادي بشكل يضمن وصولها بصورة طيبة تعكس اهتمام الجماهير الزرقاء بفريقها .

%%%%%%%%%%


علما بأن المقترحات ليس بالضرورة أن تكون من أعضاء المنتديات فقط ، بل يمكننا الإستعانة بالجماهير التي ليس لها علاقة بالإنترنت وطرحها من خلال احد أعضاء المنتديات بعد شرح الطريقة ببساطة لغير الأعضاء .

وهذي ناحية مهمة جدا يا اخوان ، فكما نعرف هناك في خارج عالم الانترنت الكثيرين ممن لا يهتمون بما يطرح فيها ، ولكن عندما تناقشهم رياضيا يكونون فاهمين جدا في الكرة ...

واسمحوا لي اطرح لكم مثالين طريفة على ذلك :

1- واحد من اعز اصدقائي ، اذا حلل أي مباراة ، احس ان شتالي مايفهم كورة بسبب تحليل خوينا المنطقي ... لكنه مرّة يسألني عن الكيبورد وش رأيي فيه ؟ ويوم استفسرت منه وش يقصد طلع يحسبه من كثر مايسمع هالكلمة (من تالي على قولته ) عطر فرنسي جديد

2- واحد ثاني من الشباب متابع كل صغيرة وكبيرة في النادي ، لدرجة انه يحظر تمارين السلة والطائرة شباب (القدم ناشئين ماجيناكم فيها طبعا ) يقول : ياخي (Windows 98) مع انها انتشرت ، لكن الغريبة اني الى الحين ماشفتها في الشارع ، او اني شفتها بس مادريت انها هي ..... ظنّك ان وكيلها سيء لهالدرجة؟ ...... طبعا الرجال طلع يحسبها سيارة اوروبية غريبة


وبالتالي يا شباب ... خلونا نترك السلبية والكسل عنّا شوي ، رجااااااااااااااء أي هلالي عنده أي مشاركة او اقتراح ، او من يعرف هلالي عنده مشاركات او اقتراحات ولا يقدر يوصلها للمنتديات ، لايستصغرها ابد ، وياليت يطرحها هنا وان شاء الله انها ماراح تطلع الا وهو راضي عنها ، بتعاون الاخوان من جميع المنتديات واللي ماراح يقصرون معنا ان شاء الله .

ومالكم الا اللي يضمن لكم وصولها للإدارة ، ولو مايتنفذ منها الا شيء بسيط ، على الأقل سوينا ابسط حقوق نادينا اللي موسع صدورنا .

ودمتم،، ،، <----- علشان تدرون اني راعي خطابات


%%%%%%%%%

ملاحظة للإخوان المشرفين في منتدى الزعيم :

كان لي موضوع قبل كم يوم في المنتدى عنوانه (آخر اخبار دوري الشفا) ، دورته ولا لقيته ، اذا كان تم حذفه فأتمنى شرح السبب ، وماهي الإساءات التي يحملها الموضوع (اذا كان فيه إساءات ) ، إلآ اذا كان احد من المشرفين في نفس الوقت من منظمين دوري الشفا ولا أعجبه الموضوع ، مع العلم اني اعتذرت للقائمين عليه؟؟

لا أريد هنا مناقشة إختلاف مساحة الحرية المعطاة بين المنتديات ، ولكن اتمنى الإيضاح من أحد الإخوان المشرفين اذا تكرمتوا .

اضغط هنا لمشاهدة الموضوع والحكم عليه .... وشكرا