نادي الهلال السعودي - شبكة الزعيم - الموقع الرسمي

[c]بسم الله الرحمن الرحيم [/c]

معقول ياناس هذا هو الهلال ؟؟؟؟؟؟
الهلال اللي كنا نراهن على كسبه أي لقاء ضد أي فريق حتى لو كان الخصم يلعب على ملعبه !!!!
الهلال اللي حقق البطولات والامجاد اللي لايمكن أن يصل لها أي فريق منافس الا بعد احتكاره للبطولات عدد من السنين !!!!
الهلال اللي وصل صيته عنان السماء وتعدت بطولاته الاربعين بطوله !!!!!

معقول ياناس هذولا هم لاعبين الهلال ( النجوم ) اللي نعقد عليهم الآمال ؟؟؟؟

سامي الجابر هذا مستواه ؟؟؟؟؟؟؟؟؟؟؟؟؟؟؟؟؟
لا تقولون عمل اللي عليه وسجل وش اكثر من كذا ؟ .
الهدف اللي سجله هدية واي لاعب يمكن ان يسجله ،وليس هذا هو سامي .
سامي مستواه في الوقت الحالي لا يمكن أن يظهر اذا لعب في مركز رأس الحربه وعلينا ان نعترف بذلك .
والمباريات الاخيره خير برهان ، ضيع قدام النصر ثلاثة اهداف محققه ، يتفلسف بالكوره قدام القول حتى تضيع ، يحاول قد ما يستطيع ( ان يأتي بما لم تأتي به الاوائل ) أن يسجل هدف ماركة ( خمس نجوم ) ، ظهرت عليه الانانية بأكثر من لعبة وخصوصا في مباراة الليله ، ويعصب على ضعيف الله صوماليا يوم اخطأ بالتمرير ، وهو مرر لمدافع الاتحاد قبله بأقل من دقيقه ولا لام نفسه .
هل هذا هو سامي الجابر هداف الدوري السعودي ؟؟؟؟
هل هذا طموحنا من نجم احترف بالدوري الانجليزي ؟
هل يكفي انه يسبب بلنتي بامكانه أن يسجله هدفا أو يسجل هدف هدية ؟
لالالالالالالالالالا لااعتقد أن هذا يرضينا منه .

يوسف الثنيان ...... اعتقد ان للسن احكام ولا يلام .... فالغلطة غلطة المدرب اللي لعبه مع بداية المباراة قدام لاعبين اقل منه عمر واكثر نشاط وحيوية ولو لعب آخر عشرين دقيقه بالشوط الثاني اذا صارو لاعبين الخصم مجهدين كان بين بتمريره أو صناعة هدف .

أحمد الدوخي ....... ليته مالعب بمباراة الليلة
كان ممر بالشوط الاول لكل هجمات الاتحاد ، يتقدم مع الهجمة دون حساب ، ولا رفعه له كانت صحيحة ، يرفع الكوره وهو يناظر الارض كأنه لاعب مبتدء ، ويرجع لمركزه بتثاقل عجيب لدرجة ان عبدالله الشريدة تنرفز عليه اكثر من مره .

معقول ياناس هذا محترف أجنبي بفريق مثل الهلال ؟؟؟؟

والله ان لاعب الطائي البرازيلي يسوى منه عشره

يقولون عطوا صوماليا فرصه يمكن مع المباريات يبين مستواه
اكثر من هالفرص اللي جته ، والمباريات اللي لعبها ، انا ما ادري هم جايبينه رأس حربه ولا مدافع للخصم ، استلام للكوره ما يعرف ، تهديف انسى .
ياجماعه اذا كانوا مستخسرين فيه مقدم العقد وهو اخذه خلاص ولا يمكن يرجع ليه يتركونه يخرب ( قصدي يلعب ويعطونه زود على المقدم رواتب . والله لو نفتك منه كان اصرف ، خسرنا مقدم العقد ، وزود على كذا نصرف له رواتب ومكافآت والله ما يستاهلها .
اللاعب يبين من استلامه للكوره ، من تمريره لزميله ، من اهداف يسجلها ، من مجهود مثمر يفيد الفريق ، ولكن هذا والله كلمة لاعب ما يستاهلها .

معقول ياناس هذا بلاتشي ؟؟؟؟

بلاتشي اللي كان اذا تأخر فريقه يطلع دفاع وينزل هجوم ؟؟؟؟؟
بلاتشي اللي يسمونه صائد البطولات ؟؟؟؟
ينزل صوماليا يلعب ويخلي حسين العلي على دكة الاحتياط ؟؟؟ أي نظرة فنيه يقنعنا فيها ؟؟؟
المفروض يرجع سامي للوسط كصانع لعب وينزل العلي ( آلة الأهداف ) رأس حربه ، شاب وجاهز ، وينتظر المشاركه على أحر من الجمر ، ودفاع الاتحاد كان تعبان ورايح يتعبهم واذا ما سجل رايح يفتح المجال لغيره يسجل .

ومثل ما ان فيه لاعبين قصروا فيه لاعبين قدموا مستوى يشكرون عليه
عبدالله سليمان ، الشريدة ، عمر الغامدي ، الدعيع ، خليل بعدما نزل ، كلهم قامو بالواجب

الخثران ، بدرا ..... هذولا اللي الحكم عليهم بدري لو ان مواريهم مواري خير .

عزيز ، الصالح ، الشلهوب ، لالالالالالالالا تعليق على مستواهم !!!!!!!!!!!!

نعم هناك لاعبين اثنين مهمين جدا خارج التشكيله ( الجمعان والتمياط ) لكن من متى الهلال يتأثر بغياب أحد ؟
الهلال عملاق اندية الوطن بصفه الثاني والثالث يحقق البطولات ، كيف نراه بهذا المستوى ونسكت ؟؟؟؟

يا اخوان يمكن يعتب علي بعضكم ويشوف اني قسيت على بعض اللاعبين ، ولكن هذا كله من قهري وانا اشوف نجومنا في مثل هالحاله وهم يمثلون الزعيم
يا اخوان حنا مقبلين على بطولات خارجية ورايح نمثل الوطن ، وخصومنا في هالبطولات استعدوا من فترة ، وجابوا اجانب على مستوى ، واذا استمر الحال على ماهو عليه أشك اننا نبي نحقق أي بطوله من البطولات الخارجية .
فوزنا على الاهلي جاء بعد عملية قيصرية
مستوانا قدام النصر ما يطمئن
واليوم قدام الاتحاد مثل ما شفتوا
معقووووووول هذا الهلال ؟؟؟؟؟؟؟؟
ما أصدق