اجعل من الماضي .. ذكرى تُقال ..واعرض عن الحاضر كفاك جدل ..انا لست هيماناَ بذاك الجمال ..ذهب الجمال منك ام لايزل!! - نادي الهلال السعودي - شبكة الزعيم

فلسفة كاتب · #1 16/02/2011, 12:21 AM

".

لا ..لا.. تناجي .. كفاك نضال
دع لي غرامي .. وجد لك أمل
لا لم أراك يوما .. حفظت الوصال
إدفع ثمن هزلك .. بهذا الجهل !!

.

"

انا متعب العتيبي .. عمري 25 سنة ..

أنا من الناس اللي تؤمن ( بأن ) كل شخص في هالكون له رأي

ومؤمن جداً ( بأن ) لكل فعل - ردة فعـــل

ومؤمن أيضا بـــ بيت شعر للشاعر سعد علوش في قصيدته ( ياللي غرامك جاري في وريدي ) :

لكن مع الله كل بلوى بخيره

أنا ذكاي من التجارب رصيدي

عشان كذا ..

حبيّت اقولكم تجربة صارت لي في عام 1423 هــ

يمكن ( أحد يستفيد منها ) وأستفيد أنا ( أجره )

..

لكل شخص اخطاء ..

لكن تتفاوت نسبة الخطأ من مجتمع الى اخر

في يوم الأثنين من شهر سبعة من ذيك السنة المشؤومة

تهاوشت مع واحد من عيال الحارة

وكان الموضوع في ذاك الوقت .. كبير بالنسبة لنا ..

فكان هم كل واحد فينا .. إنه ( يجلد الثاني ) بأي وسيلة كانت ..

وللأسف .. كنت انا ( الجالد ) ولستُ المجلود

وش اللي صار ..!!؟

سجن أربعة أشهر في دار الملاحظة ..

طبعا هذا كله مو مهم ..!!!

اللي اشوفه مهم .. وش صار بعد ما طلعت ..!!

صرت بنظر الجميع .. ( خريج السجون ) + ( السربوت ) + ( الداشر )

لدرجة إن جميع اللي اعرفهم يتهربون مني ..!!

صرت عايش في وحدة وهَم مايعلم فيها غير الله ..

وصلت الى مرحلة .. كنت راح أضيع ..وأسلك درب ماهو دربي ..

لكن ..

لأني من الناس اللي أحب التحدي ...

ولا أحب استسلم بسهولة ..

قدرت اني اعكس صورتي الحقيقية ..وأزيل الضباب اللي كان يشّوهها

لا .. موب كذا وبس ..

قدرت اكون ( مضرب مثل ) عند شيّاب الحارة ..( لعيالهم )

تدرون وش هي كلمة السر ..!؟

ما كانت خلطة شعبية من عطار البحرين ..!!

ولا كان عمل على يد ساحر ..!!

كان الموضوع بكل بساطة .. اكون على طبيعتي ..

وأتجاهل كل تصرفاتهم ..

كانوا يتوقعون .. إني راح انجرف في إحدى المستنقعات ..

لكن بعد مارجعت مثل ما كنت عليه .. ويمكن افضل ..

تغيرت الصورة .. وتحسنّت مع الوقت ..

والحمد لله .. على كل شي ..

..

الشاهد في الموضوع ..

موب لازم نلتفت لقرار لجنة الانضباط ... ونعارض ونصايح ..

لأن هذا الشي هم اللي يتوقعونه .. ( ويبغونه )

يبغون الإدارين يشغلون أنفسهم في اللجان ..
ويبغون الجماهير تشغل نفسها .. في المعارضات ..

بالعربي .. يبغون نادينا يكون مثل ناديهم ..

وهذا غلط ..

لازم حنّا ننصف رادوي ... لكن موب بالطريقة هذي ..

ننصفه بتشجيعه .. وترديد اسمه ..

ننصفه .. بحمل لافتات .. وصوره ..

اخواني ... آسف .. عندي استفسار صغير ..

لما اكون انا مشجع .. وحاضر المباراة من خمس العصر ...

ولما يبقى خمس دقايق وتنتهي المباراة .. أطلع من الملعب ..؟

سواء فريقي فايز او مهزوم . !!! ليه طيب ..!؟.

بسبب الزحمة ومواقف السيارات والخ ...

لنفرض انه سبب مقنع .. ( أين التضحية ) ..!!؟

ليه مافي نادي سعودي ( وقف جمهوره ) بعد المباراة وجلس يصفق له ( بإستثناء النهائيات والمباريات المهمه )

ليه مانبدأها في مباراة الأهلي بكرا ..!!؟

وش سبب انقلاب شعب تونس على ابن علي ..!!؟

كان شرارة .. من المرحوم اللي حرق نفسه ..

طيب اللجان ما احرقتنا .. بظلمها لنا ..!!؟
ليه ما نرج الملعب بكرا ..!؟ بأهازيجنا ومثاليتنا وطربنا ؟

والله ثم والله ان اخر مباراة حضرتها .. هي اعتزال سامي ..

ومباراة الشباب ( اللي بعد طرد كوزمين ) لو اني في الرياض لأحضرها ..

وبكرا راح احضر الأهلي ..

لأن الحبيب اذا كان في حاجتي .. ولا وقفت معه .. على ايش اكون حيبيه ..!!؟

على العموم وعلى كل حال ..

نبغى ننسى , ونبغى نتكاتف , ونبي نكون مع بعض .

مايقولون ( خذ الحكم من افواه المجانين ) ..!!؟

طيب المجنون قال .. ما صديقنا الا إنا .. خلاص .. حنا ياجماهيرالهلال مانبي منهم شي ..

نبي نصادق انفسنا فقط ...فقط .. فقط ...

وأنا ابدأ أول واحد ..

معاكم صديقكم متعب العتيبي ...

أتمنى يكون اول موضوع اكتبه .. نال على اعجابكم ..

والردود - هي الوقود

وأوعدكم بالأجمل

مخرج /

أسألك يوم غـدري أجبنـي السـؤال

أم للغرام شـرعـك حـب الهـــزَل

لك تجدنـي قريبــاً بعيـــد المنـــال

قلبـي بهيمانه وضع ما حـمـــل

أنصحك لا تعايش ذميـم الخـصـــال

تغـدو إلى دنيـا تعـانـي الفشـــل

ضع للغـرام قـدراً كفـاك احتـيـــال

واعدل بحق غيرك كما لك عــــدَل

فلسفة كاتب · #2 16/02/2011, 02:32 AM

مادري ليه معجبني هالفيس ..!!؟

وش رايكم نسوي حملة لعيونه

الوافي22 · #3 16/02/2011, 02:41 AM

الله يعطيك العافية وبصراحه انك في قمة الروعة
..........................................................