السلام عليكم ..




ها جربتو صداع اعضاء الشرف .!! لاحول ولاقوة الا بالله .. يعني صدقني نتهاوش بالإعلام


الهلال أكبر من مشاكل عابرة ..الهلال تاريخ حافل من التكاتف والتعاضد والتماسك , كيف انفرطت السبحة .!! لايهمني من السبب او من صرح او من بدأ .. هي مشكلة وليست لعبة أطفال لنقول العتب على من بدأ او من رد أو أو .. انا مشجع هلالي يهمني ان ينتهي هذا التراشق الإعلامي والذي يُضحك علينا ويسمونه حوار راقي او إختلاف في الرأي .. يعني صدقني ترانا نختلف .. بالعربي او على قولة السوري بالمشرمح من زمان وحنا ندري انه يوجد اختلاف بين الآراء داخل البيت الهلالي ولكن الإختلاف يا كبار الهلال كان داخل البيت , لكن الحين كل واحد يدق على العجلان وتعال عندي كلام بقوله , وخوينا يدربي راسه ومعه مسجله ويسجل وينشر حرفياً .. والمتضرر هلال حمد وهلال عادل وهلال خالد وهلال سعد وهلال بدر وهلال صالح ومصلح وخليفة خلف الله خلف خلاف المحامي , بينما هلال بندر بن محمد ماهو مهم وهلال عبدالله بن مساعد ماهو مهم .. سبحان مغيّر الأحوال , قبل كم يوم نشوف العمران وكحيلان بالإعلام وفضايح وتصفية حسابات ( عاد هم مختلفين على ملايين ) حنا اختلافنا على الفئات السنية .


ادري والله وبالله وتالله ان البعض حاول إصلاح وضع الفئات داخلياً وماقدر .. لكن يطلع هالكلام للإعلام لا وألف لا .. ياخي طقاق بالفئات السنية اذا بيهدم البيت الهلالي كله عشان خلاف أو اختلاف او وجهات نظر او عناد او تقليد اعضاء شرف النصر ..
ماجاك دعم تقدر تروح لعضو شرف وتجمع الثاني وتجتمع مع الثالث وتجتمعون كلكم بالنادي وتحلون المشكلة , وانت تقدر تروح لعضو الشرف الفلاني وتكلم عضو الشرف الكبير وتروح للثاني وتقولهم نبي نروح نشوف وش الخلاف والمشاكل بالمكان الفلاني وتوته توته خلصت الحتوتة .

كل واحد مسوي نفسه معصب ومادري ايش ويعني صدقني ماني مثل النصراويين وكل واحد يرد على الثاني ويقول اختلافنا درس للرياضيين والثاني يقول خلاف الهلاليين راقي ووجهات نظر وليس اختلاف .. اقسم بالله ماحنا صغار ونفهم ونعرف ونشوف ونضحك من القهر .. يعني تصرح وهو يرد وانت ترد وهو بكرا بيرد ويستمر الموال وتبونا نصدق ان هذا كله وجهات نظر وماهو خلاف .!!


ريحو روسنا وشوفو رئيس النصر اللي ماخلا شي ماقاله في الهلال .. قال اللجان كلها هلالية واتهمنا بالمنشطات واتهمنا بكل شاردة وواردة والرد وشو .. تبي تضحكون .. طيب اضحكو بس والله ادري انه ضحك من القهر

الرد الأول يقول ينامون بالمسارح ولا ينامون بالمعامل .!!
والرد الثاني يقول اللجان فيها 10% هلاليين والباقي للأندية .!!
والرد الثالث يقول رئيس النصر يتطاول على الهلال .!!


والرجال طايح اتهامات للهلال وحنا نرد الله يخليك لاتتهم والرجال شغال اتهام بالمنشطات وحنا نقول حنا ماننام بالمعامل .. الرجال ماخلا كلمة الا وقالها وحنا نقول مايصلح نرد على كل من هب ودب .. والمشكلة هب ودب والكاتب والإعلامي والصحفي والرئيس طايحين فينا شماته وتطاول وحنا نقول نبي نهتم بهلالنا .. حتى لاعب نادي الفيصلي فيصل سيف يتطاول وحنا نقول ماننزل انفسنا نرد ,
ردو على فيصل بن تركي ووقفوه عند حده واتركو الردود بينكم على صفحات الجزيرة .. شوفو الإتهامات وردو عليها .. هذي اتهامات مسجلة بالفيديو ويحفظها التاريخ ويسجلها .. التاريخ مايرحم اذا مافي تدافع عن حقك ..

ماقلنا لكم ردود على كل شي .. لكن الأمور الكبيرة ردو عليها برد أقوى منها ..


اااااااه يامحمد بن فيصل يوم تجي قدامنا بمدرجات ملعب الملك فهد وتقلد الدب منصور وتحط يدك على خشمك وتقول كسرت خشمه .. ابوك للجنة ياشبخ انت الشيخ والأمير ,, نبي واحد يرد الصاع صاعين .. والله تمنيت محمد بن فيصل في موقفين لاثالث لهما .. يوم يشيلون كوزمين ويوم يقول خبيلان الهلال مثل اسرائيل .. والله لو اعرف بيته اني لا أروح له واقول وش ردك على خبيلان .. والله بيجي رد من الأمير محمد بن فيصل يخلي خبيلان يترك الرياضة لكن وش نقول ..



يا كبار الهلال والله مايحتاج نقول لكم سوو كذا وكذا .. انتو اخبر واعرف واكبر منا .. ياناس الخلافات حصلت بالوحدة وانهته ,, وحلت بالأهلي ودمرته .. وحلت بالنصر ومسحته , وحلت بالإتحاد وشتته , وهاهي قادمة للهلال فهل تبعثره ام يعود الكبار كما عهدهم الكبار , ام يستمر الكبار ليضحك علينا الصغار .



يامؤسس الهلال والله اني فاقد الثقة في أعضاء الشرف الا فيك انت وفي خالد بن محمد وفي سعود بن تركي .. ياجماعة رجوعو لنا كبار الهلال .. فكبار الهلال لايعرفون للإعلام طريق .. ولايعرفون للتصريحات ضد بعضهم منهج .. نريد كبار الهلال الذين نعرفهم وتعرفهم انت يا مؤسس الهلال ويامؤسس نادي القرن الآسيوي على الوفاق والتلاحم والتكاتف الوقوف مع بعضهم البعض او السكووووووووووووووووووووووووووت .





يا أعضاء شرف الهلال نقول لكم هالبيت

بعض الجروح ان جت من اغراب عادي
الـجـرح موووت الجرح لو جا من اقراب

شي يقهر إإللي جآلس يصير لآ رد ولآ غيره

لكن ربك يعين كلآمك عين العقل يآ حمد

يعطيك العافيه طرح رائع .......................................................

مشكور أخوي حــمـــــ الهلالي ــــــد

والله حاس باللي تحسبه!!>> كلامك من قلب إلى قلب!!

وأكيد إللي حاصل مايرضى الأطراف الهلالية!!

لكن الشكوى لله!!

والله يكتب اللي به خير!!

تحياتــي

هلا فيك
مايميز الهلال عن بقية الاندية هو بقاء كل الاحداث داخل البيت الهلالي
مهما صار , وهذا بشهادة حتى اعلام الاندية الاخرى..... ماشاهدناه في
الايام الماضية نتمنى ان لايتكرر وذلك لمصلحة الهلال قبل كل شي


ومثل ماقلت :

بعض الجروح ان جت من اغراب عادي
الـجـرح موووت الجرح لو جا من اقراب
بالتوفيق للزعيم

إقتباس الرسالة الأصلية كتبت بواسطة ولد الملك عبدالله نعيب على الناس والعيب فينا من متى والهلاليين يتناولون وجهات نظرهم بالاعلام ما يحصل مؤشر خطير جدا اعداء الهلال الى وقت قريب جدا واخرها بخط الفتنه قبل اسبوع وفي بعض البرامج الاخرى يتغنون ويشيدون بأسلوب الهلاليين بحل اختلاف وجهات النظرداخل البيت الهلالي بعيدا عن الاعلام ان مايحصل بين الاميرين المؤثرين حفظهم الله امرُ مستغرب وسابقه جديده قد تنعكس سلبياتها على مسيرة الهلال والهلاليين ليس بالاسلوب اللائق هذه المكابره العلنيه بين شخصيتان لهما ثقلهما ولهما تقديرهما من الجمهور الهلالي والله من وراء القصد

هذا اقتباس لرد لي على موضوع الامير عبدالله المثبت

تسلم يالغالي على موضوعك الراقي والذي بلاشك ما يخالج كل مشجع هلالي

واعتقد ابلغ ما يدور في نفوسنا هو ما ختمت به موضوعك

بعض الجروح ان جت من اغراب عادي
الـجـرح موووت الجرح لو جا من اقراب

الله يعطيك الف عافيه

فعلا ماحدث بين الامير بندر و الامير عبدالله

شي محزن و شي لا نريده كاهلاليين

و مثل ماقلت يجب حل الاختلافات في البيت الهلالي الكبير

و بعيد عن الاعلام

و اذكرك المتربصين ماراح يعدون حديث الامير بندر و الامير عبدالله على خير

اتمني ان لا اشاهد ماحدث خلال الايام الماضي مره اخرى في الاعلام

تحياتي لك

يعافيك ربي حمد على الطرح

لكن اشوف ان اللي صار عادي نوعا ما او مقبول صحيح كنا نتمنا حله داخل البيت الهلالي وصدقني وانا متاكد ان الموضوع ما راح يتعدا هالحدود وبس



و اشوف انه فعلا كلام الامير عبدالله معقول واايده فيه . . الامير بندر لزوم يبتعد ويكفيه يكون رئيس هيئه اعضاء الشرف والتصعيد ما كان له داعي اساسا من الاول لكن الان اصبحت القضيه لابد ان تحل علنيا .

وليس عيبا ان تحل قضيه ما لم يختلف للود قضيه ..


حمد اغلب كلامك مميز الا كلامك عن المدارس وانك تقول بالطقاق من اجل مشكله بين اعضاء الشرف ..

المستقبل ذولا ( الفئات السنيه )مو اعضاء الشرف

واذا عضو شرف عضوين لو طلعوا وتكلموا . فيهم خير للهلال وبغيرهم خير للهلال

اشكرك على طرحك الراقي ما قصرت ... دمت بود اخوي حمد

الازم يكون فيه اهتمام اكثر

لكن بالتوفيق للهلال


وبالنسبه خطر على الافئات الهلال كمستقبل


تحياتي

مايميز الهلال عن بقية الاندية هو بقاء كل الاحداث داخل البيت الهلالي
مهما صار , وهذا بشهادة حتى اعلام الاندية الاخرى..... ماشاهدناه في
الايام الماضية نتمنى ان لايتكرر وذلك لمصلحة الهلال قبل كل شي

بصراحة لم أكن متوقع يوماً من الأيام أن يحدث في الهلال مثل هذه الأختلافات في الرأي
وتظهر في الإعلام وبشكل علني ومن من للأسف بين الرئيس الذهبي الامير بندر بن محمد و بين المفكر و القلب النابض للهلال حالياً الأمير عبدالله بن مساعد فكلاهما عينان في رأس الهلال
ونعلم جيداً أن كلاهما يريد مصلحة الهلال ولكن ...
ليس من مصلحة الهلال أن تظهر المشاكل و الإختلافات من داخل البيت الهلالي إلى الصحافة فيتناولها كل من هب ودب و من يريد أن يتربص للهلال و له أغراض تسيء للهلال ..

أتمنى أن لا نرى مثل هذه الأمور مستقبلاً

/


شكراً لك يا غلا

كلامكـ في محلهـ

الوضع خطيــر

واللهـ يصلح الحاااااااااااااااال

الله عليك ع الكلام الرائع

واااااه ع زمن محمد بن فيصل الذي لايجعل اي شخص يتطاول ع الكيان الهلالي
روساء انديه واعضاء شرف واعلامين يتهمون الهلال ليل نهار
وربعنا لايردون عليهم ويردون ع بعضهم في امور تاافه بكل صراحه
اذا الامير بندر لا يهتم في الفئات السنيه لا تتهمه في الاعلام
بل واجه امام كبار اعضاء الشرف وامام مؤسس نادي القرن
هذا هو الصح
اما ان تواجه في الاعلام لن تحل بل سوف تزيد تقيدا اكثر
اتمنى من كبار اعضاء الشرف ايقاف هذه المهازله الحصاله مع اعضاء شرف النادي
وبترها نهائيا

كلامك سليم حمـد..
واكيد أي مشجع هلالي لا يرضى في الامور الي تصير..من ناحية الهجوم نسميه عيني عينك من رئيسهم للنادي الهلال..وبعـد ما نرضى بالامور الي تصير بين اعضاء الشرف..والمثالية مع البعض وترك المواجهه وتصحيح الامور..والكل يجامل الثاني..بالنسبة للتصاريح الي تسئ نادي الهلال انا اشوف مو مهمه عشان يكون الرئيس يرد على كل من هب ودب...لو كِذا راح نترك فريقنا ونهتم فيهم وكل شوي تصريح طالع من هنا ونازل من هنا...شبية الريح يرد..وكحيلانهم يرد..ويالله نعيد مسلسل حرب البلطان وفيصل بن تركي..وما اشوف اي داعي هـ الامور..نـآدي الهلال اكبر من ناديهم من تصاريح او كلام فاضي..

اما بالنسبة بخصوص اعضاء الشرف ..انا معاك 100% ولابد من تهيئة في الامور الي تحصل ..وما نرضاها على مشجعين وعلى مسمى نادي القرن...




يعطيك العافيه حمـد..