نادي الهلال السعودي - شبكة الزعيم - الموقع الرسمي - منتخب المستقبل !! نجوم المستقبل !! تكتيك المستقبل !! متى تنتهي ( صرفة ) المستقبل ..!!

بسم الله الرحمن الرحيم

نواف الهلالي يمسي عليكم بالخير :smilie47::rose:

يالله حي السعوديين كلهم :smilie47::d < على أساس إن الأقسام الثانية مب سعوديين :d

طبعا موضوعي هذا عام عن مسيرة المنتخب طوال السنين اللي راحت ..

ولا له علاقة لا من قريب ولا من بعيد في المباريات القريبة الماضية ..!

واسمحوا لي إذا كنت صريح جدا في الموضوع فما أكتب هو على الأقل ما أراه بأنه واقع المنتخب حاليا

حبايب قلبي متابعي وعشّاق الأخضر السعودي أو كما يحلو للإعلام تسميتهم الصقور الخضر ..!!

طبعا التسمية هذي خطأ قولوا ليش ..؟! لأن الاتحاد السعودي من خمس سنين وأكثر وهو يقول

هذا منتخب المستقبل يعني إلى الآن ما بعد صار مؤهل إنه يصيد الكؤوس يعني للحين ما بعد صار صقر

يعني تقدرون تقولون إن الاتحاد السعودي يعتبره منتخب خلوني أقول ( صقور المستقبل ) !! يعني ما بعد

صاروا صقور مره :d وشر البليّه ما يضحك ..!!!!

اسطوانة صارت تكرر كل سنة مرتين ثلاث ..! فإذا طلعنا من الخليج قالوا هذا منتخب المستقبل

وانتظرونا في آسيا وإذا طلعنا من آسيا قالوا هذا منتخب المستقبل وانتظرونا في كأس العالم

وإذا طلعنا من تصفيات كأس العالم قالوا منتخب المستقبل وانتظرونا بكأس العرب بعدين انتظرونا بالخليج

وعلى هالدائرة ندور وعلى هالموال نعيد ولا فيه أي جديد ...!! وأنا أقترح من كثر ما انغثينا من كلمة المستقبل هذي

إنه الاتحاد السعودي يشتري قناة المستقبل اللبنانية وتكون خاصة بالمنتخب وتعرض عليها مباريات المنتخب حصريا

وعشان اللي يشوفها يفهمها على طول من اسم القناة :to: ولا يقعدون يعيدون علينا ذا الكلمة ..!

أنا اللي جايب لي الصداع بالموضوع هذا والسؤال اللي يفحط في مخيلتي في كل سنة عندما يعيدون ذا التصريح

وما لقيت له جواب حتى لحظة كتابة هذا الموضوع ..!! هو : من متى والمنتخب له علاقة بإعداد اللاعبين ؟؟؟؟!!!!

اللي نعرفه إنه أي منتخب بالعالم يعتبر كل بطولة على حده ..! فإذا جت بطولة معينة اختار اللاعبين ( الأجهز )

لهذه البطولة حاليا ..!! وفي البطولة اللي بعدها يختار اللاعبين الأجهز في ذلك الوقت ..!! يعني مهب بالضرورة

اللاعب اللي لعب بالبطولة الماضية إنه يلعب بالبطولة هذي ! يعني البطولة اللي تلعبها تلعبها عشان تحققها

مهب عشان تجهز لاعبينك للبطولة اللي بعدها ..!!! وش ذا المنطق ..!!! تجهيز اللاعبين وإعدادهم هذا

من خصائص الأندية وإلا وش فائدة الأندية أجل ! وأنت عليك تختار اللاعب الأفضل وتلعب فيه ..!

أما إنك تجمع لي كل من هب ودب وتسوي لي معسكرات بالأشهر وتقعد تجرب في ذا اللاعبين هذا بكل اختصار ( بربسة )

أضرب لكم مثال بطولة الخليج في الإمارات في مركز الحراسة مثلا كان اللاعب الأجهز والأفضل بلا منازع

هو الأسطورة محمد الدعيع :smilie47: ومع ذلك ما أخذوه بحجة إننا نجهز منتخب شاب !!!

وحطوا بداله خوجة :to: وخذ نكبات إلى آخر مباراة في البطولة وهو ينكب !! وبعدها ما شفناه مع المنتخب

السؤال هنا .. هما المنتخب شاب وتجهزونه للبطولة القادمة ليش يوم جت البطولة القادمة غيرتوا اللاعبين !!!!!

وعلى هالحال .. في كل مره لا يختارون أفضل اللاعبين بهذي الحجة وإذا جت البطولة اللي بعدها غيروهم

والمنتخب من جرف لدحديرة !!!

الشيء الثاني والمصيبة الثانية اللي لها التأثير الكبير في دحدرة المنتخب هو ( الإعلام المنافق ) !!!

الحين من سنوات والمنتخب حالته متدهوره ولا هو فالح في شيء وخرّب سمعة المنتخب اللي كانت زمان

ومع ذلك اللي ما يدري وش السالفة ويقرأ جرايدنا يقول أكيد أكيد إن المنتخب الآن يصنف الرابع عالميا على أقل تقدير :s5s:

تطبيل في المنتخب وتطبيل في رئيس الاتحاد ونائبه وتطبيل في أشباه اللاعبين وإذا بغوا ينتقدون أحد ذاك اليوم

دوروا لهم أقرب مدرب ولزقوا البلاوي كلها بظهره ..!! ما فيه أي انتقاد للمنتخب وكيفية إدارة المنتخب

التي فشلت فشلا ذريعا بعد وفاة الأمير فيصل بن فهد رحمه الله :ba1:

الكل خائف وليس لديه الجرأة للنقد لذلك الأخطاء والتخبطات هي هي مستمره لم تتغير ..! وهذا من أكبر الأسباب

اللي جعلت المنتخب مكانك سر ..! ولا يوجد حل لهذا الموضوع إلا بطريقتين : الأولى وهي الأسهل أن يظهر

في الإعلام ( مجموعة ) من الكتاب الذين يمتلكون الشجاعة الكافية لانتقاد كل ما هو سيء ويطالبون الرئاسة

بالتصحيح والتطوير وإذا لم يتحقق ذلك أو لم يوجد من لديه الجرأة على النقد نذهب للحل الثاني الصعب جدا

وهو أن يتغير نظام الاتحاد السعودي فيصبح الأمير سلطان مثلا رئيس ( فخري ) للاتحاد ..!

أما من يدير الاتحاد فعليا فيكون شخص من عامة الناس حتى نرى الإعلام يبتعد عن هذا النفاق وهذا التطبيل

الذي أضر كثيرا بمسيرة منتخبنا العزيز ..!

والمشكلة دائما وأبدا كلما انتقد شخص المنتخب حتى يوم انتقدوه مجلس الشورى خرجوا علينا بالرد المعهود

أننا تأهلنا لكأس العالم أربع مرات متتالية ..!!!!!

طيب على عيني وراسي انجاز حلو .. لكن بالله عليكم ما هي الميزة الكبيرة أولا من أنكم تأهلتوا لكأس العالم

على حساب قارة ضعيفة جدا في كرة القدم كان من المفترض أن تتأهلوا عنها في كل النهائيات وليس أربع مرات فقط

في المقابل لو كنتوا في أفريقيا مثلا أكاد أقسم أنكم ما تشوفون كأس العالم ولا تحلمون فيه إذا كان هذا تفكيركم

وهذه طريقتكم ومستواكم ..!

وثانيا ما الفائدة من تأهلكم اللي يفشل بصراحة حينما تتلقون الثمنيات والخمسات وحتى الأربعات من منتخبات

مثل أوكرانيا وما شابه ..! أين الطموووح !!! اسمحوا لي إذا كان طموحكم هو مجرد التأهل فقط فهذا ما هو طموح

الجماهير السعودية فـ غيروا طموحم أو أتيحوا المجال لغيركم ..! يعني عندما تأهلنا للدور الثاني في الـ 94

كان طموح الجماهير السعودية إننا في الكؤوس القادمة سوف نصل إلى أبعد من ذلك دور الـ 16 ودور الـ 8

ولا منتخبات أفريقيا التي لا تقارن بنا ماديا بأفضل منا ..! يعني والله لو أتحنا المجال لمنتخب مصر اللي وقف

الحظ دائما حجر عثرة في وصوله لكأس العالم لو تركناه يروح بدل منا كان بالتأكيد إنه رجع بنتائج تبيض الوجه

وشفنا وش سوى بكأس القارات ..!!

على العموم ما أحد يستغرب مع هذي الأمور ومع هالأشياء اللي ذكرنا محد يستغرب إن الشعب ملّوا من طاري المنتخب

ولا ننكر إنه كثير ما عاد صاروا يتابعون المنتخب والدليل شوفوا المدرجات في الرياض إذا كانت المباراة ودية

وإلا تصفيات أولية ما تلقى فيها أحد !! مع إنه الدخول مجاني :s5s: عشان كذا ترا يلعبون بالشرقية :d

غير كذا بعد لو تلاحظون كانوا الجمهور سابقا متعصبين بشدة في موضوع إنهم يبون لاعبين فريقهم

يصيرون بالمنتخب ..!! أما الآن أكاد أجزم إن الكثير يقولون فكونا من المنتخب لا ياخذون لاعبينا

ويرجعونهم مصابين أو يحرموننا منهم في الدوري ..! يعني الكل صار يعتبر المنتخب أمر ثاني وثانوي

وليس هو الأساس كما يريد الاتحاد السعودي :yes: ولن تجد في الموضوع أي غرابة أبدا ولا تحتاج

إلى أي دليل على ضياع هذا الاتحاد عندما تعلم أن مباريات المنتخب غالبا ( مشفرة ) عن أبناء البلد ..!

في أي بلد في العالم يحصل هذا ..!

أما طريقة لعب المنتخب في السنوات الماضية فحدث ولا حرج .. بل لا يشك فاهم في كرة القدم أن المنتخب

كان يلعب بخطة طقها والحقها إلا يمكن في كم مباراة تعد على أصابع الأيدي خلال السنوات الماضية كلها ..!

ما أدري بس ما أذكر إني شفت المنتخب هذا يلعب بأفضل تشكيلة موجودة في الدوري .. ولا أذكر أيضا

إني شفته لعب مباراة فيها جمل تكتيكية عالية أو تبديلات مميزة تدل على قراءة جيدة لمدربي المنتخب ..!

كل اللي أشوفه بصراحه تخبط وبربسة ومثل ما قلنا طقها والحقها وشدوا حيلكم يا شباب ..!!

يعني باختصار ما فيه هوية للمنتخب وطريقة لعب معينة يعرفونها اللاعبين ويجون يطبقونها على طول

من دون معسكرات طويلة وما شابه ..! وقد يكون كثرة تغيير اللاعبين وعدم اللعب بتشكيلة شبه ثابتة

من سنوات السبب الأكبر في ذلك ..!

طيب خلونا نترك الماضي شوي :razz: يعني لو نبي نتكلم عن المنتخب حاليا أنا أشوف إن الأسماء الموجودة

هي تقريبا أفضل الأسماء وإن شاء الله ونتمنى إنه يكون المدرب قد الثقة ويختار التشكيلة المناسبة

ونشوف تكتيك حقيقي في الملعب وقراءة جيدة للمباريات بعد السواليف اللي قاعدين نشوفها كل هالسنين ..!

طيب لو نبي نشوف مثلا والمسألة مطروحة للنقاش للجميع :ba1: لو نبي نشوف ماهي أفضل الأسماء

الموجودة في الدوري حاليا واللي تستحق أن تكون هي التشكيلة الأساسية للمنتخب - إذا افترضنا عدم وجود الإصابات :yes:

نبدأ بالتشكيلة طبعا بالتأكيد أنها ستكون 4 - 4 - 2 فهي الأنسب دائما للمنتخب واللي متعودين عليها

أكثر اللاعبين في أنديتهم ..!

بالنسبة لمركز الحراسة فـ للأسف بعد اعتزال ظاهرة الأرض :smilie47: لم يأت من يسد ولو ربع الفراغ

اللي تركه فجميع الحراس مستوياتهم عجيبة وغريبة ..! مره فوق تقول يا زينهم ومرة تحت وتقول الله يستر !!

لذلك الحين ما فيه حارس أقدر أقولك هو المتفوق والمميز .. كلهم بمستويات متقاربة لكن خل نوافق بيسيرو

ونقول وليد عبد الله لعله هو أفضل السيئين ..!

ثانيا خط الدفاع .. الدفاع فيه مشكلة كبيرة يمكن لاحظتوها في كثير من مباريات المنتخب الماضية ومنها مباراة العراق

وهي إنه كل الظهيرين يهاجمون مع بعض :to: !!!!! وهذا خطأ بدائي وغريب تشك معه بعض المرات

إن اللي يحط التشكيلة - وأنا مدري منهو s121s - إنه لا يفقه في أبجديات كرة القدم ..!

فالمعروف إن الأظهرة واحد يكون لديه نزعة هجومية والآخر يقضب مكانه ويغطي منطقته صح ..!

عشان كذا الواجب إننا نشوف ظهير ممتاز هجوميا وظهير ممتاز دفاعيا ..! ولو شفنا من الأظهرة

الجيدين في الهجوم يكاد يكون عبد الله شهيل هو الأبرز حاليا - إذا كان في مستواه - لذلك نضعه في الظهير الأيمن

أما في الظهير الأيسر فأنا بصراحة احترت ولم أجد أي لاعب أقدر أطمئن على الجهة اليسرى في وجوده !!!

فالزوري والصقري والسعيد وغيرهم كلهم يكشتون بالهجوم وينكبون أم الدفاع :to:

لذلك يشوف الكثيرين إنه من الأنسب أننا نحط المدافع الأشول حمد المنتشري في منطقة الظهير الأيسر

وذلك لأنه إذا كان في مستواه فأنت تضمن أنه لن يمر أحد وهو يلعب بعض المرات مع الاتحاد في هذي

المنطقة إذا تقدم الظهير للهجوم وهو بالتأكيد يعتبر محل ثقة في الدفاع لأننا لا نحتاجه إلا في الدفاع فقط :yes:

أما متوسط الدفاع فالأمر شبه محسوم للوسيمان أسامه أبو كلبشة :smilie47: وأسامه المولد المجرم :s5s::smilie47:

في المحور الدفاعي .. يوجد عدة لاعبين مميزين في المحور لكن المشكلة أغلبهم يلعبون كمحاور هجومية !!

لكن المحاور الدفاعية قليل مثل الغنام أو إبراهيم غالب أو معتز الموسى أو غيرهم لكن يبقى الأبرز

والذي لا يوجد له منافس حتى الآن في هذه الخانة هو خالد عزيز :smilie47:

أما المحور الهجومي فيوجد عدة لاعبين مميزين جدا أمثال أحمد عطيف وكريري والجاسم وبصراحه تحتار بينهم

لكن ربما في الفترة الأخيرة ظهر كريري بمستوى جيد يذكر بمستوياته السابقة لذلك ربما هو المرشح لهذا المركز

خصوصا أنه يتميز عن البقية بالتسديدات الصاروخية من خارج المنطقة ..!

أما في الوسط فهو إما سيلعب بالأجنحة والعرضيات وهنا يوجد عدة لاعبين مثل الدوسري والعابد ويقدر يلعب الجاسم

أو بعض الأظهرة مثل حسن معاذ وغيرهم ..!

لكن إن كان سيلعب بصانعي ألعاب في المنتصف وهو الأقرب فـ صانعي الألعاب اللي عليهم الكلام في السعودية قليلين جدا

ويكادون لا يبلغ عددهم أصابع الكف الواحدة ..!! يعني تقدر تقول مثلا محمد نور والشلهوب وعبده عطيف والفريدي

ربما هذولاء الموجودين !! لكن لو شفنا مستوياتهم فـ نور مستواه هابط والفريدي متذبذب لذلك ربما أن الأحق

بالمركز هو عبده عطيف وإلى جانبه الشلهوب :smilie47: اللي نحتاجه أيضا في الكرات الثابتة :s5s:

أما الهجوم وما أدراك ما الهجوم :d يوجد عدة مهاجمين يعتبرون جيدين مثل الشمراني وياسر والسهلاوي وهزازي

لكن اللي تحتاجه هو اثنين .. واحد يكون يطلع برا المنطقة ويستلم ويسلّم ويصنع بعض المرات وهذي المميزات

غير موجودة في المهاجمين المذكورين سوى في الكابتن ياسر :smilie47: لذلك سيكون ياسر أحد المهاجمين

أما المهاجم الثاني فأنت بين خطتين .. إما أن اللعب مفتوح فتحتاج وقتها إلى مهاجم سريع وبالحالة هذي

يبي يلعب ناصر الشمراني أو إن اللعب مقفل وتلعب بالعرضيات والكور الطويلة وفي الحالة هذي تحتاج هزازي

والملاحظ إننا دائما نلعب بالطريقة الثانية لأنه غالبا المنتخبات تلعب أمامنا بالتكديس الدفاعي لذلك سيكون المهاجم

الثاني هو نايف هزازي ..! وعلى هذا فستكون التشكيلة الأساسية كالتالي ..:

http://www.footballuser.com/Formatio...48626_Ohod.jpg

أتمنى محد يشوف التشكيلة هذي ويعطي رأيه فيها قبل لا يقرا الكلام اللي كتبته فوق .. :yes:

ختاما .. المعذرة عن الإطالة يا شنبات :d:smilie47: لكن عشان أول مره نتكلم عن المنتخب فيذا

فلازم يصير الموضوع دسم :s5s::d

لكم مني أرق وأعذب التحايا ،،،