حبي للهلال وتشجيعي له كان مقدر وكتوب
*** والقصة
بدايتي كانت تقريباً عام 1406 هـ وقتها عمري كان 6 سنوات وكنت احب الكورة واتفنن في لعبها واسمع عيال عمي واخوياهم
اللي اكبر مني يتكلمون عن المباريات وانا اللي اعرفه عن المباريات هي المباريات اللي نلعبها في الحاره على بابين او على عواميد الانارة
وكان الغالبيه يتكلمون عن الهلال بكثره وانا احب اسمع اي شي عن الكورة حتى لو كانوا يتكلمون عن مباراة كانو يلعبونها هم انفسهم
في حارة بعيدة عن حارتنا ولا كنت اقدر اروح معهم المهم حبيت الهلال وانا ماشفته لأن وقتها ماكان عندنا TV . ذيك الايام كانت فيه
دورة او تصفيات مادري والله وش قصة ذيك المباريات اللي اقيمت على مدينة الملك عبدالله في بريدة بعد تأسيها بفترة قصيرة
وكانوا العيال يسولفون ان الهلال بيلعب فيها والاتحاد والرائد ومدري مين بعد . المهم انهم في يوم قالوا ان الهلال بيلعب وبنروح للمباراة
وقاتلت عشان اروح معهم وبصعوبه وافقوا لانهم كانو يشوفوني ( بزر ) المهم يوم دخلنا الملعب قلت وين الهلال وكان الفريقين اللي يلعبون
واحد لابس اصفر واسود والثاني احمر . قالوا انهم غلطانين تعرفون وقتها لاجرايد ولا اخبار رياضه ولا ert ولا الجزيرة يعني على البركه
اتضح ان المباراة بين الاتحاد والرائد . وكانت اول مباراة اشاهدها في حياتي على الطبيعه . بعدها بفترة وصل الـ TV الخاص حقنا ( طلبية من برى )
وكنت اتسمر عليه وانتظر اشوف الهلال ( نحبه وماندري وش وضعه) المهم اني شاهدة اول مباراة بحياتي وكانت بين الهلال والاتحاد
() وراك وراك هالاتحاد () مادري وش السر المهم شدني الازرق تحمست مع الهلال وانا ماعرف ولا لاعب واللي ماغاب عن بالي اسم الاعب اللي سجل هدف الفوز للإتحاد
اظن اسمه سامي كتوري او هاني مدري بالضبظ . زعلت وتنكدت بس ماهمتني الهزيمه لأني بوقتها كنت الوحيد في البيت اللي يتابع كورة
يعني ماحد يأثر علي خلاص حر بالفريق اللي اشجعه وتشجيعي له ماكان عشان الفوز... بعدها اذكر اول نهائي بطولة شفته
كان على كأس الملك بين الاتحاد والنصر مدري سنة كم بالضبط المهم فاز الاتحاد وكان الهلال المركز الثالث وصوروا بعد المباراة
جميع يعني كان فيه وقتها روح رياضية بين الهلال والاتحاد بعدها شفت مباريات للهلال بالدوري وتعلقت بصالح النعيمة امبراطور
شي خيالي هالاعب ثقه بمعنى الكلمة شخصية هبلت فيني خلاص صرت اقلد اي حركة يسويها وكنت اتمنى اني اصير قائد مثله
اخذ الهلال الدوري عام 1407 هـ بس ماكنت احس بنشوة وانها بطولة لأني ماشفت مباراة نهائية يكون فيها فريقين والفائز ياخذ الكاس
مرت الايام وشفت ثاني نهائي بحياتي بين الهلال والنصر على كأس الملك وفاز النصر وقتها بهدف ماجد . زعلت بس برضوا هلالي هلالي
جاء عاد النهائي اللي فرحني وخلاني اطامر من الفرح نهائي كأس الملك مع النصر وثلاثية المدافعين الشهيرة بعدها بديت افهم الكورة اكثر واكثر
عرفت يوسف الثنيان من بداياته وكان يشدني بلعبه واحب اقلده وكان ثاني لاعب يأثر فيني بعد النعيمه والمصيبيح بعد كان يشدني جدا جدا
ناس كانت تلعب بثقه فوق ماتتخيل تحس ان الفوز بجيوبهم متى ماارادوا اخرجوه وفهودي بعد لحقت عليه كم مباراة الخلاصه من بعد النهائي مع النصر عام 1409
الى الدوري عام 1410 وبداية الاسطورة ومباراة الرائد اللي ماانسها واللي اطلق فيها سامي الجابر صاروخه سام 6 وسنتها حضرت اول مباراة للهلال
وكانت مع الرائد واصيب فيها صالح النعيمه ونقل بالاسعاف ( انكسر خشمه على مااعتقد ) وزعلت جدا لاني وقتها لاشفت صالح يركض قدامي بالملعب
تساوي هالوقت انك تشوف ميسي يلعب قدامك على الطبيعه شي خيالي يعني المهم ماكان يفوتني شي عن الهلال حتى المباراة اللي ماتنقل
اتابعها عن طريق الراديو احيانا كان ينقل مباريات الهلال اللي ماتجي على التلفزيون (
ومن مربع ثلاثه لمربع خمسه )
والقصه تطول المهم إنا نحب الهلال في كل الظروف ولا علينا من غيره
..
..
..
.
الوضع العادي
