“All the world's a stage, And all the men and women merely players”

الدنيا مسرح كبير، وان كل الرجال والنساء ما هم إلا لاعبون على هذا المسرح







الدنيا غريبه عجيبه!!!

احيانا نقابل ناس ما ادري ايش نوعية تفكيرهم ؟؟؟

ماكتبت الا لما طفح الكيل ..


بعض من الناس توزع رقمي على اني موزعة لعروضي ومدرسه خصوصية!!!! بالمجان!!!!!!!



في بنت اعرفها مسويه اني انا Wow

ف بتوزع رقمي على كل احد يطلب مساعده ..ما اعرف يمكن انا ال 911 ولا ايش ؟؟!!! المشكله اني مفهمتها انو

انا ما احب احد يوزع رقمي خييييييير .. يعني اقولكم قصتي قبل اختبارماده شوي صعبه ويبغالها عقل مفتح وحول

الدراسه ولو مو حول الدراسه مايفلح..

الموهيم..

جاني رقم غريب وانا كما قلت سابقا في فضفضة 1 لو ينطق الجوال ويقول تكفين ردي اقوله انطم ..

ما ارد على أي رقم غريب ..حتى لو كانت بنت ارسلت لي مسج وقالت انا فلانه وانا ما اعرفها ما ارد ..

لييييييييييش انا ما اعطيتها الرقم ف خليها ..عشان مره ثانيه لما تبغاني تجيني وتطلب رقمي مو تروح

وتجيب رقمي مدري من فين..



طولت الهرجه .. بس جايه بالزبده ..

قبل اختبار الماده (المذكوره اعلاه)جاني رقم وجلس يتصل يمكن فوق ال12 مكالمه <<طبعا جوالي سايلنت بعدين

جاني مسج..

"انا فلانه علانه اعطتني رقمك..معليش انا ماعرفت اذاكر الماده وهي صعبه وانا ماني فاهمتها" <<الين هنا

الكلام تمام

تكملة المسج ..

"اذا ماعندك مانع ممكن اجلس بجمبك وقت الاختباراذا مافيها احراج ..وشكرا "

يحتاج اقولكم الـ، reaction ردة الفعل ولا خلاص.. طبعا انا ولا كأني شفت شي .كملت حياتي طبيعيه وناويه

ارتكب فيها جريمه لو لو لو جات واتجرأت وكلمتني <<المشكله ماني عارفتها أخ لو بس اعرفها ...



الخلاصه ..

1- الواحد لازم يحترم خصوصيات الغير ..مو أي شخص يطلب رقم صديقك او صديقتك تقوموا تعطوه حتى لو كان

الطلب ضروري ...

2-اصابع يدينكم مو زي بعض ..



بعض من القوم شين وقوي عين !!!وشحاد ويتشرط!!!


في بنات ما ادري ليش متعبه نفسها ومتعبه عقلها وتفكيرها المموري تبعها..

هذي ياعييييييييييييييييييييييييييينيييييييييييييييييي عليها اللـــــــــه الله ..

حطمت الرقم القياسي لعدد الاتصالات بجوالي ..وصلت اتصالاتها ال20 اتصال طبعا ارسلت المسج من ثاني اتصال

وانا على طول حطيته سايلنت ..

لحظه اكتب لكم المسج من الجوال نفسه افضل..



"ياماري <<انا

الله يسعدك اعطتني علانه رقمك ارسليلي عرضكم اللي سويتوه في الدراما ماراح اسوي نفسه راح اكتبه بطريقتي

بس افهمه وهذا ايميلي ****ضروري الله يسعدك "



طبعا العرض كان جدا صعب ..بماده اسمها Drama عني المسرحيه ..كان مقارنه بين كاتبين بريطانيين

شكسبير ومارلو ..كانت المقارنه في اعمالهم المختلفة وبعدين لعملين لهم محدده من عند الدكتوره ..ومايتعدى عدد

الشرايح 6 شرايح ومايكون الكلام دش ووو يعني من جد كرررف كان اصعب شي والحمدلله عجب الدكتوره ..

<<علللله على العرض ترا

وهذي الاخت اللي مااعرفها تبغاه ..هذي تبغى تاخذ العرض اللي تعبت وانهلكت فيه!!!

والمشكله ان احنا الثنتين عند نفس الدكتوره وانا علاقتي مع دكتوراتي ممتازه ..

مرررررره صدقت انها بتفهمه ..ليش مو من اول اهتمت ودورت وكتبت .. معليش ما اعطي تعبي

لأحد هذا شي .. شي ثاني لو اعطيتها انا اللي بأخسر العرض عليه 20 درجه وهي درجه اساسيه ..لو

اكتشفت الدكتوره شي بسيط انا الخسرانه مو بس الدرجات بأخسر الدكتوره كمان .. طبعا في يوم جميل

خارجه ومروقه والسواق يستناني برا ..قابلتني ووقفتني وجلست تسبني وتنافخ وتصارخ .. يا *** ليش ماتردي

على الجوال انا وانا وووو..<<< وختمت كلامها ..على فكره تراني مسحت رقمك ..<<<

وقتي انا ماكان يسمحلي امسح فيها بلاط الجامعه ..ف قلت لها وانا استهبل عليها هو انتي

صاحبة الرقم !!! مين سمحلك اصلا تاخذي رقمي ..وبعدين انا ما اعطي تعبي لأحد

فاهمة .. الا على فكره كيف سويتي بالعرض ؟؟!!

مع ابتسامه مستفزه <<اخر جمله قلتها وانا خارجه لأني عارفه انها معتمده على عرضي .. وماعملو شي



الخلاصه

1- لما تحتاج انك تطلب شي بس خجلان او ماقدرت تتكلم لصديقك لاتلف وتدور عليه لأ

تكلم واجهه واطلب منه اذا رضي اوكي واذا مارضي خلاص هو حر

2- لما تتصل على احد مره ومارد عليك كررها بعد ساعه واذا برضو مافي رد لاعد تتصل..لأن

بالجوال يبين ارقام المتصلين لو يبغى يكلمك كان رد او راح يكلمك اذا فضي ..





بعض من البشرية مع الخيل ياشقرا!!!

في بشر ما ادري ليه داخلين الجامعة على بالهم مدرسه ولا ايش ..

احيانا احس اني جالسه مع اطفال او مراهقين..يا استاذه بلاش محاضره اليوم <<ليش جايه يالاخت !!!!

مره فلت لساني على بنت قالت هالجمله وهي تترجى الاستاذه .. "ما نبغى محاضره اليوم "

قمت قلتلها اطلعي برا اذا مالك نفس ويلا اللي ماتبغى محاضره تطلع انا جايه من بيتي ومتعبه

نفسي عشان تكنسلي المحاضره انتي وهيا ..وربي اعرف الخط السريع واعرف الطريق كامل وحافظته

.. بعدين انتبهت على نفسي بعدها الاستاذه كررت كلامي وهي هاديه "اللي ماتبغى محاضره

تطلع وراح احاسب على الحضور والغياب" <<واخذنا المحاضره

..

(انا بهذا اليوم ماعندي الا هالمحاضره ووقتها غبي اضطر اني اداوم من الساعه 7 ونص ومحاضرتي 9 ونص )





همسة بأذن الجامعيين الجدد..

1-انت الان بالجامعة فتصرف بعقلانيه ..حدد هدفك وثابر حتى توصل له

2-لاتتصرف كالمراهقين والاطفال ..





بعض من امة اتقوا الله ... واعطيني المقطع هيفاا!!!!

هنا اقف لحظه ..اتكلم بواقعيه ..من حياتنا ولاحد ينكر .. من كثر اللي مروا علي ماعرفت ايش اكتب ..ليه

الناس كذا يجيك واحد لحيه والمسواك بيده والسبحه باليد الثانيه و تلاقيه ..ظالم .. انسانه تجلس مجالس ذكر

وتتكلم على الحجاب والحجاب والبناطيل وعبايات الكتف ووو ..وتلاقيها هي وبناتها عباياتهم على الكتف ويلبسو

بناطيل .. ولاحد يقول مافي لأن هذا شي من الواقع ومو على وحده ولاثنتين لأ على كثيييير .. الدين

على كيفهم .. يطبق على الناس وعليهم لأ !!



الخلاصه ..


1- قبل ماتنصح وتحاول تعدل بالناس ابدأ بنفسك ..واهلك ..واللي حولك..

2- الدين المعامله..





بعض من الــ بني ادميين.. اهم شي اني نجحت واللغة NO COMMENT


دخلت بالواسطات..

نجحت بالبراشيم..

خدعت كثير ..

وسرقت..

ضحكت على كثيييير..

تخرجت..

راحت الاربع سنين جا يوم المقابله الشخصيه لوظيفه!!

مفاجأة..

ماتفك الحرف بالانجليزيه..

وضاعت الاربع سنين بلا فائدة..

والكل يقول خريجت لغة انجليزيه ..

عجب عجاب ..

الخلاصه

1- الله يمهل ولايهمل..

2- من غشنا فليس منا ..

3- الفائده لنفسك اولا وللغير ثانيا ..

4- تذكر ان انت محظوظ لأنك جالس تدرس ..




اطباء اليوم بكم شهادتك!!!!


اختي عمرها 5 سنوات الله يحفظها ..تعبت من الجو وصار عندها بداية ربو..كتبلها الدكتور على

ادويه كثيره تنفجعو من كثرتها .. كتب لها مضاد عادي وماتحسنت ورجعت امي له ورجع كتبه لها مره ثانيه

..وكتب معاه مضاد ثاني ..يعني يبغاها تاخذ مضادين وبكميه ال5 مل..

قرأت امي النشره اللي مع المضاد الجديد ..وسمعناها تسب الدكتور..كانت بترجع له بس

بطلت اخذتهاعلى دكتور ثاني ..وورته الادويه ..ماتكلم بس كنسلها كلها ..وكتب لها على ادويه ثانيه

يومين وتحسنت حالتها وخفت الكتمه عندها ..



امي رجعت عند الدكتور القديم ولما واجهته اخذ منها الوصفة اللي كتبها ورماها.. طبعا ما ادري ايش صار

لأن امي عصبيه ولما كانت تقولنا فجأة قلبت علينا <<<يازينها بدون العصبيه احب

اشوفها تعصب على الغير



الحمدلله اهلي معودينا ان لازم نقرأ النشرات اللي مع الادويه ونتأكد من العلاج اذا ينفع لعمرنا ولا لأ..

الخلاصه ..


1-لازم تتأكدو من اسم العلاج ..

2-لازم تقرأو ا النشرات اللي بالعلاج..

3-مو اي علاج تاخذوه ..

واتمنى ان الصحه تكون رفيقة دربكم ..