السلام عليكم ورحمة الله وبركاته



هارد لك يازعماء التعادل الغير مرضي تماماً !! بصراحة ما أدري كيف أوصف شعوري .. يعني
الكل كيف شاف المتعة اللي قدمها الهلال من ناحية التبادل بالكرة !! تبادل رائع جداً ولكن كان
ينقصنا من ينهي الكورة بشكل رائع ..



اليوم أحمّل النتيجة بنسبة 90 ٪ لـ حسن العتيبي !! في كل البلنتيين كان يتفرج على الكورة .
خاصة البلنتي الأول .. يعني معقولة فيه حارس ما يعرف يقفز بالبنتيات !! والله شيء مُخزي..
تذكرت حارسنا المبدع شراحيلي الله يقومه بالعافية .. آه بس يوم يصد بلنتيي الرائد بنفس الملعب..



سلبيات الفريق من وجهة نظري :


* عدم رجوع لي يونج بسرعة كافية ..
* وجود الشلهوب بـ مركز المحور في مباراة اليوم .. وربما هذه نتجت عن فلسفة من كالديرون ..
* وجود وليهامسون بالتشكيلة الأساسية !! << هذه لها محور خاص ..
* قلة عمل الـ 1 > 2 ، يعني نشوف اليوم قلة فتح اللاعبين لبعض << هذه برضو لها محور خاص ..
*عدم إنهاء الهجمة بالسرعة الكافية أمام المرمى بكثرة تبادل الكورة << هذه لها محور خاص ..


طيب الحين أشرح لكم وجهة نظري ببعض السلبيات اللي قلتها :

أولاً وجود وليهامسون بالتشكيلة الأساسية .. من بداية الموسم والكل شايف مستويات السويدي
وليهامسون السيئة !! يعني اليوم بصراحة أنقهرت منه بشكل غير طبيعي .. الكورة اللي أنفرد
فيها بالمرمى كانت شبيهه بهدفه على بونيودكور .. لكن لماذا لم يسدد بسرعة ؟ لا أعلم .. يمكن
سراب مرته جاه .. والله مدري .. أيضاً كثرة فلسفته بالكورة .. يعني اليوم أغلب اللاعبين كانوا
يلعبون من لمسة واحدة إلا وليهامسون اليوم كان قليل يناول .. مدري بيثبت نفسه بالمهارات
ولابصراحة مدري كيف ..


ثانياً اللي هي قلة عمل الـ 1 > 2 !! اليوم ضاعت علينا أكثر من هجمة بسبة الشيء هذا .. يعني
مثلاً أكثر من كورة كانت بتكون خطيرة بس فَشل هذه العملية قادت بنا إلا ضياع الهجمات ..
اليوم أحمد الفريدي مرتين يسوي هالحركة .. يسلّم الكورة لـ نيفيز ولا يطلع معه .. سلمان الفرج
سوها أكثر من مرتين .. سلم الكورة مرة لشلهوب ورتين لـ ولي ولا طلع معهم .. يعني ياليت
يكون فيه تركيز من ناحية المناولات والتدقيق فيها ..


ثالثاً اليوم كان فيه تهاون بالتسديد خاصة من ولي والفريدي .. يعني يتبادلون الكورة عند خط
الـ 16 !! واحد يسدد الكورة ويفكنا والله المفروض الشوط الأول على الأقل طالعين بـ 3 أهداف ..




عندي بعض النقاط حاب أقولها .. بموضوعي اللي قبل هذا قلت أنه من المفروض أني ولي يروح
ويجي مهاجم بداله .. ويروح لي يونج ويجي عبدالله شهيل .. وفكرت مدرب لكل خط !!
والبقاء على اللاعب تياجو نيفيز ..
البعض من الأعضاء كان مُصر على بقاء وليهامسون !! بل وصلت لبعض الأعضاء بأن يتهمني
بالـ [ مجنون ] الـ [ غبي ] بصراحة حسيت أني ما أفهم بالكورة بُتاتاً

ياجماعة الخير .. وليهامسون الموسم الماضي حلل نص مبلغه .. وقدم مستويات طيبة .. لكن
الموسم هذا [ الكتاب باين من عنوانه ] وليهامسون مستواه طايح من أول الموسم .. فـ كيف لو
أستمر معانا وكمل الموسم بهذا المستوى .. وبكل تأكيد أنه بيكمل الموسم بهذا المستوى لضروف
اللي قاعد يمر فيها ... بدايةً بعدم رغبة أم العيال بالقعدة بالسعودية .. ووصلاً إلا معرفة باقي
المدربية على كيفية لَعب السويدي وكيفية إيقافه بشكل تاااااام .. البعض منكم يقول من يجي
بداله ويغطي المنطقة اللي يلعب فيها !! نقولهم نفس الكلام اللي كنّا نقولوه لـ عُشاق طارق
يجي اللي أحسن منه .. نقولهم نفس اللي كنّا نقوله لعشاق كوزمين .. يجي اللي أحسن منه ..
وبالفعل جاء أحسن منهم كلهم !!


اللاعب الثاني اللي هو [ لي يونج بيو ] البعض بل الكثير منكم كان مُعارض على فكرة أنتقاله ..
أقول : لي يونج الحين صار عمره كبير .. مدري الظاهر أنه 35 ومستحيل يستمر على هذا
المستوى .. اللاعب أجزم أنه قدم كل مايملك في كأس العالم .. أضف إلا أنه الشيء الرئيسي
اللي كنّا نبغاه منه صار .. وهو إضافة الخبرة لمحمد نامي .. فـ مع وجود عبدالله شهيل وإحتياطه
محمد نامي نكون إكتفينا بشكل كبير من الظهير الأيمن ومن مشاكله ..


ثالثاً أنا قلت فكرة وطحتها عليكم ألا وهي أنه لكل مركز نجيب مدرب .. ونسيت لا أشرح لكم ليه
هالفكرة وعلى أي أساس خطرت في بالي .. وكيف تطبيقها ... إلخ هالفكرة أنا جبتها من بعض
الأندية الأوروبية .. أنا أخوي يدرس في بريطانيا ويحضر بعض تمارين الأرسنال لتّغطية في
بعض المنتديات .. فـ يقولي: تدري ليه السبب الأكبر في نجاح الأندية الأروبية .. قلت له لا ..
قال لأنه عندهم في كل مركز مدرب خاص فيه .. يعني مثلاً كالديرون أنا ما أعرف كان يلعب بأي
مركز .. لكن أفترض أنه بالهجوم .. مدرب كان يلعب بالهجوم .. كيف تبغونه يعرف أساسيات
المدافعين وكيف الطريقة اللي يقفلون على مهاجمين الخصم بالشكل المطلوب .. كيف طريقة
لِعب صُناع اللعب بالشكل المطلوب .. البعض منكم قال كيف يتفاهمون على بعض اللاعبين ..
أقوله أنا ماقلت خلاص ماأحد يكلم الثاني .. بس يكون فيه مدربين متخصصين بالمراكز .. يعني
مثل ما أن الحراسة لها فنون كذلك المراكز الثانية لها فنون ..

عموماً الموضوع يطول .. اللي بيفهم يفهم .. اللي مب فاهم بسلامته الله معه



رابعاً اللي هو مكوث تياجو نيفيز وتأييدي لهالفكرة .. ياجماعة والله العطيم نيفيز يدوّر على
واحد يفتح معه بشكل سليم .. يعني لو نشوف نص الأهداف اللي صنعها تجي من حطات حلوة
مرة .. مين بيفتح معه ؟ ياسر مثلاً ؟ ياسر مو قادر يتحرك لأنه المهاجم الوحيد بحضرة 4 مدافعين ..
نيفيز يعدي ويسحب لأنه مافيه أحد يطلع معه من الأطراف .. ولا لو نشوف نص الأهداف اللي
صنعها للأطراف تجي بعد تركيز كبير وتطليعه حلوة مرة .. نيفيز متعود على رؤوس حربة
زي الناس .. مو وليد الجيزاني وفيصل الجمعان الله يذكره بالخير .. بإستثناء ياسر لأني أعتبره
مهاجم ثاني مو رأس حربة .. أرجو أن المقصد وصل ؟




أنا مازلت أُناشد في خروج ولي ولي يونج وقدوم جناح كـ أيندو أو هوندا بدلاً عن لي يونج
وقدم مهاجم على مُستوى رفيع أو بالأصح رأس حربة رهيب .. ويكون ياسر خلفه ..




بالمناسبة .. حاب أشيد بمستوى سلمان الفرج ..


تنبيه خاص بخصوص بعض الأعضاء اللي أستنكروا حركة ياسر بعد الهدف واللي هي
تقبيلة للكورة .. أنا أتوقع والله أعلم أن ياسر بحكم أنه كان غايب كل هكالمدة عن الملاعب
وبحكم أن هالكورة هي اللي أفتتح فيها أهدافه بعد الرجعة قبلها .. فقط لاغير ..




مشكورين على حسن قرائتكم وردكم على الموضوع