ترى مهوب معنى وصلونا للنهائي إن منتخبنا ( فلته ) او منتخب قوي ..

منتخبات الخليج كلها مدحدره هذا أولاً

ثانياَ وصولنا للنهائي جاء بطرق صعبه وصدفه والحظ لعب دور كبير لوصولنا للنهائي

ثالثاً فوز على اليمن .. تعادل مع الكويت غير عادل بصراحة لأن الكويت إستحقت الفوز في تلك المباراة .. وبعدها تعادل مع قطر بآخر الدقائق ومن قدم لاعب المنتخب القطري وللعلم طلال البلوشي كان غايب عن منتخبهم .. وهو يعتبر أحد أهم لاعبي المنتخب القطري .. وماأنسى لاعب الكويت بدر المطوع في مباراة الكويت ..رغم هالظروف اللى من صالحنا ولاإستغليناها صح ..

بطولة الخليج نقول مثلاً بطولة غير معترف فيها على قولة بعض الناس .. كل ماطلعوا وصرحوا قال إنها بطولة غير معترف فيها وغير مهمة وهم من الداخل ( تسبودهم تقطر ) تبي البطولة ويصيحون صياح لو ضاعت مدري ليه نكابر ؟ كلنا في دول الخليج نكابر على بطولة كأس الخليج .. رغم إننا محتاجينها أكثر من غيرنا ولأسباب حقيقيه مهيب لأسباب فلسفجيه .. مثال لم الشمل والتواصل ولقاء الأشقاء ... مو هذا القصد

القصد هو تطوير منتخبات الخليج .. الإستفادة من هالبطولة في ظهور نجوم وإعطاء فرصه لبروز لاعبين في بطولة مهمه ... والأمثله واجدة وأخرتها منتخب عمان .. وكلنا نذكر منتخب عمان ياكل بالخمسه والسته .. والحين صار منتخب يخوف ..

كاس اسياء مابقى عليها شي .. ومثلها مثل كاس الخليج نوصل للنهائي ونفشل في المباراة النهائيه

نبي آسياء ... وآسياء ماراح تجي مع هالمدرب ولا مع بعض هاللاعبين ولا مع هالروح الميته !!!

حتى الخليج ماراح تجي في ظل هالمستوى ومع هالمدرب ..

مهوب هذا هو المدرب اللى يبي يحقق طموحات الجماهير في السعودية


لذا يجب طرد المدرب في حالة الفوز في بطولة الخليج او خسارة النهائي ... لانصبر عليه بعد الفوز وننسى تخبطاته بعد البطولة ..

لأننا نسكت عن الغلط في حالة الفوز .. مثلا أحمد عباس كان طيلة البطولة سيء بس متأكد إن البعض او الغالب يبي يسكت عن وضع أحمد في البطولة لأنه جاب الهدف أمام الإمارات ..

بس تدرون .. والله ياسر القحطاني له وحشه

-----

شكرا لليمن جمهور وشعب وشكرا لحارس عمارتنا ( صالح ) اللى إنصل علي مخصوص يبارك لي الفوز على الإمارات .. والله شعب طيب وكانت الجماهير أحلى مافي البطولة .. وأتوقع في الإستضافة القادمة لليمن بيكون الوضع أفضل في كل شي حتى في منتخب اليمن ..

فهد العنزي صرّح .. فهد العنزي ينفي .. ومره يؤكد .. ومره يكذّب .. وانا رأئي الشخصي ان فهد يلعب على الوتر الحين وهذي فرصته لو مااستغلها صح ماراح تجيه مثل هالفرصة ..فرصة للتجنيس وللتعاقد ولتحسين مستواه المعيشي .. هالبطولة بتكون منعطف في حياته وأسرته .. أتمنى له التوفيق

كثير من اللاعبين يستغلون المواقف ويختارون الأوقات الصح .. من يذكرتوقيع عقد السعران بعد ماجاب هدف قدام الزعيم .. ومن يتذكر صرف رواتب لاعبي النصر قبل مباراة الزعيم .. هذي كلها مواضيع أحسن فيها إختيار التوقيت وتم لهم مارادوا وهذا مايحصل مع فهد العنزي .. راح ياخذ كل شي خصوصا إن السعودية هي الخصم وهذا نوع من التنافس بين الكويت والسعوديه الغير رياضي

الفريان فاقده في هالبطولة ... وسمعني بعد ماصرحت بفقدانه وصرت أشوفه في كل مكان وفي كل القنوات ماشاء الله عليه .. وافي يافريان

مبروك لقطر إستضافة كاس العالم 2022 بيصير عمر طلال إن شاء الله 18 سنة وفارس 15 سنة وانا 30 سنة >> قويه هاه ؟ الله يعطينا طولة العمر بس بعد الحسبه يصير لي ست سنوات متقاعد تقاعد ( مبكر ) ويبقى لي 4 سنوات وأتقاعد تقاعد كامل .. يعني أستلم الراتب كامل ..

السؤال اللى يطرح نفسه ... هل الشحروره صباح بتكون متواجده في حفل إفتتاح كاس العالم ؟ أتوقع بتغني ببلاش خصوصا وهي توها متزوجه ذيك الفتره هع هع هع

تمنياتي للمنتخب الكويتي ( كيده وكيده ) زي ماتمنيت للمنتخب الإماراتي من قبل

أخوكم الصغير ابو طلال