معروف أن المنتخب العراقي يلعب بكامل نجومه وقوته في جميع الخانات وخاصة في المقدمه ..

والهجوم العراقي سيتأثر بغياب ( فريان ) المنتخب العراقي .. وهالغياب هو مفتاح فوز المنتخب الكويتي .. وهذا مااتمناه بصراحة ... أتمنى النهائي سعودي كويتي .. او سعودي عراقي >> وراك هونت .. بصراحة كل منتخب أطلق من الثاني ولنا مع كل واحد فيهم قصة وحسابات .. خصوصا العراق

لكن العراق في ظل غياب ( الفريان ) لن يسجل .. خصوصا وأن المنتخب الكويتي يلعب للهجوم والبحث عن الأهداف بوجود المبدع بدر المطوع ومن اليمين فهد العنزي .. وهالكشه اللى لاشفتها طايره ( هج عنه ) فنان

المباراة قوية .. أتوقع بتكون احلى من بماراتنا مع الإمارات ...

قبل مااطلع لمنتخبنا والإمارات بس بعلمكم إن المقصود بـ ( الفريان ) هو يونس محمود .. واللى صار أشد من الفريان بكثرة مداخلاته وملاحقته للكاميرا .. حتى شكيت إنه ينافس الفريان على اللقب بالظهور الأكثر في العالم بالليل يتصل .. بالنهار يطلع ويصرح .. بين الشوطين له مداخله في برنامج المجلس .. وهو في الإحتياط يدلي بتصريح .. >> ياصبرر الأرض

* منتخبنا ..

من يذكر أغنيه أبو بكر سالم الوطنيه ( يامنتخبنا سعووودي الله يصووونك أوه او اووووه .. حقق أملنا سعودي وأثبت وصولك ..) بس اللى يسمعها لايوفته ابو بكر وهو يقول ( أووه اوو اووووه )

الله يرحم حالنا أول .. أغانينا الوطنيه يغنيها يماني .. والكورال مصريين ... والملحن أردني .. بس كانت أجمل من الأغاني الوطنيه الحاليه .. ..

أجل أغنيه محمد عبده .. هبت هبوب الجنه ؟؟ اللى يرددون وراه يقولون ( هااابت هابووب القنّه .. وينيك ياباغيهااا ) ( القنه = الجنه ) بالمصري ...

حتى السلام الوطني السعودي كلمات مصريه .. او لحن مصري .. بس حلو تحس وإنت تسمعه إنك بطابور المدرسه الصباحي .. والبرد ميبس الخشم وإذا خلص السلام الوطني يجيك الفاضي الفاغر المالغ مدرس الرياض مع حركاته اللى مالها داعي يسمع بالتسخين .. وح نين ثلا بع .. وح نين ثلا بع .. وح نين ثلا بع ( يعني واحد إثنين ثلاثه أربعه ) مع حركات اليدين ..

أما الأغاني الوطنيه .. مافيه مثل ابو عبدالله طلال الله يرحمه ( روحي وماملكت يداي فداه .. وطني الحبيب وهل احب سواه ؟ ... وطني الذي قد عشت تحت سمائه .... وهو الذي قد عشت فوق ثراه ... منذ الطفولة قد عشقت ربوعه ... إني محب سهوله ورباه ...... ) ... الله ياطلال مداح

سمعتها باليوتيوب وشفت تعليقات السعوديين اللى بالغربه .. تعليقاتهم تصيح .. مشتاقين المساكين للديرة !
واحد منهم مختصر الموضوع وكاتب ( احبتس ياالسعوديه .. الله يلعنتس يابريطانيا )

والله ياني حذفت عن الموضوع والبطولة .. والغرض اللى له مفتوح قسم خليجي 20 بس خل عنك بداية الأغنيه معبره .. الله يرحمك ياطلال مداح

السعوديه والإمارات ... منتخبات مشاركه مسويه نفسهم ( البرازيل .. وأسبانيا ) مشاركين بالرديف مهوب عاقلين الألمان على غفلة ... وش عندكم الله واكبر ماتشاركون ومشغلين العالم عن هالصف الثاني اللى ذليتونا فيه وحطمتوا اللاعبين الحاليين بالمنتخب !!! وش شعور اللاعبين الحين المشاركين في البطولة وهم يسمعون مثل هالكلام وخصوصا من ( الطرمبه ) بسيرو .. وإعلامنا المبجل !ّ! اجل متهاوشين علشان المدرب لاعب بالصف الثاني !! طيب ليه مافيه ثقه في هالصف الثاني .. وتنطمون لين ماتخلص البطولة .. يعني انا لو لاعب وأسمع هالكلام والله تطيب نفسي من المنتخب واللى فيه !! يعني ملعبينا تصبيره ! كلام فاضي ..

عموما انا ماعمري تمنيت لمنتخب يفوز او ياخذ بطولة إلا ويخسر .. بدري بدري ..

تمنيت في بطولة أمم أوروبا المنتخب التركي وماأخذها .. قلت الألماني بعده بالامنيه .. ماضبطت توقعاتي
في كاس العالم الأخيره ... تمنيت ألأرجنتين وسبحان الله طلعت بشكل مخزي .. ياللعار وبعدها تمنيت الألمان .. وراحت عليهم .. قلت عاد مافيها هولندا . وبالأخير تاخذها أسبانيا ..!

في بطولة كاس الخليج الحاليه في اليمن .. تمنيت وشجعت البحرين .. طلعت ومن هزيمه ثقيله من الإمارات ..

والأمثله كثيرة ...

لذلك انا تسمحون لي هالمره أتمنى فوز المنتخب الإماراتي على السعوديه .. ( كيده وكيده ) على قولة الدكتور بفلم عصابة الدكتور عمر ..

خلوني بس اتمناها إماراتيه وشوفوا الهزيمه التاريخيه على الإمارات الليله فيني نحاسه مهيب فحد

الغريبه إني تمنيت التوفيق لدولة اليمن الشقيق في تنظيم البطولة وللحين الامور زينه .. والله يستر لايصير الوعد بالختام .. إنفجارات وبلاوي .. ( لاقدر الله ) مايستاهلون اليمانيين والله .. عاد من وين لنا قات

في الختام .. البطولة للحين ماخلصت صحيح .. لكن من جمالياتها طبعا الإجتماع الخليجي ... ثانيا الجمهور اليمني ثالثاً برنامج المجلس .. ررابعا شوفة هالوجيه الطيبه في موضوعي


أخوكم الصغير ابو طلال