بين منتخب الثمانيه ومنتخب التشليح
يا اخوان سبب نكسة المانيا الرئيسي هو الاعداد السيء (كالعاده) للمنتخب وذلك باعتراف الاداره واللاعبين وليس اللاعبون فقط. طبعا بالاضافه للمدرب الجوهر. الجوهر انسان مجتهد قام بقيادة المنتخب لنهائي اسيا امام اليابان بعد تخبطات ميلان ماتشالا اللي كان يلعب المشعل ظهير ايسر!!! رتب الاوراق الى ان وصل للنهائي بس يوم النهائي بدأ يألف لما وضع السيد فوزي الشهري محور!! وما لمس كوره طول المباراه لان اللاعبين غير مقتنعين باللاعب ومركزه وكنا بنلعب كاننا ناقصين واحد وخسرنا الكاس بهدف وظهر انه الجوهر ما ينفع مدرب بس ممكن يكون مساعد مدرب يمكن لان اسلوبه مع اللاعبين احسن من ناس كثيرين.
وجاتنا تصفيات كاس العالم وجاك السيد سانتراش(ما ادري احنا ليش موعودين دايما بالمدربين العلل) وبدأ مسلسل التخبط تعادل مع البحرين وخساره من ايران ومستوى صفر. ورجع الجوهر تاني وعدل الوضع واتأهلنا بمساعدة البحرين. وجلسوا يقولوا مره يوردانسكو ومره ديمتري ومره فلان اللي حيدرب المنتخب لحد ما شككونا في الجوهر وشككوه في نفسه وقدراته وبعدين حطوه لكاس العالم على بالهم انه المانيا وايرلندا والكاميرون زي البحرين وتايلاند والسودان ومن هنا بدا العك في الاعداد والتشكيل والصحافه بدات تنفخ كاننا حنلعب مع البانيا مش المانيا؟؟طبعا غير مشاكل اللعبين مع بعضهم والحزازيات العرقيه والضرب كانهم اطفال مش لاعبين في مهمه وطنيه.
وجاك الموت يا تارك الصلاه, 8 اهداف المانيه لا والجوهر يغير ويلعب الجمعان على باله كابتن ماجد اللي حيسوي الهوايل بدل ما يرقع الدفاع ويشيل السيد تكر اللي قبل موسم كان مع احد في الدرجه الاولى واحسن مهاجم لعب ضده بمستوى سليمان الحديثي ومن يوم ما شافه لعبه اساسي وشال الخليوي وخليلّّّ!!!! غير اللي لعب مصاب ولسه ما كمل علاج وغير وغير.وقدام الكاميرون نفس المسلسل بس هدف واحد اما ايرلندا اعطتنا درس في الكوره ما حصل وخرجنا بدرزن اهداف ورقم قياسي في الهباله وصار الواحد ما يحب يفتكر كاس العالم من مرارة الهزيمه...مش هزيمه دي فضيحه!!!!
وصارت الصحافه تلوم الجوهر والاداره والحقيقه ان المسؤول هو الاتحاد السعودي بس لا اللاعبين ولا المدرب. كاس العالم كبيره على الجوهر ومسكين خلوه يصدق انه مدرب عالمي وخسرنا الجوهر للابد زي ما خسرنا الخراشي اللي كان ممكن نستفيد منهم كمساعدين للمدرب مش مدربين.ولامو اللاعبين وقالوا مافي روح والحقيقه انه ادارة المنتخب هي الغلطانه لانها تعامل بتفرقه وما حاولت تلغي الحزازيات بين اللاعبين
اما اليوم الوضع اسوأ وأسوا.قالوا نبغى نبني منتخب 2006. طيب يااخوان ما في منتخب في العالم يسوي زينا, تغير95% من اللاعبين دفعه واحده؟؟؟ ليش قد كده احنا عندنا مواهب كرويه ما حصلت؟؟قد كده احنا مهتمين باللاعبين الصغار؟؟ ولا المحترفين السعوديين مستواهم عالمي ؟دا حتى احنا ابتعدنا عن كاس اسيا للشباب والناشئين من مده طويله.الناس تحط واحد او اثنين لاعبين صغار موهبتهم واضحه ومميزه في كل خط حراسه ودفاع ووسط وهجوم في المنتخب الاول يلعبوا ويحتكوا مع اصحاب الخبره مش يشيلوهم مره واحده؟؟؟ لا وجاك السيد الهولندي جايبلك مجموعه من قوائم التنسيق والاحتياط والدرجه الاولى!!!!!!يا سلام ايش المدرب ده اللي يشوف اللي احنا ما نشوفه واللي حيكتشف مواهب ما اكتشفناها؟؟؟؟؟؟؟
انا متوقع فضيحه كرويه جديده للمنتخب السعودي اذا لعب امام منتخب قوي لا وفضيحه بجلاجل واظنها حتكون امام البرتغال. اما كاس العرب هادي البطوله المضروبه اللي مافي منتخب عربي قوي زي المغرب ومصر اشتركوا فيها واللي مرسل الفريق الاولمبي والبقيه لبنان وسوريه واليمن!!!(لا وفي مجموعه يسموها الحد يديهّّّّّّّّّّ!!!!) ما حنستفيد منها ولا من مبارياتها اللي كل الفرق فيها تلعب بطريقة (طقها والحقها) وانا مستعد اراهن اني ما اتفرج كوره طول عمري اذا ما لحقت بالمنتخب السعودي هزائم تاريخيه طالما لسه بنلعب بمنتخب التشليحّّ!!
الوضع المتطور
