16/12/2002, 01:49 PM
|
| زعيــم فعــال | | تاريخ التسجيل: 13/12/2000 المكان: الرياض
مشاركات: 239
| |
|
سواليف أبوفهد ...(6)...(رسائل هامه للجميع)...؟؟؟
إخواني الأعزاء السلام عليكم
وكل عام وأنتم بخير
بعد فترة توقف لحبيبنا أبو فهد ... استرد فيها الأنفاس ... رجع لنا في هالعيد ... بشكل جديد ... وعطانا رسائل خاصه لأحبابه ... وبأي حال عدت يا عيد ...؟؟؟
أبو محمد: كل عام وأنت بخير أبو فهد ... من طول الغيبات جاب الغنايم ... وينك ما سمعنا صوتك من زمان ؟
أبو فهـــد: وأنت بخير ... وبعدين تعرف وأنا أخوك رمضان شهر عباده ... والمواضيع اللي تبيها ... مواريها مهيب زينه ؟
أبو محمد: خير إنشاء الله تفاءلوا بالخير تجدوه ... الهلال الحمد لله استقرت أحواله ... والأمور تتحسن مع الإدارة الجديدة ... بإذن الله كل شيء بيصير تمام.
أبو فهـــد: تبي الصراحة ياخوي مانيب مرتاح ... الرئيس فيه الخير والبركة ... ومسؤوليته صعبه الله يكون بعونه ... لكن إحساسي يقول هالسنه ... الله يستر...هي أمور متجمعة ...؟؟؟
............................... رســــالة للهلاليين .........................
أبو محمد: أنت يابو الأحاسيس ... وش أموره اللي متجمعه ... نوديك لطبيب يعالجك...؟؟؟؟؟؟
أبو فهـــد: أحس إن الهلاليين غير متكاتفين ... والدوري ممل ... اللعب فيه خمول وبرود ... راح الحماس اللي أخبره ... علشان كذا مانيب مرتاح ...وإحساسي له أسبابه ...؟؟؟
· إن جيت من ناحية الإدارة ...ما أقول إلا ( الله يعين أبو مساعد)... المشوار صعب كثير... وصراحه الأمير جديد على الرئاسه ... وأنا أشوف ممكن تكون هذي أصعب مرحلة في تاريخ الهلال ... والله إني أدعي له ليل ونهار...؟؟؟
· وإن جيت من ناحية أعضاء الشرف ... أتساءل ... وش السر في رئاسة الهلال ... وإبتعادهم ...؟؟؟
· وإن جيت من ناحية اللاعبين (ما أدري وش أقول) ... لكن أظن نفسياتهم تتكلم عنهم ... وأظنها تقول (ما عندهم جديه) ... و(روح التحدي مفقودة) ... ليت هالموضوع يعطونه أولويه...؟؟؟
· وإن جيت من ناحية الجماهير ... ما يدرون وش يسوون ... وعدم حضورهم دليل واضح على عدم رضاهم ...؟؟؟
· وإن جيت من ناحية الإعلام ... أشوف (الهلاليين يتطاحنون) ... في الجرايد والمنتديات ... صابتهم عين ما صلت على النبي ... حالهم ما يسر صديق ...؟؟؟
هي مثل ما قلت لك أمور متجمعه ..؟؟؟
............................... رســــالة لرئيس الهلال .........................
أبو محمد: بإذن الله ... مواريها خير يابو فهد ... الإدارة الجديده بتطور النادي ... والرئيس الله يخليه ... يقولون بدأ بقوه .. وعنده أفكار وخطط بتعجبك وبتوسع صدر كل هلالي ...؟؟؟
أبو فهـــد:
الأمير فيه الخير والبركة ... وأقول له الله يوفقك (سر ونحن معك) ... ودي أعطيه رسائل خفيفه:
1. هذي أصعب مرحلة يمر فيها الهلال ... وجت في وقتك ... وأنت لها ... الله يكون في عونك ...؟؟؟
2. خايف إن أفكارك ومخططاتك تصطدم بجدار الواقع ... لأن أمورنا أغلبها إرتجاليه (طقها وإلحقها) ...؟؟؟
3. حنا الهلاليين متعودين مكاننا دائما في المقدمة ... وعنواننا البيت اللي يقول ... لنا الصدر دون العالمين أو القبر...؟؟؟
4. ما يرضينا نشوف هلالنا (كومبارس) أبداً ... بأي لعبة كانت ... والمهزله اللي صارت في كرة السلة بين الهلال والإتحاد ... ما تنبلع ... يا ننافس أو نلغي أي لعبه ما لنا فيها حضور...إذا كانت هزيلة المستوى ... لأنها تسيء لإسم الهلال ولا تخدمه ...؟؟؟
5. من الواضح في الوقت الحاضر دخول الإتحاد كطرف أول منافس للهلال على البطولات ... مع مناوشات أهلاوية ... أما البقية (كومبارس) يتزعمهم طبعاً النصر والشباب ... وبعدين تجي باقي الأندية... والملاحظ أن الإتحاديين يلعبون (بالنار) ... ويؤلبون الآخرين بطرق ملتوية وبشكل فاضح ... نتمنى منكم وقفة جادة ...لحماية الحقوق الهلالية ... وإيقاف من يلعب بالنار عند حده ...؟؟؟
6. ما ودي أتكلم عن بيلاتشي ...لأنه راح المرة اللي فاتت بظروف غامضه ... وعقب كل هذيك الدعاوي والتهديدات اللي وصلت لأعلى مستوى ... رجع مرفوع الرأس ... وأخاف يرز خشيمه ... علشان كذا ودي لو تصكون على (جوازه) في خزنه عندكم ...لا يهج مره ثانيه ... لأنه ( لا يلدغ المؤمن من جحر مرتين) ... ؟؟؟
7. صحيح إنك جديد في الساحة الرياضية ... لكن بإذن الله أنت قدها وقدود ... وأقولك سر على بركة الله ونحن معك ... الله يوفقك ... الله يوفقك ... الله يوفقك ...؟؟؟
............................... رســــالة للاعبين .........................
أبو محمد: أبو فهد ... واللاعبين وش رسالتك لهم ...؟؟؟
أبو فهـــد: هذولا هم الواجهة ... وحنا خابرين رجال الهلال ... إذا جت ساعة الجد نلقاهم ... لكن هالمرة أنا خايف منهم ... وبعض حركاتهم ...؟؟؟
أبو محمد: وش اللي ما أعجبك فيهم ...؟؟؟
أبو فهـــد:
1. لاعبينا لو بغوا نجحوا ... (بياع بصل) لو دربهم ... ولو بغوا سقطوا أشهر المدربين ...؟؟؟
2. ما أقول غير ياليت الجابر والتمياط والجمعان وبقية اللاعبين يكذبون أحاسيسي... ويعطوني إياها (ضربه قاضية) ... بطولات هلاليه جديده ... ويقولون يا بو فهد (ما عندك سالفه)... والله إنها عندي مثل شهد العسل ... أنت تدري إن البطولات (تلم الشمل) ...؟؟؟
3. اللاعبين يبي لهم جلسات (شحذ همم) ... تخليهم يشتعلون ... ونكحل عيونا بشوفتهم يحرثون الملعب ... يلعبون بتركيز وإخلاص للشعار اللي لابسينه ... ترى شعار الهلال ماهوب بسيط ... وفنيلة الهلال غاليه ... هذا زعيم آسيا بكبرها ... تعرفون معنى هالكلام ... أبيهم يعرفون إن اللي يلبس هالفنيله (محظوظ) ... وأمه داعيه له ... للأسف بعض اللاعبين ما يعرفون هالكلام ...يبي لهم مصعه إذن...؟؟؟
4. أعرف أن بعضهم في حلقه غصه ... متضايق من بعض الأمور ... وما ينلام ... لكن هذا الهلال ... لازم نضحي له...؟؟؟
5. أبيهم يتركون عنهم التعالي ...مهوب يلعبون من دون نفس (كنهم مغصوبين)... الله يرحم زمانك يابو فهد ( يقصد صالح النعيمه)...؟؟؟
6. أشوف الطريق صعب ... بس ما هوب مستحيل ... تراكم تفرطون ببطولات سهله ومالكم عذر فيها ... ومستواكم ما يملاْ العين ... إذا فكرت في هالأمور ... تجيني (حرقه) في صدري ... وأذكر سالفة (يا مطره حطي حطي) ... والمطر عند ربنا ... ؟؟؟
ووقف أبو فهد شوي ... وشفت دمعه في عينه ... وأخذ نفس ... أطلق زفره وقال ...؟؟؟
وأظن والله أعلم ... إن الحل والورقه الرابحه بيد الجماهير ... لازم تكون البداية من الجماهير ...؟؟؟
............................... رســــــــالة للجماهير .........................
أبو محمد: وشلون من الجماهير ...؟؟؟
أبو فهـــد: الجماهير هي الركيزة الأولى ... وهي راس المال وواجهة الفريق ... كله من هالإعلام الله لا يبارك فيه ... هز النفسيات ... وخلانا نكره الكوره ... هو السبب الرئيسي بإبتعاد الجماهير ... وهجرهم للملاعب ... صابهم الملل والطفش من هالمطاريس اللي يشوفونها ويقرونها ... ورسالتي لهم ...؟؟؟
1. الجماهير هم من يجب أن (يعلق الجرس) ... وعندهم الكلمة الفصل ... وودي إن الجماهير تكون أكثر تفاعل وحيويه وتشجيع وتعاون مع اللاعبين والإدارة...؟؟؟
2. تقول رأيها بكل صراحه ولو إنهم ما قصروا ... لكن ودي إنهم يشاركون بكل شيء ... ترى جمهور الهلال غير ... جمهور الهلال واعي ... تحس في هالكلام إذا قريت المنتديات ... وقارنتها مع غيرهم ... علشان كذا ودي كلمتهم تكون أشد وأقوى ...؟؟؟
3. ودي الجمهور يملأ المدرجات ... هو جمهور الإتحاد أكثر منا ... أو أحسن منا ... لالالالالالالا ... جمهور الهلال ما له مثيل ... لكن للأسف لكن للأسف تشجيعهم في الملعب محدود ...؟؟؟
4. لو يشوفون لهم طريقه تشجيع جديده ... يتفاعلون في اللعب ... ليت الجماعه في المنتديات يعطون هالموضوع أهميه ... ويتبنون طريقه منظمه للتشجيع ... ونستفيد من طرق التشجيع العالميه ...؟؟؟
5. أن يكون التشجيع عام وليس خاص بلاعب أو لاعبين...؟؟؟
6. البحث عن وسائل تجعل الحضور للملعب والتشجيع متعه نبحث عنها في الملاعب ...؟؟؟
7. أنت تدري في بعض البلدان يحطون موسيقى معينه مع الهجمات ... وفيه ناس على مستوى كبير يديرون الجماهير بإستخدام ساعة الملعب ... طبعاً هذا ما هوب ممكن عندنا ... لكن لو نتناقش في الموضوع ... وننظم تشجيعنا ... أكيد نطلع بنتيجه...؟؟؟
أبو محمد: أبو فهد بإذن الله رأيك وصل ... والموضوع مطروح للنقاش ... وبالنسبه لتفاعل الجماهير واضح ومعروف ...؟؟؟
وأعضاء الشرف واجتماعهم التاريخي ... وش تقول عنهم ... ؟؟؟
............................... أعضاء الشرف .........................
أبو فهـــد: أعضاء الشرف ما لنا عنهم غناة ... كثر الله خيرهم ... نبيهم يتكاتفون ... ورسالتي لهم ...؟؟؟
1. أي إنسان يدفع من حر ماله ... صاحب فضل ... وكثر الله خيره ... وأعضاء الشرف مشكورين على كل اللي يسوونه ... وما لأحد عليهم منه ...؟؟؟
2. الزين ما يكمل ... والله إن قضيه التمياط ... وبعدين تأخير تجديد عقد سامي (فشيله) ما بعدها فشيله ... ومثل هاللاعبين يستاهلون كل خير ... هذولا رموز هلالية ما تتكرر ... ما أقدر أقول أكثر...؟؟؟
3. وش قصة هالإجتماع مثل (الولادة المتعسرة) ... ما بغى يصير ... كم مره تأجل ... الاجتماعات بالصيف في باريس ... وبعدين صارت هنا ... المرة الأولى (ألغي) ... ويالله خلص في الثانية... بعد ما وصل حده ... فيه سر غامض ... عجزت لا أعرفه...؟؟؟
أبو محمد : رسائلك حلوه يابو فهد وبإذن الله توصل ... شفت هالإجتماع الناجح ... رجال الهلال ما يلعبون ...؟؟؟
أبو فهـــد: الله أعلم إن أسباب نجاح الاجتماع أثنين... الأول ضغط الجماهير وكثافتها ... والثاني له علاقة (بالاتحاد)...؟؟؟
أبو محمد: وش قصدك (الاتحاد) ... اتحاد كره القدم ... أو اتحاد (جده) ... أو تقصد (اتحاد) أعضاء الشرف ...؟؟؟
أبو فهـــد: أقول كيف الحال ... افهمها مثل ما تبي ... وخل (المعنى في بطن الشاعر) ... واللبيب بالإشارة يفهم ... وبعدين ترى تسحيبات أبو يعقوب اللي تسويها معي ... راح زمانها ... هالحين ما توكل عيش ... المهم إن وضع الهلال محيرني هالسنه ... هذا اللي أقدر أقوله ...؟؟؟
أبو محمد: تونا في بداية الموسم ... وإنشاء الله بتشوف رجال الهلال ... يرضونك ويوسعون صدرك ... قدامهم بطولات كثيره ... نبيها كلها ... وبإذن الله يجيبونها ...؟؟؟
أبو فهـــد: عسى الله يسمع كلامك ...؟؟؟
............................... صــدى المتاعب .........................
أبو محمد: على فكره أبو فهد أنت شفت برنامج صدى الملاعب يوم الجمعة ...؟؟؟
أبو فهـــد: قصدك صدى (المتاعب) ... لعلمك هالبرنامج عبارة عن (شله) ... في البداية (المعد) يقول للمقدم ... كل شيء تمام ... والربع كلهم جاهزين ... ومداخلاتهم مثل ما حنا متفقين ... ورقم البرنامج بيكون ظاهر على الشاشة للمشاهدين المساكين (مع وقف التنفيذ) ... أنت تدري إن البرنامج هو اللي يتصل على اللي يبي ويقولون (إتصال من فلان) ... لكن تبي الصراحة أنا استغربت من مكالمتين في أخر حلقة (مقابلة بلوي الإتحاد) ... ؟؟
أبو محمد: أي مكالمتين ...؟؟؟
أبو فهـــد: الأولى من المشجع النصراوي (المريض) اللي متفقين معه الربع (الزعلان) ... اللي بيرفع سهم الإتصالات ... من كثر اتصالاته بالفضائيات ... هالمرة فاجأني على غير العادة ... ما تكلم عن همه و(حارق دمه) ... (سامي) ... الظاهر إنشغل بـ (الطراره)...؟؟؟
والثانية مكالمة الكاتب الكبير الله يحفظه (أبو سعد) عبدالرحمن السماري ... اللي مداخلته محسوبه على الهلال ... وأظنه شاخ وبدأ ينسى أو إنه مبتعد عن الكوره ... يوم يؤيد ويمدح البلوي ويقول من حقه إنه يخدم ناديه بأي طريقه ... ويمدح إعانته للأندية ويقول إنه يخدم الوطن ... ويتمنى لو فيه ناس مثله ...؟؟؟
؟؟؟
............................... رسالة للسماري .........................
ودي أقول له أبو سعد ... إسمحلي أقول وبالفم المليان (إنك هالمرة غلطان...غلطان غلطان) ... أنت تعرف البيوت تدخل من أبوابها ... والهلال ما سرق اللاعبين من أنديتهم ولا فسدهم عليها وما أخذهم في رحلات سياحيه وخلاهم يعلنون العصيان ... وما جاب طيارة الفليت في ليلة ظلماء ... وعلى خارج المملكه ... وبعد ما يزرع المشاكل يرجع ويقول ... نادينا أكبر من هؤلاء ولا حنا بحاجتهم ... هذي خدمه نادي ... وإلا خراب بيوت ... أقووووول أنت توحي أبو سعــــــــــــد...؟؟؟
والغريب إن البلوي يستغبينا ويقول أنا سويت مثل الهلاليين يوم أخذوا الدعيع وعبدالله سليمان وأحمد خليل والشريده وحسين العلي ...
والرد مثل ما قلت لك البيوت تدخل من أبوابها... والبلوي دخل مع الدريشة ...؟؟؟
............................... إبعـــاد الخوجلي .........................
أبو محمد: طيب وش رأيك بإبعاد الخوجلي عن المنتخب ...؟؟؟
أبو فهـــد: بصراحة إستبعاد أو إبعاد الخوجلي ... مسخره ...أول مره أشوف لاعب يبعدونه ... ويترضونه ... أجل إدارة المنتخب تقول (على إستحياء) ... لعدم إنضباطه وبناء على طلب المدرب تم إستبعاده ... وبعدين يقولون (المجال مفتوح للعودة) ... بصراحه هذي عجزت لا أهضمها ... بس يوم تذكرت إن الخوجلي زعل علي نواف التمياط ... وكذبه يوم يقول اللاعبين يرمون قشر البرتقال ...(كاد المريب أن يقول خذوني) ... وشفت هالإعتذار (الرقيق) على إستبعاده ... مغصني بطني ... وعرفت إن (وراء الأكمة ما ورائها) ...؟؟؟
كنت أظن إنهم بيوقفونه 6 شهور (أقل شيء) ... ويسامحونه بعد مضي (نصف المده) كما جرت العاده ...؟؟؟
لكن بصراحة صابني شك في سبب إستبعاده ... إن له علاقة (بدجــه) النصر وهزايمه الأخيره ... قلت في نفسي يمكن النصراويون محتجين (ما عندهم حراس) ... ويخافون فريقهم يهبط ... وبعدين قلت وشلون فريق ياخذون منه 8 للمنتخب ... ويخاف يهبط ... ؟؟؟
أوه نسيت ليش أخذوا منهم 8 للمنتخب لأنهم غايبين عن البطولات 8 سنوات ...؟؟؟
أكيد السنه الجاية بإذن الله يزود العدد وياخذون منهم 9 لاعبين ... مع غياب 9 سنوات عن البطولات ... ويلقون مناسبه (تسعات) ...ويكرمون فيها لاعبهم المسكين رقم 9 اللي إعتزل من 9 سنوات ... بعد ما ضاعت عليهم فرصة 9/9/1999م ... والله فكره ...؟؟؟
أبو محمد: تبي الصراحة أبو فهد ... كلامك كله (إبداع × إبداع) ...؟؟؟
.........................................................................
إخواني الأعزاء
أتوقف عند هذا الحد ... علشان ما تملون ... وبإذن الله سواليف أبو فهد ورسائله مستمره ... وسترونها تباعاً ... ولا أستغني عن ملاحظاتكم إخواني ...؟؟؟
وكل عام وأنتم بخير
وتقبلوا تحيات أخوكم ........ أزرق هلالي ....؟؟؟؟ |
الوضع العادي
