|
## قلنا لكم الاسيوية صعبة قوية ## السلام عليكم ورحمة الله وبركاته راح ادخل في لب الموضوع مباشرة وأوجه رسالتي لمبزرة واطفال المنتدى اللي المفروض على أدارة المنتدى تضع من اهم شروط التسجيل ان يتجاوز عمر العضو 15 سنة ونا اضمن ان المنتدى ينقص عدده للنص . قبل اسبوعين تقريبا كتبت موضوع في هذا القسم وقلت أن مستوى الهلال سيئ جدا وانسوا شي اسمه اسيوية بهالمستوى وبهالفريق وبهالمدرب الخاين ،،، فطمر علي مجموعة مبزرة واتهموني بأني مندس واللي ضحك علي واللي قالي لاتفائل بالشر واللي قعد يتحداني وقالي الوعد 20 أكتوبروهذا حنا وهذا يوم المواجهة . قلنا لكم وكررنا أن مستوى الهلال في بطولة اسياء واخص بالذكر هذا الموسم سيئ جدا جدا جدا ( الكلام موجه للعقلاء وليس للاطفال ) . أولا :مدرب كلب وخاين باعنا وباع شبيه الريح ( صديقه كما يقول سموهـ ) لا تكتيك ولا خطة ولا لمسات ولا أي شي يشفع له وكأنه يقول مليت منكم وابي الفكه حتى التغيرات فاشله جدا ولكن ماقول عنه الا صديقك وانت صديقه وطز بالهلال . ثانيا : فريق زفت لا روح ولا حماس ولا اخلاص لهذا الكيان والله ثم والله اننا من بداية هالموسم وحنا ماشين على بركة الله ( أخص بالذكر بطولة اسياء ) ومامبارة الغرافة الا اكبر دليل على ذلك والله ستر علينا من دعواتنا أما من ناحية المستوى فهو فاشل وهو واضح للي يفهم بالكورة اما الجمهور العاطفي صاحب نظرية أهم شي ثلاث نقاط فماراح يلاحظ هالشي . ثالثا : لعيبة مدلعين رواتب وبالجزمة اخر الشهر على حسابهم ومعسكرات ولا اجمل وتسهيلات ودلع وبلاستيشن وبلياردو ومقدمات عقود كبيرة وجمهور مضحي بالغالي والنفيس عشانهم لدرجة انه ملئ المدرجات بثلاث مناسبات لعيونهم وكانت هديتهم للجماهير هي هذه المستويات الفاشلة ،، ناس تلعب من اجل المال واللي يلعب من اجل الشهرة واللي يلعب يضيع وقت وكأن نادي الهلال اصبح جحر للمتردية والنطيحه فاصبح كل من احرز هدف على نادي الاتحاد او الفقر او الشباب قارناه بسامي واصبح كل من لعب على نفسه وسوى حركة المروحة قارناهـ بابو يعقوب وأصبح كل من قمط بمدافع شبهناهـ بصالح النعيمة ،،، باختصار فنايل تلعب بدون لاعبين وبدون روح وبدون حب وتضحية لهذا النادي وكان الهلال واقف على هالاشكال . رابعا : ياسمو الامير قدمت للهلال الشي الكثير وماينكر هالفضل وهالشي الا ناكر او متخلف ولكن مع احترامي لك وتقديري أنت السبب بضياع الهلال وانت السبب بهجران اعضاء الشرف لك وأنت السبب باللي حصل والحمدلله انك اعترفت بهالشي ،، فتساهلت مع الخاين جيرتس رغم علمك بأنه مخالف للانظمة الدولية وموقع عقد مع المغرب من كم شهر وسكت وكذبت علينا بل انك فزعت معه ضد الكيان الهلالي لمجرد انه صديقك كما تقول وبدل ماتشتكي عليه وتلعن خامسه وتشتكي على مغربهيش ( المغرب ) وتاخذ الغرامة منهم قمت تطلع على الفضائيات وتطالب اعضاء الشرف بالتبرعات ،،،، وخل طيبتك واخلاقك تفيدك مع هالاشكال لدرجة ان الحق معك وهم يهددونك ويهددونه ان ماحضر خلال اسبوعين فأصبحنا مهزلة لجيرتس وللاخوان المغاربة وكل يوم عبر التلفاز شغل طرارة وكأن مافي هالبلد الا هالولد ومايمشي الهلال الا بجيرتس وكان الحق معاهم وحنا اللي سارقينه منهم . فاسمح لي واعذرني دلعك للاعبين وتساهلك معهم وتساهلك مع الخاين جيرتس ومكابرتك علينا كجمهور عندما طلبنا منك ( رأس حربة قناص اجنبي ) هو السبب بخروجنا من هذه البطولة وهو سبب الحزن البادئ على محياك ،،، فختامها اقول لك جزاك الله خير وصدقني من يتصف بالطيبة وحسن الظن كسموك الكريم لن يعيش في وسطنا الرياضي النتن . بأختصار وزبدة الموضوع : أنا عارف ان كلامي ملخبط وموضوعي ملخبط لكن الغبنه وماتعمل قلنا من اشهر طويلة الهلال محتاج لمهاجم اجنبي قناص بلا ياسر وبلا المحياني وبلا بطيخ ومحتاج لصانع لعب كطارق التايب اللي كان عذرهم بالاستقناء عنه بطئه وقتله للهجمه وجابوا لنا العن منه ( تياغو نيفيز ) اللي ماذكر له حسنة في مشواره بنادي الهلال سوى مبارة الاتحاد . وقلنا الهلال لابد انه يشوف له مدرب غير هالمدرب لان ذيل الكلب مايعتدل ومثل ماخان مرسيليا خاننا وياكثر هالمدربين المميزين والرخيصين والصارمين . وقلنا ان الهلال محتاج لقربلة شاملة ،،، محتاج لظهير ايسر ومحتاج لمدافع مساند لهوساوي في خانة الدلوعة المرشدي ومحتاج انه يسفر ويلهامسون ونيفيز على اقرب طيارة ويوفر دراهمهم ومحتاج انه يمسك هالفريدي ويعلمه الاخلاق وان ماتعدل النادي في غنى عنه . باختصار الهلال ضاع وانتهى كما ضاع منتخبنا الفاشل باعتزال ابو عبدالله وانسوا الاسيوية واعلومها دام ماعندك قائد مثل الذيب . والهلال اذا بغى يتوفق ويرجع مثل ماكان لابد من حضور رائيس شديد وقوي كبندر بن محمد وفكوا اهلنا من المجاملات لبعض اللاعبين أمثال الزوري والفريدي والمرشدي والقحطاني والشلهوب وودي ازيد بس اخاف اسير على الفريق كله . ختامها مابي اي طفل يرد على موضوعي واللي ردو علي بموضوعي السابق مابي اشوف وجيههم مع احترامي لهم رغم اني متأكد ان كرامتهم ماتسمح لهم يدخلون بموضوعي :) ،،، فاللي يبي ينتقد ويتكلم بالمنطق حياهـ واللي يبي شغل اطفال فالتجاهل كما هي عادتي راح يكون علاجه :) الاسيوية صعبة قوية |
رح عدل آلفآظك بآلآول عشآن نرد :D |
رابعا : ياسمو الامير قدمت للهلال الشي الكثير وماينكر هالفضل وهالشي الا ناكر او متخلف ولكن مع احترامي لك وتقديري أنت السبب بضياع الهلال وانت السبب بهجران اعضاء الشرف لك وأنت السبب باللي حصل والحمدلله انك اعترفت بهالشي ،، فتساهلت مع الخاين جيرتس رغم علمك بأنه مخالف للانظمة الدولية وموقع عقد مع المغرب من كم شهر وسكت وكذبت علينا بل انك فزعت معه ضد الكيان الهلالي لمجرد انه صديقك كما تقول وبدل ماتشتكي عليه وتلعن خامسه وتشتكي على مغربهيش ( المغرب ) وتاخذ الغرامة منهم قمت تطلع على الفضائيات وتطالب اعضاء الشرف بالتبرعات ،،،، وخل طيبتك واخلاقك تفيدك مع هالاشكال لدرجة ان الحق معك وهم يهددونك ويهددونه ان ماحضر خلال اسبوعين فأصبحنا مهزلة لجيرتس وللاخوان المغاربة وكل يوم عبر التلفاز شغل طرارة وكأن مافي هالبلد الا هالولد ومايمشي الهلال الا بجيرتس وكان الحق معاهم وحنا اللي سارقينه منهم . لا عدمناك يا شيخ .. لا انكسرت يدك يا غالي و الله مادهورنا ألا هالمدرب و اقسم بالله الذي لا إله إلا هو أني بعد مباراة الغرافة الذهاب قلت لواحد من العيال الأسيوية صعبة في ظل وجود هوساوي و خيرات و المرشدي ! الله يذكر زمان النعيمة بخير تحياتي يابطل |
اية والله صعبة لكن الحمد الله على كل حال |
فعلا الأسيوية صعبه قووويه على رئيس أقل ما يقال عنه أبفوووز ولا أبستقيل بالله هذي عقلية رئيس ناادي وهو سبب الظغط على اللاعبين لأنه وبكل بساطه كل مايطلع يصرح يقول أنه هدفنا الأسيوية بالله وش تبون أكبر من الظغط هذا على اللاعبين |
اذا همتك العالمية ششيء ثاني ,, الزعيم عالمي وصل لها او ما وصل , الزعيم يريد زيادة البطولات فقط والانجازات , والعالمية اعتقد انه ليس انجاز من وجهت نظري , |
صااااااااااادق بكل كلمه قلتها هوساوي اغبى لاعب شفته بحياتي وياسر يتدلع علينا ويضيعنا ويفرحنا قدام فتح ونجران ونرجع نصفق له ومباراه حاسمه يتدلع الهلال يبي رئيس مثل بندر بن محمد يسنعهم بدال دلال |
إقتباس:
ياصديقي ماعجبتك الفاظي وموضوعي لاترد ماحد جابرك ترد او الاخو وده يزيد عدد مشاركاته :) وشغلة ثانية شكلك ماقريت اخر سطرين من مووضوعي :) |
اعتقد انت مثلنا .. الآن تحت تآثير صدمة الخروج .. ربما تعود لكلامك بعد كم يوم وستجد انك قسوت على اطراف مالها دخل بـ خسارة الاسيويه .. والخروج متوقع من بعد مباراه الاياب امام الغرافه لان الفريق ليس هو الفريق الموسم الماضي .. وبدأ هالشي واضح .. وايضا خسارة مباراتين في دورين مختلفين من البطولة هو اكبر تحذير بـ الخروج .. لذلك آنا وغيري لم يكن املنا في بروز لاعب معين او تكتيك معين او انجاز شخصي .. بقدر ما آن التفائل كان ان المباراهـ بتكون على ارضنا ويمكن يتآثر اللاعبين بحضور جمهورهم ويقدمون مستوى كبير .. الا التقصير في رتم الفريق ومستواهـ ككل كان واضح .. وانا بضرب مثل بـ شخص آدى ماعليه في مباراه الليله وهو حسن العتيبي .. لكن انت كـ فريق تبي تحصل على اكبر بطولة قاريه .. من الصعب ان تدخل غمارها بـ حارس زي العتيبي مباراهـ مستواهـ في التوب ومباراهـ عكسها .. وتخيل هذي سلبيه ونقطه مؤثرهـ ولكن لم تكن سببا في خروج الزعيم الليله .. الفريق اعتقد يحتاج قرارات قويه مثل تغير بعض المحترفين .. مثل تدعيم بعض الخانات .. وبقاء الرئيس او عدمه هو بالنهايه لايجلب بطولة فـ مثلا قرآت ان شخص يقول مرحبا بـ الامير بندر بن محمد عراب اسيا .. استغربت يوم يقولها واجززززم ان الامير بندر بن محمد رغم انه شخص محبوب وعاشق للكيان لكن لن يآتي من يقدم للهلال مثل ما قدمه ابو فيصل .. ولكن لـ تكتمل المعادله .. اعطني محترف بـ قيمة سيرجيو الفنيه امام جابيليو .. اعطني صانع لعب بـ قيمة نواف التمياط في اغلب بطولات اسيا .. اعطني مهاجم بـ قيمة سامي الجابر بتلك الفترات الذهبيه له كـ لاعب ولناديه .. اعطني عملاق في المرمى بـ قيمة الدعيع في عزز توهجه .. ثم اجلب لي مدرب يملك 70% من التمكن في مجاله .. لن اجززم بشي في امر الغيب .. ولكن اراهن ان الفريق سيروض اسيا اعوام وليس عام .. |
مستحيل تكون هلالي لان هذا مو من طبع الهلاليين وليست الفاظهم العالميه خليناها لك انت وفريقك وبعدين احنا همنا نتاهل ونقدم مستوى ونافس مو بس نتهزاء ونصك بكم من الاهداف وبعدين غير نكك الى نصراوي لكن احب الاتحاد وين المشرفين عن هذه الالفاظ |
يآليل آلبزرآن :D لآننآ خسرنآ مبآرآة , صآر هوسآوي آغبى لآعب , وآلرئيس متسآهل مع صديقه قريتس , وصآر قريتس خآين حسآفه آللي صآرت آلمبآرآة يوم آربعآء , لآن بكرآ مآفي مدآرس عشآن ينآمون بدري :D الحين مآقدرت تكتب بمنتدى جمهور آلهلآل لآنه يخضع لـ تقييم , آخذت رآحتك هنآ :rose: !! |
إقتباس:
هلا بك حبيبي يارجال والله لو احلف لك انه بايع المبارة وكل المحللين قايلينها بدأية من مستوانا مع الغرافة وتشكيلته الغبيه اللي مالها حل واضح ان خوينا مستعجل على النحشه عقب ماعرف ان الاندية عرفت خططه وطريقته وصاروا يضغطونا علينا بدل مانضغط عليهم وصار جيرتس بالنسبة لبقية المدربين كتاب مفتوح فقال انحاش بكرامتي احسن لي . وعلى طاري المرشدي فكتبت عنه بموضوعي السابق انه من عقب جائزة افضل لاعب في خليجنا الفاشل وهو متدهور ومع ذلك عندي خيرات افضل منه والله بالالتحامات والرأسيات وغيرها . اما هوساوي من عقب شارة الكابتنية ........ خلنا ساكتين بس يارجال وشاكر لك مشاركتك |
إقتباس:
ياخوي انت واضح انك قرأت موضوعي بالمقلوب وش عالميته يارجال ووش خرابيطه ،، انا اتكلم عن بطولة اسياء ماجبت طاري العالمية وبعدين اذا بطولة اسياء ماتهمك انا انصحك تستقيل عن كرة القدم كما سبقك قبلها شبيه الريح واستقال بسببها . شاكر لك ردك |
إقتباس:
وصدقني شبيه الريح ماقصر وجزاه الله خير لكنه مايننننننننننننننننفع في وسطنا الرياضي النتن وخبرته ضعيفة جدا . وشاكر لك ردك يابطل |
بعيدا عن بعض الالفاظ الي ذكرها اخوي في موضوعه ياجماعة الخير فعلا هي اخطاء بالجمله وقعت لكن لانهضم ونقسو على اللاعبين لولا الله ثم هوساوي الهلال خرج بعدد كبير في مباراة الذهاب في اغلب دول العالم اي فريق يقدم مستوى كبير في موسم لابد الموسم الي بعده يتراجع هذا ماحصل للهلال عتبي على عبدالرحمن بن مساعد هو تهديده دائما بالاستقاله اذا خسر الهلال الاسيويه لانظلم حقه اتقد هو من احدث نقله للكره السعوديه وللدوري السعودي بطولة تذهب ولكن يبقى الزعيم خساراة بطوله لاتجعلكم تقسون على لاعبين من 14 سنه بهدونك بطولتين كل موسم ودمتم |
إقتباس:
ياخوي الله يهديك انت ناقضت نفسك بكلامك هالحين تقول اني قسيت على ناس مالها دخل وقمت تعدد لي النواقص بنادي الهلال ومابقى شي ماخليته يالغالي ياخوي الفريق مستواه سيئ ماهب من مبارة الغرافة من قبلها وعشان اكون واضح معك من بداية هالموسم ،، وجميع اللاعبين مع احترامي لهم لم يقدموا المستوى المأمول منهم والخسائر وهالمستويات يتحملها اللاعبين في المرتبة الاولى ثم الادارة والمدرب الخاين . وبعدين حسن العتيبي ياخوي افضل لاعب هلالي في هالموسم بوجهة نظري وجميع المباريات اللي لعبها هالموسم مممتازة صحيح ان مشكلته في التقدم بكثرة وغيره لكنه ممتاز . وبعدين وناخوك صدقني كنت ضامن الخروج من البطولة من قبل ماتبدأ لاني عارف امكانيات اللاعبين والاجانب اللي معانا وخاصة الفقر في خط الهجوم لذلك ماكانت صدمة بالنسبة لي . فصدقني انا ماقسيت على احد انا بالعكس قاعد اذكر لك اللي اشوفه بوجهة نظري ولايوجد اي لاعب يستحق الشكر سوى العتيبي ورادوي . وكفانا مجاملات وكذب وتطبيل على حساب النادي من احسن وابدع راح نرفعه للسماء ومن تخاذل وفشل راح نعطيه حقه . |
إقتباس:
اقرأ اخر ثلاث اسطر من مووضووعي وراح تفهم جوابي لك . اكبروا ياعالم عن التطبيل والمجاملات ماضيعنا الا هي اجل تبينا نرقص ونغني ونمجد بابو سعيد وبقية اللاعبين على حساب انفسنا . لا والله الا ابتكلم وابنتقد وابهاجم وانت خلك ساكت ياصديقي واقعد عزز للفريق |
إقتباس:
هلا بك يالغالي صدقني كلامك جميل وعلى عيني ورأسي ولو تركز بموضوعي راح تلاقي كلامك نفس منطق كلامي . انا اقولك الاخطاء بالجملة والفريق محتاج غربلة شاملة . وبعدين انا ماقسيت على شبيه الريح بالعكس ماذكرته الا بكل خير وقلت اللي مايذكر فضله ومجهوداته فهو اما ناكر او متخلف فهو احدث نقلة شاملة بالكرة السعودية سواء بالاسلوب او بالفكر او بالتواضع ،،، كل اللي قلته اانه ماينفع يتواجد بالوسط الرياضي النتن لانه ماراح يعيش فيه ،، وسطنا الرياضي يبي ناس متخلفة امثال خبيلان وغيره او راح يضيع حقك . وبالنسبة للاعبين وناخوك تعبنا وحنا نطبل لهم ،، قلنا الهجوم ضعيف جدا وفاشل من الموسم الماضي قالوا لنا طبلوا لياسر والمحياني واصبروا عليهم ويوم جبنا الخمسة على الاتحاد طلع لنا شبيه الريح ويسألنا هاه تبون مهاجمين ؟؟ رغم ان كل اهدافنا جاية من لعيبة الوسط . ويوم وصلنا للجد ووصلنا عند الفرق السنعه كلينا خابور بمهاجمينا وضاع وسطنا واهدافهم وافتقدنا للمهاجم القناص . حتى في الاظهرة يارجل عندك الزوري هالبارد لعب فينا لعب معقولة نادي الهلال بكبره ماعنده بدل الزوري ،،، وغيره من اللاعبين والسنوات اللي عطونا فيها بطولات مدحناهم ورفعناهم فوق روسنا و طبلنا لهم لحد ماصرنا طقاقات وعززنا لهم في المنتديات ،، فمن مبدأ المساواة اذا مابدعوا وتخاذلوا وفشلونا لازم ننتقدهم ونعاتبهم ونلومهم ونوبخهم بشرط يكون غرضنا الانتقاد للتشجيع وليس للتجريح . فكفاية تطبيل تكفون لعيون السبعين الف اللي حضرو الملعب اليوم وكفاية استهزاء بعقولنا وبقدرنا وماراح نطبل لحد مانشوف فريق يلعب بروح من اجل الشعار مو من اجل المال او الشهرة . تحياتي لك وشكر |
|
الدلوعة المرشدي هو اللي اليوم نشوفه يخلص كووور اما هوساوي يوم خذا الكابتنية بزعمه وين راسه المفروض الكابتنية تعطى لرادوي |
إقتباس:
انشهد ان فيك عصبية قبليه اجل يوم انك من حائل والمرشدي من حائل تبي تفزع له ههههه وناخوك حنا ماهمنا لا المرشدي ولا هوساوي ولا غيرهم حنا يهمنا اللي يخدم الفريق وبوجهة نظري ماحد متحمل بلاوي المرشدي الا هوساوي وحسن خيرات افضل من المرشدي بمراحل خاصة بالفترة الاخيرة |
لله يعطيك الف عافيه جريتس يوم تعاقد مع المغرب و باله مشغول في المغرب لكن الحمد لله على كل حال تحياتي لك |
ولكم بآك أخـوي هـلالي آخـوي هلالي آنا معآك بكـل كلمـة بـل بكـل حـرف أنـا أشـهد أنك كـتبت الموضـوع السابق وكآنت نقآطك كلهـا صحيحـة 100% وأذكر آني رديـت علـيك لـكن العتـب على المـرآقبين اللي حـذفو الموضوع للآني جلـست آدور على الموضـوع ولا حصـلتة آنـا ما رآح آزيـد آو آنقـص على كـلامك للآن كـلامك هـو الصح بدون زيآدة آو نقصـآن نبي بندر بن مـحمد آنسآن وآعي وفآهـم وخبيـر كنت آشـوف روح الهلال وآبداع الهـلال من غير صـرف الملآيين ولا كآن فية دلـع ولا معسكـرآت خآرجيـة مثل اللي نشوفهـا الحيـن النمسـآ وسويسرآ ومدري وشو آصلآ حـرآم آنك تشيـل وآحد ما عمـرة تعدى حدود الريآض تشيلة للنمسـآ هههههه الشـي الثآني المـدرب غريتـس هـذا اللي لعـب فيـنا لعـب آول ما تعاقد مع المنتخب المغربي وهو بآيع آم المباريااات وكآنة يبي يخسر وينهزم على شآن يمسك البآب بس من حقـك يآ غريتـس للآنك تبي تروح تفلهـأ عنـد جميـلة وعيشـة وهـديل المغربيـة الله على ايامك يآ بندر بن محمد والله على ايامك يآ محمد بن فيصل والله على ايام العمالقة السابقين سآمي الجابر ويوسف الثنيآن والغشيآن والتيمآوي وخميس العويرآن وآلدعيـع والدوخي وليتآنـآ وآلكـآتو وآبوثنين فعـلآ الاسيآوية صعبـة قوية الا برجعـة نـصف روح سآمي :smilie47: وشآكر لك آلف شكر يآ هلالي ولكـن بس المشكلة بكرة بيجيك مشرف مطفي النور ويقفل موضوعك آهم شي يآ هلالي لآ تحرمنـا من هالموآضيع تعجبني عقليتك آنسآن فآهم كرويآ بعيدآ عن العاطفية |
كلام يبرد القلب الله يحرم يمينك على النار وانا كنت متأكد من الخسارة لعدت اسباب _ المدرب الغبي وكمثال عيسى وين يلعب وياسر وين يلعب بشكل عام وفي مباراتنا مع ذوبهان نجده يلعب بياسر ونيفيز رغم عدم جهازيتهم _ اشباه اللاعبين بشكل عام وارجع اقول مافيه لاعب عودي تقدر تقول انه لاعب حقيقة يعني يلعبون الكرة من اجل انو بيامن حياته موب عشان لعب الكره والوصول الى الامجاد _ انا ادخل الواسسطات عندنا بشكل عام رغم تفاوتها _وعندك الشماته واقصد بالشاته بالنصراوين والاتحاديين عند الخساره يقول المصطفى عليه افضل الصلاة واتم التسليم ’’ لاتضحك باخيك فيشفيه الله ويبتلك ’’ والله ودي اكتب بس مغبووووووووووووووووووووووووووووووووووووووووووووووووووووووووووون |
إقتباس:
يابن الحلال جيرتس خاين مثل ماخان مرسيليا خاننا واللي غابنك ان شبيه الريح مزعجنا صديقي جيرتس ومعاملتي لجيرتس كصديقك ونا وجيرتس نطلع سواء ونا وجيرتس ندخل سواء وهذا هو جيرتس سحب عليه وانحاش للمغرب وقوانين الفيفا تقول ان للهلال الحق يشتكي عليه لانه موقع عقد مع نادي اخر وعقده مازال مرتبط مع الهلال والعقوبات اللتي مؤكد استخراجها هي ،،، ايقاف جيرتس لمدة ماتقل عن السنة وغرامة ماليه كبيرة على ميساء مغربي . لكن قالها جيرتس في احد التصاريح انه تفاهم مع شبيه الريح وباع الهلال للاسف والمشكلة ان ميساء مغربي تهايط هالحين وتهدد وتقول اسبوعين وجيرتس عندنا وكأننا حنا السارقين ماهب هم . فخلها على ربك بس وخل المثالية تنفعهم |
إقتباس:
هلا بك اخوي سنايدي والله يارجال قلناها من زمان لكن ماحولك احد وراح نقولها وماراح نوقف لحد مايرجع الزعيم زعيم ،، من متى وحنا نعتمد على مدرب ونطره طراره عشان يقعد عندنا شوي ونرسل برقية للعاهل المغربي عشان يرحمنا ويراف بحالنا ويخلي جيرتس معانا رغم ان الحق معانا وبأقرب بقالة ترسل فاكس للفيفا ويلعنون خيره وخير ميساء مغربي لكن خلنا ساكتين . وبعدين اشوفك تحاملت شوي على شبيه الريح لاتكون ناكر وتنسى كل مجهوداته وفضله على النادي وصدقني لن يمر رائيس نادي على الهلال يمتلك ذكاء وحنكه وتواضع وكرم كما هو حال شبيه الريح ،،، ولكن قلة خبرته ونيته الصافيه وطيبته هي سبب اللي حنا فيه الحين ،، فالله يجزاه كل خير ونقوله قدمت اللي عليك واعط المجال لغيرك . وهذي اممممطخ على راسك . وبعدين انت الله يهديك تقارن لي التيماوي والتمياط وسامي وابو يعقوب مع هالحلوين خلك واقعي وناخوك ولو قعدنا عشرين سنة ماراح نجيب مثل ابو عبدالله او او يعقوب او ابو ثنين وغيرهم ،،، والغبنه عقب ماكنا نورد لاعبين للاندية الاخرى من فئة الشباب صرنا نستورد وصار فريقنا طرش بحر(من كل نادي لاعب) مثل انتر ميلان . تحياتي لك وشاكر لك ردك الجميل |
إقتباس:
لا يارجال مالك داعي انا ماحطيت هالموضوع الا عشان تطلع اللي في قلبك وتفك حرتك وفعلا شكلك مغبون والدليل مطت الواووووو . لكن ابعطيك بشارة انا دائم توقعاتي تجي صائبه : في مبارتنا مع الفقر القادمة راح نركهم ونفوز عليهم باذن الله وخذ هالكلام مني . لكن حتى لو فازوا ماراح نرضى وراح نقاطع الملعب وراح نقاطع التدريبات لحد مانحس ان فيه تحرك وتصحيح واضح من قبل الادارة . وأولها طرد ويلهامسون ونيفيزا وجلب مهاجم قناص راس حربة وصانع لعب مثل كماتشوا او التايب ( انا قلت مثل ) . وبعدين طرد هالشايب المروح جيرتس وجلب مدرب ويفضل يكون اوروبي . وبعدين تسنيع بعض اللاعبين امثال الزوري والمرشدي والقحطاني والشلهوب والفريدي والتحقيق معهم ،،، حنا ماندفع لك يافلان مقدم عقد بالملايين ورواتب شهرية بالعشرين الف وفوق عشان تسحب برجيلاتك في الملعب . فختامها طلع مابداخل ياولد العم وكفانا تطبيل وكذب على انفسنا |
أقول وش رآيك تنزل الملعب وتورينا مهاراتكـ ياميسي نآس عقليتها فاشلة يآخي الآسيوية ذي مو مكتوبه لنا فيه آسيويه جآية وبعدهآ وبعدهآ وبعدهآ ...إلخ ألحين صآر هوساوي دلخ والمرشدي دلوووع وطارق أفضل من نيفيز الله يالدنيا أقول أنت حرآم تفعل عضويتكـ |
إقتباس:
وبالنسبة لهوساوي دخل انا ماقلتها الحمدلله . وبالنسبة للمرشدي دلوع فانا قلتها ايه نعم ولاتزعل مني مشكلتي صريح وماحب المجاملات . وبالنسبة لنيفيز افضل من طارق فانا ضحكت في هالنقطة صراحة حتى ظهرت انيابي ،، اجل نيفيزا احسن من التايب . اساسا انا والله قاعد اظلم التايب لمن اقارنه بنيفيز ،،، قالوا لنا طارق التايب يقتل الهجمة وبطيئ وشفنا نيفيز ماشاء الله عليه من سرعته يدلعونه صوعان ولا تمريراته ياساتر استر يعطيك اياها انت وضميرك اما من ناحية الكرات الثابته فلا تعليق من بين عشرين تصوية 19 هدف ومن ناحية المهارات أتعب انا معه . ماقول غير اصحاب العقول في راحة ويرحملي ايامك يالتايب صحيح ان اصاباتك واجدة وعصبي لكنك عن وسط الهلال كله . وبالنسبة لعضويتي فانا عضويتي مفعلة قبل مايتفعل الانترنت في بيتكم فماقول غير حرام يتفعل الانترنت عند امثالك . تيت |
إقتباس:
آقـول تلايـط تلعب على نفسـك آنت آنا ما همني كل ردك اللي همني هو يوم تتـكلم على التآيب آقسـم بآلله آنك ما تدري وشهي الكـورة آدري فيـك يآ بزر آنك حاقد على التآيب للآنة ضيع ضربة جزاء قدام آم صـلآل فنسيآت كل حسنآت التآيب هذآ آنتم يآلمبـزرة الشي الثاني نيفيز حقـك ذآ وش سـوآ للهـلأال غير آنة عآلـة عليـنا هالموسم آو آظاهـر آنك مبسوط بنيفيز للآنة سجل هدف على الفقـر الله على ايامك يآ آبونآدين آقسـم بآلله كآن شآيل الهلال شششششيل القحطآني مستواهـ صآير زفـت بدون التآيب ماحد رفع مستوى القحطآني الا التآيب وتجي آنت تقول الله يالدنيآ التايب صاير افضل من التآيب ههههههه آقسم بآلله آضحك وقلبي يحرقني آضحك على خيبتك يآ بآبآ وآبكي على فقدآن طآرق التآيب الله على ايامك يآلتآيب كورة وحدة تنهي المباراة آما نيفيز ما فـلح بآي شـي غير آنة سجل ثلآث آهداف بآلآتشـآد آمنية ويآرب تتحقق طـرد نيفيز شـر طردة ونجيب لآعب مثل التآيب وووين آحصل لآعب مثل التآيب نبي لاعب نـصف التآيب مشـكلة مبزرة صبآح الخميس |
إقتباس:
والله ماحد فاهمني مثلك تسلم يمينك على هالرد ويارجال لاتقسوا عليه فهمه بهدوء وبتواضع يمكنه ماحضر ايام التايب ومايعرف التايب بس يسمع عنه بالمنتديات ويمكنه مستانس على رقصة نيفيز اللي يسويها عقب كل هدف . لكن انا انصحه يروح في اليوتيوب ويكتب تياغو نيفيز وثمن يكتب طارق التايب ويعطيني الفرق والنتائج ،،، وطبعا هي وجهات نظر ونحترمها ماعدى بهالنقطة مع احترامي طبعا للجميع . |
الشكوى على الله .. انا من بعد مباراه الاهلي الاماراتي اللي كان يلعب مقفل والله يتفرج الين شبك فينا هدف .. و مباراه الغرافة اللي تعتبر كابوس مع ان رجعه الهلال بهدفين تحسب له بس ولووو .. انا والله ما ادري وش ابي من القهرررر و ضيقة الصدررر !! لي يومين وانا اقول للعالم الهلال بيفوز بنسبة 45% .. فقط لان مستواهـــ يخذلك وقت الحسم !! |
صدقتـ نيفز مااشتغل لك مثل مااشتغل التايب ! بالله سوال ياشباب .. وش يحس به ليونج ؟ |
يافقراوي الأسيويه صعبه وقويه على فريقك الكديش بنو فقر والوعد يوم الأحد الجاي يابو خمسه وأنا مستغرب من المشرفين مايحذفون موضوعك البايخ مثل وجهك وياليت يافقراوي تعدل الفاظك في موضوعك وأنت في مكان محترم ولست في شبكة الحالمي أكرم الله الجميع 5555555555555555555555555555555555555555555555555555555 |
يازعماء أنتبهوا من المندسين الفقراويه هذا وقتهم مايطلعون من جحورهم الأ في الخساره اللهم أشغلهم في أنفسهم وأجعل كيدهم في نحورهم اللهم أميييييييييييييييييييين 5555555555555555555555555555 |
قدر الله ومشآء قعل , خيرهآ فـ غيرهـآ..,’‘,.. |
كلامك حلو يا عسل .. ولاكن اخالفك الرأي بالنسبة للامير الشاعر .. من وجهة نظري هو افضل ادارة مرت على الهلال من حيث التخطيط و الدفع و الانظمة ولاكن غلطته الوحيده انه كابر على "نيفيز" العاهه و ابقاه كان المفترض يتعاقد مع مهاجم بدلا منه للاسف خسر الهلال و ايضا خسر افضل رئيس نادي في تاريخ الكرة السعودية مع البلوي الاتحاد .. صدقني انه لا بندر بينفع و لا غيره .. الامير عبدالرحمن هو الافضل وهو رجل المرحله اهم شيئ يعدل عن استقالته ويتعاقد مع "اريكسون" او "ريكارد" او مدرب عالمي له اسم و يلغي عقود "ويلي" و "نيفيز" وسيعود الهلال كما كان في الموسم الماضي |
إقتباس:
يآ حبيبي حنا جماهير الهلال مشكلتنـا آننا عاطفيين بزيآدة يآ حبيبي كرستيآنو رونالدو وهو كرستيآنو رونالدو آغلى لآعب بالعالم في بداية هالموسم مع ريال مدريد جماهير ريال مدريد كآنت تصفر علية وتتكلم عليـة هذا وهـو كرستيآنو رونالد فليـة ما ننـتقـد القحطآني آو المرشدي او الزوري آو نيفيز حتى جريتس الخآيـن يآ حبيبي آحسن مآفيك آسـمك وصـورتك آما تفكيرك معليش سقيـم يعني اللي يقول كلمـة الحـق يصير حآلمي !! مشكـلة هالعآلم يآ تـطبـل يآ تصير منـدس لـكن متى نفهـم للكورة صـح متى نرتقـي بفـكرنـا شوي بـس مثـل عنـدك المنتخب السعودي من بعـد كآس العآلم 94 وهو سيئ جدآ ما فكـرت ليـة ؟؟ آنا آقول لك لـية هـو فية آسبآب كثيـرة وآكثر الآسبآب تتعـلق بسلطآن بن فهد الوريث الشرعي لفيصل بن فهد الله يرحمة لكـن انا بعطيك سـبب آبيك تحـطة في عقـلك وتفـكر فيـة وآنت حـر تقتنع فية آو لآ السـبب هـذآ آن الآعلآم سوآ كآن بالجرآيد او التلفزيون او الأذاعـة كلهـم يطبلون للمنتخب أذا فآز وحتى أذآ خسـر لكن خل واحد ينتقـد يطلع لـة سلطآن بن فهـد ويهزئـة ويلعب في حسبتـة لـكن أذا كآن هناك فيـة نـقد وتجآوب مع النقـد كآن شـفت المنتخب السعودي آلآن مثل المنتخب الياباني وآلكوري بكآس العآلم الآخيـرة لـكن التطبيـل وعـدم النقـد هو اللي ما راح يفيـد المنتخب آو آي فريق فنـحن هنـا في منتدى الزعيـم آتمنى آن يكون صوتـنا مسموع وآنا آدري آن ماحـد درآ عنـا من حقـنا حنـا كجمآهير للـزعيم الهلال ان ننـتقـد اللاعب الكبير قبل الصغير على آي خطآ يقترفة نقـدر نطبـل نقـدر نمـدح نقـدر نقـول هآردلـك لـكن الى متى نقول هآلكـلام يجـب النقـد على آي لآعب آو آي رئـيس للآن هـذآ حـق من حقـوقنـا آما آذا اآستمرينـا بآلتطبيـل ما رآح نحـلم بآلآسيآوية ورآح يتكـرر في الهلال نفس سينآريو المنتخب من بعـد كآس العآلم 94 على العموم آتمنى آتمنى آتمنى آن يركـز الهلال بآلدوري وآلآسيآوية آن تكون درس قآسي لجميع اللاعبيـن وبآذن الله الهلال يحـقق الآسيآوية بآلقريب العآجـل |
حسآفه آللي صآرت آلمبآرآة يوم آربعآء , لآن بكرآ مآفي مدآرس عشآن ينآمون بدري هههههههههههههههههههههههههههههههههههههههههههاااي حلـــــــــــوووووووووووه لاتعليـــــــــــق.. |
موضوع طرح في غير مكانه فهذا منتدى الرياضة السعودية وليس منتدى الجمهور الهلالي .. وسنتغاضى عن الألفاظ السيئة في الموضوع مقدرين الحالة النفسية للجمهور ..وإلا الألفاظ التي صدرت يجب أن تراجع نفسك فيها كثيراً بعيداً عن الرياضة عموماً .. شكراً لك وتقبل تحيتي .. أبو ميار |
| الوقت المعتمد في المنتدى بتوقيت جرينتش +3.
الوقت الان » 12:38 AM. |
Powered by: vBulletin Version 3.8.7
Copyright ©2000 - 2025, Jelsoft Enterprises Ltd