بالعكس .. بتّال يواصل إبداعه - نادي الهلال السعودي - شبكة الزعيم

ابو طـــــلال · #1 14/10/2010, 12:31 AM

ماكتبت العنوان مخصوص علشان ( خالف تعرف ) لاوالله ..

بس حلقة البارحه في برنامج ( في المرمي ) زاد إعجابي بالإعلامي المميز بتال القوس ..

ليه كل هالهجوم على برنامج رياضي يقوم بتخصيص دقائق بسيطه لإستضافة نجوم سابقين على طبيعتهم ليتكلموا عن تجربتهم او ذكرياتهم خصوصاً وأن المستقبل والحديث عنه لايهم المشاهد .. ومايهمنا هو خفايا وخبايا هذا النجم في الماضي ورياضة الماضي من حلوها ومرها ..

ظهور النجم فهد الغشيان بهذه الحالة مهي ذنب بتال ولا حتى المعد ... فالمعروف أنه يتم إبلاغ النجم بالمقابله والترتيب لها بمده كافيه لكي ( يختار لبسه .. وحديثه .. والشخصيات اللى يبي يتطرق لها .. ) يعني ماصار شي بالصدفه ... وهذي غلطة فهد الغشيان إن كان هنالك غلطه ...

ظهوره بهذا الشكل ليس عيب البرنامج ولا قصور في حق بتال القوس .. بالعكس .. هذا تميز وسبق ..

الكل يعرف إن الكابتن فهد الغشيان مختفي عن الساحة الرياضيه .. وإنه غايب او مغيب .. او ( وصل لحد الغرور ) أو ( التشبع ) من الظهور .. وقدر عليه الرائع بتال القوس وأظهر كونكوورد الزعيم السابق .. فهد الغشيان .. والحمد الله أنني رأيته بهذا الشكل .. وياليتني ماشفته بهالشكل !!

البرنامج الناجح هو من يقدم ضيفة للجمهور على حالته الطبيعيه .. وهذي مع الأسف حالة فهد الغشيان ..

تكلم فهد .. وقال .. وأخذ جوه .. يبقى الجمهور العاقل له الحكم من خلال حديثة وأسلوبة وطريقة كلامه ومابين صحت ماتحدث عنه .. او حتى إتهامه للكل دون أستثناء .. إلا فيصل بن تركي

يحب فيصل بن تركي .. ومالوووه ؟!

اللاعبين كلهم شحاذين .. ومالوووه ؟!

رؤساء الأندية منافقين وكذابين .. ومالوووه ؟!

الإحتراف في الهلال كان عفن .. ومالوووه ؟!

مااحد من اللاعبين الحين يعجبه .. ومالوووه ؟!

يقول اللى يقوووله .. ماحد يقدر يسكر فم أحد عن الكلام .. لكن الشرهة على اللى يصدق مثل هالكلام

والمثل المصري يقول :: إذا كان اللى يتكلم مجنون .. فاللي يستمع عاقل

نعم .... فهد الغشيان كان أخطر جناح أيمن عرفتها الملاعب السعودية وانا شخصياً كنت أعشق لعبه وكان رقم 2 بعد يوسف الثنيان

وكنت اعشق لعبه .. لكن مالي بأخلاقة وأسلوبه لأنه مايهمني إلا لعبه في هالمستطيل الاخضر .. غيره مالي فيه

إذا بنزعل فالمفروض مانزعل على بتال وبرنامجه الناجح ولانزعل على فهد الغشيان في ظهورة المخجل .. المفروض نزعل له وللحالة اللى وصل لها .. وكيف أهمل عمره وخلى جمهور الهلال وغيره يتمنى إنه كان مختفي على هذا الظهور ( الغبي ) لنجم كبير كبير كبير جداً

ظهر مصطفى أدريس في حالة أسواء من هالحالة ... ماحد تكلم عن سوء البرنامج ومقدمه ...

ترى مو شرط يكون كل لاعب هلالي محترم ونظيف وخلوق ؟ ومو لازم نشخص فيه بعد الإعتزال ..

انا ماودي أذكر أسماء .. سواء اللاعبين اللى نسمع عنهم امور سيئه ولا اللاعبين اللى تفتخر بوجوده ظمن تعداد المملكه واحد سكانها مثل النجم الرائع ( نواف التمياط ) الله يخليه لعين ترجيه .. لكن في الوقت نفسه كلنا نذكر أخوه وشقيقه ( محمد التمياط )

البرنامج ناجح ...

اجل تبون برنامج سلمان المطيويع يروح نص الكلام بمدح نواف وسلطان ... وإلا إبراهيم الجابر يقدم وهو طاق أربع علب نشاء بظهره .. وكل كلمه ( حكومتنا الرشيده ) ؟؟ وإلا مصطفى الآغاء يقراء رسايل سخيفة مالها بالرياضه .. اللى يقول خشمك كبير واللى إذنك كبيرة ؟؟ وإلا جايزنلكم بدر الفرهود .. الثلجه أو الهويمل الميت .. وإلا محمد الشهري يروح نص كلامه ( يعطيك العافيه ) وبس ..

بتال غير

انا ياواحد كانت نظرتي لبرنامج بتال إنه مخصوص لمحاربة الهلال .. وانا أعلم إن بتال نصراوي .. لكن مع المتابعه ويعلم الله إني صادق .. ماينصف الهلال مثله .. الإنصاف المطلوب .. مهوب الترفيع اللى ماله سنع ..

وعلى فكره .. رغم إنه نصراوي .. ينتف النصر تنتيف غير طبيعي ..

كل ماشفته قلت .. ليته هلالي وياخذون أحمد العجلان ويصير نصراوي ونزودهم صالح الطريقي

نرجع لموضوع فهد الغشيان ولقطه إستضافته ..

لم يسقط أحد .. بل تجلت الحقيقه ( في ظهوره فقط ) كما هي دون رتوش او تزيين .. هذا لاعب وجاكم بوضعه الطبيعي ( أما في ماقاله ) فالعاقل يقدر يحكم ..

ويقولون لاشفت الواحد يقول صدقني .. ويكثر منها تراه يكذب !!

معقوله نصدق فهد في هالحاله .. ونكذب شبيه الريح ومالنا إلا الظاهر .. والغيب عند رب العالمين

اخوكم الصغير ابو طلال