[poet font="Simplified Arabic,4,deeppink,bold,italic" bkcolor="transparent" bkimage="" border="none,4,gray" type=0 line=200% align=right use=ex length=0 char="" num="0,black" filter=" shadow(color=white,direction=135) glow(color=teal,strength=2)"]
... عرفـان ...

*********************

عرفان مندوبي بخطي تنصاك
بشعور من هو مخلص لك ويغليك
عرفان واوجدي على قرب لاماك
يدق قلبي مثل روس السنابيك
وجد السجين اللي حبس خلف شباك
بابه حديد وغلقن الشبابيك
في ديرة لغواتهم مثل الأتراك
مامن صديق ولا رفيق يحاكيك
عرفان واقلبي شكى حر فرقاك
عرفان لاتنسى خوي مخاويك
كم مرة للبرد ناديته إياك
بالبر بفراشي عن البرد أدفيك
كان إن عندك شك طالع لماطاك
أقدام رجلي يشبهن لمواطيك
أقصر خطى رجلي على قدر ممشاك
أقصر خطى رجلي علشان أباريك
وكم مرة تطلب وأنا أقول لك هاك
آخذ على الراتب لزومك ونعطيك
كم مرة قايست رجلك على حذاك
كنادر الكوره على قياس رجليك
عرفان لاتنسى زمان تعداك
يوم أنت فوق المتن لاصحت أراضيك
أسهر ليا قالولي النوم ماجاك
واليا رقدت أحلم وبالإسم أناديك
أراجع الدكتور وآخذ لك دواك
آخذ قياس الملعقه منه وأعطيك
وكم مرة حبيت خشمك وعلباك
وليا ضحكت أضحك ويبكيني مبكيك
كم ليلة نضفي على جسمك غطاك
خدام لك مثل العبيد المماليك
هذا كلام اللي سهر لجل يرعاك
لفتة نظر واطلب عسى الله يخليك
كان الشعور اللي كتبناه يخفاك
أسأل عنه خالك ترا الخال يمليك

[/poet]