زيارتي لملعب الإمارات .. وحضور مباراة أرسنال , برشلونة
السلام عليكم ورحمه الله وبركاته
هالموضوع عبارة عن تقريري لزيارة ملعب الإمارات وحضور مباراتين للقنرز اللي هي :
أرسنال , وولفرهامبتون .. في تاريخ 12-2-2011
أرسنال , برشلونة .. في تاريخ 16-2-2011
طبعاً الموضوع طويل شوية ويبي يكون على جزئين او ثلاثة اللي هي :
الجزء الأول : زيارة الملعب وعمل جولة فيه وزيارة المتحف والمتجر
الجزء الثاني : مباراة وولفرهامبتون
الجزء الثالث : مباراة برشلونة
طبعاً بالبداية ابعلمكم وشلون مسكت معنا بالاساس عشان نروح للندن ونحضر الماتشين
واحد من اعز اصدقائي أرسنالي متعصب
من زمان وهو يفكر بحضور مباراة للقنرز في ملعب الامارات ويزور النادي والمتجر
فـ فيه واحد من الشباب حضر ماتش أرسنال ومانشستر سيتي الأخير .. ولما جاء قعد يسولف معاه وانهبل الرجال من رخص التكاليف .. الحقيقة كان حاط في باله قبل وسبق وتناقشنا عن الموضوع انا وياه ان الرحلة لمدة اسبوع بتكلف حول الـ 20 الف ريال وحطينا ببالنا اننا نخليها الموسم الجاي ان شاء الله .. لكن لما سمعنا تجربة صديقنا اللي حضر ماتش مان سيتي .. تغيرت النظرة كلياً وقررنا نخليها قريبة
ولافيه فرصة احسن من انك تحضر مباراتين للارسنال كلها في ملعب الإمارات ووحدة في الدوري ووحدة في الأبطال
فـ اتكلنا ع الله وبدينا نشتغل ونوينا نروح من تاريخ 10 فبراير 2011 .. الى 18 فبراير 2011
من موقع بوكنق دوت كوم حجزنا في فندق قيمته جيدة لمدة 8 ايام و9 ليالي بقيمة 4900 ريال .. عبارة عن غرفة ستاندر دبل روم .. غرفه فيها سريرين .. طبعاً لاننا حاطين في بالنا ان الفندق فقط للنوم .. وباقي اليوم بيكون تمشي وغيره
هذا رابط الفندق في موقع بوكينق
حجزنا في الفندق عن طريق فيزا الراجحي وكان فندق جميل ولطيف
حقيقة موقع الفندق جداً جميل من ناحية انه جنب الهايد بارك .. وقريب جداً من محطة الميترو او الأندرقراوند لانكاستر قيت تقريباً دقيقتين مشي وقريب جداً من محطة ماربل أرتش اللي فيها شارع اكسفورد التجاري وادجور رود والمعروف بشارع العرب
واللي يميزّه الحقيقة انو خط الميترو اللي تبع المحطات ذي هو السنترال لاين اللي يعتبر بالنص تماماً ويرتبط بجميع خطوط الميترو الباقية اللي تخدم لندن
وبعدها رحنا قدمنا ع الفيزا البريطانية اللي موقعها في حي السليمانية في الرياض
متطلباتها طبعاً :
1- صورتين 4*6 .. مكشوف الرأس وخلفية بيضاء
2- برنت لحسابك الجاري باللغة الانجليزية .. وسمعنا انو لازم يكون فيه 10الف ريال مع انهم ماطلبوا مننا هالشي
3- تعريف من العمل بالراتب وانك مازلت على رأس العمل باللغة الانجليزية
وقيمة الفيزا السياحية 480 ريال تقريباً لـ 6 شهور للشخص الواحد.. قدمناها يوم الثلاثاء واستلمناها يوم الاحد او الأثنين اللي بعده
حجزنا برضو عن طريق الخطوط السعودية تذاكر الطائرة بسعر 2900 ريال للشخص الواحد وقصينا التذاكر عن طريق الفيزا
بقي عندنا الحين اهم نقطة .. التذاكر للمباريات
الحقيقة حسيت اننا جنوط هههههه وحنا نحجز ونقص تذاكر قبل لانضمن تذاكر المباريات
كلمنا الكونسيرج حق الفندق بخصوص التذاكر .. قالوا لنا نقدر ندبرها لكم بهالاسعار
ارسنال * ولفرهامبتون .. بسعر 150 باوند
ارسنال * برشلونة ... بسعر 450 باوند
طبعاً الباوند = 6 ريال وشوي
سألت الناس اللي حولي واللي راحوا وكذا .. ومنهم خوينا اللي حضر مباراة ارسنال ومان سيتي قال لنا انه اخذ التذاكر بحوالي 90 باوند تقريباً من السوق السوداء عند الملعب
فقلنا بلاش نصب يافندق الشر .. ونبي نشتريها من هناك .. ومنها بنحاول نبحث بالنت وكذا لعلنا نلقى شي أرخص
دورنا وتعبنا وحنا ندور ولالقينا شي والا الاسعار بنت كلب حتى كلمت واحد من العيال هناك وراح لمقر النادي وسألهم قالوا برشلونة بححح خلصت التذاكر .. ومباراة وولفرهامبتون لازم تطلبها من النت وعضوية والعضوية بـ 20 باوند ويبي لها اقل شي 15 يوم عشان تجيك وتقدر تاخذ التذاكر بـ 50 باوند تقريبا .. وبرضو الأخ الكريم هلالي موت لبى قليبك يااحمد ماقصر معي وعطاني معلومات عن التذاكر افادتني كثير
المشكلة باقي تقريباً 8 ايام ع الرحلة
فكلمنا الفندق وقلنا هم نبي التذاكر .. قالوا لنا مافي الا وولفرهامتون.. برشلونة ماعاد فيه تذاكر
قلنا عطونا اياها .. ونرسل لهم صورة الفيزا مع طلب شراء .. وقالوا لنا اول ماتجون تلقونها عندنا
وطلعنا ع الطيارة يوم الخميس 10 فبراير 2 بالليل
وصلنا على 5 ونص الفجر بتوقيت لندن = 8 ونص الصباح بتوقيت الرياض
طبعاً فيه واحد ماله داعي بالحياة فهمني ان التكاسي تبي تلعن شكلي بالاسعار وانها غالية .. لذلك خذ الميترو وليتني مااخذته
.. ساعتين وحنا بهالميترو لأننا مافهمنا له وكل من سألناه جاب بنا العيد وودانا لمحطه بعيدة .. لحد ماربي سهلها ولقينا واحد وصف لنا طريقنا مزبوط ووصلنا للفندق عن طريق الميترو
يوم الجمعة قررنا أننا نزور النادي .. فأخذنا الميترو اللي كان صعب علينا بالبداية ثم بعد يومين عرفنا له وصار سهل جداً .. اللهم تعرف اسم المحطة اللي يكون عندها الشي اللي تبي تزوره وخلاص .. ومحطتنا اللي بنروح لها اسمها ارسنال
المهم طلعنا للملعب .. ورحنا قصينا تذاكر الجولة في الملعب .. قالوا لنا الساعة 3 تبدأ جولتكم وكانت الساعة ذاك الوقت 11 ونص الصباح
فطلعنا للمتجر .. نتفرج عليه وكانت هذي الصور :
طبعاً عندهم متجرين مدري ليش .. الأول يعتبر صغير نوعاً ما واسمه :
بعدها طلعنا نقص تذاكر الجولة على الملعب وكانت متضمنه جولة ع الملعب وحجرة الملابس وغرفة المؤتمرات الصحفية والمتحف وتنتهي بالمتجر الكبير اللي عليه العلم عشان الناس تشتري بنهاية الجولة
وهذي صور الجولة :
هذا مجسم لخشه فينقر .. تلقاه بوجهك اول ماتدخل من البوابة استعدادا للجولة
هذي غرفة العلاج اللي يتبّطح فيها فان بيرسي وسيسيك نص الموسم خخخخخ
هذا المرشد في الجولة .. قام يفغى روسنا ويقول ان السيد فينقر هذا موقعه لابغى يعطي العيال الزبدة بين الشوطين
وهذي حفرة المندي حقتهم خخخخخخ
هذي كبسولة الزمن .. يقولون انهم حاطين فيها حاجات من زمان ومن ضمن الحاجات شرّابات لهنري < ابوك يالخياس
ثم توجهنا بعدها لغرفة المؤتمرات الصحفية واللي ماحصل لي اصور فيها لان الكاميرا قربت تخلص بطاريتها
.. قلنا بنوفّر الباقي للمتحف والشغلات اللي تهّم
اول ماتدخل المتحف تلقى هالصورة بوجهك على طول
قوية يابوشابمان والا ؟ ههههههه
ثم طلعنا بعدها ورحنا للمتجر الكبير :
هنا طبعاً تقدر تكتب أي شي تبيه ع التي شيرت .. ويحاسبونك ع الكتابة بالحرف
طبعاً هنا خلصنا جولتنا ع الملعب .. وقعدنا ندور حوله ونتمشى ورحنا تغدينا بمطعم قريب منه
ثم توكلنا للفندق
لأنو بكرة مباراة الارسنال مع الولفز قلنا ننام بدري لان ورانا حضور من بدري
< قراوى
الماتش كان الساعة 3 بتوقيت قرينتش .. حنا من 12 وحنا هناك الظاهر خخخ
وطلعت معنا هالصور :
اول ماتطلع من محطة الميترو حقت الأرسنال
حنا طبعاً دخلنا قبل المباراة بساعة .. عشان نصور وكذا وفوق كذا جوعانين ومعانا كرت للبوفيه اللي جوّا .. فدخلنا بدري
طبعاً هالصورة قبل المباراة بساعة الا ربع
اول مابدت المباراة بعدها بخمس دقايق تقريباً نزل مطر وكان الجو جميييل جداً .. صحيح انه شاخوف على ماقالوا .. هواء بارد بس عقب المطر الجو صار جدا روعة
الاحتفال بهدف فان بيرسي الثاني
نهاية المباراة اللي فاز فيها الارسنال 2-0
طبعاً حنا في يوم مباراة ولفرهامبتون لقينا واحد يبيع تذاكر لمباراة برشلونة بـ 250 باوند للتذكرة .. وصرفّناه .. قلنا بنلقى اللي نبيه بسعر اقل يوم المباراة وليتنا ماخليناه يروح
.. يكفي التعب النفسي يوم المباراة
المباراة الساعة 8 الا ربع بتوقيت قرينتش .. وحنا من 3 العصر تقريباً هناك قبل المباراة بـ 4 ساعات ندور تذاكر
بالبداية كانت الأسعار فوق .. توصل الـ 650 باوند للتذكرة الوحدة وغالبية الموجودين معاهم تذكرة وحدة بس .. وحنا اثنين
شوي شوي يوم قرب الماتش وانواع التعب النفسي والعصبي وجوعانين وبردانين وحالتنا صعبة .. لقينا واحد بالبداية قال لنا 400 باوند الظاهر تذكرتين مميزتين ومقاعدها ممتازة .. قلنا لا وزي مانصحوني الشباب قبل اني اكاسر .. اول مرة اصير بطل بالمكاسر خخخ طول عمري ينلعب علي بالاسعار لكن هالمرة زبطت معي قلنا له تبيها بهالمبلغ او خلها تطيح بكبدك ونروح لأي مكان نشوفها لان مامعانا فلوس وكل اللي معانا 400 باوند وكسرنا راسه واخذناها بـ 200 باوند للتذكرة الوحدة
المشكلة ان خويي طلع قدامه 700 باوند خخخخخخ
المهم اخذنا تذاكرنا .. ودخلنا قبل المباراة بساعة لاننا تعبانين وواقفين على رجليننا من 3 .. جلسنا وصورنا والحقيقة كانت المقاعد جداً مميزة ولو اننا دافعين فيها 400 باوند ماهيب حسوفة وهذي الصور
فيه جزء من جدران الملعب كاتبين فيه اللاعبين اللي سجّلوا هاتريك في تاريخ الأرسنال
هذولا جمهور برشلونة
والحقيقة انهم طرب .. من يوم اجتمعوا وهم يغنون ماسكتوا الا يوم امتلأ الملعب من جماهير القنرز .. ويوم سجّل فيها قاموا يغنون ويشجعون مرة ثانية لحد ماجاء التعادل ومير يقمطون
دخول القنرز للإحماء
دخول لاعبي برشلونة للإحماء
طبعاً نشوفهم كلهم يحمّون في هالصورة الجاية الا ميسّي .. مبوبز
مايحتاج يحمّي .. يدخل يشخبط هالفرق ويمشي
هدف فيّا واللي بغيت انجلد يوم قمت اصور هههههههه المشكلة خويي اللي بغى يجلدني
بداية الشوط الثاني
بعدها مع الحماس مهوب وقت تصوير الحقيقة
وهذي بعض الصور اللي حصل لي اصورها
نهاية المباراة
جماهير برشلونة بعد نهاية المباراة جالسين خخخخ يحسبون فيه شوط ثالث
يعلّمك ان نصهم مايدرون وش الكورة < امزح وربي ههههههههه
انا مدريدي .. وفريقي الثاني اللي استمتع فيه حقيقه القنرز
انا اساساً جايب الشعار لأن الماتش كان بين ارسنال و البرشا .. كذا لعانة والحقيقة ماكانت في بالي الا واحد من العيال قال لي خذ الشال معك .. فأخذته وعلقته وقت الماتش بالحاجز الأبيض اللي يميني .. وبعد ماخلصت المباراة بشوي وفضت المدرجات شوية وصار فيه مجال اني اتمشى في المدرجات رحت ألوّح بالشال قدام جماهير برشلونة اللي كانت تحت
حسيت اني وصخ هههههههههه
والجماهير الأرسنالية اللي كانت موجودة صارت اوصخ منّي صارت تصوّت للجماهير البرشلونية وتأشر علّي .. يعني شوفوا شعار مدريد هههههههههههههههههههههه مهابيل
بعد مارحت الوّح بالشعار والا فيه واحد يناديني ورى يقول تعال .. توقعت انه بيضربني .. لأنو وش هالتعبان اللي جاي يحارش البرشلونيين بشعار ريال مدريد وهم توهم مصقوعين خخخ
يوم جيته لقيته اسباني مدريدي ويبي يصوّر معي .. طبعاً لشهرتي في انحاء المعمورة والأهم لأنو شاف شال مدريد معي
وصورنا خويّه اللي كان كاتلوني ولابس طربوش بألوان برشلونة
المشكلة الحقير يقول لي : هذا صديقي من كاتلونيا لكنه شخص كويس هههههههههههههههههه
اتمنى يحوز الموضوع على اعجابكم .. واللي يبي يسأل او يستفسر عن شي لايرده الا كيبورده
علماً انو في بالي روحة ثانية لمباراة توتنهام الاياب .. لاسيما ان الفيزا باقي لها 4 شهور .. وتستاهل الروحة
سلاام
.. 
الوضع العادي
