السلام عليكم
في البدآيه احب اعتذر عن قلة مشاركتي في الشبكة بشكل عام !
في السنه الماضيه الوالد تكلم معي عن برنامج تبادل للولايات المتحده
البرنامج مؤسس من الخارجيه الامريكيه , الهدف ارسال طلاب مسلمين من دول اسلاميه او فيها اقليات اسلاميه كبيره بعد 11 سبتمبر لتحسين العلاقات بين الشعوب !
مثل ( مصر - اندونيسيا - كينيا - جنوب افريقيا - تايلاند - الهند ... ) واكيد السعوديه !
وافقت على الانضمام لهالبرنامج , كان التحضير طويل وصعب احيانا ! , من بين اكثر من 100 طالب سعودي ( الاغلبيه اولاد بس فيه تقريبا 8 بنات )25 طالب قدروا يسافرون لامريكا والحمدلله انا منهم , لازم تختبر اختبار انجليزي و مقابلات وقروشه اول ما وصلت لامريكا مع القروب السعودي محطتنا الاولى كانت واشنطن( العاصمه )
كان كل واحد متعلق بالثاني لانه الوحيد السعودي واللي يفهمه , جلسنا في واشنطن مده ثلاث ايام تحضير للسفر النهائي , كل طالب او طالبه بيكون في ولايه ثانيه نادرا اثنين في ولايه وحده ! اللي اكتشفته خلال هذا التحضير ان الشعب السعودي شعب عنيد و لا يلتزم بأي قواعد من الامثله ان لازم كل طالب ينام السآعه 10 ! وهذا شيء اعتقد انه مستحيل في مخ الطالب السعودي
كنا القروب السعودي كله نروح لغرفنا الساعه 10 على شان يجيون المسؤولين ويشيكون ان كل واحد في غرفته و الامور هاذي وبعد كذا نطلع في الحديقه التابعه للفندق ونجلس كلنا سوا لآخر الليل !
عرفوا الاداره و قرروا يحطون مسؤولين خارج المبنى خصيصاً للقروب السعودي , غير كذا خلطوا الجنيسات وحددوا لكل واحد مجموعه مخلوطه من هندي ومصري و كيني يجلس معهم اثناء الغداء ! , ما فيه ولا طالب سعودي نفذ المطلوب وجلسنا سوا كلنا في طاوله واحده رافضين كل انواع القواعد !
وبعد ما مرت الايام وكل واحد راح لرحلته ولولايته , الاغلبيه كان اكثر حزن لفراق الطلاب السعوديين اكثر من اهله لانه الحين رايح لحاله و لازم يعتمد على نفسه 100 %
انا حطوني في ولايه جميله تقع في الجنوب ,, فلوريدا ! واختارولي مدينه صغير جدا جدا وتعدادها السكاني بسيط وكل واحد يعرف الثاني , انتشر موضوع الطالب الاجنبي من السعوديه و صرت ما اروح ناس يسلمون علي ما اعرفهم لكن لازم تتأقلم , وكان في البدايه صعب التأقلم مع قواعد العائله , من وقت للنوم واستخدام للكمبيوتر ... الخ
اول يوم في المدرسه شيء جديد , مدرسه اكبر ومنشآت احسن وطلاب جدد ومر اليوم الاول على خير , رجعت البيت وسويت غلط سعودي شنيع اللي هو نومة العصر صارت لي مشاكل على هالنومه وبعدها توبه نومة العصر المشكله الثانيه الواجبات , مثل ما كنت في السعوديه الواجب ما ينحل الا في الحصه الاولى , سويتها لاول مره وفشلت و انخصم من درجاتي كثير و اقتنعت اني لازم اسويها في البيت !
ومرت الايام وانا اتأقلم احسن و تتحسن اللغه وطريقة التفكير تعرفت على فئات مجتمعهم , منهم الطيب ومنهم اللي يحاول يستغلك منهم طيب القلب و التعامل و الغريب ان عندهم مثل ما عندنا بدو و " طعوس " واكيد مشتاق للوطن الحبيب و مشتاق للأكل السعودي و مشتاق اتكلم عربي مع احد شخصيا ! الان انا في الولايات المتحده تقريبا شهرين ونص والامور في تحسن ان شاء الله القى وقت و اقدر اكتب مواضيع ثانيه عن فئات المجتمع هنا و كيف طرق التعامل واذا اي شخص عنده اي سؤآل رح اكون سعيد اني اجآوب عليه