السلام عليكم و رحمة الله و بركاته

يوووووه مشتاق اكتب في هالقسم .. فقلت أخربط لكم شوي و أشخبط بكيبوردي العزيز

ما ادري من وين أبدأ .. بس نبدا لأنه أكيد الموضوع ما ينتهي الا ببداية المهم في هالفترة الماضية شفت شيء عجيب و المشكلة انها بشكل يومي أشوفه !! في لحظة حسيت ان الهلال فريق غير سعودي .. جاء يلعب كم سنة و يطلع و الكل ما هو راضي عنه و يتمنى خروجه من السعودية اليوم قبل بكرة !!

صرت كل ما احط القناة السعودية الرياضية أشوف كلام عن الهلال و جيريتس .. كل ما أقرا اخبار لا بد إني أقرا شيء عن ياسر و غيابه !! .. ليته كلام حلو و يحافظ على استقرار الهلال .. بالعكس كلام يحاولون فيه زعزعة استقرار الهلال بشكل غريب جداً !!

بدوا الموضوع بجيريتس .. و عن روحته للمغرب .. المشكلة ما ادري الى متى يتكلمون عن هالموضوع .. أجزم انهم بيتكلمون عنه حتى نهائي دوري ابطال اسيا دون توقف [ بإذن الله يتأهل الهلال و يتوج بالبطولة ] لاحظوا من مباراة بونيودكور أو حتى قبلها بمدة .. إلى النهائي .. تقريباً سنة .. واااااااوك يا هي مدة يتكلمون فيها عن قضية واحدة

المشكلة و اللي اشوفها مصيبة ان المسألة صارت واضحة .. الرجال وقع للمغرب .. بيستمر لنهائي آسيا .. و بيطلع للمغرب أو حتى بيجلس لنهاية الموسم .. طيب وش يبون يثيرون هالموضوع .. يعني هدفهم تعال يا الهلال ترى نبي مصلحتك و نضغط عليه و يجلس .. هذي ما يسويها الا عيال مساعد الهدف واضح .. نشتغل ع المدرب و نحاول قدر المستطاع نزعزع علاقته مع اللاعبين !!

كملوها الآن بمستوى الهلال السيء .. سبحان الله ما كأن الفريق بدا الموسم اللي راح بمستوى سيء قدام القادسية و ما قدر يفوز الا في الدقائق الاخيرة .. هالموسم بدينا قدام التعاون فريق كان مقفل بشكل كبير .. و أيضاً بعض اللاعبين منخفض مستواه [ في المباراة ] و أرضية الملعب سيئة جداً .. كل هذي كانت ظروف مباراة فقط لا غير و تروح إن شاءالله .. قدام الحزم الفريق قدم مستوى أفضل بالرغم من الاشكالية المعروفة عن ملعب الحزم اللي هي مساحته

الشباب مستواه سيء و أسوأ من الهلال بمراحل و ما شفنا هالكلام كله عليه .. عارف ان الهلال يجذب الصحافة أكثر و لكن المشكلة هناك هي اللي يجب انها تُثار .. لكن لأنه الهلال فلا بد اننا نطلع عنه كل هالكلام عشان نأثر عليه و نزعزع ثقة الفريق .. أما الشباب لا فريق سعودي و لازم ندعمه شر البلية ما يضحك

في النهاية رد بسيط على قضية ياسر اللي تضخمت بقدر غير طبيعي .. سمو الأمير عبدالرحمن بن مساعد ما هو جديد على اللعبة و يعرف كل شيء و رجل واعي و يقدر يوزن الأمور بحكمة و رجل عنده دراية كاملة بأمور النادي و الأصلح للنادي .. فـ من المستحيل انه يتأخر عن لاعب مهم في الفريق بمستحقاته قبل مرحلة هامة جداً للفريق نحتاج فيها كُل لاعب

و أيضاً ياسر و إن كان حق له فـ من المستحيل انه يستغل ظرف الهلال الحالي [ قرب مباراة آسيا ] بالمطالبة بمستحقات متأخرة و ما يتدرب مع الفريق و من هالكلام .. الكلام هذا ممكن يحصل قبل مباراة مهمة في الدوري او ولي العهد او الملك .. لكن قبل آسيا مستحيل ياسر يستغل الهلال و كلنا نعرف تضحيته للهلال و وقفات الهلال معه الرجال ضحى أيام انتقاله بأكثر من 20 مليون فرق العرض الإتحادي عن عرض الهلال يجي الحين يساوم الهلال ويغيب!!

هذا غير سوالف ثانية .. سالفة ويلهامسون .. وسالفة نيفيز و كلها كانت فيها مراعاة لظروف اللاعبين لكن لازم يتحرف الكلام و يسببون مشاكل فيها

ايه صدق في النهاية فيه شيء شفته اليوم ما كملته بس ضحكت عليه حطيت ع السعودية الرياضية بالصدفة لقيت الحكم المعتزل الحمدان يتكلم عن رحيل جيريتس من بقى ما أبدى رايه

هذي شخبطاتي أتمنى تكون بسيطة .. فاضي و طلعت شيء من اللي في قلبي و اعذرونا على الاسلوب البسيط