القناة الرياضية ...... والأستخفاف بالمشاهد
 

سلام عليكم

جلست قدام القناة الرياضيه ساعه ونص وانا مغطس شطوبي في ماء وملح انتظر مباراة يوفنتوس وميلان وشوفو وش صار لي ...

بدء المذيع بالكلام وقال : الأن سوف ننقل لكم تسجيلا كاملا ( قصده من قدنا ننقل لكم كامل مهوب مقطع :D ) لمباراة قويه من مباريات الدوري الأيطالي تجمع ميلان ( قلت انا اشوى بينقلون المباراه ) و أودنيزي يوم فقيت شختي , وقبل لا امسك الريموت وأصكه في المذيع الا وراحت صورته وجت صورة المباراة , يوم شفت لبس اودنيزي مخطط اسود وابيض قلت اشوى شكل المذيع ماعنده سالفة ( شي طبيعي ومتعودين عليه في شبكة قنوات غصب ) يوم شفت اللعيبة قلت لا ذولي مهومب لعيبة يوفنتوس والمدرجات فاضيه ! هه !!

همين نقلت الطشت للكمبيوتر ودخلت احد المواقع ابشوف وش قصة هالمباراه الي ناقلينها ( وأسمع المعلق يقول : فعلا مباراة قويه ورائعه وحماسية من هذا الدوري القوي اقوى دوري في العالم , تقول يسويلهم دعاية !! .... ويقول : كما عودناكم ننقل لكم اقوى المباريات من هذا الدوري ) المهم يوم دخلت الموقع توقعوا وش طلعت المباراه هذي ؟؟؟؟؟؟؟؟؟؟؟


























طلعت أول مباراه في الدوري الأيطالي الموسم هذا !!!! طيييييييب ومباراة يوفنتوس وميلان وين راااااااحت ؟؟؟؟؟؟ انتهت اربع وعشرين ساعه ليه ما تنقلونها :mad: :mad:


يعني شايفيننا دلوخ ما نعرف المباراة القويه من البارده ؟ ما نعرف المباراة الجديده من القويه ؟؟؟؟؟ (( طبعا انا حاله أستثنائيه لأني كنت مريض يوم يلعبون المباراه هذي فما دريت عنها :D:D )

لاااااااا و من زييين الطبااااايع


المعلق جالس يقول ترتيب الفرق بعد الجوله الأخيره !!! والله حااااله :confused:

مساء الوررررررررررررررررررررررررررررد


ياحليلك :laugh: أنت تتابعها لين الحين :razz:

أنا يوم شفت أن وضعهم من سيء لأسوء ماعاد قبلت عليهم :sleep:

وكل الوعود صارت وهم :upset:

اجل قبل المباراه وبين الشوطين وبعد المباراه ماشفت التحليل الفني للمباراه :D :D :D

والله ان الواحد بلش بنفسه اذا اشترك بال اي ار تي شاهد مباراه وفوت مباراه واذا اشترك بالاوربت شاهد مباراه وفوت مباراه واذا اشترك بالشوتايم شاهد مباراه وفوت مباراه .

مايصير يبونا نشترك بكل القنوات والله لو سطح بيتنا مدرج مطار على كثر الصحون للدش :D

الحين لو فيه تنظيم وتعاون بين هالعالم التعبانه هذي وتنقل المناسبات الرياضيه كلها باشتراك واحد كان اريح لنا ولهم .

والله انك صادق اخوي رامي
ما تدري وش تلحق وش تخلي
لكن الكلام على القناه هذي الي مدري وش تبي
لا ويقولون لنا احمدوا ربكم الحمد الله على كل حال بس شي ما يصير اجل مباره من الاسبوع الاول
بس اكثر شي ضحكت عليه قبل فتره في الدوري الفرنسي سجل الفريق المهزوم هدف في الوقت الضايع الغاء الحكم لانه تسلل يعني المباره منتهيه 5 -0
الحبايب يقولون في التحليل المباره انتهت 5-1 ما يدرون انه هدف تسلل
:D :D :D :D :D :D :D :D

ماعندك احد .. انا اول ماشفت شعار ميلان قلت غريبه مسوين اليوم مفاجأه لكن يوم دققت زين لقيت ميلان وفريق ثاني مهوب اليوفي !! فعرفت ابوطبيع مايخلي طبعه... ومستحيل نشاهد بث مباشر او تسجيل سريع لمباريات الدوري الايطالي ..

الله يرجك ياقلب صحانه هههههههههههههههههههههههههههههههههه

هذا الطشت ومايسوي :D

يقولك السهم من اول ركزة .. وانا من اول يوم شفت فيه هالقناة غسلت ايدي منهم بطشت كله كلوركس وتايد وفيري وديتول وانواع الصوابين .. وصرت ماشوف فيها الا مباريات الهلال وبالغصب بعد وهي مباراة وحدة يالله لك الحمد .. حتى اني تفاجأت بالمحللين وصكيته بين الشوطين علشان ماشوف دعاية الغتر والشمغ والحلاقين :mad:
اجل يطلعلك الواحد يلق تقول توه طالع من الكوافير هههههههههههههه
ومن زينهم عاد .. اكره ماخلق ربي عندي ( الرومي وفؤاد انور :dead: ) ماناقصهم الا الهريفي والداوود علشان تكمل واحرم اشوفها حتى لو فيها مباراة للهلال على كأس الاندية للمنتخبات :mad:

حسبي الله ونعم الوكيل .. ويافرحة ماتمت .
والحمدلله اللي لهالحين ماشريت اريل :blueroll:

تحياتي للجميع :)

[email protected]

ياليت كل واحد منا يرسل احتجاجه على هذا الوضع ..

غاسلين أيادينا منهم ياصحن قلابة
ومحنب راضين إلين ينقلون الدوري الاسباني ----------> " يحلم "

الشكوى لله بس ....

قصرنا وحنا نرسل شكاوي لهم ... لكن ماشفنا شي ....

لا وشف الخبث وين وصل ...... حاطين في بالهم انهم بيعرضون مصارعه ..... وقبل لا يبدا برنامج المصارعه يقول المذيع : وصلنا أيميل من أحد الأخوه المشاهدين يطلب عرض مصارعه , وهانحن نلبي طلباتكم ونعرض لكم ما تريدون .

طيب وأيميلات الشكاوي وين راحت ؟ الأيميلات الي تطلب الدوري الأنجليزي وين راحت ؟؟ <<< مرسل 68 رساله يبي الدوري الأنجليزي ولا عطوه وجه ! .

بالله ما يرفعون الضعط ؟؟ !!

ومثل ما قال اخوي هلالي الجوف .. فؤاد والرومي عجبه !! كل مباراة يعيدون نفس الكلام دققوا وبتشوفون . ( مار فؤاد يذكرني بفؤاد بن بطاح , ما يعرف يتكلم ويعبر عن نفسه !! )

تحياتي :)

على طاري المصارعة ..

هذي جايبينها على أنها رياضة !!!

انا ادري !!!

المفروض يعرضونها في الأولى على انها مسلسل

اقول ترى بعد العيد بتسكر


وشفها اليوم كيف يسحبون الوقت تسحيب


ولا احد يقول من الشباب متى بتصير فضائيه

تراه عيب


سر كبير


اقول موسهلين قريب وبس قريبا وبس متى محد يدري

اقول باي

والله مسخرة...........قالو الإسباني والفرنسي والإيطالي راح يكون مسجل ....وفي الدور الثاني بطولة ابطال الدوري الأوروبيه.....................
وكل هذا ولا شفنا إلا الإيطالي تسجيل والفرنسي مباراة وحده مباشرة.والإسباني مدري وين راح ودوري الأبطال صار وهم او بالأحرى حلم غير متحقق لو ايش.......
والله العظيم ان الكويتيين والإمارتيين مستانسين مرة....كل قناة من عندهم تنقل الشامبيونز ليج والإسباني والإنجليزي.....والإتحاد الأوروبي وغيره.....وانا مصارعه لا ومن العصر الحجري بعد........الله يرحم والديكم ارسلو لهم عشان يسكرونها...

لا ومن زين الطبايع شف من هو االلي يحلل .....:upset: مهوب عاقلين الشتالي ....