الريال vs خيخون

المباريات اللي تجيك في مثل هالضروف هي اللي توضح لك مدى جاهزية وقوة الفريق وتشربة لـ تكتيك المدرب
الفريق يعاني من غيابات كبيرة جداً .. كل أعمدة الفريق غايبين عن مباراة اليوم ..
لذلك نبي نشوف فريقنا هل هو قادر على المواصلة بنفس الرتم وبـ نفس النظام حتى مع هذي الغيابات .!؟
الشيء هذا بيوضح لنا اثناء المباراة
كلي ثقة بمورينهو وباللاعبين وإن شاء الله الفريق قادر على حسم المباراة بسهولة .
أشوف إن اصابات نجومنا جت في وقتها .. لأن فوزنا بكرة على خيخون في ظل الغيابات الكبيرة هذي
بيعطينا قوة إضافية وثقة كبيرة وبتكون شخصيّة اللاعبين لها بصمة كبيرة على الفريق وبتفيده كثير في شهر ابريل الحاسم

نقاش بسيّط قبل المباراة

1- في نظرك وش انسب تشكيلة يدخل بها المو لـ مباراة بكرة في ظل هذه الغيابات .؟!

2- تطبيق تكتيك معيّن وخاص لهذه المباراة بسبب غياب الاسماء القويّة تشوف إنه راح يأثر على نهج الفريق في مباراة توتنهام .؟

3- تفضّل مشاركة هيغوين بعد حسم المباراة .. أو الإحتفاظ به لـ مباراة توتنهام .؟!

وبس

إقتباس أكيد وردي كان موجه لشخص واحد كتب في رده الوعد بعد المباريات نشوف مين الصادق بيننا << وش تعني هالنبرة ؟

يااخي من جد طفح الكيل !

هذا آخر رد لي اللي بيقتنع وبيتفهم وجهة النظر الله يحييه واللي مو مقتنع عله مااقتنع ابد ان شاء الله

مسألة اني انا جايكم بقلب الشغلة تحدي وخرابيط مالها اي داعي معناها شغل بزران وجاي اعابط وادور لي هوشة معينة

تابع النقاش من اوله الله يرضى عليك وشف كيف بدت القصة ولاتجي مطفي النور

قال الاخ عاشق زعيم اني انهزامي وجيت طفيت النور وصفيت معه ولو ترجع لبداية القصة وتقرا الردود زين فيه رد لي قلت فيه اني متخوف جداً لااكثر ولااقل ماقلت اني ضامن هزيمة
بالعكس مورينيو لعباته الذهاب والاياب
الله العالم وش بيصير من هنا الى بعد شهر
ميسي يصاب تشافي يموت الجني الفيس يجيه داء القطط يجي ديفيد فيا زهايمر كلش جايز وهذا بعلم الغيب ومااحد يقدر يجزم بشي عموماً
كل اللي قلته اني خايف وقدامنا ثلاث بطولات بنقابلهم فيها حنا نترنح شوي اثار الخمسة والاصابات واللاعبين اللي حارقين دمي بمباراة الذهاب اللي فشلوا مورينيو ودخلوا الملعب يتنافضون من اول ماسنتروا الكورة ويشوت ماادري من فيهم الكورة غلط قلت بس مرتبكين وعز الله رحنا فيها

فريقنا جديد وفريقهم متفاهم
كل التوقعات تعطيني خوف

كان تعبير خوف مستحيل ابديه عند مشجعين اندية ثانية لاني برا مهما كان ببين ثقة بفريقي بس بين جماهير ناديي المفترض اني اتكلم بمنطقية والهياط والضحك اخليه برا لاننا هنا جايين نفضفض ونعبر عن خوفنا ومااخفيك كنت انتظر احد يجي يرد علي بكلام حلو مثل:

ماعليك قدامنا الحلول الثالية بيسويها مورينيو وبهالشكل بنعرف نتصرف معهم وبنفوز
والا الله يستر ان شاء الله يفاجئنا مورينيو


لكن للأسف العينات اللي ردت اكتشفت انها تقول لاتخوفنا وانت فيك وفيك يعني زادت الطين بلة

انا للحين آثار الهزيمة المرة اللي انت ماجربتها مثل ماجربتها انا

حاط صور مورينيو وقلت خلاص يابرشلونة جاكم البعبع مورينيو
ميسي انتهت ابداعاتك قدامنا جاء مورينيو بيكلبشك

وفعلا صح اني كنت ابي تعادل وخايف بس كنت متفائل اننا بنقفل وممكن نفرق بهدف ونفوز بالكامب نو والنتيجة شفتها مسخرة الكل يضحك يقول انت ومدريدك والتهزئ جاني بكل الاماكن
يارجل هل تصدق انه بعد الهدف الثالث الوالدة الله يطول بعمرها بالبيبي تقول لي هذولا كفار وش تبي فيهم ياولدي انهزموا والا فازوا ؟ حتى امي حست اني تمسخرت هاك الليلة مسخرة مابعدها مسخرة

وآخرتها تقول لي انت واللي أيدك ماابي رد انهزامي

ياشيخ !

ثلاث سنين وحنا ننلزخ منهم وتقول لاتصير متشائم وهو كله خوف لااكثر ولااقل

اصلا تفاءلوا بالخير تجدوه وقل هذي انا مااعرفها بعد ؟ ..بس عاد لاافراط ولاتفريط


لعلمك عاد

عندي قناعات غريبة مااعجبت يحيى اول واحد بحكم انه خويي واتكلم كثير انا واياه عن النادي وكذلك مدريدية غيره

قلت انا ماابي ناخذ الابطال هالموسم

مااشوف فريقي وصل لمرحلة الفريق المتكامل اللي يمشي بتكتيك موب صاحي

وش تفكيري؟

ابي هالموسم ناخذ الكاس بس ولا ابي الابطال عشان كذا افضل نطلع من توتنهام ولانطلع من برشلونة لاني عارف نظام البرشلونية وهياطهم وبثارتهم بعد الفوز

ليش ماابي الا الكاس بس ؟

ابي أضمن مية بالمية ان مورينيو يستمر بالنادي لانه لو اخذنا الابطال مااستبعد يمشي لان هذا نظامه ولاتقول مايسويها هذي حركاته

اذا مشى نهاية الموسم معناها صارت جيته مجرد حبة سنافي ولعنا فترة ونهجد بعدها
يعني ماضبط النادي من جذوره

لكن لما يجلس الى الموسم الجاي مؤكد ان الفريق بيتشرب الخطه وبيدعم صفوفه بالخطوط الناقصة بوجوده وبكذا الموسم الجاي بصير جاي بكل حماس وساعتها ابي مسخرة كبرى

مسخرة لبرشلونة
مسخرة للبايرن
لارسنال
لروما
لليفر

كلها بنصفي ديوننا معهم وابغاها على سنع على قوة

ابي يرجع اسمنا رعب من جديد
ماابي مسكن

القضية ماهي قضية بطولة وخلاص ابي شي للأمد البعيد

زي تشيلسي مثلا
صنع فريق استمر ل 6 سنوات قوي والى الان له هيبته

هذا اللي بوصل له مو لقب وخلاص

عشان كذا ولاني افضل اطلع قلت اطلع من توتنهام ولا اطلع من برشلونة ويقعدون يزعجوننا جمهوره

لكن فيه ناس ماعندها تفاهم وتجي تنبرش عليك مطفيه النور

شفت الرأي هذا؟ اتوقع بنسبة كبيرة من اعضاء الرابطة بيستنكرونه بس انا ابي هالشي لاني ابي فريق للمستقبل ماابي شي سريع



شككت بالميول وشغلة تحدي وماادري ايش

ناخذ شغلة الميول

شي يمكن البعض يعتبره غريب وتعصب

الكثير من جمهور فريقنا شجع اسبانيا بكاس العالم
انا لا كنت اكرهه وكنت اسميه فريق برشلونة يخسي اشجعه
7 لاعبين لهم و3 بس لنا يعني اغلبية برشلونية
وفعلا لما اخذوا الكاس جو جمهور برشلونة قالوا حنا اللي اخذنا الكاس وصادقين اغلب الشغل على لاعبينهم وهم زبدة السالفة واللي بينكر هالشي سلم لي عليه

انا اشوف شعوري ذا تعصب بايخ وانا ماني مقتنع فيه لكن شعور مااقدر اخفيه


انا مااحب لعب تشافي مااخفيك ولايمتعني ومثله ميسي صح يسحب ويمسخر بس مايمتعني مثل رونالدينو وايتو
وطبعا قبلها المتعة الكبرى شلة مدريد 2004
باختصار جيل برشلونة ذا قوي بس اكره اسلوبه باللعب ولامتعني ( وهذي برضو بتستنكرها بس شغلة ذوق



نجي للانهزامية

مسألة اني اكتب كلام كثير وآخرتها تجي تصر اني انهزامي وماادري ايش وتعيد الكلام من جديد
معليش حنا لو بنقعد نتناقش بنقطة معينة كثير القارئ بيمل مننا وبيقول خلاص غيروا الموضوع

فخلاص انا ماابغى اكثر كلام قلت لك الوعد المباراة نشوف هل خوفي على سنع والا خل نقول ثقتكم بالفريق على سنع لاني قلت كل اللي عندي وماابغى اعيد وازيد بنفس الموضوع


اقرا الردود اللي قبل زين الله يعافيك وحاول تفرق زيييييييييييييييييين بين كلمة انهزامية
وبين واقعية

لو ماتشوفها واقعية انت حر بس انا من حقي اشوف الواقعية بنظريتي اللي اساساً ماطرحت فيها هزيمة اكيدة لكن كان تخوف بس


التقطة الاخيرة لاني طولت بالكلام وسولفت واجد

للمرة الثانية اعيد واكرر لكن بشكل اوضح

الاخ سليم مدير الرابطة حسب ماانا فاهم واللي له الصلاحية
هم بس لهم الحق يجون يسنون القوانين ويمنعون اللي يبون ومو من حق اي واحد يصادر رأيي
مااعجبك الرأي ولااعجبتك بشكل عام آراء الكاتب تقدر الله لايهينك تكلم المشرف يلغي ردي او الله لايهينك تنطه وتروح للي بعده لانه يبقى رأي وانت في منتدى تتقبل جميع الاراء مادامت ماتعرضت للدين والاخلاص العامة


عندك نقطة معترض عليها تعال اعترض وصحح المفهوم الخاطئ اذا انت تشوفه خاطئ بدون تصنيفات وتشكيكات ودخول بنوايا الكاتب ( ايه بدعي انه نخسر عشان اقول هاه شفتوا كلامي ؟ ) يعني ابي فريقي يخسر عشان اكسب نقاش

ان شاء الله عمري ماكسبت نقاش عن مدريد عن طريق خسارته وش ذا المنطق؟!


وانا لو مااني احب مدريد من 10 سنين ماجيت تعبت نفسي وقعدت اقرا اخبار النادي
بلاك بيري
الرابطة هذي
منتديات رياضية ثانية

اخر همي ان اكون مشجع نادي ثاني والا ماني متحمس للنادي واجي اخوفكم واصير انهزامي ومن هالكلام الفاضي


يوسف سيف احب معلق على قلبي لانه ارتبط سنوات طويله معي مع ريال مدريد من بداية فتح قناة الجزيرة وانا اتابعه مع ريال مدريد لين حبيته وتعودت عليه وهو اللي كثير الان يكرهه ومايحبه

يارب تصدق اني احب مدريد من زمان

تمسون على خير


برايفت :

اخوي سليم انا تشعبت واجد واعذرني وانا اخوك اذا فيه شي بالرد بس متفاجئ جداً بالوضع هنا

العضو فلورنتينو امثالك يحببني بالرابطة سجلني من متابعين قلمك

السلام عليكم

بداية المعذرة لو ردي صار مو مرتب شوي ومعليش بكتب بلون واحد احتراما لقلم ابو يوسف اللذي عطرا شجيا في الايام الماضية

سهمين لفوق مع وردة وقلب كبير لريان اذا ما خاب ظني
قلمك دخل نغاشيش قلبي على قولة المصريين

ووردة وقلب لعبود دكتورنا ونايبنا السابق


لو تسمحون لي بس ادخل بالحوار وأكون ضيف خفيف على قلوبكم البيضاء لانها مدريديه أكيد


اللي يقلل من عشقكم لمدريد مخطأ ووجهة نظركم تطرح على العين والراس وما يقدر اي احد يمنعكم والا بمشعاب سليم نوقفه از جوكينج طبعا

لكن الشرح يقول نادي كالريال ما يتحمل انه ينظر بمنظور سلبي تجاه اي لقاء او لقب
والمسألة هنا بعيدة عن التخاذل او التشاؤم كما طرح
المسألة تتعلق بكبرياء نادي وعلشان لا تحسبوني أتفلسف عليكم

شوستر طرد بموافقة 81٪ من اعضاء مجلس الادارة لانه قال ( لن نستطيع الفوز على برشلونه )
هل كان شوستر يكذب او يتخاذل؟ أكيد لا بدليل الهزيمة بعد تصريحه باسبوع واكد انه كان يتكلم بالواقعية اللي تتكلمون عنها الان وع فكرة اميل كثيرا لتفكيركم الواقعي مع شوية تحفظات على توقع الخسائر

يعني ان نادي كالريال ماراح يقبل الا بالروح والإيجابية من لاعبيه داخل الميدان وما يوجد ادنى تفكير بشماتة البرشلونية لو انهزمنا يكفينا اللعب بشرف والحفاظ على شخصية النادي لان الكورة فوز وخسارة ليش افكر بس بواقعية الخسارة واتخلى عن آمال الفوز
هذا المنطق اللي يمشي عليه النادي .. وتواريخ الريال بالأرقام الإعجازية يشهد له


الانقسام باراء الإعضاء اعتبره صحي ويدل على مدى قوة الطرح الموجود بدون اساءات طبعا ومو شرط ان سطر ما يعجبني برد اي عضو يعني ما يعجبني الرد بالمجمل

تنقيح الرد قبل الرد جزء مهم جدا أتمني ما يهمل


وتأكدوا عبدالله وريان أنكم إخوان قبل الرد وبعده اتفقت او اختلفت معكم بالنسبة لي شمعتين تنور هالرابطة مع شموع الاحبه الأخرى وفيه منها وحده محششه وثانيه سوداء شمعة غراب


واذا كان فيه تتمه لكلامي راح ارجع بس هالرد مثل اللي باثمه ماااا ويبي يطلعوووه



للكل وردة

لابو دسم ( ابي صورة الالترا سور قبل ماتش ليون تكفى لو تلقاها خلفية )

والحصريات قريبا سيكون لها عودة قوية والسوق الصيفي يبشررر بالخير أؤكد لكم

إقتباس لعب انجليزي تقليدي وهو إرسال الكرات العالية للأديب وبطوله وقوته البدنية إما يجهزها لزملائه اللاعبين أو يجهزها لنفسه وكذا يكون الفريق اختصر موضوع بدئ الهجمة من الخلف وصار يلعب في وسط ملعب خيخون او حتى في منطقة ال 18 حقته

أبو تولين

ماتشوف إن ذا الاسلوب ممكن يأخر من حسم المباراة ويخلي الفريق مضغوط ومتسرع ..؟
لأن لعب الكرات الطويلة يحتاج لـ صبر وحكمة ماتلقاها الا عند الانجليز
اذا لعبنا كورات طويلة يبي لنا نصبر وننتظر المساحات والاخطاء اللي ممكن يسويها مدافعين خيخون
لذلك ذا الاسلوب ما اتوقع انه بينفعنا اليوم ولا بـ 1 في المية لأنه اسلوب صعب تطبقة بين يوم وليلة

إقتباس وأحسن شيء إنك انت وابو دحة وزيد ماسألتوني في الأيام اللي راحت أحس نظامكم كله تحجير

إي والله احمد ربّك .. والله ياكنت مجهّز لك اسئلة .. لكن سليّم نزل رد وقال انتهى وقت الاسئلة
وقتها حسيت ان ربي يحبك