05/07/2010, 12:08 AM
|
| الكاتب الساخر | | تاريخ التسجيل: 19/06/2006 المكان: Najd
مشاركات: 1,022
| |
مغاط بـ شارع البراميل !!
آآآآآآه يا ناس والله اني بديت أنخرم لأيام الديل أب !! و أيام الصجة والازعاج وذاك الصوت اللي يسمونه ( طنين ) اذا جيت تتصل !! أما طنين تحس إنك لاحق ذبانـّه !!
واذا دخلت النت تسلطوا اللي يدقون عليكم .. لدرجة فيه عجوزن بثرة من قرايبنا آخذه رقم جيرانا و إذا دقت ولقت خطنا مشغول اتصلت عليهم وقالت روحوا لمهم خلوّا ولدهم يفصل اللي هو شابك !! وش جاب طاري الديل أب ؟!
طرّاها إننا مبطي ينقال لك راعين ذمة وتوفير .. إذا صار الموضوع طويل .. قلنا للعالم ببدايته : افصلوا النت ترا الموضوع طويل !! تسن العالم ما تشوف !! فعلى كل ٍ حبيت أقول لكم ترا الموضوع طويل اللي بيطمـّر يطمـّر تراه ب حل !! <-- بالله ؟
-----------------------------------------------------------
-----------------------------------------------------------
خشَّــــه :
- تذكرون البوسنة والهرسك ؟! والصرب وملعنة الجدف اللي ذيك الأيام !!
كان بوقتها معي ثلاثو ثمانين هايلوكس غمارتين !! محافظ عليه ومركب له كفرات عراض ومغيّر المرايات اللي على الجنب ومزبرقهن بشطرطونات .. وكانت الأف إم ما تشتغل عندنا بالديرة .. ومع ذلك مركب "انتل" لو تجلس على جدار سطحكم .. مستعد أمحـّطك به من طوله !! وكانت أحداث البوسنة مؤثرة فيني !! وكان معي شريط أناشيد عن ( سراييفو ) اللي هي عاصمة البوسنة ذيك الايام << يحسبهم غيرّوها !! المهم كنت موزّي الشريط تحت المرتبة .. اللي يشوفني يحسبني داس بكت مالبورو !! لأني أخاف أحد يشوفه ويعلم الباقين !! اذكر مرة كنت متهيـّظ !! و ماسك خط المزارع ورافع للنشيدة على أطول حد .. لا وينقالك مسوّي جو شاري (أورنجينا) ليمون راجها الين تفلت العافية .. وسير المكيـّف منقطع وحرّ .. و داق طبلون الهايلوكس ومنطرب إلى النعلة !! المهم مع الحماس ما قدرت أتحكم بمشاعري يوم وصلت آخر الشارع وأنا أسحب ( جلنط ) عشان أديور .. وأقصـّر لصوت المسجل وأعيش جو الاستهتار وإني شخص مخربهـا وغير مبالي .. !! وبهالأثناء ويدي تجرّ الجلنط تذكرت إنه خربان ولا يمسـك !! بحياتي ما قد جتني روعة مثل ذيك الروعة !!
المهم انحاشت بي السيارة .. و أنا اللي أنصى سور مزرعة بغيت أضفه و أتوطى شجر الأثل .. اللي وراه !! لكن فكني الله ووقفت السيارة قبل الجدار بـ شعرة !! مع الروعة والحوسة .. والمراتب راطسه أورنجينا !! وحالتي حاله !! نزلت أبشوف وش اللي صاير !! و أنا اللي أناظر الغبره والوضع المزري اللي أنا به !! قلت الحين لو إني قاضّ السور.. و إلا راقيه .. من بينفعني أنا ووجهي!! شفتوا وشلون الحماس قذر و وصخ ولا له داعي << تحسون إنه مرتاع الى هالحين !!
ما يستفاد من القصة :
-بعض كتـّاب جرايدنا .. ما نقصه إلا أورنجينا .. ويطلع أسفه وأبزر مني ذيك الايام إذا تحمّس !!
-إذا اجتمع هياط وحماس .. وقل دبرة بشخص !! ( سواءا شيخ / لاعب/ كاتب / مسؤول ) .. لا ترجي منه خير أبد !!
--------------------------------------
--------------------------------------
استفهامات !!
- س1 : ما هو الاستذهان والتفيهم ؟
جـ 1 : هو الاحساس بإنك قافط العالم !! و أنت وكم واحد من اللي يهزّون روسهم معك .. فاهمين الكفت وعارفين البير وغطاه !! وأنت و أياهم من جنب القدة !!
س2 : وش معنى كلمة " خنبقة " و " حواق " و " بربسة " ؟!
جـ 2 : شف جدول دوري " زين " وتدري !!
س3 : لمن تقول ( يا شين السرج على البقر ) ؟!
جـ3 : للي ( يثاغي ) باللي يعرف واللي ما يعرف !!
--------------------------------------
--------------------------------------
رؤية مغاطية !!
- شكل الموضوع غزو فكري !! [ليه اللعيبة صاروا أشهر من الأدباء والمفكرين ومن بعض المشائخ] ؟!
- قسم بالله ظلم !! الحين نكرف بالدوامات إلى العصر .. وذا اللعيبة تبطـح وتسدّح بهالثيـّل.. ورواتب يحبها قلبك !! وكل صيفية يا بالسودة يا بالحبله <<-- ينرحم يحسب الوضع على خبره ؟!
- وش هاللي هابل العالم بالكورة !! وش السر ؟ العالم مالهم شغل إلا كورة ؟!
** تجيكم هالخمــّات وتسألون أنفسكم هالأسئلة ؟
- اذكر مرة قريت تفسير نفسي وتحليل سيكولوجي للسبب اللي يخلي العالم ينسحرون بهالكورة .. وتبيــّن لي إنه من ضمن ( فصوص ) المخ .. يوجد مناطق خاصة بـ(الأهداف والتصويب) ومناطق ( تركيز ) ومناطق ( توجيه ) .. لذلك بمتابعة أو ممارسة كرة القدم : ( ترضي غرور داخلي ) وحاجة نفسية تعتبر غريزية للأشخاص اللي توجد فيهم هالمناطق في أدمغتهم ( الرجال الأغلبية الساحقة / النساء أقل في هالجانب ولكن يوجد للبعض ) !! إذن المسألة ( استمتاع داخلي لا يضاهى واحتياج تركيبي نفسي ) !!
- كرة القدم كـ ممارسة !! ( فرصة لا تتاح لأي شخص ) سوى أناس معينين يمتلكون ( الموهبة والموهبة فقط ) ويوجد لديهم مزايا خاصة ( وتوافق عضلي عصبي معقد ) !! وهذا أيضا سرّ من أسرار النفس البشرية بالاندهاش والانتشاء بهذه ( التموجات الجسدية ) و ( تقاذف وسيلة معينة للوصول لـ غاية <- كرة / مرمى ) !!
- مع التطور المذهل في كل مجالات الحياة ( المالية ، التقنية ،الصناعية، السياسية ، الإعلامية ، الأيديولوجية ......) وتطوّر (النظريات والفرضيات) والبحث عن (صناعة المال) بأي شكل من الأشكال !! نال هذا التطور ( كرة القدم ) و أصبح ( اللاعب ) سلعة تجارية من جانب !! وثروة طبيعية من جانب آخر !! ووسيلة استثمارية وتسويقية للانتشار والتوسع والفوران الإعلامي الذي تطّور بدوره وأخذ يبحث عن أي فرصة لها عوائدها المالية المرجوّه !! وبما أن ( اللاعب ) هو الركيزة الأساسية والركن الركين في هذه المنظومة المترابطة !! ناله نصيب الأسد من هذا التطور !! الذي جعل اللاعب يحظى بكل هذا الاهتمام والتقدير لأن ( المدار والمجال الفلكي ) الذي شاء القدر أن يسبح به هذا اللاعب هو مجال ( تطوّر بطريقة متناغمة ، وتقنية متآلفة بصبغة إعلامية بغاية الذكاء والتميز ) !!
- الحقيقة أنها ليست مشكلة لاعب ضد / شيخ أو مؤلف أو مفكر أو أيً كان !!
بل لأن ( المجال الرياضي عموما و الكروي تحديدا ) استطاع و بكل انسجام أن يتوافق مع ( التوجه الإعلامي الجديد ) و ( الكسب السريع للمادة ) و ( عدم معارضته وتصادمه مع أي تيارات دينية أو فكرية أو حزبية سياسية ) و ( ووجود حاجة روحيـّة ماسه في كل فرد للانتماء لمجموعة / فريق ) و ( التطور المستميت بخلق ما هو جديد و مثير للدهشة ) من قبل صنــاع القرار في هذا المجال !! وبما أن ( التركيبة العقلية للإنسان ) و (الفرص المذكوره أعلاه ) توفرّت والتقت بكل أريحية وسلاسة في هذه (المستديرة) !! فمن الطبيعي والطبيعي جدا أن تحظى بكل هذه الأولوية !!
** الشاهد من الخنبقة والفلسفة أعلاه !! إذا بغينا نطــّور أي مجال من مجالات الحياة الأخرى " اللي ما أفلحنا ولا بجانب منها " !! لابد أن تتطور ( المنظومة ككل ) !! بدون تجديد وتكاتف من كل طرف وتكاسله عن أداء دوره ( ستتعطل المجموعة وسيتلاشى وهجها ) !!
** كرة القدم : حظيت بفرص فطرية عقلية " تسهـّل كثيرا من انتشارها " + غياب المعوقات ووجود المحفزات [على المستوى المالي والإغراء الإعلامي ] .. فأسهمت كل هذه السوانح لأن تتبوأ كرة القدم هذه المنزلة !!
** قبل أن أختم .. إذا ما أردنا أن نتطور في أي مجال ( لا بد أن ننظر للمعوقات ونعمل على إزالتها ) !! لأنها هي ما نصطدم به حينما ننوي السير للأمام !!
** إذن من القبح بمكان أن نتغابى ونتغافل عن بعض الاعتبارات الأخرى لتقييم ( أي موقف ) من حولنا !! أكرر ( أي موقف ) !! وكرة القدم هنا كـ ( مثال ) !!
كتبه وأملاه : أخوكم الصغينون مغاط :$ |
لبى خربوشاااااااااااااااااتك يامغاط لاتحرمنا ابدااااعك
الوضع المتطور
