ياليت الإداره تطلع وتوضح .. الصمت ليس دائماً أفضل الحلول ! - نادي الهلال السعودي - شبكة الزعيم

آلماتدور آلهلالي · #1 07/06/2010, 06:11 PM

بسم الله الرحمن الرحيم

هذا لاهو هجوم على الاداره ولا انكار لخدماتها .. بس أخطاء صعب ماتعلق عليها .. ياليت الإداره تطلع وتوضح .. الصمت مب دايم أفضل الحلول !

ما أدري ليه البعض يعتقد ان انتقادنا للاداره فيه انكار للخدمات والانجازات اللي قدمتها .. ردي السابق ماكان يناقش هالشي أبد .. ردود كثيره كتبناها فيها إشاده وقلوب إلى بكره .. مافيه أحد يقدر ينكر جهد الإداره وتميزها على جميع الأصعده .. لكن عبدالرحمن بن مساعد ماهو منزه عن الخطأ .. ولاهو عيب ولا حرام ولا قلة خاتمه اذا تكلمنا عن هالأخطاء ..

الإداره تكلمت عن جلب لاعبين محليين .. على سبيل التجربه على الأقل في المعسكر .. وينهم ؟! .. فيصل الجمعان ولاقدرنا نجيبه ! .. هذا عدا موضوع حسن العتيبي اللي جلس شهور معلق !

( وبالمناسبه أتمنى أفهم موقف الإداره من خالد عزيز .. هل هو معاقب .. ولا النادي معاقب نفسه .. ولا وش النظام .. ! )

والحين نقرأ ونسمع كلام عن الدعيع .. والمصادر تنفي وتؤكد .. والإداره لاهي اللي حلت الموضوع ولا هي اللي حطتنا بالصوره وسكتت الاعلام ! ..

موضوع جيريتس الاداره هي الوحيده اللي تنفيه .. ونفي يعتمد على اللعب بالألفاظ والذكي يفهم !
نبي موقف واضح .. الخبر طالع من صحف أجنبيه والإداره ملتزمه الصمت ! .. بتقولون لي نفت أكثر من مره ؟! .. دام الخبر كل يوم يتجدد ومن مصادر قويه .. مفروض يطلع توضيح .. مب معقوله الاعلام ماخذ راحته والجمهور على اعصابه والاداره ساكته !

الخطأ الأكبر هو تصريح الاستقاله .. أي رساله اللي بتوجهها الاداره للاعبين ؟! .. اسلوب ضغط .. الجمهور نفسه صار مترقب وحاط يده على قلبه لانطلع من الاسيويه وكل شي يروح ! .. ندري ان الاسيويه طموحنا والاداره عازمه على تحقيق هالشي للجمهور ماهو انجاز شخصي لها .. بس تربط استمرارك في الرئاسه بالاسيويه خطأ كبير !
وتطلع اخر الموسم تشتكي من هم الرئاسه والمتاعب الماليه والنفسيه والجسديه .. أنا كمشجع هلالي وش بستفيد ؟! .. اللي ماحس بمذله ومنّه .. بيحس ان الاداره فاقده الحماس والحافز وطموحها الوحيد الاسيويه .. بعدها مافيه هلال !