متحمسيييين لليوم وجاء اليوم وجت القرعه وهذا الفريق اللي بنقابله والله + صوووره لقطة ختام لكن لاتستحق الختام - نادي الهلال السعودي - شبكة الزعيم

ReeM Alfala · #1 25/05/2010, 04:37 PM

.....

.
.

السلام عليكم ورحمة الله وبركاته

كنا قبل متحمسين ليوم الثلاثاء ونستنى اليوم عشان نشوف القرعه ومن بيقابل الهلال ومن ماراح نقابله
وألحين عرفنا << اللي يسمعني كني شايفتها الله يعافي المطرسه ماسكتني

...وياخبر اليوم بفلوس باتسر ببلاش

..

الفريق هو الـــغــــرافه الـــقـــطــري,, وما أدراك مالغرافه

بس للأسف وأكررها للأسف

رحت أشوف المواضيع حالي حالكم وشفت ردود الأعضاء اللي أغلبهم متشائمين ويتكلمون
عن عقدة الهلال وهي الفرق الخليجيه وأن الهلال مايتجاوزها خصوصا في أبطال آسيا ويتمنون أننا نقابل فريق كوري ..
يخرب عئلكو !!!

يعني إذا كان الهلال في نظركم مهوب قاوي الغرافه وخايفين منه أجل بيقوى نادي كوري!! لا والله
مهيب الظنه .. المفروض نرضى باللي صار واللي راح يصير إن شاءالله ..وبالعكس هذا من مصلحتنا لأن الدور
ربع النهائي يكون بعد شهر من بداية الدوري عندنا واللي يقولون ودهم بفريق كوري .. كوريا يبدون الدوري قبلنا
بكثير وبتكون لياقة لاعبينهم ودخولهم جو المباريات أفضل بكثير من لاعبينا ولكن نحمد ربنا ونشكره أن القرعه
ماحطتنا بحضن فريق كوري ولا تسان رحنا فيها

ولكن الغرافه بيكون مثلنا توهم يبدون الدوري ولياقتهم ودخولهم جو المباريات نفسنا يعني كولنا في الهوا سوا <<ولا موبايلي

..

وتتذكرون كلامكم يابعض الجمهور اللي يقول الهلال عقدته استاد الملك فهد وكتبتوا مواضيع وكنتو تطالبون أن
المباراة تنلعب في الملز بالله وش هالتفكير!! شوفو لعبنا باستاد الملك فهد وفزنا بثلاثه بعد.. والا لو كانت بالملز
كان ماشفنا هالجمهور

واللي يقولون بعد الهلال عقدته دور الـ 16 !! صحيح أننا من زمان ماتأهلنا لدور ربع
النهائي لكن فكرو ليش خسرنا من أم صلال ؟؟ يعني كنا في أفضل حالاتنا وخسرنا ؟..لا والله

أولها وأعظمها
وآخرها طرد كوزمين وهذي بلحالها تكفي ..كانت نكسه على النادي واللاعبين وجاء بعدها أكثر من مدرب في الفتره ..
بس الهلال إذا كان الشئ فيه ذهاب وإياب فهو قدها وقدود وتذكروا كلامي وهذا مو استهانه بالخصم كثر ماهو ثقه بفريقي الــــــــهــــــــــلال

وفرصه لكم ياجمهور تروحون لقطر وتدعمون ناديكم ..

كلامن ياصلكم ويتعداكم لاتحطون في بالكم عقده وماعقده والله أن كلامكم في المنتديات يأثر على اللاعبين

وعلى قولة المثل كثر الدق يفك اللحام .

لــــــقــــــطـــــة خـــــتــــــام

يااااخي مالنا ومالكم !!
هماكم تقولون إحنا نادي عالمي والهلال محلي .. طيب ليش تسوون كذا وتتابعون أخبار الهلال أول بأول ..
انا أتوقع أن اللي كاتب الموضوع سبق إدارة الأخبار في شبكتنا لاحظو الساعه 11:35 الله يخلف عليهم بس..
طيب ماتجي نادي عالمي مثلكم يتابع نادي محلي !! أنا أخبر أن النادي المحلي هو اللي يتابع النادي العالمي وهذا ينطبق عليكم يالمحليين

مع العلم صارت أغلب الردود على الموضوع يدعون بالتوفيق للغرافه وهزيمة الهلال .. العقل نعمه .

لكنها لاتستحق الختام ...

اللهم وفق الهلال واجعل بطولة آسيا السنه هذي من نصيبه ..اللهم آمين

ادعووولي اختبار قدرات يوم الخميس

الله يوفقني ويوفق الجميع يارب .

تحياتي

ReeM Alfala · #2 25/05/2010, 04:38 PM

.
.

الرجاء يا إداره الرفع
وشكرا ..

فديت روحي · #3 25/05/2010, 04:52 PM

يشرفنى انى اكون اول من رد عليك

وبالنسبه للغرافه فريق قوى ويمتلك لاعبين جيدين بس الزعيم اذا دخل المباراه وهو فى كامل جهازيته ولاعبينه صدقونى الفوز للزعيم

واتمنى من الاخوان عدم تكبير الموضوع وتقولون عقده مادرى شنو لايوجد عقده فى كره القدم الكره تعطى من يعطيها

وعلى فكره اكثر اللاعبين يدخلون على المنتدى الغالى واتمنى تكون مواضيع مفيده لنا ولهم ويدركون صعوبه الخصم ولكى لا يتكرر مشهد ام صلال
اعطوى الفريق القطري حقه
اتذكر العاام الماضى اكثر الاعضاء ضامنين التأهل على حساب ام صلاال

وفجأه حدث العكس واتمنى لايتكرر المشهد

والله انك تستاهل اسيا ياشبيه الريح تكفوووون كلها اربع مباريات

مسكين يامعاندالزعيم · #4 25/05/2010, 04:56 PM

اولا يعطيك الف عافيه على الموضوع
وانا معك بكل كلامك
يعني الا متى كلمه عقده وماعقده
يالربع اذا كان الهلال بيومه صدقوني ولافريق اسيوي يهزمه
وتركو عنكم كلام الاصفرين عقده وماعقده
تفائلو بالخير تجدوة
وحنا ثقتنا بالله ثم بلاعيبنا كبيره
والنهائي سعودي خالص باذن الله والكاس للزعيم

تاز الهلالي 9 · #5 25/05/2010, 04:59 PM

تسلم موضوعك اكثر من رائع ومره حلو

المهم نجيب الاسيوه علشان نسكت النفسيات

تركي الهاملي · #6 25/05/2010, 05:01 PM

مشكوووووووووووووووووره على الموضوع

زعيميه انـــــا9 · #7 25/05/2010, 05:01 PM

موضــوع رائــع خيوووو .. ويعطيك عافيــه ياربي ...

بالنسبـه للنصــر مممدري وش يحسسـون فيـه .. ؟
وربي يوفق الهـلآلآلآل ياررررررررربي ونفــوز ع’ الغـرآآفه ...

ReeM Alfala · #8 25/05/2010, 05:09 PM

.......................
.

تسلمووون

مروركم الأروع

بنت أنا والله بنت

هلاك · #9 25/05/2010, 05:04 PM

مشكور اخوي

وانصراويه ياحليلهم منزلين الاخبار في منتداهم

(( بالعكس يا زعماء هذي الاخلاق الرياضيه ومفروض نشكرهم على الروح الرياضيه والابتعاد عن التعصب))

alfrido15 · #10 25/05/2010, 05:06 PM

إقتباس


	لــــــقــــــطـــــة خـــــتــــــام يااااخي مالنا ومالكم !! هماكم تقولون إحنا نادي عالمي والهلال محلي .. طيب ليش تسوون كذا وتتابعون أخبار الهلال أول بأول .. انا أتوقع أن اللي كاتب الموضوع سبق إدارة الأخبار في شبكتنا لاحظو الساعه 11:35 الله يخلف عليهم بس.. طيب ماتجي نادي عالمي مثلكم يتابع نادي محلي !! أنا أخبر أن النادي المحلي هو اللي يتابع النادي العالمي وهذا ينطبق عليكم يالمحليين مع العلم صارت أغلب الردود على الموضوع يدعون بالتوفيق للغرافه وهزيمة الهلال .. العقل نعمه . لكنها لاتستحق الختام ...

ياخي هما الهلال نادي سعودي عالمي

وبعدين اسفرت القرعه عن المواجهات التالية

اتوقع انهم حاطينها بنفس الترتيب

يعني تكلمو عن القرعه بشكل عام اما عن الوقت فالقرعه بدت 9ز30

ادري بيجيك واحد داعس الطبلون 300 ويقول اطلع برا يالمندس لاعاد تطب منتدانا

لكن الرجال حط خبر اسيوي

مانبي نصير مثلهم

شطحه : على طاري النصر مستني من رشيد سليم الكريكتير الخاص بتتويجهم لقب نادي القرن بالتصويت

يأنه بيطلع توحفـــــــه هههههههههههههههههههههه

بإنتظارك ياسليم

ReeM Alfala · #11 25/05/2010, 05:12 PM

إقتباس

الرسالة الأصلية كتبت بواسطة alfrido15


	ياخي هما الهلال نادي سعودي عالمي وبعدين اسفرت القرعه عن المواجهات التالية اتوقع انهم حاطينها بنفس الترتيب يعني تكلمو عن القرعه بشكل عام اما عن الوقت فالقرعه بدت 9ز30 ادري بيجيك واحد داعس الطبلون 300 ويقول اطلع برا يالمندس لاعاد تطب منتدانا لكن الرجال حط خبر اسيوي مانبي نصير مثلهم شطحه : على طاري النصر مستني من رشيد سليم الكريكتير الخاص بتتيجهم نادي القرن يأنه بيطلع توحفـــــــه هههههههههههههههههههههه بإنتظارك ياسليم

بس الشئ اللي يقهر صارت أغلب الردود يدعون على الهلال وسب ومن هالأشياء

مخ هلالي · #12 25/05/2010, 05:10 PM

الغرافه محترفينه جدا مميزين وفريق قوي,واللي هونها عندي انه مباراتنا في قطر جمهور الهلال اكثر

هلالي موت ؟؟؟ · #13 25/05/2010, 05:10 PM

مشكور اخوي

بس والله نكتة ذولي النصراوية

اي واحد قلقان يدخل موقعهم ويشوف المواضيع خخخخخخخخ

عاشق النمر والذئب · #14 25/05/2010, 05:18 PM

ما شاء الله عليك طالب بالمدرسة واسلوبك بالتعبير جدا رائع

لاحظت الجيل الجديد ازين من الجيل السابق بمسألة التعبير .

الف شكر لموضوعك .

ReeM Alfala · #15 25/05/2010, 05:21 PM

إقتباس

الرسالة الأصلية كتبت بواسطة عاشق النمر والذئب


	ما شاء الله عليك طالب بالمدرسة واسلوبك بالتعبير جدا رائع لاحظت الجيل الجديد ازين من الجيل السابق بمسألة التعبير . الف شكر لموضوعك .

شكرا لك

بنت أنا والله بنت

....................