نادي الهلال السعودي - شبكة الزعيم - الموقع الرسمي

http://www.qnadel.net/up/uploads/ima...3eabcedd51.gif

أقر .. وأعلن أنا المواطن السعودي الموقع أدناه والمدعو - شارلي شابلن - أعلن وأنا بكامل أهليتي المعتبرة شرعاً .. أعلن وأنا بكامل قواي العقلية .. أعلن أني مسؤول مسؤولية كاملة عن تصرفاتي , أعلن أني قررت تطليق النصر طلاقاً بائناً بينونة كبرى لا رجعة فيها – والله لا يقوله - , خلاص يا زين من حبكم هوَّنا , :d

أنا .. يا سادة يا كرام , حكايتي حكاية ,و قصتي قصة , خذوا منها العبرة , والقصه وما فيها إنو - قدر الله علي وشجعت النصر - كنت وقتها بزر مدري ش السالفه , بس سمعت الناس واللي حولي مالهم سالفة إلا ماجد عبدالله وأهدافه الخورافية , قلت يا ولد ما بِدَّ هاشي , وللأسف الشديد إنو سواااها قلبي على قولة أصالة نصري .. فـ اللي حصل إنو ما شجعت النصر وبس .. بل حبيته , ومن هنا بدأت المعاناة , ومن هنا بدأت دوامة المشاكل اللي لا ولم تنتهي , :cry:

واللي .. قاهرني إنو أنا شجعت النصر من هون وأخينا في الله ماجد عبدالله قرر الإعتزال من هونيك , قلت بيني وبين نفسي , إيه عادي أصلن النصر بطل, واكيد إنو يبي يجيب بطولات على الأقل بالسنة حِسنه – يعني بالسنة مرة لازم يجيب بطولة - والأحلام للاسف طلعت كوابيس مزعجه , وآخر هذه الاحلام موقعة الوصل فرغم أن النصر يلعب بـ 3 فرص إلا أنه لم يستطع الوصول للنهائي >> عاد هذا اسمه فريق ؟

طبعاً ..أبو عبدالله قرر الإعتزال من هنا والنصر دخل في سنوات الضياع >> هذي تصلح عنوان فلم .. المهم خلونا نرجع لسالفتنا , يعني من بعد الزمن الجميل وجيل العمالقة محيسن جمعان ويوسف خميس وفهد الهريفي والكبير طبعاً ماجد عبدالله , من بعد هالنجوم صار النصر نادي – يالله حسن الختام – يعني بالعربي الفصيح اللاعب اللي وده يتقاعد يجي عند النصر عشان يقضي بقية حياته الكروية , من بعد ما كان النصر - عالمي - صار النصر الآن سكراب وتشليح ولاعيبين كديش > ومنكم من يرد إلى أرذل العمر ,

حتى .. أني قرأت في تاريخ البداية والنهاية لابن كثير قال - رحمه الله - (.. ودخلت السنة الحادية والثلاثون بعد الأربعمائة والألف من هجرة المصطفى عليه السلام , وفيها جرت من الأحداث العظام أنه , أصبح الناس إذا أرادوا تحفيزاً لإبنائهم من أجل النجاح بالمدرسة , تجد الأب يمني إبنه ويحفزه بالمكفأة قائلاً له : – يا وليدي إذا نجحت تراي أبجيبلك النصر تلعب بووووه – ) وقرأت في كتاب - أخبار الحمقى والمغفلين - لابن الجوزي أنَّ رجلاً حضرته الوفاة وعندما علم بدنو أجله جمع أبنائه وقال موصياً لهم ( يا عيالي وانا ابوكم لا تصيرون غشيميين مثلي ويضيع عمركم ع الضغط والسكر لا تشجعون النصر اذا صرتوا ملزميين ومشجعيين مشجعين كوره عندكم الهلال شجعوه ع الاقل تنبسطون بقية حياتكم ) :yes:

وربي .. إن صديقيني اللي العب معهم كورة كل اثنين ,إنهم أحسن من لاعيبة النصر هاللي مسوين زحمة والشارع فاضي , من بعد ما كان النصر في زمن أبو خالد – عبدالرحمن بن سعود – فارض هيبته على الكل , صار النصر الان ملطشه للي يسوى واللي ما يسوى , عاد.. أنا بعدها قلت يا ولد يا شارلي ش لك بعوار الراس والصداع وألم المفاصل وضغط الدم والتهاب اللوزتين , جلست بغرفتي ثلاثة أيام ,إعتزلت الناس وصرت ما أقابل أحد .. أبد أبد , بعده خرجت بفكرة جوهنمية , و قلت .. ايه عادي خلن اشجع فريق ثاني غير النصر ,

لكن .. وربي ما دريت ان الحب أوله – دلع وأخره ولع – ولا أدري منو المجنون اللي قال – إنه لا يوجد حب ثاني حبك الأول هو حبك الأخير – يخرب بيتوو كلامو صحيح ؟ معقوله النصر يبي يظل مستعمرني ابد الابدين , عن جد عانيت كثير من حب النصر وتحملت تعليق الزملاء , وصار الواحد إذا إسألن وقال – يا اللخو أنت ش تشجع ؟ - وربي أستحي أرد عليه من الفشيلة >> خصوصاً بعد خمسة الهلال ؟

يعني .. بالله عليكم وش تبون اقوله ؟ ترضونها علي وأنا ولد حمايل , أقوله إني اشجع فريق جالس يلعب 14 سنة ما حقق ولا بطولة كبرى عليه العلم , يعني بالله عليكم تبون أقوله إني أشجع فريق يجلس 9 سنوات متواصلة ما يقدر يفوز على الهلال , يعني الأندية الثانية البطولات عندهم تعني حصد الذهب وإعتلا منصات التتويج والنصرواييين بطولتهم الكبرى إنهم يفوزون على الهلال >> الحمدلله والشكر بس ,

بعده .. رحت وراجعت دكتور نفساني مصري > قالي الدكتور " وااد يا شارلي حالتك متنيله بستين نيله " >> قلت أفا ليه يا دكتور ؟ >" قالي أبدن يا بني إنتا حالتك مستعصية ع العلاج >> قلت يعني وشولن واللي يرحم والديك > قالي إنتا فاسد المزاج ليس لك علاج >> قلت وشهو ؟ > قال " آآآه.. وجزء كبير من مشكلتك مش بيدك وإنتا لزمن ولا بد ولعل ويا ريت إنك تبطَّل عملتك المهببَّة دي ؟ >" قلت وش مهببتووه تراي منب أتتن ولا أحشش قسم ؟>> قالي الدكتور يا رييت دا ح يكون ارحم ؟

قلت .. يا دكتور تراك وحشتن قسمن لا أعلم أمي عليك > إخلص علي علمن وش بي ؟ >>قالي الدكتور برضك دا اسمه كلام يا راجل ؟ فيه واحد طول بعرض زيك ابن ناس اكابر يشجع البتاع دا ؟> قلت يعنبوا بليسك وشو بتاعوووه بعد ؟ >> عجل علمن لا يصير هالبتاع يس سرطان ولا شيء ؟> قالي الدكتور " آآآه بس منك > دا ح يكون ارحم من الهباب اللي انتا بتعملوا بـ نفسك >> قلت وجع يا دكتور وش هبابوه واللي يرحم والديك عجل علمن وش بي ؟>> تراك هبلت بي ؟ :ranting:

قالي .. اسمع يا واااد يا شارلي البتاع دا هو اللي اسمه النصر > لزمن ولابد .. اذا كنت عايز تعيش حياتك تمام إنك تبطلو ..؟>> قلتله أبطلووووو ؟ يا دكتور طيب انا احبووه وش السواااة يعني > قالي ما تخفشيء المسألة دي حلها البدوي قبل الالاف السنيين - وداوها بالتي كانت هي الداءُ – > قلت شلوووون يعني؟ فهمن تراي غبي ..> قام وصرفلي روشتة علاج مكتوب فيها عليك انك تشجع فريق الهلال اليوم قبل بكرا اذا انتا عاوز تعيش من دون وجع قلب وهم ..مشيت ع كلامه ومن يومه وصحتي عال العال .:smilie47: